1991-yilning 15-fevralida respublikada qabul qilingan «Jamoat birlashmalari to‘g‘risida»gi Qonun haqiqiy mustaqillikka erishish, respublikada ijtimoiy-siyosiy vaziyatni barqarorlashtirish yo‘lida jamiyatni jipslashtirishga umuman ijobiy ta’sir ko‘rsatmoqda.

Shu bilan birga keyingi paytda ayrim jamoat birlashmalarini ana shu birlashmalarining ro‘yxatdan o‘tkazilgan ustavlarida ko‘zda tutilmagan mablag‘lar hisobidan qonunga xilof ravishda mablag‘ bilan ta’minlash hollari qayd etilmoqda.

Yuqorida ko‘rsatilgan qonunga amal qilgan holda va unda ko‘zda tutilgan qoidalarni so‘zsiz bajarish maqsadlarida O‘zbekiston Respublikasi Oliy Kengashining Rayosati qaror qiladi:

1. O‘zbekiston Respublikasi Adliya vazirligi «O‘zbekiston Respublikasida jamoat birlashmalari to‘g‘risida»gi Qonunning 1-moddasida ko‘zda tutilgan jamoat birlashmalarining ustavlarini ular o‘z faoliyatlarini, shu jumladan noshirlik faoliyatlarini, matbaa nashrlarini mablag‘ bilan ta’minlash manbaalari xususidagi dalolatnoma (deklaratsiya) taqdim etganlaridan keyingina ro‘yxatdan o‘tkazsin.

2. O‘zbekiston Respublikasi Moliya vazirligi, Prokuraturasi, Davlat soliq bosh boshqarmasi yuqorida qayd etib o‘tilgan Qonunga muvofiq tarzda ro‘yxatdan o‘tgan jamoat birlashmalari faoliyatining mablag‘ bilan ta’minlanishining qonunda ko‘zda tutilgan tartibi va manbalari to‘g‘risidagi qoidalariga qat’iy rioya etsin.

Moliya intizomi buzilganligi hollari aniqlansa ularga nisbatan qonunda belgilangan choralar, hatto materiallarni sud idoralariga o‘tkazish choralari qo‘llansin.

3. Belgilab qo‘yilsinki, siyosiy maqsadlarni ko‘zlovchi siyosiy partiyalar va ommaviy harakatlar diniy tashkilotlardan, shuningdek xorijiy davlatlar, tashkilot va fuqarolardan tushayotgan mablag‘lar hisobidan noshirlik faoliyatini amalga oshirishga hamda matbaa nashrini pul bilan ta’minlashga haqli emaslar.

4. Qonunchilik, qonuniylik va huquq-tartibot masalalari qo‘mitasi jamoat birlashmalari to‘g‘risidagi Qonunga tegishli qo‘shimchalar va o‘zgartishlar kiritish xususida takliflar tayyorlasin va uni O‘zbekiston Respublikasi Oliy Kengashining navbatdagi sessiyasiga kiritsin.