Oʻzbekiston Respublikasi Hukumati va Hindiston Respublikasi Hukumati (bundan keyin “Tomonlar” deb yuritiladi),

Oʻzbekiston Respublikasi Hukumati va Hindiston Respublikasi Hukumati oʻrtasida 1992-yil 12-oktabrda tuzilgan Savdo, iqtisodiy va ilmiy hamkorlik boʻyicha Hukumatlararo Komissiya toʻgʻrisida Bitimini eʼtiborga olgan holda;

Oʻzbekiston Respublikasi Hukumati va Hindiston Respublikasi oʻrtasida fan va texnika sohasida hamkorlik qilish toʻgʻrisida 1993-yil 29-iyulda imzolangan Bitimga muvofiq;

fan va texnika sohasidagi hamkorlikni bunday buyon ham rivojlantirishda har ikki tomonning oʻzaro manfaatdorligini hisobga olgan holda;

quyidagilar haqida kelishib oldilar:

Tomonlar ushbu bilan ilmiy-texnik hamkorlikka koʻmaklashish boʻyicha Oʻzbekiston-Hindiston Markazini (bundan keyin “Markaz” deb yuritiladi) taʼsis etadilar.

Markaz Toshkent shahrida joylashadi va yuridik shaxs maqomi va huquqiga ega boʻladi. Oʻzbekiston Tomoni Markaz infrastrukturasi, shu jumladan ish uchun zarur binolar, xizmat koʻrsatish, xodimlar mehnatiga haq toʻlash uchun zarur mablagʻlarni ajratadi.

Ushbu Bitim yuzasidan majburiyatlarni amalga oshirish Oʻzbekiston Respublikasi fan va texnika Davlat komiteti va Hindiston Respublikasi Hukumati fan va texnologiya Departamentiga topshiriladi.

Markazning vazifalari quyidagilardan iborat:

a) Oʻzbekiston va Hindiston oʻrtasida ilmiy-texnik hamkorlikka koʻmaklashish uchun markaziy agentlik vazifasini bajarish;

b) Hamkorlikdagi oʻzbek-hind ilmiy-texnik loyihalarini amalga oshirish maqsadida har ikki mamlakatning olimlari va ilmiy tashkilotlarini aniqlash yoʻli bilan hamkorlikni rivojlantirish;

v) Kelishuv yoʻli bilan tanlangan tadqiqot sohalarida oʻzaro foydali asosda Oʻzbekiston va Hindiston oʻrtasida olimlar bilan almashinishni tashkil etish;

g) Ilmiy va muhandis-texnik xodimlar tayyorlash va ularning malakalarini oshirishda koʻmaklashish;

d) Oʻzaro manfaatli seminarlar, amaliy uchrashuvlar va koʻrgazmalar tashkil etish;

e) Oʻzbekiston va Hindiston olimlari, ilmiy-texnika tashkilotlari, shu jumladan universitetlari boʻyicha, shuningdek mavjud texnologiyalar boʻyicha maʼlumotlar bazasini taʼminlash va yaratish;

j) Ilgʻor axborot texnologiyasi sistemalaridan foydalanib, ilmiy-texnik axborot bilan almashinishga koʻmaklashish;

z) Har ikki tomon uchun manfaatli qoʻshma korxonalar tashkil etish uchun ilmiy-texnika sohasidagi faoliyatdan foydalanishga intilish.

Markaz quyidagilarga ega:

a) Markazning umumiy faoliyatini amalga oshirish uchun tuzilgan Rahbar Organ, u oʻz ichiga Oʻzbekiston va Hindiston tomonidan hukumat organlarining uch nafardan lavozimli shaxsini oladi. Oʻzbekiston Respublikasi fan va texnika Davlat komiteti Raisi va Hindiston hukumatining fan va texnologiya Departamenti Kotibi Rahbar Organning Hamraislari boʻladilar.

Rahbar Organ ustuvor yunalishlarni ishlab chiqish va Organ faoliyatiga rahbarlik qilish, shuningdek Markaz ishlariga doir boshqa masalalarni hal qilish uchun yilda bir marta yigʻiladi.

b) Ilmiy Kengash, u ilmiy-texnik hamkorlikning asosiy sohalarini belgilash, ishga doir uchrashuvlar, seminarlar va hokazoni tashkil etish hamda Oʻebekistonning iqtisodiy rivojlanishiga koʻmaklashish maqsadida Markaz tomonidan qoʻllab-quvvatlash uchun takliflarni tanlab olish uchun Oʻzbekiston va Hindistondan uch nafar olimdan iborat tarkibda tuziladi:

Ilmiy Kengash, shuningdek muayyan vaqt oraligʻida loyiha va dasturlarning bajarilishini baholaydi va tegishli choralarni koʻradi.

Ilmiy Kengash aʼzolari tabiiy va ijtimoiy fanlar, texnika fanlarining vakillaridan iborat boʻladi. Ilmiy Kengashning har bir uchrashuvida qabul qiluvchi Tomon vakili raislik qiladi. Ilmiy Kengash bir yilda ikki marta, navbati bilan Oʻzbekiston va Hindistonda yigʻiladi.

Ilmiy Kengash tomonidan tavsiya etilgan loyihalar Rahbar Organning har ikkala Hamraisi tomonidan koʻrib chiqiladi va tasdiqlanadi, soʻngra Rahbar Organga taqdim etiladi.

v) Rahbar Organ va Ilmiy Kengash aʼzolari oʻz vazifalarini jamoatchilik asosida bajaradilar.

Har ikki Tomon hamkorlikdagi ilmiy-texnik loyihalarning xarajatlarini teng koʻtaradi. Yoʻllovchi Tomon xizmat safariga yuborilayotgan olimlarning qabul qiluvchi Tomon poytaxtiga yetib borish va undan qaytish xarajatlarini qoplaydi, qabul qiluvchi Tomon esa rasmiy dastur asosidagi kelishuvga muvofiq, xizmat safariga yuborilgan olimning mamlakat ichkarisidagi xarajatlarini, shu jumladan aeroportdan kelish va borish xarajatlarini, yulovchilardan olinadigan soliqlarni (soliq toʻlanadigan hollarda) toʻlaydi va yashash, ovqatlanish, transport va mayda sarfiyotlar uchun sutkalik pul toʻlaydi. Sutkalik toʻlanadigan pul universitet professori yoki qabul qiluvchi Tomondagi shunga teng lavozim oylik maoshi miqdorida har ikki Tomon oʻrtasida oʻzaro kelishuv asosida oʻrnatilgan darajada belgilanadi.

Markaz, imkoniyat boricha, Mustaqil Davlatlar Hamdoʻstligi mamlakatlariga Toshkentdan tranzit bilan oʻtayotgan hind olimlariga, shuningdek bu mamlakatlardan Hindistonga tranzit yoʻli bilan Toshkent orqali oʻtadigan olimlarga yordam koʻrsatadi.

Ushbu protokol Dehli shahrida, 1994-yil 5-yanvarda, oʻzbek, hind va ingliz tillarida, ikki nusxada tuzildi, barcha matnlar bir xil va teng kuchga ega.