Oʻzbekiston Respublikasi Hukumati va Italiya Respublikasi Hukumati, bundan keyin “Tomonlar” deb ataluvchilar,

ikki mamlakat va ularning xalqlari oʻrtasidagi doʻstona aloqalarni mustahkamlash va rivojlantirish maqsadida,

taʼlim, madaniyat, fan va texnika sohasidagi almashish va hamkorlik ikki xalq bir-birini yaxshiroq oʻrganishiga va oʻzaro anglashuvlariga koʻmaklashishiga ishonch hosil qilib,

quyidagilar haqida kelishib oldilar:

Madaniy va ilmiy aloqalarni jadallashtirish jarayoni doirasida Tomonlar quyidagi ustuvor sohalarda hamkorlikni rivojlantirish toʻgʻrisida kelishadilar: taʼlim va tildan dars berish, universitetlararo hamkorlik, madaniy tadbirlarda ishtirok etish va artistlar bilan almashish, arxeologiya sohasida hamkorlik qilish.

Taʼlim va tildan dars berish sohasida Tomonlar:

xususan, kurslar, lektoratlar va kafedralar tashkil etish yoʻli bilan tegishli til va adabiyotlarni oʻrganishga;

ikki mamlakatning taʼlim sohasida mashgʻul boʻlgan shaxslari, muassasalari va tashkilotlari oʻrtasidagi bevosita hamkorlikka va almashishga;

xususan, ekspertlar bilan almashish orqali hamkorlik qilishga va metodika, oʻquv materiallari va dasturlari bilan almashishga koʻmaklashadilar.

Universitetlararo hamkorlik sohasida Tomonlar oʻqituvchilar va tadqiqotchilar bilan almashish boʻyicha, oʻzaro qiziqish uygʻotadigan mavzularni birgalikda tadqiq qilish boʻyicha seminar va simpoziumlar tashkil etish boʻyicha shartnomalar tuzishga koʻmaklashadilar.

Tomonlar ushbu Bitimda belgilangan maqsadlarga erishishni taʼminlash niyatida amaldagi universitetlararo shartnomalar asosida va shuningdek kelajakda tuziladigan shartnomalar asosida axborot bilan almashib boradilar.

Madaniy tadbirlarda ishtirok etish va artistlar bilan almashish xususida Tomonlar artistlar bilan almashish va spektakl, kino-festival, kitob yarmarkalari, simpoziumlarda va boshqa shunga oʻxshagan tadbirlarda ishtirok etish yoʻli bilan adabiyot, kino, musiqa, raqs, teatr sohasidagi hamkorlikni rivojlantiradilar.

Tomonlar vaqti-vaqti bilan ikkala mamlakatning badiiy va madaniy merosi bilan tanishtiradigan yuqori darajadagi koʻrgazmalar uyushtirib turadilar.

Tomonlar arxeologiya sohasidagi hamkorlikni axborot va tajriba almashish, simpoziumlar, seminarlar va birgalikdagi tadqiqotlarni tashkil etish yoʻli bilan amalga oshiradilar. Har bir Tomon oʻzining hududida ishlayotgan boshqa mamlakat arxeologik ekspeditsiyalari faoliyatiga koʻmaklashadi.

Ikki Tomonning har biri axborot, tajriba almashish, birgalikda nashr etish va ekspertlar tashriflari vositasida arxeologik, badiiy va madaniy merosni saqlash, muhofaza qilish, tegishli munosabatni qoʻllab-quvvatlash sohasida ekspertlar va vakolatli organlar oʻrtasidagi hamkorlikni ragʻbatlantiradilar.

Universitet va universitetdan keyingi darajalarda oʻqish va ilmiy tadqiqotlar olib borish uchun Tomonlar boshqa mamlakat oʻquv yurtlari talabalari va bitiruvchilariga stipendiyalar ajratadilar, bunda yuqorida koʻrsatilgan ustuvor yoʻnalishlarga alohida eʼtibor beradilar.

Tomonlar ikki mamlakatning ilmiy institutlari, tadqiqot markazlari va universitetlari oʻrtasidagi ilmiy-texnikaviy hamkorlikka koʻmaklashadilar.

Shu maqsadda ular:

ilmiy-texnikaviy hujjatlar bilan almashishni;

oʻqish-oʻqitishga va tajriba almashishga koʻmaklashish maqsadida ekspert va mutaxassislarning oʻzaro tashriflarini;

ilmiy-texnikaviy konferensiya va seminarlar tashkil etishni;

kelishilgan sohalarda birgalikda tadqiqotlar oʻtkazish, oʻrganish va rejalar tuzishni ragʻbatlantiradilar.

Tomonlarning har biri oʻz hududida boshqa mamlakatning madaniy markazlari, madaniy assotsiatsiyalari va oʻquv yurtlari kabi madaniy muassasalarining tuzilishiga va ishlashiga koʻmaklashadilar.

Tomonlar sanʼat asarlari va madaniy boyliklarni gʻayriqonuniy olib kirish, olib chiqish va olib oʻtishga qarshi kurashda hamkorlik qiladilar.

Tomonlar quyidagi sohalarda axborot, materiallar va ekspertlar bilan almashish vositasida ham tegishli tashkilotlar oʻrtasidagi hamkorlikka koʻmaklashadilar:

matbuot, radio va televideniye;

sport;

yoshlar;

arxivlar;

kutubxonalar;

muzeylar.

Ushbu Bitimni amalga oshirish maqsadida Tomonlar Qoʻshma komissiya tuzishga qaror qildilar, uning vazifasi — ikki mamlakat oʻrtasidagi madaniy va ilmiy hamkorlikning rivojlanishiga baho berish va shuningdek Bitimni bajarish boʻyicha koʻp yillik dasturlar tuzish. Bu Komissiya navbati bilan ikki mamlakat poytaxtlarida yigʻilib turadi.

Ushbu Bitim Tomonlarning tegishli milliy protseduralariga muvofiq ratifikatsiya qilinadi va ratifikatsiya qilingani toʻgʻrisidagi ikkala xabarnomaning ikkinchisi olingan sanadan 60 kun oʻtgandan keyin kuchga kiradi.

Ushbu Bitim cheklanmagan vaqt davomida amal qiladi. Har bir Tomon diplomatik yoʻllar bilan istagan paytda undan voz kechishi mumkin. Bunday voz kechish boshqa Tomonga bu toʻgʻrida xabar qilingandan olti oy oʻtgandan keyin kuchga kiradi va Bitim harakat qilib turgan davrda muvofiqlashtirilgan amaldagi dasturlarning bajarilishiga taʼsir qilmaydi, Tomonlar boshqacha qaror qabul qilgan hol bundan mustasno.

Buning tasdigʻi uchun, tubanda qoʻl qoʻyuvchilar, tegishli hukumatlarning keraklicha vakolat olgan vakillari, ushbu Bitimni imzoladilar.

Toshkent shahrida 1997-yil 3-mayda ikki asl nusxada, har biri oʻzbek va italyan tillarida tuzildi, ikkala matn ham bir xil kuchga ega.