Oʻzbekiston Respublikasi Tabiatni muhofaza qilish davlat qoʻmitasi va Rossiya Federatsiyasi Tabiiy resurslar va ekologiya vazirligi, keyingi oʻrinlarda “Tomonlar” deb ataluvchilar,

davlat suvereniteti prinsiplariga asoslanib,

barqaror rivojlanishga boʻlgan ehtiyojni anglagan holda,

Oʻzbekiston Respublikasi va Rossiya Federatsiyasi oʻrtasidagi doʻstona munosabatlar va strategik hamkorlikni yuqori baholab,

atrof-muhitni muhofaza qilish va tabiiy resurslardan barqaror foydalanish sohasida hamkorlikni amalga oshirish istagida,

atrof-muhitni muhofaza qilishning koʻpgina masalalari oʻzaro tushunish va hamkorlik asosida hal etilishi mumkinligini anglagan holda,

atrof-muhitni muhofaza qilish sohasidagi hamkorlik ikki davlat oʻrtasidagi munosabatlarni yanada rivojlantirishga koʻmaklashishiga ishonch bildirib,

BMTning atrof-muhit va rivojlanish boʻyicha Konferensiyasi (Rio-de-Jaynero, 1992-yil), shuningdek barqaror rivojlanish boʻyicha yuqori darajadagi Uchrashuvda (Yoxannesburg, 2002-yil) qabul qilingan prinsiplar va tavsiyalarga tayangan holda,

quyidagilar haqida kelishib oldilar:

Tomonlar ikki davlat manfaatlari yoʻlida oʻz davlatlari qonunchiligi hamda mazkur Bitimga muvofiq, global va mintaqaviy atrof-muhit muammolarini birgalikda hal qilish maqsadida atrof-muhitni muhofaza qilish sohasida hamkorlikni amalga oshiradilar.

Tomonlar atrof-muhit muhofazasi sohasida quyidagi yoʻnalishlarda hamkorlik qiladilar:

a) atrof-muhitni muhofaza qilish va tabiatdan oqilona foydalanish, atrof-muhitni muhofaza qilishning iqtisodiy vositalari hamda uni iqtisodiy tartibga solish sohalarida davlat nazoratini takomillashtirish;

b) atmosfera havosi, suv resurslarini ifloslanishdan muhofaza qilish, shu jumladan transchegaraviy doirada, shuningdek resurslarni tejashga qaratilgan ekologik toza, samarali texnologiyalarni joriy etish;

v) suvli-botqoq hududlarni, birinchi navbatda, 1971-yil 2-fevraldagi Suvda suzuvchi qushlarning asosiy yashash manzili boʻlgan xalqaro ahamiyatga ega suvli-botqoq yerlar toʻgʻrisidagi Konvensiyaga (Ramsar konvensiyasi) muvofiq xalqaro ahamiyatga ega boʻlgan suvli-botqoq hududlarni asrash va ulardan oqilona foydalanish;

g) ekologik falokat hududlarida atrof-muhit holatini yaxshilash boʻyicha global va mintaqaviy muammolarni oʻrganish va hal etish;

d) hayvonlarning kamyob va yoʻqolib ketish xavfi ostida boʻlgan turlarining koʻpayishini oʻrganish, saqlab qolish va tiklash;

e) atrof-muhit ifloslanishi ustidan nazorat qilish, shu jumladan chiqindilar (radioaktiv chiqindilar bundan mustasno) bilan muomala qilish sohasida ekologik monitoring tizimlarini rivojlantirish va texnologiyalar bilan almashish;

j) alohida muhofaza etiladigan tabiiy hududlar (muhofaza etiladigan tabiiy hududlar) tizimlarini rivojlantirish, milliy bogʻlar va boshqa alohida muhofaza etiladigan tabiiy hududlar (muhofaza etiladigan tabiiy hududlar) faoliyatini boshqarish;

z) ekologik taʼlim-tarbiya;

i) atrof-muhitni muhofaza qilish va tabiiy resurslardan foydalanish sohasida qonunchilikni qoʻllash, ekologik nazoratni tashkil etish va amalga oshirishda tajriba almashish, kadrlar tayyorlash;

k) atrof-muhitni muhofaza qilish sohasida tajriba, davlat siri boʻlmagan ilmiy-texnik maʼlumot va yangi texnologiyalar bilan almashish.

Hamkorlik mazkur Bitimni amalga oshirish jarayonida kelishilgan boshqa yoʻnalishlarda ham amalga oshirilishi mumkin.

Atrof-muhitni muhofaza qilish sohasidagi hamkorlik Tomonlarning oʻzaro kelishuviga koʻra quyidagi shakllarda amalga oshiriladi:

a) taʼlimga oid, ilmiy va amaliy maqsadlarda olimlar, mutaxassislar va delegatsiyalar bilan almashish;

b) mazkur Bitim Tomonlarining vakillari ishtirokida konferensiyalar, simpoziumlar, ekspertlar muhokamalarini tashkil etish;

v) atrof-muhitni muhofaza qilish va tabiatdan oqilona foydalanish sohasida qoʻshma dastur va loyihalarni amalga oshirish;

g) atrof-muhitni muhofaza qilish va tabiatdan foydalanish sohasida (tabiiy muhitning barcha tarkibi boʻyicha), shu jumladan atrof-muhitni muhofaza qilish sohasidagi meʼyoriy hujjatlar boʻyicha maʼlumot va tajriba almashish.

Tomonlar atrof-muhitni muhofaza qilish sohasidagi hamkorlikning boshqa shakllari haqida ham kelishib olishlari mumkin.

Mazkur Bitim qoidalarini amalga oshirish uchun Tomonlar hamda Oʻzbekiston Respublikasi va Rossiya Federatsiyasining boshqa manfaatdor idoralari vakillaridan iborat boʻlgan Ishchi guruh tuziladi.

Ishchi guruh yigʻilishlari yiliga kamida bir marotaba navbati bilan Oʻzbekiston Respublikasi va Rossiya Federatsiyasida oʻtkaziladi.

Ishchi guruhning vazifalari quyidagilardan iborat:

a) mazkur Bitim va muayyan loyihalar boʻyicha harakatlar rejasini amalga oshirish yuzasidan ikki yillik dastur va/yoki ish rejalarini tuzish hamda kelishish;

b) loyihaviy takliflarni koʻrib chiqish;

v) Mazkur Bitim doirasida Tomonlar amalga oshiradigan dastur va/yoki ish rejalari, shuningdek hamkorlik loyihalarining bajarilish jarayonini kuzatib borish.

Tomonlar mazkur Bitim doirasida hamkorlikni muvofiqlashtirish va amalga oshirish uchun masʼul boʻlgan shaxslar toʻgʻrisida ushbu Bitim imzolangan kundan boshlab 30 kun mobaynida bir-birlarini xabardor qiladilar.

Tegishli masʼul shaxslar oʻzgargan hollarda Tomonlar mazkur oʻzgarishlar va yangi masʼul shaxslar toʻgʻrisida bir-birlarini 30 kun mobaynida xabardor qiladilar.

Mazkur Bitimni amalga oshirish jarayonida olingan hamkorlik natijalari uchinchi davlatlarga, ularning yuridik yoki jismoniy shaxslariga faqatgina Tomonlarning oldindan berilgan yozma roziliklari asosida taqdim etilishi mumkin.

Oʻzbekiston Respublikasi va Rossiya Federatsiyasi davlat siri boʻlgan maʼlumotlar mazkur Bitim doirasida taqdim etilmaydi.

Basharti har bir alohida holatda boshqa tartib kelishilmagan boʻlsa, har bir Tomon mazkur Bitimni amalga oshirishda yuzaga keladigan xarajatlarni mustaqil ravishda oʻz zimmasiga oladi.

Mazkur Bitimni qoʻllash va talqin qilishda Tomonlar oʻrtasida yuzaga kelishi mumkin boʻlgan nizolar maslahatlashuv va muzokara oʻtkazish yoʻli bilan hal etiladi.

Mazkur Bitim qoidalari Oʻzbekiston Respublikasi va Rossiya Federatsiyasining ular ishtirokchisi boʻlgan boshqa xalqaro shartnomalardan kelib chiqadigan huquq va majburiyatlariga daxl qilmaydi.

Mazkur Bitimga Tomonlarning kelishuviga asosan oʻzgartish va qoʻshimchalar kiritilishi mumkin.

Mazkur Bitim imzolangan sanadan boshlab kuchga kiradi va besh yil mobaynida amal qiladi hamda Tomonlardan biri dastlabki yoki navbatdagi besh yillik muddatning tugashidan kamida olti oy oldin rasmiy diplomatik kanallar orqali Bitimning amal qilishini toʻxtatish niyati toʻgʻrisida boshqa Tomonni xabardor qilmasa, oʻz-oʻzidan keyingi besh yillik muddatlarga uzayaveradi.

Mazkur Bitim amal qilishining tugatilishi Bitim doirasida amalga oshirilayotgan hamda uning tugatilishiga qadar yakunlanmay qolgan loyiha va dasturlarni amalga oshirishning yakunlanishiga olib kelmaydi.

Moskva shahrida 2013-yil 11-aprelda har biri ikki nusxada boʻlgan oʻzbek va rus tillarida tuzildi. Mazkur Bitim qoidalarini talqin qilishda kelishmovchilik yuzaga kelsa, Tomonlar rus tilidagi matnga tayanadilar.