Oʻzbekiston Respublikasi Konstitutsiyasining 105-moddasiga hamda “Fuqarolarning oʻzini oʻzi boshqarish organlari toʻgʻrisida”gi Qonunning 1-moddasiga muvofiq, 1998-yil noyabr—dekabr oylarida fuqarolar oʻzini oʻzi boshqarish organlari raislarining (oqsoqollarining) va ular maslahatchilarining vakolat muddati tugashi munosabati bilan Oʻzbekiston Respublikasi Oliy Majlisi Kengashi qaror qiladi:

1. Qoraqalpogʻiston Respublikasi Joʻqorgʻi Kengesiga, viloyatlar va Toshkent shahri hokimlariga 1998-yil noyabr—dekabr oylarida fuqarolar yigʻinlarining raislari (oqsoqollari) hamda ularning maslahatchilari saylovini oʻtkazishni tashkil etish, shuningdek davlat hokimiyati organlarining ayrim vakolatlarini fuqarolar oʻzini oʻzi boshqarish organlariga asta-sekin oʻtkaza borish toʻgʻrisidagi konsepsiyadan kelib chiqib, faollar, manfaatdor mansabdor shaxslar va mutaxassislarning oʻzini oʻzi boshqarish organlarining huquqlarini kengaytirish masalalariga doir takliflarini oʻrganish tavsiya etilsin.

2. Tuman va shahar hokimlari fuqarolar yigʻinlariga tayyorgarlik koʻrish va ularni oʻtkazishda, kadrlar tanlashda koʻmaklashsinlar.

3. Fuqarolar yigʻinlariga, tuman va shahar hokimlariga yigʻinlar raislari va ularning maslahatchilari vazifasiga tashkilotchilik qobiliyatiga va katta obroʻ-eʼtiborga, yetarli bilim darajasiga ega boʻlgan, yangi demokratik qadriyatlarni tez oʻzlashtira oluvchi, fuqarolar tashabbuslarini qoʻllab-quvvatlashga va ularni amalga oshirishni taʼminlashga qodir odamlarni tanlash tavsiya etilsin.

4. Oliy Majlis Kotibiyati:

saylov bilan bogʻliq tashkiliy tadbirlar oʻz vaqtida oʻtkazilishini, qonun hujjatlari bir xilda qoʻllanilishini, fuqarolar oʻzini oʻzi boshqarish organlarining huquqlarini kengaytirish masalalariga doir takliflar toʻplanishi va umumlashtirilishini taʼminlasin;

fuqarolarning oʻzini oʻzi boshqarish organlarida saylov oʻtkazishni tashkil etishga doir tavsiyalarni, shuningdek zarur hujjatlarning nusxalarini joylarga joʻnatsin;

fuqarolarning oʻzini oʻzi boshqarish organlarida saylov oʻtkazishga tayyorgarlik koʻrishda amaliy yordam koʻrsatish maqsadida joylarga Kotibiyat xodimlarini yuborishni nazarda tutsin.