Oʻzbekiston Respublikasi Hukumati va Latviya Respublikasi, bundan keyin “Tomonlar” deb ataluvchilar,

aloqa sohasida oʻzaro manfaatli hamkorlikni rivojlantirishga, ikkala davlatdagi elektr va pochta aloqasi tarmoqlari va vositalarining uzluksiz ishlashini taʼminlashga, shuningdek bu sohadagi huquqiy tartibni takomillashtirishga intilib,

quyidagilar toʻgʻrisida kelishib oldilar:

Tomonlar aloqa sohasidagi oʻz munosabatlarini xalqaro huquqning hamma tan olgan normalari va prinsiplari, Jahon pochta uyushmasi aktlari qoidalari va Xalqaro elektr aloqasi uyushmasi tavsiyalariga muvofiq quradilar.

Ushbu Bitim bilan, shuningdek, Oʻzbekiston Respublikasi va Latviya Respublikasi ishtirokchi boʻlgan xalqaro bitimlar bilan hal qilinmagan masalalar, davlatlar har birining qonunchiligiga muvofiq oʻzaro kelishilgan holda hal qilinadi.

Tomonlar oʻzlarining vakolatlari va imkoniyatlari hajmida Oʻzbekiston Respublikasi qonunchiligi va Latviya Respublikasi qonunchiligi talablariga muvofiq ish tutgan holda, pochta va elektr aloqasi sohasidagi hamkorlikni davom ettiradilar va kengaytiradilar.

Tomonlar oʻz davlatlarining hududlarida barcha yuborilayotgan pochta joʻnatmalari va hujjatli xabarlarni uzluksiz qabul qilish, ishlab chiqish, tashish va egalariga yetkazib berishni taʼminlaydilar va shuningdek, belgilangan tartibda roʻyxatdan oʻtkazilgan vaqtli nashrlarni tarqatish boʻyicha oʻzaro xizmat koʻrsatadilar.

Tomonlar oʻzaro manfaatli shartlar asosida elektr aloqasi, pochta joʻnatmalari va maxsus aloqaning barcha turlarining, televideniye va radio dasturlarining oʻz davlatlari hududlari orqali erkin tranzit qilinishini kafolatlaydilar.

Ushbu Bitimning bajarilishidan kelib chiqadigan hisob-kitob va toʻlovlar Tomonlarning Aloqa maʼmuriyatlari oʻrtasida amalda boʻlgan bitimlarga muvofiq amalga oshiriladi.

Davlatlararo axborot va maʼlumotlar berish texnologik jarayonlarida Tomonlar aloqa korxonalarida hisobga olish hisobot berish uchun yagona vaqt —Moskva vaqtini qoʻllaydilar.

Tomonlar operativ-texnik boshqarish sistemalarining amaldagi texnologik jarayonlarga muvofiq birgalashib harakat qilishi toʻgʻrisida kelishib oldilar.

Tomonlar favqulodda vaziyatlarda aloqa vositalari boʻyicha axborotlarning ustuvorlik bilan berilishini taʼminlaydilar.

Tomonlar davlatlararo aloqa liniyalarida yuz bergan falokatlar oqibatlarini bartaraf qilishda bir-birlariga yordam beradilar. Tiklashishlarini olib borishda bir-birlariga yordamlashish tartibi Tomonlarning Aloqa maʼmuriyatlari tomonidan ishlab chiqiladi va muvofiqlashtiriladi.

Tomonlar bir-birlariga nisbatan Tomonlar Aloqa maʼmuriyatlarining uchinchi davlatlar bilan munosabatlaridagi va tegishli xalqaro tashkilotlardagi faoliyatiga toʻsqinlik qiladigan yoki qiyinlashtirib qoʻyadigan kamsitish choralarini qoʻllamaydilar.

Har bir Tomon pochta va elektr aloqasini tashkil qilishga, shuningdek koʻrsatilgan xizmatlar uchun oʻzaro hisob-kitob tartibiga har qanday oʻzgartirish kiritmoqchi boʻlsa, bu haqda uch oy ilgari boshqa Tomonni xabardor qiladi.

Tomonlar oʻzaro xizmatlarning yoʻnalishlarini va hajmlarini hamda hisob-kitob tartibini belgilash va aniqlab olish uchun Oʻzbekiston Respublikasi va Latviya Respublikasi Aloqa maʼmuriyatlari va korxonalari oʻrtasida bevosita aloqalar oʻrnatishga koʻmaklashadilar.

Tomonlar xizmat koʻrsatishda ishtirok etayotgan barcha aloqa korxonalarining oʻz vaqtida va sifatli xizmat uchun isteʼmolchi oldida teng javobgar boʻlishi toʻgʻrisida kelishib oldilar va xalqaro aloqaning sifatsiz ishi ustidan tushgan shikoyatlarni Jahon pochta uyushmasi va Xalqaro pochta uyushmasi normativ aktlariga muvofiq koʻrib chiqish tartibini oʻrnatish zarurligini tan oldilar.

Tomonlar telefonistlar, telegrafistlar, texnik xizmatchilar, aloqa korxonalarining pochta xodimlari oʻrtasida xizmat bilan bogʻliq boʻlgan maʼlumotlar almashish uchun, shuningdek, xizmat bilan bogʻliq boʻlgan hujjatlar almashish uchun rus tilidan foydalanishga kelishib oldilar.

Tomonlar davlatlari oʻrtasida yuborilayotgan pochta joʻnatmalari va telegrammalar adreslari rus tilida yoki lotin harflarida rasmiylashtiriladi.

Telegrammalar matnlari lotin harflarida qabul qilinishi va yuborilishi mumkin.

Agar Tomonlar davlatlari oʻrtasidagi Bitimlarda aloqa sohasidagi munosabatlarda paydo boʻladigan munozaralarni bartaraf qilish tartibi koʻrsatilmagan boʻlsa, Tomonlar Aloqa maʼmuriyatlari bu tartibni mustaqil ravishda ularning oʻrtalarida tuzilgan shartnomalarda belgilashga kelishib oldilar.

Ushbu Bitim Tomonlar tuzgan boshqa xalqaro shartnomalaridan kelib chiqadigan huquq va majburiyatlariga taʼsir qilmaydi.

Ushbu Bitim imzolangan kundan kuchga kiradi va Tomonlardan biri boshqa Tomonga uning amalini toʻxtatish niyati toʻgʻrisida diplomatik yoʻl bilan bildirish xati yuborgandan keyin 90 kun oʻtgunga qadar amal qiladi.

Toshkent shahrida 1996-yilning 23-mayida har biri oʻzbek, latish va rus tillarida boʻlgan ikki asl nusxada tuzildi, bunda barcha matnlar teng kuchga ega.

Matnlar turlicha talqin qilinganda Bitimning rus tilidagi matni asos qilib olinadi.