Oʻzbekiston Respublikasi Hukumati bilan Turkmaniston hukumati, keyingi oʻrinlarda “Tomonlar” deb ataluvchilar,

ikkala davlat xalqlari oʻrtasidagi anʼanaviy munosabatlarni hisobga olib, sogʻliqni saqlash sohasida oʻzaro manfaatli va teng huquqli hamkorlikdan Tomonlarning manfaatdor ekanliklarini eʼtiborga olib,

quyidagilar haqida ahdlashdilar:

Tomonlar sogʻliqni saqlash va tibbiyot sanoati sohasida hamkorlikni rivojlantirish va kengaytirishga koʻmaklashadilar.

Tomonlar quyidagi sohalarda oʻzaro manfaatli hamkorlikni rivojlantiradilar:

birinchi va ixtisoslashtirilgan tibbiy yordam koʻrsatish;

ona va bola sogʻligʻini muhofaza qilish;

profilaktik tibbiyot va atrof muhitni muhofaza qilish;

dorishunoslik va tibbiyot texnikasi;

sanatoriy-kurortda davolanish va salomatlikni qayta tiklash;

favqulodda vaziyatlarda paydo boʻladigan tibbiy-sanitariya asoratlarining oldini olish va bartaraf qilish;

shoshilinch axborotni ayirboshlash;

Tomonlar hududida oʻta xavfli yuqumli kasalliklar tarqalishiga qarshi epidemiologik nazorat oʻtkazish.

Tomonlar bemorlarning ahvoli ogʻir boʻlgan hollarda tekin, bemorlarni rejali usul bilan davolashda tijorat asosida tibbiy yordam koʻrsatadilar.

Tomonlarning har biri sogʻliqni saqlash tizimini takomillashtirishda, tibbiyot tashkilotlari va muassasalari oʻrtasida toʻgʻridan toʻgʻri aloqalarni tashkil etishda, shuningdek mutaxassislarni ayirboshlashda, konferensiyalar, simpoziumlar va seminarlar oʻtkazishda oʻzaro yordam beradilar.

Tomonlar dorivor vositalar, tibbiyot jihozlari va texnikasi ishlab chiqaruvchi qoʻshma korxonalar tashkil etilishiga koʻmaklashadilar.

Tomonlar favqulodda vaziyatlarda tekin shoshilinch davolash-maslahat yordami koʻrsatadilar.

Sogʻliqni saqlash sohasidagi hamkorlikning aniq shakllari va shartlari Tomonlar davlat boshqaruvi tegishli organlari oʻrtasida tuziladigan alohida bitimlar bilan tartibga solinadi.

Tomonlar zarurat tugʻilganda mazkur Bitimni amalga oshirish va oʻzaro hamkorlik yuzasidan tavsiyalar tayyorlash uchun qoʻshma komissiya tuzishlari mumkin.

Ushbu Bitim imzolangan kundan boshlab kuchga kiradi, besh yil davomida amal qiladi va agar tomonlardan hech biri tegishli muddat tamom boʻlishidan kamida olti oy oldin bitimning amal qilishini toʻxtatish niyati toʻgʻrisida yozma ravishda ikkinchi Tomonga maʼlum qilmasa oʻz-oʻzidan navbatdagi besh yillik davrlarga uzaytiriladi.

1996-yil 16-yanvarda, Chorjoʻy shahrida, har biri oʻzbek, turkman va rus tillarida boʻlgan ikki nusxada tuzildi, barcha matnlar bir xil kuchga egadir. Talqin etishda kelishmovchiliklar kelib chiqqan taqdirda rus tilidagi matn asosiy matn hisoblanadi.