Oʻzbekiston Respublikasi Hukumati va Ukraina Hukumati, bundan buyon “Tomonlar” deb ataladi,

iqtisodiyotda va savdo munosabatlarida texnikaviy toʻsiqlarni bartaraf etish maqsadida,

standartlashtirish, metrologiya va sertifikatlashtirish sohasida, bunda xalqaro tashkilotlar tomonidan qabul qilingan prinsip va normalardan kelib chiqib, hamkorlikni rivojlantirish niyatida,

ikkala Tomonning iqtisodiy manfaatini koʻzlab, quyidagilarga kelishildi:

Tomonlar, amaldagi standartlashtirish, sertifikatlashtirish va oʻlchovlar birligini taʼminlash davlat tizimlarini tan oladilar.

Tomonlar:

standartlashtirish, metrologiya va sertifikatlashtirish boʻyicha meʼyoriy va maʼlumot beradigan hujjatlarni kelishilgan holda oʻzaro taqdim etishni taʼminlaydilar;

milliy etalonlarning fizikaviy kattaligi hamda oʻlchov vositalarining ilk namunalarini tuzish, takomillashtirish, solishtirish va metrologik attestatsiyadan oʻtkazish boʻyicha hamkorlikni amalga oshiradilar;

boshqa Tomon tarafidan oʻtkazilgan davlat sinovlari, tekshirishlari, kalibrlashlarni, metrologik attestatsiyadan oʻtkazish natijalarini va oʻlchov vositalarining turini tasdiqlashni tan oladilar;

tekshirish va sinov laboratoriyalarini hamda markazlarni akkreditlashtirishni oʻtkazadigan tashkilotlarni, shuningdek ular tomonidan akkreditlashtirilgan oʻlchov vositalarini tekshirish, sinash va kalibrlash laboratoriyalari va markazlarini tan oladilar;

boshqa Tomonning sertifikatlashtirish boʻyicha idoralarini, akkreditlashtirilgan sinov laboratoriyalari va markazlarini, oʻzaro bir-biriga yetkazib berilayotgan mahsulotga sertifikatlarini va muvofiqlik belgilarini tan oladilar.

Tomonlardan biri, boshqa Tomonning standartlashtirish, metrologiya va sertifikatlashtirish boʻyicha meʼyoriy hujjatlarini, agar ularning talablari amaldagi davlat qonuniga koʻra, standartlashtirish, metrologiya, sertifikatlashtirish boʻyicha milliy idora joriy etgan va oʻrnatgan tartibga ularning talablari qarama-qarshi boʻlmasa, qoʻllashi mumkin.

Tomonlar, bitimlar, bayonnomalar va dasturlar asosida quyidagilarni nazarda tutib, hamkorlikni amalga oshiradilar:

standartlashtirish, metrologiya va sertifikatlashtirish boʻyicha meʼyoriy va uslubiy hujjatlarni ishlab chiqishda birgalikda harakat qilish;

xodimlar tayyorlash va ularning malakasini oshirish;

fizik kattaliklar birligi milliy etalonlarini va oʻlchov vositalarining ilk namunalarini yaratish, takomillashtirish va solishtirish;

moddalar va materiallar tarkibi va xususiyatlarining standart namunalarini, shuningdek fizik konstantlar va moddalar va materiallar xususiyati haqidagi standart maʼlumotlarini yaratish va qoʻllash;

sertifikatlashtirish davlat tizimini yanada rivojlantirish, takomillashtirish va uygʻunlashtirish;

standartlashtirish, metrologiya va sertifikatlashtirish sohasida axborot faoliyatini rivojlantirish.

Ushbu Bitimda moʻljallangan ishlarni muvofiqlashtirish va ularni amalga oshirish:

Oʻzbekiston Respublikasida — Oʻzbekiston Respublikasi Vazirlar Mahkamasi huzuridagi standartlashtirish, metrologiya va sertifikatlashtirish Oʻzbekiston davlat markaziga,

Ukrainada — standartlashtirish, metrologiya va sertifikatlashtirish boʻyicha Ukraina Davlat Qoʻmitasiga yuklatiladi.

Tomonlar, standartlashtirish, metrologiya va sertifikatlashtirish sohasidagi xalqaro tashkilotlarga kirishida va bu tashkilotlarning ishida, tomonlardan biri shu tashkilotlarning aʼzosi boʻlgan holda, bir-biriga yordam beradilar.

Tomonlar, mazkur Bitim doirasida amalga oshiriladigan ishlar va ilmiy-texnikaviy natijalar haqida olinayotgan hujjatlar va axborotlarning maxfiyligini taqdim etayotgan Tomon shart qilib qoʻygan boʻlsa, ularning maxfiyligini taʼminlaydilar.

Hamkorlik jarayonida Tomonlardan biri olayotgan ilmiy-texnikaviy axborot, agar ikkinchi Tomon uni maxfiyligini qayd qilmagan boʻlsa, bemalol foydalanishlari mumkin. Bu axborot uchinchi bir davlatga faqat uni taqdim etayotgan Tomon roziligi bilan berilishi mumkin.

Mazkur Bitim qoidalari zarurat tugilgan taqdirda Oʻzbekiston Respublikasi Vazirlar Mahkamasi huzuridagi standartlashtirish, metrologiya va sertifikatlashtirish Oʻzbekiston davlat markazi bilan standartlashtirish, metrologiya va sertifikatlashtirish boʻyicha Ukraina Davlat Qoʻmitasi oʻrtasida tuzilgan qoʻshimcha Bitimlar va bayonnomalar bilan aniqlik kiritiladi.

Mazkur Bitim Tomonlar va ularning idoralari boshqa davlatlar bilan tuzgan shartnomalardan kelib chiqadigan huquq va majburiyatlarga daxldor emas.

Mazkur Bitimni bajarish va talqin qilinishiga oid barcha munozarali masalalar, turli darajada, oʻzaro muzokara va maslahatlar yoʻli bilan hal qilinadi.

Mazkur Bitim aniq boʻlmagan muddatga tuziladi, u imzolangan kundan kuchga kiradi va tomonlardan biri uni amaldagi harakatini toʻxtatish maqsadini yozma xabar qilgan kundan 6 oy oʻtgunga qadar kuchga ega boʻladi.

Bitimning amal qilish muddati boshqa Tomon xabar olgan kundan boshlab 6 oydan soʻng toʻxtatiladi.

Bitim 1995-yil 26-aprelda S. Peterburg shahrida hamma matnlari bir xil kuchga ega boʻlgan oʻzbek, ukrain va rus tillarida asliga toʻgʻri 2 nusxada tuzildi.