Oʻzbekiston Respublikasi Hukumati va Ukraina Hukumati, keyinchalik “Tomonlar” deb ataladilar,

ilmiy darajalar haqidagi hujjatlarni eʼtirof etish va tenglashtirish, ilmiy darajalarni qiyoslash prinsiplari toʻgʻrisida kelishuvlarga asoslanib;

ilmiy aloqalarni saqlab qolish va rivojlantirishga intilib;

yuqori malakali ilmiy va ilmiy-pedagog xodimlarni attestatsiyadan oʻtkazish sohasida hamkorlikni davom ettirishga boʻlgan intilishni tasdiqlab;

quyidagilar haqida kelishdilar:

Tomonlar yuqori malakali ilmiy va ilmiy-pedagog xodimlarni attestatsiyadan oʻtkazish tizimlari va talablarini rivojlantirishning milliy konsepsiyalarini ishlab chiqishda oʻzaro maslahatlashishlar oʻtkazadilar.

Tomonlar ilmiy xodimlarning ixtisosliklari milliy roʻyxatlarni (nomenklaturalarni) ishlab chiqish va oʻz davlatlari hududida ilmiy darajalar beruvchi kengashlar tarmoqlarini tashkil etish haqida oʻzaro bir birlarini xabardor qilib turadilar.

Tomonlar yuqori malakali ilmiy va ilmiy-pedagog xodimlarni attestatsiyadan oʻtkazishning davlat tizimida ilmiy darajalar talabgorlariga qoʻyiladigan asosiy talablarning bir-biriga taqqoslash imkoniyatini taʼminlaydilar.

Tomonlar yuqori malakali ilmiy va ilmiy-pedagog xodimlarni attestatsiyadan oʻtkazish sohasida hamkorlikni quyidagi yoʻllar bilan rivojlantiradilar:

bir Tomonning ilmiy darajalarga talabgorlarini boshqa Tomonning davlat hududidagi ilmiy darajalar beruvchi kengashlarda dissertatsiya himoya qilishlari uchun teng imkoniyatlar yaratish;

yuqori malakali ilmiy va ilmiy-pedagog xodimlarni attestatsiyadan oʻtkazish davlat tizimlaridagi oʻzgarishlar haqida oʻz vaqtida bir-birlarini xabardor qilib turish, ushbu xodimlar attestatsiyasi boʻyicha tegishli normativ aktlar va boshqa hujjatlarni oʻzaro almashtirib borish.

Tomonlardan har biri dissertatsiya ishlarini ekspertiza qilish sifatini oshirish uchun:

oʻz mamlakatlarining yetakchi olim va mutaxassislarini boshqa mamlakatning ilmiy darajalar beruvchi kengashlarining ishida, hamda dissertatsiyalar himoyasida opponentlar sifatida qatnashishlariga;

oʻz mamlakatining ilmiy darajalar beruvchi kengashlarida himoya qilingan dissertatsiyalarni boshqa mamlakatning ilmiy darajalar beruvchi kengashlarida qoʻshimcha ekspertizadan oʻtkazish uchun yordam beradi.

Tomonlar oʻz davlatlari hududida boshqa Tomonning tegishli davlat idorasi tomonidan ilmiy darajalar berilganligi haqidagi davlat namunasi shaklidagi malaka hujjatlarini eʼtirof etadi.

Berilgan ilmiy darajalar haqidagi davlat namunasi shaklidagi hujjatlarning eʼtirof etilishi, shu hujjatlar egalariga Tomonlarning oʻz hududlarida milliy malaka hujjatlari egalariga beriladigan huquqlar ham hech qanday shartsiz tarqalishini bildirmaydi.

Ilmiy darajalar haqidagi davlat namunasi shaklidagi malaka hujjatlarini teng baravarligi hujjat egalarining qayta attestatsiyadan oʻtkazish jarayonida belgilanadi.

Qayta attestatsiya talabgor fuqaro boʻlgan yoki uning hududida doimiy yashab turgan mamlakat davlat attestatsiya idorasi tomonidan oʻtkaziladi.

Tomonlar yuqori malakali ilmiy va ilmiy-pedagog xodimlarni attestatsiyadan oʻtkazish jarayonlarini boshqarish va takomillashtirish boʻyicha tajriba almashishga bagʻishlangan zarur qoʻshma tadbirlar oʻtkazib turadilar.

Tomonlarning ushbu Bitimda qatnashishlari, ularni yuqori malakali ilmiy va ilmiy-pedagog xodimlarni attestatsiyadan oʻtkazish sohasida hamkorlikning boshqa shakllaridan foydalanish huquqlarini cheklamaydi va Tomonlarning ilmiy va ilmiy-pedagog xodimlarning davlat attestatsiya tizimlarini mustaqil ishlab turishiga xalaqit bermaydi.

Ushbu Bitimning amalda tatbiq etilishiga bogʻliq aniq masalalar boʻyicha qoʻshimcha bitimlar va protokollar imzolanishi mumkin.

Ushbu Bitimdan kelib chiqadigan yoki uning bajarilishi bilan bogʻliq boʻlgan masalalar boʻyicha kelishmovchiliklar vujudga kelganda, ularni bartaraf qilish tartibi boʻyicha Tomonlar vakillari oʻzaro maslahatlashadilar.

Ushbu Bitim boʻyicha vakolatli organ boʻlib, Oʻzbekiston tomonidan Oʻzbekiston Respublikasi Vazirlar Mahkamasi huzuridagi Oliy attestatsiya komissiyasi, Ukraina tomonidan esa Ukraina Oliy attestatsiya komissiyasi hisoblanadi.

Ushbu Bitim u imzolangan kundan boshlab kuchga kiradi va besh yil davomida harakatda boʻladi va agar Tomonlarning birontasi Bitim harakatini toʻxtatish haqida oʻz istagini ikkinchi Tomonga Bitim muddati tamom boʻlishidan olti oy oldin yozma ravishda maʼlum qilmasa, uning harakati keyingi besh yillik muddatlarga oʻz-oʻzidan uzaytiriladi.

Toshkent shahrida 1996-yil 5-dekabrda ikki nusxada, har biri oʻzbek, ukrain va rus tillarida tuzildi, bunda barcha matnlar teng autentikdir.

Ushbu Bitim qoidalarini talqin qilishda kelishmovchiliklar yuzaga kelganda rus tilidagi matn asosiy hisoblanadi.