Oʻzbekiston Respublikasi Hukumati va Qirgʻiziston Respublikasi Hukumati, keyingi oʻrinlarda “Tomonlar” deb ataladi,

iqtisodiy, savdo va boshqa munosabatlardagi texnikaviy toʻsiqlarni bartaraf etishda standartlashtirish, metrologiya va sertifikatlashtirishning oʻrnini hisobga olib,

ularning inson hayoti va salomatligi xavfsizligini taʼminlash ishidagi, shuningdek atrof muhitni muhofaza qilishdagi ahamiyatini tushunib,

chambarchas texnik hamkorlikdan manfaatdor boʻlgan holda, quyidagilar toʻgʻrisida ahdlashdilar:

Tomonlar standartlashtirish, metrologiya va sertifikatlashtirish milliy tizimlarini shakllantirish va ularning mavjud boʻlishida toʻliq mustaqillikka ega boʻlgan holda:

standartlashtirishning davlat tizimlarini, oʻlchov birliklarini taʼminlash tizimlarini va sertifikatlashtirish milliy tizimlarini oʻzaro tan oladilar hamda ularni takomillashtirishda eng koʻp darajada uygʻunlikka intiladilar;

fizik miqdorlar birliklari milliy etalonlarini tan oladilar, eng koʻp qulaylik rejimida ulardan oʻzaro foydalanishga yoʻl qoʻyadilar;

oʻlchov birliklari Davlat reyestrlarini, moddalar va materiallar tarkibi va xossalarining standart namunalarini, sinovlar va turlarini tasdiqlash, meteorologik attestatsiyalar, oʻlchov vositalarini tekshirish va kalibrlash natijalarini oʻzaro tan oladilar;

davlatlarda akkreditatsiya qilingan sinov, tekshirish, kalibrlash va oʻlchash laboratoriya (markaz)larini, sertifikatlashtirish organlarini, oʻzaro yetkazib beriladigan mahsulot va oʻlchov vositalarining sertifikatlarini va muvofiqlik belgilarini tan oladilar.

Tomonlar, zarurat boʻlganda, Oʻzbekiston Respublikasi davlat standartlarini Qirgʻiziston Respublikasi hududida va tegishli ravishda, Qirgʻiziston Respublikasi davlat standartlarini Oʻzbekiston Respublikasi hududida qoʻllashlari mumkin.

Tomonlar axborotni, normativ hujjatlarni (koʻrsatkichlar, standartlar, texnik shartlar va standartlashtirish, metrologiya va sertifikatlashtirish boʻyicha boshqa normativ hujjatlarni) tekin oʻzaro taqdim etadilar.

Mazkur Bitimda nazarda tutilgan ishlarni muvofiqlashtirish va ularni amalga oshirish:

Oʻzbekiston Respublikasida — Oʻzbekiston Respublikasi Vazirlar Mahkamasi huzuridagi Oʻzbekiston davlat standartlashtirish, metrologiya va sertifikatsiya markaziga yuklanadi;

Qirgʻiziston Respublikasida — Qirgʻiziston Respublikasi Hukumati huzuridagi standartlashtirish va metrologiya Davlat inspeksiyasiga.

Tomonlar tomonlardan biri aʼzo hisoblangan xalqaro tashkilotlarda qatnashishda yoki ularga kirishda bir-birlariga yordam koʻrsatadilar.

Tomonlar, agar axborotni beruvchi organ ularning maxfiy tusdaligini xabardor qilgan boʻlsa, olingan hujjatning va ushbu Bitim doirasida amalga oshiriladigan ishlar toʻgʻrisidagi axborotning hamda erishilgan ilmiy-texnikaviy natijalarning maxfiyligini taʼminlaydilar.

Hamkorlik davomida Tomonlardan biri olgan ilmiy-texnikaviy axborotdan, agar boshqa Tomon uning maxfiyligi toʻgʻrisida ogohlantirmagan boʻlsa, erkin foydalanishi mumkin. Ushbu axborot uchinchi mamlakatga uni bergan Tomonning roziligi bilan berilishi mumkin.

Tomonlar standartlashtirish, metrologiya va sertifikatlashtirish sohasida kadrlar tayyorlash va ularning malakasini oshirishda, mutaxassislarni ayirboshlashda, normativ-texnik hujjatlar, oʻquv qoʻllanmalari, metodik hujjatlarni tayyorlash, metrologiya va sertifikatlashtirishga doir ishlarni tashkil etish boʻyicha korxonalar, tadbirkorlar, jamoat tashkilotlari oʻrtasida toʻgʻridan toʻgʻri aloqalar oʻrnatishda oʻzaro hamkorlik qiladilar hamda hamkorlik uchun qulay sharoitlar yaratadilar.

Mazkur Bitim qoidalari, zarurat boʻlganda Oʻzbekiston Respublikasi Vazirlar Mahkamasi huzuridagi Oʻzbekiston davlat standartlashtirish, metrologiya va sertifikatsiya markazi bilan Qirgʻiziston Respublikasi Hukumati huzuridagi standartlashtirish va metrologiya Davlat inspeksiyasi oʻrtasida tuziladigan qoʻshimcha bitimlar va protokollar bilan aniqlashtiriladi.

Tomonlar oʻrtasidagi mazkur Bitimni talqin qilishga oid nizolar oʻzaro maslahatlashuvlar va turli darajalardagi muzokaralar yoʻli bilan hal etiladi.

Mazkur Bitim ilgari ahdlashuvchi Tomonlar uchinchi mamlakatlar bilan standartlashtirish, metrologiya va sertifikatlashtirish sohasida tuzgan boshqa bitimlarning amal qilishiga daxl qilmaydi.

Mazkur Bitim imzolangan kundan boshlab kuchga kiradi. Mazkur Bitim 10 yil muddatga tuziladi hamda ahdlashuvchi Tomonlardan biri tegishli davr tamom boʻlishidan kamida olti oy oldin uning amal qilishini toʻxtatish haqidagi oʻz niyatini boshqa ahdlashuvchi Tomonga yozma ravishda xabar qilmagunicha keyingi oʻn yillik davrlarga oʻz-oʻzidan uzaytiriladi.

1996-yil 24-dekabrda Toshkent shahrida har biri oʻzbek, qirgʻiz va rus tillarida boʻlgan ikki nusxada tuzildi, bunda barcha matnlar bir xil kuchga egadir.

Mazkur Bitimning qoidalarini talqin qilish maqsadlarida rus tilidagi matndan foydalaniladi.