Oʻzbekiston Respublikasi Hukumati va Belarus Respublikasi Hukumati, keyingi oʻrinlarda “Ahdlashuvchi Tomonlar” deb ataladi,

oʻzaro munosabatlar asosida ikkala davlat oʻrtasida avtomobilda yoʻlovchilar va yuk tashish va ularning hududlari orqali uchinchi davlatlarga tranzit qatnovini rivojlantirish, shuningdek, ushbu qatnovlarga koʻmaklashish istagiga amal qilib quyidagilar toʻgʻrisida ahdlashdilar:

1. “Tashuvchi” iborasi ikkala davlatning milliy qonunchiligiga muvofiq xalqaro tashuvlarni bajarishga vakolatli har qanday jismoniy yoki yuridik shaxsni anglatadi.

2. “Avtotransport vositasi” iborasi quyidagilarni anglatadi:

yoʻlovchilar tashishda — avtobusni, yaʼni haydovchi oʻrnini hisobga olmagan holda yoʻlovchilarni tashish uchun moʻljallangan va kamida 8 oʻringa ega boʻlgan mexanik transport vositasini anglatadi;

yuklarni tashishda — yuk avtomobilini, pritsepli yuk avtomobilini, shatakka oluvchi avtomobilni yoki yarimpritsepli shatakka oluvchi avtomobillarni anglatadi.

3. “Ruxsatnoma” degan ibora Ahdlashuvchi Tomonning avtotransport vositalarining ikkinchi ahdlashuvchi Tomonning hududidan oʻtishga yoki hududidan chiqishga ruxsat beruvchi yoki boshqa Ahdlashuvchi Tomonning hududi orqali tranzit oʻtish huquqini beruvchi hujjatni anglatadi.

4. “Yoʻlovchilarni muntazam tashish” iborasi qatnovning boshlangʻich va soʻnggi punktlari va toʻxtash punktlari koʻrsatilgan, oldindan kelishilgan qatnash jadvali va marshruti boʻyicha Ahdlashuvchi Tomonlarning avtotransport vositalari tomonidan amalga oshiriladigan tashuvlarni anglatadi.

5. “Yoʻlovchilarni nomuntazam tashish” iborasi qolgan barcha turdagi tashuvlarni anglatadi.

6. “Tranzit tashuvlar” iborasi kelish va ketish punktlari ahdlashuvchi Tomonning hududidan tashqarida boʻlgan holda davlatlardan birining hududi orqali yoʻlovchilar va yuklar tashuvini anglatadi.

7. “Vakolatli organlar” iborasi:

Oʻzbekiston Respublikasi uchun — “Oʻzavtotrans” Oʻzbekiston avtomobil transporti davlat-aksionerlik korporatsiyasini;

Belarus Respublikasi uchun — Transport va kommunikatsiyalar vazirligini anglatadi.

1. Mazkur Bitimga muvofiq yoʻlovchilarni avtobuslarda tashish ruxsatnomalar asosida amalga oshiriladi.

2. Yoʻlovchilarni avtobuslarda tashish oʻzaro kelishuvlar boʻyicha Ahdlashuvchi Tomonlarning vakolatli organlari tomonidan beriladigan ruxsatnomalar asosida amalga oshirilishi kerak. Vakolatli organ ruxsatnomani oʻz davlati hududidan oʻtadigan marshrut uchastkasi uchun beradi.

3. Kuyidagi hollarda yoʻlovchilarni avtobuslarda tashishni amalga oshirish uchun ruxsatnoma talab qilinmaydi:

a) avtobus roʻyxatga olingan davlat hududida boshlanadigan va tugaydigan butun safar davomida oʻsha avtobusning oʻzida aynan oʻsha guruh tashilganda;

b) avtobus roʻyxatga olingan davlat hududidan boshlanadigan va boshqa davlatning hududida tugaydigan safar davomida avtobusda bir yoʻnalishda aynan oʻsha guruh tashilganda.

4. Tashuvchi tomonidan foydalanishga yaroqli avtobusga almashtirish hollari 3-bandda koʻrsatib oʻtilgan tashishlar xarakteriga taʼsir etmaydi.

Ikkala Ahdlashuvchi Tomonlarning vakolatli organlari avtobuslarning muntazam qatnovini ochish toʻgʻrisida bir-birlariga takliflar beradilar. Ushbu takliflar marshrutga, qatnov jadvaliga va tariflarga oid maʼlumotlarni, shuningdek, avtobus qatnovini yoʻlga qoʻyish boʻyicha moʻljallanayotgan vaqtni oʻz ichiga olishi kerak.

Yoʻlovchilarni avtobusda nomuntazam tashishni amalga oshirish uchun ruxsatnoma berish toʻgʻrisidagi iltimosnoma bir Ahdlashuvchi Tomonning vakolatli organi tomonidan bevosita ikkinchi Ahdlashuvchi Tomonning vakolatli organiga yoʻllanadi. Unda tashuvlar xarakteri, avtobuslarning boriladigan davlatda boʻlish vaqtlari toʻgʻrisida maʼlumotlar boʻlishi kerak.

Yengil avtomobillardagi safarlar uchun ruxsatnoma talab qilinmaydi.

1. Joʻnatish punkti bir davlatning hududida, yetkazib berish manzili boshqa davlatning hududida boʻlgan taqdirda yuklar tashuvi, shuningdek, yuklarni uchinchi davlatlar orqali tranzit tashuv Ahdlashuvchi Tomonlarning vakolatli organlari beradigan ruxsatnomalar asosida amalga oshiriladi.

2. Har bir avtotransport vositasiga alohida ruxsatnoma berilishi kerak. Bunday ruxsatnomaning har biri bir marta borib kelish huquqini beradi.

3. Ahdlashuvchi Tomonlarning vakolatli organlari yuklarni tashish boʻyicha oʻzaro beriladigan ruxsatnomalarning miqdorini belgilaydilar.

1. Ushbu Bitimning 5-moddasida koʻrsatib oʻtilgan ruxsatnomalar quyidagi tashuvlarni amalga oshirishda talab qilinmaydi:

a) yarmarkalar va koʻrgazmalar uchun moʻljallangan eksponatlar va asbob-uskunalarni va materiallarni tashishda;

b) chorva mollari, shuningdek, sport tadbirlarini oʻtkazish uchun moʻljallangan turli xil anjomlarni, jihozlarni, transport vositalarni tashishda;

v) teatr dekoratsiyalarini va rekvizitini, musiqa asboblarini, kinoga olishda, radioeshittirish va telekoʻrsatuvlar tayyorlashda ishlatiladigan asbob-uskunalarni va ashyolarni tashishda;

g) vafot etganlarning jasadi va xokini tashishda;

d) shikastlangan yoki avariyaga uchragan avtotransport vositalarini tashishda;

e) koʻchish vaqtida mol-mulklarni tashishda;

j) tabiiy ofatlar roʻy berganda, yordam tariqasida yetkazib beriladigan tibbiy asbob-uskunalarni va dori-darmonlarni tashishda;

Shuningdek, buzilgan avtotransport vositasini shatakka olish maqsadida “texnik yordam” mashinalarining yurishi uchun ruxsatnomalar talab qilinmaydi.

2. Ushbu modda 1-bandining a),b),v) kichik bandlarida nazarda tutilgan istisnolar avtotransport vositasi roʻyxatga olingan davlatga yuklarni qaytarish shart boʻlgan hollarda yoki yuklar uchinchi davlat hududiga tashib oʻtilayotganda amal qiladi.

Yuk ortilgan yoki yuksiz avtotransport vositasining gabaritlari yoki uning ogʻirligi boshqa davlat hududida oʻrnatilgan normalardan oshgan taqdirda, shuningdek, xavfli yuklarni tashishda tashuvchi boshqa ahdlashuvchi Tomonning vakolatli organidan maxsus ruxsatnoma olishi kerak.

Ahdlashuvchi Tomonlarning vakolatli organlari oʻz davlatlarining milliy qonunchiligiga muvofiq kechi bilan oʻn kun mobaynida bunday ruxsatnoma berish toʻgʻrisidagi iltimosnomaga javob qaytarishlari kerak.

Ushbu Bitim asosida tashuvlar amalga oshirilayotgan vaqtda bir davlatning tashuvchilari boshqa davlat hududida boʻlganlarida oʻsha davlatning milliy qonunchiligiga rioya qilishlari kerak.

Ahdlashuvchi Tomonlar mazkur Bitimni imzolash vaqtida amalda boʻlgan avtotransport ishini tartibga soluvchi qoidalarni, nizomlarni, yoʻriqnomalarni, standartlarni va texnik shartlarni saqlab qolishga kelishib oldilar.

Bir Ahdlashuvchi Tomonning avtotransport korxonalari, tashkilotlari, ushbu Ahdlashuvchi Tomon vakolatli organining ruxsati bilan boshqa Ahdlashuvchi Tomonning vakolatli organi bilan kelishgan holda yoʻlovchilar va yuk tashuvlarini amalga oshirishni tashkil etish maqsadida uning hududida oʻz vakolatxonalarini taʼsis etishlari mumkin.

Ahdlashuvchi Tomonlarning har biri oʻz davlati hududida boshqa Ahdlashuvchi Tomonning vakolatli organi tomonidan avtomobil transporti vositalariga berilgan roʻyxatga olish hujjatlarini va nomer belgilarini, shuningdek, avtotransport vositalarini boshqarish huquqini beruvchi malaka guvohnomalarini tan oladi.

Joʻnatish punkti va yetkazib berish punkti boshqa davlatning hududida yoki joʻnatish punkti boshqa davlatning hududida, yetkazib berish punkti esa uchinchi davlatning hududida joylashgan boʻlsa, Ahdlashuvchi Tomonlardan birining avtotransport vositalarida yuk tashishga ruxsat berilmaydi, biroq Ahdlashuvchi Tomonlarning vakolatli organlari bunday tashuvlarning amalga oshirilishiga har bir alohida holatda ruxsat berishlari mumkin.

Ushbu Bitim asosida amalga oshiriladigan xalqaro avtomobil qatnovlari bilan bogʻliq tashkiliy, texnikaviy va tijorat masalalari ahdlashuvchi Tomonlarning vakolatli organlari oʻrtasida tuziladigan ikki tomonlama protokollar va shartnomalar bilan tartibga solinadi.

Ushbu Bitimning bajarilishidan kelib chiqadigan hisob-kitoblar va toʻlovlar Ahdlashuvchi Tomonlar oʻrtasida tuzilgan toʻlovlar toʻgʻrisidagi bitimlar asosida amalga oshiriladi.

Ushbu Bitim asosida Ahdlashuvchi Tomonlardan birining tashuvchilari tomonidan boshqa davlatning hududida hamda hududi orqali yoʻlovchilar va yuklar tashuvini amalga oshirish, shuningdek, ushbu tashuvlarni bajaruvchi avtotransport vositalari, ikkala davlatlarning milliy qonunchiligi bilan oʻrnatilgan avtotransport vositalarining yuk tashish normalariga muvofiq yukning ogʻirligi, gabaritlari oshirib yuborilgani uchun olinadigan yigʻimlardan tashqari, yoʻllardan foydalanganlik yoki yoʻllarni saqlash bilan bogʻliq soliqlar va davlat yigʻimlaridan ozod etiladilar.

Chegara, bojxona va sanitariya nazoratiga oid, shuningdek, ushbu Bitimda alohida kelishib olinmagan boshqa barcha masalalarga nisbatan ikkala davlatning milliy qonunchiligi qoʻllaniladi.

Ahdlashuvchi Tomonlar davlatlarining tegishli organlari ogʻir kasallarni, yoʻlovchilarni avtobuslarda muntazam tashuvlarni, shuningdek, chorva mollarini, tez ayniydigan va xavfli yuklar tashuvlarini chegara, boj va sanitariya nazoratidan navbatsiz oʻtkazadilar.

Ahdlashuvchi Tomonlar vakolatli organlar vakillaridan iborat Aralash Komissiyani tuzadilar. Uning asosiy vazifalari quyidagilardan iborat boʻladi:

a) ushbu Bitimning bajarilishini taʼminlash;

b) ruxsatnomalar shakllarini, vaqtini, marshrutlarini, kontingentini belgilash hamda ruxsatnomalar ayirboshlashni tashkil etish;

v) ushbu Bitim bilan hal etilmagan muammolar yechimini oʻrganish va ularni hal etish boʻyicha takliflar kiritish;

g) mazkur Bitimni qoʻllash boʻyicha bahsli masalalarni koʻrib chiqish va ularni hal etish.

Aralash Komissiya Ahdlashuvchi Tomonlardan birining iltimosiga koʻra yigʻiladi.

Aralash Komissiya ushbu Bitimga oʻzgartirishlar kiritish yuzasidan takliflar ishlab chiqishi va ikkala davlatlarning milliy qonunchiligiga muvofiq ularni koʻrib chiqish uchun kiritishlari mumkin.

Ushbu Bitim uning kuchga kiritilishi uchun har ikkala davlatlarda ichki davlat rasmiy tartiblari bajarilganligi haqida diplomatik yoʻllar orqali yozma ravishda ogohlantirish olingan kundan boshlab kuchga kiradi. Mazkur Bitim noaniq muddatga tuzilgan va u Ahdlashuvchi Tomonlardan biri uning amal qilishini toʻxtatish niyati toʻgʻrisida ikkinchi ahdlashuvchi Tomonni diplomatik yoʻllar orqali uch oy oldin ogohlantirgungacha amal qiladi.

1994-yil 22-dekabrda Toshkent shahrida oʻzbek, belarus va rus tillarida ikki nusxada tuzildi, barcha matnlar bir xil kuchga egadir. Mazkur Bitimning qoidalarini talqin qilishda kelishmovchiliklar paydo boʻlgan taqdirda rus tilidagi matn asos qilib olinadi.