Oʻzbekiston davlat sanʼat muzeyi binosining tashqi qismini milliy ruhda, zamonaviy arxitektura dizayniga mos ravishda rekonstruksiya qilish, ekspozitsiya zallarini mukammal taʼmirlash, zarur moʻtadil ob-havoni taʼminlovchi zamonaviy uskunalar bilan jihozlash hamda uning moddiy-texnika bazasini mustahkamlash maqsadida Vazirlar Mahkamasi qaror qiladi:

1. Oʻzbekiston Respublikasi Madaniyat va sport ishlari vazirligi, “Davarxitektqurilish” qoʻmitasi hamda Toshkent shahar hokimligining Oʻzbekiston davlat sanʼat muzeyi binosini (keyingi oʻrinlarda inshoot deb ataladi) milliy ruhda rekonstruksiya qilish va jihozlash ishlarini bajarish doirasida:

Toshkent shahar hokimligining “Yagona buyurtmachi xizmati” injiniring kompaniyasini buyurtmachi etib belgilash;

bosh loyihachi va bosh pudratchi tashkilotlarni qonun hujjatlarida belgilangan tartibda aniqlash toʻgʻrisidagi takliflariga rozilik berilsin.

2. Oʻzbekiston Respublikasi Iqtisodiyot vazirligi va Moliya vazirligi:

Oʻzbekiston Respublikasining 2015-yilgi Investitsiya dasturi doirasida tanlov savdolari natijasida tejalgan mablagʻlar hisobidan loyiha-smeta hujjatlarini ishlab chiqish uchun mablagʻ ajratilishni nazarda tutsinlar;

belgilangan tartibda ekspertizadan oʻtkazilgan loyiha-smeta hujjatlari asosida inshootni rekonstruksiya qilish va uning moddiy-texnika bazasini mustahkamlash ishlarini Oʻzbekiston Respublikasining 2016-yilgi va kelgusi yillardagi Investitsiya dasturiga kiritsinlar.

3. Toshkent shahar hokimligi “Davarxitektqurilish” qoʻmitasi va buyurtmachi bilan birgalikda:

bosh loyihachiga zaruriy maʼlumotlar (hokim qarori, arxitektura-rejalashtirish topshirigʻining 1-2 qismlari, toposʼyomka, obyektning texnik holatini oʻrganish toʻgʻrisidagi xulosalari, belgilangan tartibda rasmiylashtirilgan nuqson dalolatnomalari va tasdiqlangan loyiha topshirigʻi)ni taqdim etsin va shartnomani rasmiylashtirsin;

inshootning tashqi qismi va tegishli hududini rekonstruksiya qilish, binoning ichki qismini mukammal taʼmirlash, binoda zarur moʻtadil ob-havoni taʼminlovchi uskunalar bilan jihozlash va sayyohlar uchun zarur shart-sharoitlar yaratish, namunali servis xizmatini koʻrsatish (hunarmandlar shaharchasi, art-kafe, sovgʻalar doʻkonlari qurish) uchun moʻljallangan loyiha-smeta hujjatlarini tayyorlasin.

4. “Davarxitektqurilish” qoʻmitasi belgilangan tartibda loyiha-smeta hujjatlarini davlat ekspertizasidan oʻtkazish va bajarilayotgan qurilish-montaj va mukammal taʼmirlash ishlari yuzasidan davlat arxitektura-qurilish nazoratini amalga oshirsin.

5. Oʻzbekiston Respublikasi Iqtisodiyot vazirligi “Oʻzmetkombinat” aksiyadorlik jamiyati, “Oʻzqurilishmateriallari” aksiyadorlik kompaniyasi bilan birgalikda, loyiha-smeta hujjatlariga koʻra, bosh loyihachi tashkilot tomonidan tasdiqlangan hisob-kitoblarga asosan metalloprokat va sementni cheklangan narxlarda, belgilangan tartibda ajratilishini taʼminlasinlar.

6. Oʻzbekiston Respublikasi Madaniyat va sport ishlari vazirligi muzeydagi mavjud moddiy va maʼnaviy jihatdan eskirgan, iqtisodiy samarasiz va foydalanishga yaroqsiz boʻlgan uskunalarni belgilangan tartibda hisobdan chiqarish ishlarini amalga oshirsin.

7. Oʻzbekiston davlat sanʼat muzeyi “Oʻzbekturizm” milliy kompaniyasi bilan hamkorlikda milliy merosimiz, qadimiy tariximiz va madaniyatimizni targʻib qilish maqsadida Oʻzbekiston davlat sanʼat muzeyiga xorijiy sayyohlarni keng jalb etish chora-tadbirlarini amalga oshirsin.

8. Oʻzbekiston Respublikasi Madaniyat vazirligi Oliy va oʻrta maxsus taʼlim vazirligi, Xalq taʼlimi vazirligi, Oʻrta maxsus, kasb-hunar taʼlimi markazi, Respublika Maʼnaviyat targʻibot markazi bilan birgalikda Oʻzbekiston davlat sanʼat muzeyida muntazam ravishda turli mavzulardagi davra suhbatlari, uchrashuvlar, “Mahorat darslari” kabi maʼnaviy tadbirlar, shuningdek maktab dasturiga oid ochiq darslar oʻtkazilishini va ularga oʻquv yurtlari oʻquvchi-talabalarini keng jalb etish choralarini koʻrsin.

9. Oʻzbekiston Respublikasi Madaniyat vazirligi tegishli vazirliklar va idoralar bilan hamkorlikda 2018-yilda Oʻzbekiston davlat sanʼat muzeyining 100 yilligini nishonlash hamda uni yuqori darajada oʻtkazish boʻyicha chora-tadbirlarini ishlab chiqsin.

10. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari A.I. Ikramov zimmasiga yuklansin.