Qimmatli va yo‘qolib borayotgan o‘simliklar hamda hayvonlar turlarining nodir genofondini muhofaza qilish va saqlab qolishni kuchaytirish, yovvoyi holda o‘suvchi dorivor, ozuqa va manzarali o‘simliklarning turlarini, yovvoyi hayvonlar mahsulotlarini chetdan respublikaga olib kirishni va respublikadan chetga olib chiqib ketishni tartibga solish, ularning turi va soni saqlanishini ta’minlash maqsadida O‘zbekiston Respublikasi Oliy Kengashi qaror qiladi:

1. Mulk shaklidan, xo‘jalik faoliyati turidan va kimning tasarrufida ekanligidan qati nazar barcha korxonalar va tashkilotlarga, shuningdek xususiy shaxslarga tegishli ruxsatnomasi bo‘lmay turib yovvoyi hayvonlarning (shu jumladan zaharli jonivorlar va baliqlarning) qimmatli va yo‘qolib borayotgan turlarini ovlab tutish (otish), tutqinlikda saqlash va respublikadan chetga olib chiqib ketish, ulardan zahar olish va bu zaharlarni sotish, dorivor, ozuqa va manzarali o‘simliklarning yovvoyi turlarini tayyorlash man etilsin.

2. Belgilab qo‘yilsinki:

“Qizil kitob”ga kiritilgan o‘simliklar va jonivorlarni tabiatdan har qanday ko‘rinishda tortib ajratib olishga, alohida hollarda O‘zbekiston Respublikasi Tabiatni muhofaza qilish davlat qo‘mitasi taqdimnomasi hamda O‘zbekiston Respublikasi Fanlar akademiyasining xulosasiga ko‘ra O‘zbekiston Respublikasi Vazirlar Mahkamasi beradigan ruxsatnomalar asosida yo‘l qo‘yiladi;

ovlanadigan hayvonlarni (shu jumladan zaharli jonivorlar va baliqlarni) ovlash hamda ularning mahsulotlarini to‘plash, yovvoyi holda o‘suvchi dorivor, ozuqa va manzarali o‘simliklarni tayyorlash O‘zbekiston Respublikasi Fanlar akademiyasining xulosalari asosida O‘zbekiston Respublikasi Tabiatni muhofaza qilish davlat qo‘mitasi beradigan ruxsatnomalar bo‘yicha amalga oshiriladi;

“Qizil kitob”ga kiritilgan yovvoyi holda o‘suvchi dorivor, ozuqa va manzarali o‘simliklarning turlarini, yovvoyi hayvonlarni (shu jumladan zaharli jonivorlar va baliqlarni), ularning mahsulotlarini, kolleksiyalar, gerbariylar va o‘ljalarni chetdan respublikaga olib kirishga va respublikadan chetga olib chiqib ketishga O‘zbekiston Respublikasi Tabiatni muhofaza qilish davlat qo‘mitasi va O‘zbekiston Respublikasi Fanlar akademiyasining xulosalari asosida O‘zbekiston Respublikasi Tashqi iqtisodiy aloqalar vazirligi beradigan litsenziyalar bo‘yicha ruxsat etiladi.

3. O‘zbekiston Respublikasi Vazirlar Mahkamasi ikki oylik muddat ichida:

yovvoyi hayvonlarni (shu jumladan zaharli jonivorlarni ) ko‘paytirish va ularning mahsulotlarini olish maqsadida tutqinlikda saqlash tartibini;

“Qizil kitob”ga kiritilgan yovvoyi hayvonlar va o‘simliklarni ovlaganlik (otganlik), to‘plaganlik, sotganlik va respublikadan chetga olib chiqib ketish uchun to‘lanadigan haq miqdori, uni undirib olish va budjetga o‘tkazish tartibini, shuningdek yovvoyi holda o‘suvchi dorivor, ozuqa va manzarali o‘simliklar tayyorlashga ruxsatnomalar berish tartibini tasdiqlasin.

4. O‘zbekiston Respublikasi Tabiatni muhofaza qilish davlat qo‘mitasi, Prokuraturasi, Ichki ishlar vazirligi va Davlat bojxona qo‘mitasi o‘simlik va hayvonot olami tabiiy boyliklaridan foydalanilishi, ularni chetdan respublikaga olib kirish va respublikadan chetga olib chiqib ketish qoidalariga rioya etilishi ustidan lozim darajadagi nazoratni ta’minlasinlar.

5. Ushbu qaror ijrosini nazorat etish O‘zbekiston Respublikasi Vazirlar Mahkamasi zimmasiga yuklansin.