“Oʻzbekiston Respublikasining Davlat chegarasi toʻgʻrisida”gi Oʻzbekiston Respublikasi Qonuniga muvofiq, Oʻzbekiston Respublikasining qoʻshni mamlakatlar bilan Davlat chegarasi chizigʻini belgilash ishlarini tashkil etish maqsadida Vazirlar Mahkamasi qaror qiladi:

1. Belgilansinki, Davlat chegarasi chizigʻi xalqaro shartnomalar bilan aniqlanadi va joylarda oʻz ichiga asosiy (chegara ustuni), qoʻshimcha va yordamchi belgilarni (qorovultepalar, buylar, ishorat qoziqlari, stvollar va boshqa belgilar) oʻz ichiga oluvchi chegara belgilari tizimi bilan belgilanadi.

2. Belgilab qoʻyilsinki:

asosiy chegara belgisi Davlat chegarasining daxlsizligi, mamlakatning suvereniteti, hududiy yaxlitligi ramzi hisoblanadi va oʻtkazish manzillarida, quruqlikdagi uchastkalardan daryo (koʻl, dengiz) uchastkalariga Davlat chegarasidan oʻtish joylarida, uch davlat chegarasi tutashgan joylarda va Davlat chegarasi chizigʻi oʻtishining boshqa xarakterli nuqtalarida oʻrnatiladi;

qoʻshimcha chegara belgilari asosiy chegara belgilari oʻrtasida Davlat chegarasi oʻtishi chizigʻini belgilash uchun oʻrnatiladi;

yordamchi chegara belgilari ayrim borish qiyin boʻlgan quruqlikdagi uchastkalarda va daryolar, koʻllar va boshqa suv havzalarining suv yuzasida Oʻzbekiston Respublikasi Davlat chegarasi chizigʻi oʻtishini belgilash uchun qoʻllaniladi:

asosiy, qoʻshimcha va yordamchi chegara belgilari Oʻzbekiston Respublikasining mulki hisoblanadi.

3. Oʻzbekiston Respublikasining asosiy chegara belgisining tavsifi ilovaga muvofiq tasdiqlansin.

Belgilansinki, qoʻshimcha, yordamchi chegara belgilari, stvol belgilari, buylar, ishorat qoziqlarining shakllari va oʻlchamlari Demarkatsiya boʻyicha hukumatlararo komissiyalar tomonidan tasdiqlanadi.

4. Belgilansinki:

Oʻzbekiston Respublikasining chegara belgilari Davlat chegarasi chizigʻida, geografik koordinatlari aniq belgilangan va Demarkatsiya boʻyicha hukumatlararo komissiya protokoli tuzilgan holda oʻrnatiladi. Chegara belgilari aniq koʻrinib turishi, mustahkam va chidamli boʻlishi kerak;

chegara belgilari oʻrnatilgandan keyin qonun hujjatlarida belgilangan tartibda Milliy xavfsizlik xizmatining chegara qoʻshinlariga beriladi. Milliy xavfsizlik xizmatining chegara qoʻshinlari chegara belgilarining qoʻriqlanishini va ularning keyinchalik saqlanishini taʼminlaydi.

5. Mazkur qarorning bajarilishini nazorat qilish Oʻzbekiston Respublikasining Bosh vaziri Oʻ.T. Sultonov zimmasiga yuklansin.

Qoʻshni davlatlar bilan Oʻzbekiston Respublikasining Davlat chegarasini demarkatsiya qilishda oʻrnatiladigan Oʻzbekiston Respublikasining asosiy chegara belgisi* koʻndalang kesimi 18x22 sm, balandligi 265 sm boʻlgan va yuqori qismida toʻrt qirrali piramidal shaklli toʻgʻri burchakli konstruksiyadan iborat temir-betondan iboratdir. Chegara belgisi yerga oʻrnatilgandan keyin uning konstruksiyasi oʻzida balandligi 200 sm ustunni, poydevorni va toʻkilgan toshni ifodalaydi.

Asosiy chegara belgisi butun ustun boʻylab Oʻzbekiston Respublikasining Davlat bayrogʻi rangiga mos rangga boʻyaladi.

Oʻzbekiston Respublikasining asosiy chegara belgisida Oʻzbekiston Respublikasi Davlat gerbi oʻrnatiladi va mazkur belgining tartib raqami yozib qoʻyiladi (arab raqamlari bilan).

Oʻzbekiston Respublikasi Davlat gerbi tasviri qoliplash usuli bilan 22x22 sm oʻlchamli metall plastinkaga tushiriladi. Davlat gerbi toʻkilgan toshdan 165 sm balandlikda (plastinkaning pastida) asosiy chegara belgisining qoʻshni davlat tomonga qaratilgan tomonida oʻrnatiladi.

10 sm balandlikdagi tartib raqami havo rang fonda oq emal boʻyoq bilan boʻyaladi. Raqamlar Davlat gerbi tasviri tushirilgan plastinkadan 5 sm quyida oʻrnatiladi. (Tegishli asosiy chegara belgisi raqami, shuningdek qoʻshimcha chegara belgilarida ham koʻrsatiladi, ularning tartib raqami kasr son shaklida yoziladi, suratda asosiy chegara belgisi raqami va maxrajda mazkur qoʻshimcha belgining oʻzining tartib raqami koʻrsatiladi.).

Asosiy chegara belgilarida Davlat gerbi tasviri va tartib raqamidan boshqa belgilar nazarda tutilmaydi.

Chegara belgisi aniq koʻrinib turadigan, mustahkam va chidamli boʻlishi kerak. Belgi chegara belgisining asosiy maydonchasi yerning choʻkishini istisno etadigan, uzoq vaqt saqlanishni hamda inson yoki tabiat kuchlarining (suv toshqini, oʻpirilish, koʻchki) taʼsiri natijasida yemirilishdan yoki yoʻq qilinishdan ishonchli himoyalanishni kafolatlovchi zichlantirish va temir-betonga mahkamlash ishlari olib borilgan holda tuproqning choʻkishini istisno etadigan qattiq (zich) yerga kamida 65 sm chuqurlikda oʻrnatilishi kerak.

Chegara belgilarini choʻkadigan yerga va siljib turadigan tuproqqa oʻrnatish taqiqlanadi. Chegara belgilarini choʻl-qumloq joylarda oʻrnatish boʻyicha texnologiya sxemalarini ishlab chiqishda poydevorning asosini zichlash va eroziyaga qarshi jarayonlarni amalga oshirish (shagʻal yotqizish, chim bosish va boshqalar) shart ekanligi nazarda tutiladi.