Mehnat migratsiyasi masalalari boʻyicha davlatlararo hamkorlikning oʻsib borayotgan koʻlamlarini, Oʻzbekiston fuqarolarini ishga joylashtirish uchun ish oʻrinlari berish xohishini bildirgan mamlakatlar va chet el kompaniyalari soni koʻpayganligini hisobga olib, shuningdek respublika fuqarolarining chet ellarda mehnat faoliyatini amalga oshirish uchun chiqib ketishini tashkil etish tizimini va uning mexanizmini tartibga solish, fuqarolarning chet ellarda ishga joylashishini taʼminlaydigan mehnat organlari infratuzilmasini yanada rivojlantirish maqsadida Vazirlar Mahkamasi qaror qiladi:

1. Mehnat migratsiyasi jarayonlarini tartibga solish, Oʻzbekiston Respublikasi fuqarolarining chet elda va xorijiy fuqarolarning Oʻzbekiston Respublikasida ishga joylashishini taʼminlash masalalarini hal etish Hukumat qarorlariga muvofiq Oʻzbekiston Respublikasi Mehnat va aholini ijtimoiy muhofaza qilish vazirligi huzuridagi Tashqi mehnat migratsiyasi masalalari agentligiga yuklanganligi maʼlumot uchun qabul qilinsin.

Quyidagilar:

Oʻzbekiston Respublikasi fuqarolarining chet ellardagi mehnat faoliyati tartibi toʻgʻrisidagi Nizom 1-ilovaga muvofiq;

Oʻzbekiston Respublikasi Mehnat va aholini ijtimoiy muhofaza qilish vazirligi huzuridagi Tashqi mehnat migratsiyasi masalalari agentligining xodimlarning umumiy cheklangan soni 39 nafar, shu jumladan boshqaruv xodimlari 28 nafar boʻlgan tuzilmasi 2-ilovaga muvofiq;

Tashqi mehnat migratsiyasi masalalari agentligi toʻgʻrisidagi Nizom 3-ilovaga muvofiq;

Oʻzbekiston Respublikasi fuqarolarini xorijiy mamlakatlarga ishga joʻnatish uchun nomzodlarni tanlab olish boʻyicha Idoralararo komissiyaning yangilangan tarkibi 4-ilovaga* muvofiq tasdiqlansin.

2. Toshkent, Fargʻona, Qarshi va Nukus shaharlarida Fuqarolarni chet ellarda ishga joylashtirish boʻyicha xoʻjalik hisobidagi mintaqaviy byurolar tashkil etilsin.

Belgilansinki, Fuqarolarni chet ellarda ishga joylashtirish boʻyicha xoʻjalik hisobidagi mintaqaviy byurolar yuridik shaxs huquqiga ega boʻlgan davlat korxonalari hisoblanadi va Oʻzbekiston Respublikasi Mehnat va aholini ijtimoiy muhofaza qilish vazirligiga bevosita boʻysunadi.

Quyidagilar mintaqaviy Byurolarning asosiy vazifalari etib belgilansin:

Oʻzbekiston Respublikasi fuqarolariga chet ellarda ishga joylashishda koʻmaklashish;

Oʻzbekiston Respublikasi fuqarolarini chet elda ishga joylashish imkoniyatlari va shart-sharoitlari toʻgʻrisidagi axborot bilan taʼminlash;

chet ellarga ishga joʻnatish uchun xorijiy ish beruvchilarning talablariga muvofiq boʻlgan nomzodlarni tanlash;

chet ellarda ishga joylashishni rasmiylashtirish uchun zarur boʻlgan chiqish hujjatlarini rasmiylashtirishda, shu jumladan viza olishda va boshqa hujjatlarni olishda Oʻzbekiston Respublikasi fuqarolariga yordam berish.

Fuqarolarni chet ellarda ishga joylashtirish boʻyicha xoʻjalik hisobidagi mintaqaviy byurolar faoliyatini muvofiqlashtirish Oʻzbekiston Respublikasi Mehnat va aholini ijtimoiy muhofaza qilish vazirligi huzuridagi Tashqi mehnat migratsiyasi masalalari agentligiga yuklansin.

3. Quyidagilar:

Fuqarolarni chet ellarda ishga joylashtirish boʻyicha xoʻjalik hisobidagi mintaqaviy byuroning namunaviy tuzilmasi 5-ilovaga muvofiq;

Fuqarolarni chet ellarda ishga joylashtirish boʻyicha xoʻjalik hisobidagi mintaqaviy byuro toʻgʻrisidagi namunaviy nizom 6-ilovaga muvofiq tasdiqlansin.

4. Oʻzbekiston Respublikasi Mehnat va aholini ijtimoiy muhofaza qilish vazirligi huzuridagi Tashqi mehnat migratsiyasi masalalari agentligi huzurida xoʻjalik hisobidagi Chet ellarga ketayotgan fuqarolarni oldindan koʻniktirish va oʻqitish markazi tashkil etilsin.

Quyidagilar Markazning asosiy vazifalari etib belgilansin:

Tashqi mehnat migratsiyasi masalalari agentligi va Fuqarolarni chet ellarda ishga joylashtirish boʻyicha xoʻjalik hisobidagi mintaqaviy byurolar bilan tuzilgan shartnomalar boʻyicha fuqarolarni oldindan koʻniktirish va oʻqitish;

chet ellarga ishga ketayotgan fuqarolarga boriladigan mamlakatning asosiy qonun hujjatlari, anʼanalari va xulq-atvor normalari toʻgʻrisida maʼlumot berish;

boriladigan mamlakat tilini muomala qilish va mehnat funksiyalarini bajarish, kontrakt boʻyicha ishga joylashadigan ishlab chiqarishlarda texnika xavfsizligi va mehnatni muhofaza qilish qoidalarini bilish darajasida oʻqitish;

chet ellarga ishlash uchun joʻnatilayotgan fuqarolarning sogʻligi holatini xorijiy ish beruvchilarning talablarini hisobga olgan holda, vakolatli tibbiyot muassasalarini jalb etib kompleks tibbiy koʻrikdan oʻtkazish.

5. Oʻzbekiston Respublikasi Mehnat va aholini ijtimoiy muhofaza qilish vazirligi:

Qoraqalpogʻiston Respublikasi Vazirlar Kengashi, Fargʻona, Qashqadaryo viloyatlari va Toshkent shahar hokimliklari bilan birgalikda Fuqarolarni chet ellarda ishga joylashtirish boʻyicha xoʻjalik hisobidagi mintaqaviy byurolar faoliyati uchun zarur shart-sharoitlar yaratsin;

Tashqi mehnat migratsiyasi masalalari agentligi va Fuqarolarni chet ellarda ishga joylashtirish boʻyicha xoʻjalik hisobidagi mintaqaviy byurolar ishining puxta tashkil etilishini taʼminlasin, ular faoliyati ustidan nazorat oʻrnatsin;

Oʻzbekiston Respublikasi Tashqi ishlar vazirligi, Tashqi iqtisodiy aloqalar, investitsiyalar va savdo vazirligi bilan birgalikda mehnat migratsiyasi sohasida davlatlararo va idoralararo bitimlar loyihalarini tayyorlash, fuqarolarning ustun darajada iqtisodiy rivojlangan mamlakatlarda ishga joylashishi koʻlamlarini kengaytirish ishlarini faollashtirsin;

yilning har choragida Vazirlar Mahkamasiga fuqarolarning chet ellarda ishga joylashishi va tashqi mehnat migratsiyasini rivojlantirish boʻyicha axborot bersin.

6. Oʻzbekiston Respublikasi Ichki ishlar vazirligi:

mehnat faoliyatini amalga oshirish uchun chet ellarga ketayotgan respublika fuqarolari uchun chiqish hujjatlarini rasmiylashtirishda Tashqi mehnat migratsiyasi masalalari agentligiga va Fuqarolarni chet ellarda ishga joylashtirish boʻyicha xoʻjalik hisobidagi mintaqaviy byurolarga koʻmaklashsin;

joylardagi mehnat va aholini ijtimoiy muhofaza qilish organlari, Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari bilan birgalikda fuqarolarning chet ellardagi yashirin mehnat migratsiyasiga oid profilaktika va oldini olish ishlarini kuchaytirsin.

7. Oʻzbekiston Respublikasi Tashqi ishlar vazirligi, Oʻzbekiston Respublikasining chet ellardagi elchixonalari va konsulliklari mehnat faoliyatini amalga oshirish uchun xorijiy davlatga kelgan fuqarolarni majburiy ravishda konsullik hisobiga qoʻysin, shuningdek ularga har tomonlama huquqiy yordam koʻrsatsin va ularni himoya qilsin.

8. Oʻzbekiston Respublikasi Hukumatining 7-ilovaga muvofiq ayrim qarorlariga oʻzgartirish va qoʻshimchalar kiritilsin, shuningdek ularning baʼzilari oʻz kuchini yoʻqotgan deb hisoblansin.

Oʻzbekiston Respublikasi Adliya vazirligi bir oy muddatda qonun hujjatlari va normativ hujjatlarga mazkur qarordan kelib chiquvchi oʻzgartirishlar kiritsin.

9. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari R.S. Azimov zimmasiga yuklansin.

Mazkur Nizom “Aholini ish bilan taʼminlash toʻgʻrisida”gi Oʻzbekiston Respublikasi Qonuniga muvofiq ishlab chiqilgan va mehnat faoliyatini amalga oshirish uchun chet ellarga ketayotgan Oʻzbekiston Respublikasi fuqarolariga tatbiq etiladi.

1. Oʻzbekiston Respublikasi fuqarolari Oʻzbekiston Respublikasi qonun hujjatlariga muvofiq hukumatlararo, idoralararo shartnomalar va bitimlar asosida faqat Tashqi mehnat migratsiyasi masalalari agentligi va Fuqarolarni chet ellarda ishga joylashtirish boʻyicha xoʻjalik hisobidagi mintaqaviy byurolarning koʻmagida Oʻzbekiston Respublikasi Mehnat va aholini ijtimoiy muhofaza qilish vazirligi tomonidan belgilanadigan tartibda mehnat faoliyatini amalga oshirish uchun chet elga chiqish huquqiga egadirlar.

Oʻzbekiston Respublikasi fuqarolari xususiy mehnat kontraktlari boʻyicha mehnat faoliyatini amalga oshirish uchun chet ellarga faqat Oʻzbekiston Respublikasi Mehnat va aholini ijtimoiy muhofaza qilish vazirligi huzuridagi Tashqi mehnat migratsiyasi masalalari agentligi tomonidan beriladigan ruxsatnomalar boʻyicha chiqish huquqiga egadirlar.

2. Fuqarolarning xususiy kontraktlar boʻyicha chet ellarda mehnat faoliyatini amalga oshirish bilan bogʻliq chiqish hujjatlarini rasmiylashtirish Tashqi mehnat migratsiyasi masalalari agentligi tomonidan belgilangan shaklga muvofiq beriladigan ruxsatnomalar asosida Oʻzbekiston Respublikasi Ichki ishlar vazirligi tomonidan amalga oshiriladi.

3. Tashqi mehnat migratsiyasi masalalari agentligi tomonidan ruxsatnoma berilgandan keyin fuqarolar chiqishni rasmiylashtirish uchun yashash joyidagi Oʻzbekiston Respublikasi Ichki ishlar vazirligining kelish, ketish va fuqarolik boshqarmasi boʻlinmasiga ariza beradilar.

4. Oʻzbekiston Respublikasining xususiy mehnat kontraktiga ega boʻlgan fuqarolari chet ellarda ijtimoiy muhofazalanishini taʼminlash maqsadida Tashqi mehnat migratsiyasi masalalari agentligiga quyidagi hujjatlarni ikki nusxada taqdim etadilar:

ariza;

xorijiy firmadan (ish beruvchidan) olingan davlat tiliga tarjima qilingan, barcha ijtimoiy kafolatlar va tibbiy sugʻurta koʻrsatilgan, shuningdek mehnat vizasi (EMPLOYMENT VIZA) bilan taʼminlash borasida ish beruvchining majburiyati nazarda tutilgan holda notarial tasdiqlangan va Oʻzbekiston Respublikasining chet eldagi konsullik muassasasi tomonidan legalizatsiya qilingan kontrakt nusxasi. Agar hujjatga apostil qoʻyilgan boʻlsa, legallashtirish talab etilmaydi;

ish beruvchi toʻgʻrisidagi qisqa maʼlumotlar;

maʼlumotnoma-xolisnoma;

Oʻzbekiston Respublikasi Sogʻliqni saqlash vazirligi tomonidan tasdiqlangan tegishli shakldagi sogʻligining holati toʻgʻrisida maʼlumotnoma.

5. Ruxsatnoma blankasida ruxsatnomani bergan organning nomi, uning yuridik manzili, roʻyxatdan oʻtkazish raqami, ruxsatnoma berilgan mutaxassisning familiyasi, ismi, otasining ismi, uning fuqaroligi, faoliyat turi, ruxsatnoma amal qiladigan hudud, amal qilish muddati, uzaytirish vaqti koʻrsatiladi. Ruxsatnoma Tashqi mehnat migratsiyasi masalalari agentligining vakolatli rahbari tomonidan imzolanadi va muhr bilan tasdiqlanadi.

6. Tashqi mehnat migratsiyasi masalalari agentligining ruxsatnomasi bilan mehnat kontrakti asosida chet elga ketgan Oʻzbekiston Respublikasi fuqarolari ishga joylashish mamlakatida Oʻzbekiston Respublikasi konsullik muassasasida hisobda turishi shart. Respublikaning vakillik organlari boʻlmagan taqdirda oʻzbekistonlik fuqarolar MDH mamlakatlarining Oʻzbekiston Respublikasi Hukumati tomonidan vakil qilingan konsullik organlarida roʻyxatdan oʻtishi kerak.

7. Fuqarolarga chet ellarda mehnat faoliyatini amalga oshirishga ruxsatnoma mazkur Nizomning 4-bandida nazarda tutilgan hujjatlar Oʻzbekiston Respublikasi fuqarolari tomonidan taqdim etilgan kundan boshlab 15 kun mobaynida Oʻzbekiston Respublikasi fuqarolarini xorijiy mamlakatlarga ishga joʻnatish uchun nomzodlarni tanlash boʻyicha Idoralararo komissiyaning qarorlari asosida Tashqi mehnat migratsiyasi masalalari agentligi tomonidan beriladi.

8. Chet ellarda mehnat faoliyatini amalga oshirishga ruxsatnoma berilishining asosli rad etilishi ariza beruvchiga ruxsatnoma berish rad etilishi toʻgʻrisida qaror qabul qilingandan keyin bir hafta muddatda yozma ravishda yuboriladi.

9. Ruxsatnoma mehnat kontrakti muddatiga beriladi. Ariza beruvchining iltimosiga koʻra mazkur kontrakt uzaytirilgan taqdirda ruxsatnomaning amal qilish muddati belgilangan tartibda qayta koʻrib chiqilishi mumkin.

10. Ruxsatnoma berilganligi va uning amal qilish muddati uzaytirilganligi uchun belgilangan tartibda toʻlov undiriladi. Mazkur toʻlov ruxsatnoma berish boʻyicha hujjatlarni koʻrib chiqish va rasmiylashtirish bilan bogʻliq xarajatlarni qoplashga sarflanadi.

11. Ruxsatnoma olishning mazkur Nizomda belgilangan majburiy tartibi Oʻzbekiston Respublikasining quyidagi fuqarolariga nisbatan qoʻllanilmaydi:

a) Oʻzbekiston Respublikasining chet ellardagi diplomatik va konsullik muassasalari xodimlari;

b) oliy kasb-hunar taʼlimi muassasalarining hukumatlararo dasturlari doirasida taʼtil davrida ishlab chiqarish amaliyotini oʻtayotgan talabalar;

v) Oʻzbekiston Respublikasining chet ellardagi muxbirlari va jurnalistlari;

g) xorijiy oliy kasb-hunar taʼlimi muassasalarida maʼruzalar kursi oʻqish va boshqa ishlar uchun taklif etilgan lektorlar va instruktorlar;

d) Oʻzbekiston Respublikasining xorijiy mamlakatlar bilan tuzgan davlatlararo bitimlarida ishga joylashishning ular uchun oʻzgacha tartibi belgilangan shaxslar, shuningdek Tashqi mehnat migratsiyasi masalalari agentligi va Fuqarolarni chet ellarda ishga joylashtirish boʻyicha xoʻjalik hisobidagi mintaqaviy byurolar tomonidan xorijiy tashkilotlar bilan tuzilgan idoralararo shartnomalar (bitimlar) boʻyicha ishga ketayotgan shaxslar.

1. Tashqi mehnat migratsiyasi masalalari agentligi (keyingi oʻrinlarda Agentlik deb yuritiladi) yuridik shaxs huquqiga ega boʻlgan hamda Mehnat va aholini ijtimoiy muhofaza qilish vazirligiga qarashli davlat unitar korxonasi hisoblanadi.

Agentlik Oʻzbekiston Respublikasi qonun hujjatlariga muvofiq xalqaro huquqiy normalar va qoidalarga asoslangan mehnat migratsiyasi jarayonlarini tartibga solib borishga doir faoliyatni respublikaning milliy manfaatlarini hisobga olgan holda amalga oshiradi.

2. Agentlik oʻz faoliyatida Oʻzbekiston Respublikasi Konstitutsiyasiga, Oʻzbekiston Respublikasi qonunlariga, Oliy Majlis qarorlariga va boshqa hujjatlariga, Oʻzbekiston Respublikasi Prezidentining farmonlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga, Oʻzbekiston Respublikasi Mehnat va aholini ijtimoiy muhofaza qilish vazirligining buyruqlariga hamda hayʼati qarorlariga, shuningdek ushbu Nizomga amal qiladi.

3. Agentlik mustaqil balansga, banklarda hisob raqamlariga, valyuta va boshqa hisob raqamlariga, Oʻzbekiston Respublikasi Davlat gerbi tasviri tushirilgan, oʻz nomi davlat va ingliz tillarida yozilgan muhrga ega boʻladi.

4. Quyidagilar Agentlikning asosiy vazifalari hisoblanadi:

mehnat migratsiyasi sohasidagi xalqaro hamkorlik loyihalarini ishlab chiqish va amalga oshirish;

Oʻzbekiston Respublikasi fuqarolarini chet ellarda va xorijiy fuqarolarni Oʻzbekiston Respublikasida ishga joylashtirish uchun kvotalar ajratish va ruxsatnomalar berish masalalari boʻyicha xorijiy davlatlarning vakolatli organlari bilan hamkorlik qilish;

Oʻzbekiston Respublikasi fuqarolarining chet ellarda mehnat faoliyatini amalga oshirish huquqini roʻyobga chiqarishda ishga joylashtirish, chet ellarda ishga joylashtirishga nomzodlar bilan dastlabki koʻnikuv tadbirlarini oʻtkazish yoʻli bilan ularga koʻmaklashish;

Oʻzbekiston Respublikasi fuqarolarining chet ellardagi va xorijiy fuqarolarning Oʻzbekiston Respublikasidagi mehnat faoliyatini muvofiqlashtirib borish;

Fuqarolarni chet ellarda ishga joylashtirish boʻyicha xoʻjalik hisobidagi mintaqaviy byurolar, shuningdek Chet ellarga ketayotgan fuqarolarni oldindan koʻniktirish va oʻqitish markazi faoliyatini muvofiqlashtirish;

xorijiy ishchi kuchlarini yollovchi chet el firmalari (korxonalar, muassasalar, kompaniyalar) bilan hamkorlikni rivojlantirish;

Oʻzbekiston Respublikasi fuqarolariga chet elda mehnat faoliyatini amalga oshirish uchun Oʻzbekiston Respublikasi fuqarolarini xorijiy mamlakatlarga joʻnatish uchun nomzodlarni tanlab olishi boʻyicha Idoralararo komissiyaning qarorlariga muvofiq ruxsatnomalar berish (ruxsatnomalarning amal qilish muddatini uzaytirish);

yuridik shaxslarga xorijiy ishchi kuchlarini jalb etish uchun ruxsatnomalar berish (ruxsatnomalarning amal qilish muddatini uzaytirish), shuningdek Qoraqalpogʻiston Respublikasi Mehnat va aholini ijtimoiy muhofaza qilish vazirligi, viloyatlar va Toshkent shahar hokimliklarining mehnat va aholini ijtimoiy muhofaza qilish bosh boshqarmalari takliflariga muvofiq hamda tashqi mehnat migratsiyasi jarayonlari tahlilini, aholi mehnat migratsiyasini rivojlantirishning uzoq muddatli va oʻrtacha muddatli prognozlarini hisobga olgan holda xorijiy fuqarolarga Oʻzbekiston Respublikasi hududida mehnat faoliyatiga tasdiqnomalar berish.

5. Agentlik oʻziga yuklangan vazifalarga muvofiq:

fuqarolarni chet ellarda ishga joylashtirish uchun kvotalar ajratish masalasi boʻyicha oʻz vakolati doirasida muzokaralar olib boradi, xorijiy hamkorlar bilan tuziladigan shartnomalar, bitimlar va protokollar loyihalarini tayyorlaydi va ularni imzolaydi;

tegishli qarorlarning hamda Oʻzbekiston Respublikasining xorijiy mamlakatlar bilan Oʻzbekiston fuqarolarini chet elda ishga joylashtirish masalalari boʻyicha hamkorlik qilish toʻgʻrisidagi shartnomalari, bitimlari va protokollaridan kelib chiqadigan majburiyatlarning bajarilishini muvofiqlashtirib boradi;

Oʻzbekiston Respublikasi hududidagi korxonalar, tashkilotlar va muassasalarda belgilangan tartibda berilgan ruxsatnomalar (tasdiqnomalar) asosida ishlayotgan xorijiy fuqarolarni hisobga oladi;

Oʻzbekiston Respublikasida xorijiy ishchi kuchlaridan foydalanishni tartibga soluvchi qonun hujjatlariga va normativ hujjatlarga ish beruvchilar tomonidan rioya etilishini nazorat qiladi;

huquqni muhofaza qilish organlari bilan birgalikda Oʻzbekiston Respublikasida mehnat faoliyati huquqini beruvchi tasdiqnomaga ega boʻlgan xorijiy fuqarolar tomonidan respublika hududida mehnat faoliyatini amalga oshirishning belgilangan tartibiga rioya etilishini nazorat qiladi;

mehnat migratsiyasi sohasidagi xalqaro hamkorlik loyihalariga va tuzilgan shartnomalarga muvofiq chet elga ishlash uchun joʻnab ketayotgan fuqarolarni ishga joylashiladigan mamlakatda boʻlish xususiyatlari, xorijiy ish beruvchilar bilan mehnat shartnomalari tuzishning huquqiy jihatlari toʻgʻrisida xabardor qiladi, ularning malaka oshirishiga va xoʻjalik hisobi asosida xorijiy tilni oʻrganishiga koʻmaklashadi;

Oʻzbekiston Respublikasi Tashqi ishlar vazirligi koʻmagida, Oʻzbekiston Respublikasining chet eldagi diplomatik vakolatxonalari va konsullik muassasalari orqali, belgilangan tartibda chet elda ishlayotgan Oʻzbekiston Respublikasi fuqarolarining mehnat faoliyati monitoringini amalga oshiradi;

chet ellarda mehnat faoliyatini amalga oshirayotgan Oʻzbekiston Respublikasi fuqarolarining ijtimoiy muhofazasini belgilangan tartibda taʼminlaydi;

mehnat va aholini ijtimoiy muhofaza qilish hududiy organlari bilan birgalikda chet ellarga ishga yuborilgan Oʻzbekiston Respublikasi fuqarolari Vatanga qaytgandan keyin ishga joylashtirilishini tashkil etadi;

chet ellarda mehnat faoliyatini amalga oshirishni xohlovchi Oʻzbekiston Respublikasi fuqarolari toʻgʻrisidagi maʼlumotlar bazasini shakllantiradi;

xorijiy mamlakatlarning mehnat bozorini oʻrganadi, xorijiy ish beruvchilarni qidiradi va Oʻzbekiston Respublikasi fuqarolarini chet elda ishga joylashtirish toʻgʻrisida bitimlar tuzadi;

chet elda mehnat faoliyatini amalga oshirishni xohlovchi fuqarolar toʻgʻrisidagi axborotlarni xorijiy ish beruvchilar oʻrtasida, shu jumladan “Internet” tarmoqlari orqali tarqatadi.

6. Agentlik oʻziga yuklangan vazifalar va funksiyalarni amalga oshirish uchun quyidagi huquqlarga ega:

tuzilgan kontraktlarga muvofiq chet elda ishlash uchun kadrlarni tanlash, ularni kasb boʻyicha layoqatlikni aniqlash uchun test sinovidan oʻtkazish, ularga boriladigan mamlakatlarning asosiy qonunlarini oʻrgatish;

mehnat migratsiyasi sohasidagi hamkorlik toʻgʻrisida xorijiy hamkorlar bilan tuzilgan shartnomalarga muvofiq chet elga ishlashga joʻnatiladigan nomzodlar toʻgʻrisida maʼlumotlar olish uchun fuqarolarning oʻzini oʻzi boshqarish organlariga va vakolatli organlarga murojaat qilish;

dastlabki tanlovdan oʻtgan Oʻzbekiston Respublikasi fuqarolari bilan xorijiy hamkorlar bilan tuzilgan bitimlar (shartnomalar)ni hisobga olgan holda ularni chet ellarda ishga joylashtirish yuzasidan xizmatlar koʻrsatishga shartnomalar tuzish;

mulkchilik shakllaridan qatʼi nazar, yuridik shaxslardan Oʻzbekiston Respublikasi hududida ushbu yuridik shaxslar bilan tuzilgan mehnat shartnoma (kontrakt)lari boʻyicha mehnat faoliyatini amalga oshiruvchi xorijiy fuqarolar toʻgʻrisida maʼlumotlar olish;

xorijiy ishchi kuchlarini yollovchi va bunday yollashga koʻmaklashuvchi xorijiy kompaniyalar (firmalar) bilan oʻz vakolati doirasida bevosita oʻzaro hamkorlik qilish;

zarurat boʻlganda, ushbu Nizomda nazarda tutilgan ayrim funksiyalarni amalga oshirish uchun oʻqituvchilarni, vazirliklar va idoralarning mutaxassislarini va boshqa fuqarolarni shartnomalar (kontraktlar) boʻyicha jalb etish;

kam taʼminlangan fuqarolarning mehnat faoliyatini amalga oshirish uchun chet ellarga borishga tayyorgarlik koʻrishi va ularning joʻnatilishi bilan bogʻliq xarajatlarning bir qismini qoplash, ushbu xarajatlar keyinchalik qaytariladi;

moliya-xoʻjalik faoliyatidan olingan foydaning 15 foizini ajratish hisobiga Agentlikni ijtimoiy rivojlantirish va xodimlarni moddiy ragʻbatlantirish jamgʻarmasi tashkil etish.

7. Agentlikning mol-mulki asosiy fondlardan va aylanma mablagʻlardan, shuningdek qiymati mustaqil balansda aks ettirilgan boshqa boyliklardan iborat boʻladi.

8. Agentlikning mol-mulki Oʻzbekiston Respublikasi qonun hujjatlariga muvofiq unga toʻliq xoʻjalik yuritish huquqi bilan tegishli boʻladi.

9. Agentlikni Oʻzbekiston Respublikasi Mehnat va aholini ijtimoiy muhofaza qilish vaziri tomonidan lavozimga tayinlanadigan va lavozimdan ozod etiladigan Agentlik boshligʻi boshqaradi.

Agentlik boshligʻi:

Agentlikning joriy faoliyatini tashkil qiladi va yuklangan vazifalarning bajarilishi uchun javob beradi;

Agentlik xodimlarini lavozimga tayinlaydi va lavozimdan ozod qiladi;

davlat organlari, yuridik va jismoniy shaxslar, shu jumladan xorijiy davlatlarning yuridik va jismoniy shaxslari, shuningdek xalqaro tashkilotlar oldida Agentlik manfaatlarini ifodalaydi;

Oʻzbekiston Respublikasi Mehnat va aholini ijtimoiy muhofaza qilish vazirligi bilan kelishgan holda shtat jadvalini, Agentlik apparati taʼminoti xarajatlari smetasini tasdiqlaydi;

Oʻzbekiston Respublikasi fuqarolariga chet elda mehnat faoliyatini amalga oshirish uchun ruxsatnomalar hamda yuridik shaxslarga xorijiy ishchi kuchlarini jalb etish uchun ruxsatnomalar, shuningdek qonun hujjatlariga muvofiq Oʻzbekiston Respublikasi hududida ishga joylashish uchun xorijiy fuqarolarning mehnat faoliyatiga tasdiqnomalar beradi (ularning amal qilish muddatini uzaytiradi).

Agentlikka yuklangan vazifalarga muvofiq boshqa funksiyalarni amalga oshiradi.

10. Agentlik boshligʻining Oʻzbekiston Respublikasi Mehnat va aholini ijtimoiy muhofaza qilish vaziri tomonidan lavozimga tayinlanadigan va lavozimdan ozod qilinadigan bir nafar oʻrinbosari boʻladi.

11. Agentlik tarkibiy boʻlinmalari rahbarlari Agentlik boshligʻi tomonidan lavozimga tayinlanadi va lavozimdan ozod qilinadi.

12. Soliqlar hamda davlat budjetiga, shuningdek budjetdan tashqari jamgʻarmalarga boshqa majburiy toʻlovlar toʻlangandan keyin qolgan foyda (daromad) Agentlik moliyaviy faoliyatining asosiy umumlashtiruvchi koʻrsatkichi hisoblanadi hamda undan Agentlikni rivojlantirishda foydalaniladi.

13. Quyidagilar Agentlikning moliyaviy resurslarini shakllantirish manbalari hisoblanadi:

xoʻjalik hisobidagi faoliyatdan olingan foyda (daromad);

Moliya vazirligi bilan kelishgan holda Mehnat va aholini ijtimoiy muhofaza qilish vazirligi tomonidan tasdiqlangan tarifga muvofiq Oʻzbekiston Respublikasi fuqarolarining chet ellardagi mehnat faoliyatiga ruxsatnomalar rasmiylashtirilganligi, yuridik shaxslarga xorijiy ishchi kuchlarini jalb etish uchun ruxsatnomalar berilganligi (amal qilish muddati uzaytirilganligi), shuningdek xorijiy fuqarolarning Oʻzbekistonda ishga joylashish uchun mehnat faoliyatini amalga oshirish huquqini beruvchi tasdiqnomalar berilganligi (amal qilish muddati uzaytirilganligi) uchun toʻlov hisobiga olingan mablagʻlar;

xususiy kontraktlar boʻyicha chet ellarda mehnat faoliyatini amalga oshirish uchun hujjatlarni rasmiylashtirishda fuqarolarga koʻrsatiladigan xizmatlar uchun toʻlov undirishdan olingan daromad;

qonun hujjatlariga muvofiq boshqa tushumlar.

Agentlik pul mablagʻlarini saqlash hamda respublika qonun hujjatlariga zid boʻlmagan barcha turdagi hisob-kitob va kassa operatsiyalarini amalga oshirish uchun tijorat banklarida hisob raqamlari, valyuta hisob raqamlari va boshqa hisob raqamlarini ochish huquqiga egadir.

14. Agentlik vazifalar va funksiyalarni bajarish uchun Oʻzbekiston Respublikasi qonunchiligiga muvofiq tashqi iqtisodiy faoliyatni amalga oshirish huquqiga egadir.

15. Xoʻjalik faoliyatidan olingan valyuta tushumi qonun hujjatlariga muvofiq taqsimlanadi, Agentlikning valyuta hisob raqamiga oʻtkaziladi va undan Oʻzbekiston Respublikasi Mehnat va aholini ijtimoiy muhofaza qilish vazirligi bilan kelishgan holda foydalaniladi.

16. Agentlik oʻz ishlarining tezkor va buxgalteriya hisobini amalga oshiradi, statistika hisoboti yuritadi.

17. Agentlikni qayta tashkil etish va tugatish qonunda belgilangan tartibda amalga oshiriladi.

18. Agentlik Oʻzbekiston Respublikasi, Toshkent shahri, Olmazor tumani, Qamarniso koʻchasi, 1-uyda joylashgan.

1. Fuqarolarni chet ellarda ishga joylashtirish boʻyicha xoʻjalik hisobidagi mintaqaviy byuro (keyingi oʻrinlarda Byuro deb yuritiladi) yuridik shaxs huquqiga ega boʻlgan hamda Oʻzbekiston Respublikasi Mehnat va aholini ijtimoiy muhofaza qilish vazirligiga qarashli davlat korxonasi hisoblanadi.

Byuro Oʻzbekiston Respublikasi qonun hujjatlariga muvofiq xalqaro huquqiy normalar va qoidalarga asoslangan fuqarolarni chet ellarda ishga joylashtirish jarayonlarini tartibga solib borishga doir faoliyatni respublikaning milliy manfaatlarini hisobga olgan holda amalga oshiradi.

2. Byuro oʻz faoliyatida Oʻzbekiston Respublikasi Konstitutsiyasiga, Oʻzbekiston Respublikasi qonunlariga, Oliy Majlis qarorlariga va boshqa hujjatlariga, Oʻzbekiston Respublikasi Prezidentining farmonlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga, Oʻzbekiston Respublikasi Mehnat va aholini ijtimoiy muhofaza qilish vazirligining buyruqlariga hamda hayʼati qarorlariga, Tashqi mehnat migratsiyasi masalalari agentligining qarorlariga, shuningdek ushbu Namunaviy nizomga amal qiladi.

3. Byuro mustaqil balansga, banklarda hisob raqamlariga, valyuta va boshqa hisob raqamlariga, Oʻzbekiston Respublikasi Davlat gerbi tasviri tushirilgan, oʻz nomi davlat va ingliz tillarida yozilgan muhrga ega boʻladi.

4. Quyidagilar Byuroning asosiy vazifalari hisoblanadi:

Oʻzbekiston Respublikasi fuqarolariga chet elda ishga joylashishda koʻmaklashish;

Oʻzbekiston Respublikasi fuqarolarini chet elda ishga joylashish imkoniyatlari va shart-sharoitlari toʻgʻrisidagi axborot bilan taʼminlash;

xorijiy ishchi kuchlarini yollovchi xorijiy ish beruvchilar bilan hamkorlikni rivojlantirish;

xorijiy ish beruvchilar tomonidan Oʻzbekiston Respublikasidan ishchi kuchini eksport qilishga ajratiladigan kvotalarni olish va realizatsiya qilish;

chet elda ishga joʻnatish uchun xorijiy ish beruvchilarning talablariga muvofiq boʻlgan nomzodlarni tanlash;

chiqish hujjatlarini rasmiylashtirishda, shu jumladan viza va chet elda ishga joylashishni rasmiylashtirish uchun zarur boʻlgan boshqa hujjatlarni olishda yordam berish.

5. Byuro oʻziga yuklangan vazifalarga muvofiq:

tegishli qarorlarning hamda Oʻzbekiston Respublikasining xorijiy mamlakatlar bilan Oʻzbekiston fuqarolarini chet elda ishga joylashtirish masalalari boʻyicha hamkorlik qilish toʻgʻrisidagi shartnomalari, bitimlari va protokollari va boshqa hujjatlardan kelib chiqadigan majburiyatlarning bajarilishini amalga oshiradi;

fuqarolarni chet ellarda ishga joylashtirish masalasi boʻyicha oʻz vakolati doirasida muzokaralar olib boradi va xorijiy hamkorlar bilan idoralararo shartnomalar, bitimlar va protokollar tuzadi;

ishlash uchun chet elga borayotgan fuqarolarni mehnat migratsiyasi sohasidagi xalqaro hamkorlik dasturlari va tuzilgan shartnomalar, ishga joylashiladigan mamlakatda boʻlish shart-sharoitlari va xususiyatlari, xorijiy ish beruvchilar bilan mehnat shartnomalari tuzishning huquqiy jihatlari toʻgʻrisida xabardor qiladi;

chet ellarda mehnat faoliyatini amalga oshirayotgan Oʻzbekiston Respublikasi fuqarolarining huquqiy va ijtimoiy muhofazasini belgilangan tartibda taʼminlaydi;

chet ellarda mehnat faoliyatini amalga oshirishni xohlovchi mintaqa fuqarolari toʻgʻrisidagi maʼlumotlar bazasini shakllantiradi va Tashqi mehnat migratsiyasi masalalari agentligiga zarur maʼlumotlar va materiallarni taqdim etadi;

chet elda mehnat faoliyatini amalga oshirishni xohlovchi fuqarolar toʻgʻrisidagi axborotlarni xorijiy ish beruvchilar oʻrtasida, shu jumladan “Internet” tarmoqlari orqali tarqatadi.

mehnat va aholini ijtimoiy muhofaza qilish hududiy organlari bilan birgalikda chet ellarga ishga yuborilgan Oʻzbekiston Respublikasi fuqarolari Vatanga qaytgandan keyin ishga joylashtirilishini tashkil etadi.

6. Byuro quyidagi huquqlarga ega:

mehnat migratsiyasi sohasidagi hamkorlik toʻgʻrisida xorijiy hamkorlar bilan tuzilgan shartnomalarga muvofiq chet elga ishlashga joʻnatiladigan nomzodlar toʻgʻrisida maʼlumotlar olish uchun fuqarolarning oʻzini oʻzi boshqarish organlariga va vakolatli organlarga murojaat qilish;

tuzilgan shartnomalarga muvofiq belgilangan talablar va qoidalarga binoan chet elda ishlash uchun fuqarolarni tanlash;

dastlabki tanlovdan oʻtgan Oʻzbekiston Respublikasi fuqarolari bilan xorijiy hamkorlar bilan tuzilgan bitimlar (shartnomalar)ni hisobga olgan holda ularni chet ellarda ishga joylashtirish yuzasidan xizmatlar koʻrsatishga shartnomalar tuzish;

xorijiy ishchi kuchlarini yollovchi va bunday yollashga koʻmaklashuvchi xorijiy kompaniyalar (firmalar) bilan oʻz vakolati doirasida bevosita oʻzaro hamkorlik qilish;

zarurat boʻlganda, ushbu Namunaviy nizomda nazarda tutilgan ayrim funksiyalarni amalga oshirish uchun mutaxassislarini va boshqa fuqarolarni shartnomalar (kontraktlar) boʻyicha jalb etish;

kam taʼminlangan fuqarolarning mehnat faoliyatini amalga oshirish uchun chet ellarga borishga tayyorgarlik koʻrishi va ularning joʻnatilishi bilan bogʻliq xarajatlarning bir qismini qoplash, ushbu xarajatlar keyinchalik qaytariladi.

7. Byuroning mol-mulki asosiy fondlardan va aylanma mablagʻlardan, shuningdek qiymati mustaqil balansda aks ettirilgan boshqa boyliklardan iborat boʻladi.

8. Byuroning mol-mulki Oʻzbekiston Respublikasi qonun hujjatlariga muvofiq unga toʻliq xoʻjalik yuritish huquqi bilan tegishli boʻladi.

9. Byuroga Oʻzbekiston Respublikasi Mehnat va aholini ijtimoiy muhofaza qilish vaziri tomonidan lavozimga tayinlanadigan va lavozimdan ozod etiladigan direktor boshchilik qiladi.

Byuro direktori:

Byuroning joriy faoliyatini tashkil qiladi va Byuroga yuklangan vazifalarning bajarilishi uchun javob beradi;

Byuro xodimlarini lavozimga tayinlaydi va lavozimdan ozod qiladi;

davlat organlari, yuridik va jismoniy shaxslar, shu jumladan xorijiy davlatlarning yuridik va jismoniy shaxslari, shuningdek xalqaro tashkilotlar oldida Byuro manfaatlarini ifodalaydi;

Oʻzbekiston Respublikasi Mehnat va aholini ijtimoiy muhofaza qilish vazirligi bilan kelishgan holda shtat jadvalini, Byuro apparati taʼminoti xarajatlari smetasini tasdiqlaydi;

oʻziga yuklangan vazifalarga muvofiq buyruqlar beradi va farmoyishlar chiqaradi.

10. Byuro boshligʻining Oʻzbekiston Respublikasi Mehnat va aholini ijtimoiy muhofaza qilish vaziri tomonidan lavozimga tayinlanadigan va lavozimdan ozod qilinadigan bir nafar oʻrinbosari boʻladi.

11. Tarkibiy boʻlinmalari rahbarlari Byuro direktori tomonidan lavozimga tayinlanadi va lavozimdan ozod qilinadi.

12. Soliqlar hamda davlat budjetiga, shuningdek budjetdan tashqari jamgʻarmalarga boshqa majburiy toʻlovlar toʻlangandan keyin qolgan foyda (daromad) Byuro moliyaviy faoliyatining asosiy umumlashtiruvchi koʻrsatkichi hisoblanadi hamda undan Byuroni rivojlantirishda foydalaniladi.

13. Quyidagilar Byuroning moliyaviy resurslarini shakllantirish manbalari hisoblanadi:

xoʻjalik hisobidagi faoliyatdan olingan foyda (daromad);

mehnat faoliyatini amalga oshirish uchun chet elga borishga tayyorlashda fuqarolarga koʻrsatiladigan xizmatlar uchun toʻlov undirishdan olingan daromad;

qonun hujjatlariga muvofiq boshqa tushumlar.

Byuro pul mablagʻlarini saqlash hamda respublika qonun hujjatlariga zid boʻlmagan barcha turdagi hisob-kitob va kassa operatsiyalarini amalga oshirish uchun tijorat banklarida hisob raqamlari, valyuta hisob raqamlari va boshqa hisob raqamlarini ochish huquqiga egadir.

14. Byuro vazifalar va funksiyalarni bajarish uchun Oʻzbekiston Respublikasi qonunchiligiga muvofiq tashqi iqtisodiy faoliyatni amalga oshirish huquqiga egadir.

15. Qonun hujjatlariga muvofiq Byuroning valyuta hisob raqamiga oʻtkazilgan valyuta tushumidan Oʻzbekiston Respublikasi Mehnat va aholini ijtimoiy muhofaza qilish vazirligi bilan kelishgan holda foydalaniladi.

16. Byuro oʻz ishlarining tezkor va buxgalteriya hisobini amalga oshiradi, statistika hisoboti yuritadi.

17. Byuroni qayta tashkil etish va tugatish qonunda belgilangan tartibda amalga oshiriladi.

1.1. Oʻzbekiston Respublikasi Vazirlar Mahkamasining “Oʻzbekiston Respublikasi fuqarolarining chet eldagi hamda xorijiy fuqarolarning respublikadagi kasb faoliyati toʻgʻrisida” 1995-yil 19-oktabrdagi 408-son qarorida (Oʻzbekiston Respublikasi QT,1995-y., 10-son, 41-modda; 2000-y., 10-son, 68-modda; 2001-y., 4-son, 21-modda):

a) qarorning nomida “kasb” soʻzi “mehnat” soʻzi bilan almashtirilsin;

b) 2-band quyidagi tahrirda bayon qilinsin:

“2. Belgilab qoʻyilsinki, Moliya vazirligi bilan kelishgan holda Mehnat va aholini ijtimoiy muhofaza qilish vazirligi tomonidan tasdiqlangan tarifga muvofiq Oʻzbekiston Respublikasi fuqarolarining chet ellardagi mehnat faoliyatiga ruxsatnomalar rasmiylashtirilganligi, yuridik shaxslarga xorijiy ishchi kuchlarini jalb etish uchun ruxsatnomalar berilganligi (amal qilish muddati uzaytirilganligi), shuningdek xorijiy fuqarolarning Oʻzbekistonda ishga joylashish uchun mehnat faoliyatini amalga oshirish huquqini beruvchi tasdiqnomalar berilganligi (amal qilish muddati uzaytirilganligi) uchun toʻlov undiriladi”;

v) Oʻzbekiston Respublikasida xorijiy ishchi kuchlarini jalb qilish va ulardan foydalanish tartibi toʻgʻrisidagi Nizomda (2-ilova):

1-band quyidagi tahrirda bayon qilinsin:

“1. Mazkur Nizom Oʻzbekiston Respublikasida xorijiy ishchi kuchlarini jalb qilishga ruxsatnomalar berish (uzaytirish), shuningdek xorijiy fuqarolarning Oʻzbekiston Respublikasi hududida mehnat faoliyatini amalga oshirish huquqiga tasdiqnomalar berish (amal qilish muddatini uzaytirish) shartlari va tartibini belgilaydi”;

3, 4, 15-bandlardagi va Nizomga 1-ilovadagi “kasb” soʻzi “mehnat” soʻzi bilan almashtirilsin;

6-bandga “Ruxsatnoma” soʻzidan keyin “(tasdiqnoma)” soʻzi qoʻshilsin.

2.1. Oʻzbekiston Respublikasi Vazirlar Mahkamasining 2000-yil 28-yanvardagi 42-f-son farmoyishi.

2.2. Oʻzbekiston Respublikasi Vazirlar Mahkamasining “Oʻzbekiston Respublikasi Mehnat va aholini ijtimoiy muhofaza qilish vazirligi faoliyatini tashkil etish toʻgʻrisida” 2001-yil 13-fevraldagi 75-son qarori (Oʻzbekiston Respublikasi QT, 2001-y., 2-son, 11-modda) 5-bandining ikkinchi xatboshi va qarorga 4-ilova.

2.3. Oʻzbekiston Respublikasi Vazirlar Mahkamasining “Oʻzbekiston Respublikasi Mehnat va aholini ijtimoiy muhofaza qilish vazirligi hamda Tashqi mehnat migratsiyasi masalalari agentligi toʻgʻrisidagi nizomlarni tasdiqlash haqida” 2001-yil 6-apreldagi 162-son qarori (Oʻzbekiston Respublikasi QT, 2001-y., 4-son, 21-modda) 1-bandining uchinchi xatboshi va qarorga 2-ilova.