Oʻzbekiston Respublikasining Budjet kodeksiga muvofiq Vazirlar Mahkamasi qaror qiladi:

1. Quyidagilar:

Oʻzbekiston Respublikasi Davlat budjeti pul mablagʻlarini kassali rejalashtirish va boshqarish tartibi toʻgʻrisidagi Nizom 1-ilovaga muvofiq;

Budjet tashkilotlari va budjet mablagʻlari oluvchilarga xarajatlarni toʻlash uchun ruxsatnomalar berish tartibi toʻgʻrisidagi Nizom 2-ilovaga muvofiq tasdiqlansin.

2. Oʻzbekiston Respublikasi Moliya vazirligi manfaatdor vazirliklar va idoralar bilan birgalikda bir oy muddatda oʻzlari qabul qilgan normativ-huquqiy hujjatlarni ushbu qarorga muvofiqlashtirsinlar.

3. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov zimmasiga yuklansin.

1. Ushbu Nizom Oʻzbekiston Respublikasining Budjet kodeksiga muvofiq Oʻzbekiston Respublikasi Davlat budjeti (keyingi oʻrinlarda Davlat budjeti deb ataladi) pul mablagʻlarini kassali rejalashtirish va boshqarish tartibini belgilaydi.

2. Ushbu Nizomda quyidagi asosiy tushunchalardan foydalaniladi:

kassali rejalashtirish — Oʻzbekiston Respublikasining respublika budjeti, Qoraqalpogʻiston Respublikasining respublika budjeti, viloyatlarning viloyat budjetlari, Toshkent shahrining shahar budjeti hamda tumanlar va shaharlar budjetlarining kassa rejalarini, tushumlarning manbalari va miqdori, shuningdek xarajatlarning miqdori, xarajat yoʻnalishi va ularning maqsadi boʻyicha tuzish yoʻli bilan amalga oshiriladigan, Yagona gʻazna hisobvaragʻi orqali oʻtuvchi, Davlat budjetining mablagʻlari aylanmasini rejalashtirish va boshqarish;

Yagona gʻazna hisobvaragʻi (keyingi oʻrinlarda YAGʻH deb ataladi) — Oʻzbekiston Respublikasi Moliya vazirligi tomonidan boshqariladigan maxsus bank hisobvaragʻi boʻlib, unga budjet tizimi budjetlarining daromadlari va boshqa tushumlari kiritiladi hamda xarajatlari toʻlanadi;

davlat budjetining pul mablagʻlarini boshqarish — Davlat budjetidan mablagʻ oluvchi budjet tashkilotlari va budjet mablagʻlari oluvchilarning xarajatlarini oʻz vaqtida toʻlanishini taʼminlash maqsadida YAGʻHdagi davlat budjeti mablagʻlarini Oʻzbekiston Respublikasi Moliya vazirligi Gʻaznachiligi tomonidan boshqarish.

3. Oʻzbekiston Respublikasi Moliya vazirligi Gʻaznachiligi, Qoraqalpogʻiston Respublikasi, viloyatlar va Toshkent shahri boʻyicha Gʻaznachilik boshqarmalari, tumanlar va shaharlar boʻyicha Gʻaznachilik boʻlinmalari (keyingi oʻrinlarda Gʻaznachilik boʻlinmalari deb ataladi) YAGʻHdagi Davlat budjeti pul mablagʻlarini kassali rejalashtirish va boshqarishni Davlat budjeti daromadlari tushumi va xarajatlarining har oylik prognozlarini tuzish yoʻli bilan amalga oshiradilar.

Davlat budjeti pul mablagʻlarini kassali rejalashtirish va boshqarishni amalga oshirish boʻyicha hujjatlar shakli va ularni Oʻzbekiston Respublikasi Davlat soliq qoʻmitasi va uning hududiy organlari (keyingi oʻrinlarda hududiy davlat soliq xizmati organlari), shuningdek Oʻzbekiston Respublikasi Davlat bojxona qoʻmitasi tomonidan gʻaznachilik boʻlinmalariga taqdim etish muddatlari Oʻzbekiston Respublikasi Moliya vazirligi tomonidan aniqlanadi.

4. Davlat budjeti daromadlari va xarajatlarini kassali rejalashtirish mos ravishda:

Oʻzbekiston Respublikasining respublika budjeti uchun — Oʻzbekiston Respublikasi Moliya vazirligi Gʻaznachiligi tomonidan amalga oshiriladi. Daromadlar qismi boʻyicha kassali rejalashtirish Moliya vazirligi Gʻaznachiligi tomonidan Oʻzbekiston Respublikasi Davlat bojxona qoʻmitasi (keyingi oʻrinlarda DBQ) va Oʻzbekiston Respublikasi Davlat soliq qoʻmitasi (keyingi oʻrinlarda DSQ) bilan birgalikda amalga oshiriladi;

Qoraqalpogʻiston Respublikasi respublika budjeti, viloyatlarning viloyat budjetlari, Toshkent shahrining shahar budjeti hamda tumanlar va shaharlar budjetlari uchun — hududiy gʻaznachilik boʻlinmalari tomonidan amalga oshiriladi. Daromadlar qismi boʻyicha kassali rejalashtirish hududiy gʻaznachilik boʻlinmalari tomonidan hududiy davlat soliq xizmati organlari bilan birgalikda amalga oshiriladi.

5. Oʻzbekiston Respublikasining respublika budjetini, Qoraqalpogʻiston Respublikasi respublika budjetini, viloyatlarning viloyat budjetlarini, Toshkent shahrining shahar budjetini hamda tumanlar va shaharlar budjetlarini kassali rejalashtirish har oyda hududiy gʻaznachilik boʻlinmalari tomonidan:

tegishli budjetlarning oyma-oy boʻlingan daromadlar va xarajatlar yoyilmalaridan;

Oʻzbekiston Respublikasi Moliya vazirligi Gʻaznachiligiga DBQ va DSQ tomonidan taqdim etiladigan, Oʻzbekiston Respublikasi respublika budjeti boʻyicha daromadlar tushumining har oylik prognozlaridan;

hududiy gʻaznachilik boʻlinmalariga hududiy davlat soliq xizmati organlari tomonidan taqdim etiladigan, tegishli maʼmuriy-hududiy birliklar boʻyicha daromadlar tushumining har oylik prognozlaridan maʼlumotlar asosida amalga oshiriladi.

6. Budjet tashkilotlari va budjet mablagʻlari oluvchilarning xarajatlarini YAGʻHdan oʻz vaqtida amalga oshirish va tegishli budjetlarning daromadlari va xarajatlari oʻrtasidagi vaqtinchalik kassa uzilishlarini bartaraf etish uchun gʻaznachilik boʻlinmalari:

tegishli budjetlarning shaxsiy gʻazna hisobvaraqlaridagi aylanma kassa mablagʻini belgilangan tartibda ishlatishlari;

tegishli budjetlar tomonidan budjet ssudalari olinishi tashabbusi bilan chiqishlari;

qonun hujjatlarida nazarda tutilgan (Oʻzbekiston Respublikasi respublika budjeti boʻyicha), mablagʻlarni jalb qilishning boshqa manbalaridan foydalanishlari mumkin.

7. Tegishli budjetlarning daromadlari va xarajatlari oʻrtasidagi vaqtinchalik kassa uzilishlari hollarida hududiy moliya organlari:

tegishli budjetlar tomonidan budjet ssudalari olinishi;

budjetdan ajratiladigan mablagʻlarga oʻz vaqtida aniqlik kiritilishi boʻyicha choralar koʻradilar.

8. DBQ, BSQ va hududiy davlat soliq xizmati organlari tegishli budjetda nazarda tutilgan, xarajatlarni qoplashni taʼminlovchi, soliq va boshqa majburiy tushumlarni toʻliq safarbar qilinishiga, shuningdek gʻaznachilik boʻlinmalariga taqdim etilayotgan maʼlumotlarning oʻz vaqtidaligi va haqqoniyligiga javobgardirlar.

9. Oʻzbekiston Respublikasi Moliya vazirligi Gʻaznachiligi va tegishli gʻaznachilik boʻlinmalari mazkur Nizomda nazarda tutilgan, YAGʻHdagi Davlat budjeti pul mablagʻlarini kassali rejalashtirish va boshqarish qismini amalga oshirish boʻyicha, talablarning toʻgʻri bajarilishiga javobgardirlar.

10. Hududiy moliya organlari tegishli budjetlarning daromadlari va xarajatlari oʻrtasidagi vaqtinchalik kassa uzilishlari hollarida, tegishli budjetlarda nazarda tutilgan budjet manbalarining toʻliq safarbar qilinishi xarajatlarni qoplashni taʼminlamaganda, budjet ssudalarini jalb qilish boʻyicha oʻz vaqtida tegishli choralarni koʻrish, shuningdek budjetdan ajratiladigan mablagʻlarga tegishli aniqlik kiritilishiga javobgardirlar.

1. Mazkur Nizom Oʻzbekiston Respublikasining Budjet kodeksiga muvofiq Oʻzbekiston Respublikasi Davlat budjetidan (keyingi oʻrinlarda Davlat budjeti deb ataladi) mablagʻ oluvchi budjet tashkilotlari va budjet mablagʻlari oluvchilarga xarajatlarni toʻlash uchun ruxsatnomalar berish tartibini belgilaydi.

2. Ushbu Nizomda quyidagi asosiy tushunchalardan foydalaniladi:

xarajatlarni toʻlash uchun ruxsatnoma (keyingi oʻrinlarda XTR deb ataladi) — budjet tashkilotiga yoki budjet mablagʻlari oluvchiga Oʻzbekiston Respublikasi Moliya vazirligi Gʻaznachiligi, shuningdek Qoraqalpogʻiston Respublikasi, viloyatlar va Toshkent shahri boʻyicha Gʻaznachilik boshqarmalari, tumanlar va shaharlar boʻyicha Gʻaznachilik boʻlinmalari (keyingi oʻrinlarda hududiy gʻaznachilik boʻlinmalari deb ataladi) tomonidan beriladigan, XTRda koʻrsatilgan vaqt davridan boshlab budjet tashkiloti yoki budjet mablagʻlari oluvchi uning doirasida moliyaviy majburiyatlar qabul qila oladigan va kassa xarajatlarini amalga oshira oladigan budjetdan ajratilgan mablagʻlar summasini aks ettiruvchi hujjat;

OʻRMV AT — budjet tizimi budjetlari budjet jarayonini kompleks avtomatlashtirish, shu jumladan budjet tizimi budjetlari ijrosi bilan bogʻliq operatsiyalarni aks ettirish uchun moʻljallangan Oʻzbekiston Respublikasi Moliya vazirligi axborot tizimi;

“UzASBO” DM — budjet tashkilotlari tomonidan budjet hisobi va hisobotini yuritilishini kompleks avtomatlashtirish uchun moʻljallangan dasturiy majmua.

3. Gʻaznachilik boʻlinmalari xarajatlarning belgilangan ketma-ketligiga, shuningdek daromadlar va xarajatlar tushumlarining oylar boʻyicha prognozlariga muvofiq qabul qilingan moliyaviy majburiyatlarni bajarish uchun Yagona gʻazna hisobvaragʻida (keyingi oʻrinlarda YAGʻH deb ataladi) mablagʻlar yetishmagan taqdirda, Davlat budjeti xarajatlarining cheklangan hajmini belgilaydilar hamda uning asosida budjet tashkilotlari va budjet mablagʻlari oluvchilarga XTR beradilar.

Bunda XTR budjet tashkilotlariga ularning budjetdan tashqari jamgʻarmalari hisobidan amalga oshiriladigan xarajatlari boʻyicha berilmaydi.

4. XTR kassali rejalashtirish va Davlat budjeti pul mablagʻlarini boshqarish natijalari boʻyicha olingan maʼlumotlar asosida OʻRMV ATda shakllantiriladi.

Oʻzbekiston Respublikasining respublika budjeti, Qoraqalpogʻiston Respublikasining respublika budjeti, viloyatlar viloyat budjetlari, Toshkent shahri shahar budjeti hamda tumanlar va shaharlar budjetlari daromadlari va xarajatlari oʻrtasidagi kassa uzilishlarini bartaraf etish maqsadida XTR berish muayyan davrda tegishli budjetlarga tushishi kutilayotgan summalar doirasida amalga oshiriladi. Bunda, agar daromadlar tushumi faqat tegishli oyning oxirida kutilsa, XTR daromadlarning haqiqiy tushumiga qarab beriladi.

5. Budjet tashkilotlari va budjet mablagʻlari oluvchilar qabul qilingan yuridik majburiyatlar va berilgan XTRlar doirasida, xarajatlarning belgilangan ketma-ketligiga muvofiq, koʻrsatilgan vaqt davridan boshlab moliyaviy majburiyatlar qabul qiladilar hamda toʻlovlarni amalga oshiradilar.

6. XTR gʻaznachilik boʻlinmasi tomonidan:

bir yilda (chorakda) bir marta — budjet tashkiloti yoki budjet mablagʻlari oluvchining xarajatlar smetasida (vaqtinchalik xarajatlar smetasida) birinchi, ikkinchi va uchinchi guruh xarajatlari boʻyicha, shuningdek kommunal xizmatlar, dori-darmonlar va oziq-ovqat mahsulotlariga, xorijiy kreditlar va ular boʻyicha foizlarni soʻndirishga tegishli xarajatlar moddalarida (kichik moddalari va elementlarida) nazarda tutilgan budjetdan ajratiladigan mablagʻlar summasiga;

har oylik asosda — ushbu bandning ikkinchi xatboshida koʻrsatilmagan xarajat moddalari boʻyicha budjet tashkilotlari va budjet mablagʻlari oluvchilarning xarajatlar smetasida (vaqtinchalik xarajatlar smetasida) nazarda tutilgan budjetdan ajratiladigan mablagʻlar summasiga beriladi.

Bunda, Oʻzbekiston Respublikasi Moliya vazirligi ushbu bandning ikkinchi xatboshida koʻrsatilgan xarajatlar moddalari (kichik moddalari va elementlari) roʻyxatiga oʻzgartirish va qoʻshimchalar kiritishga haqlidir.

Davlat budjetidan mablagʻ oluvchi budjet tashkilotlari va budjet mablagʻlari oluvchilarga XTR berish ushbu Nizomning 1-ilovasida keltirilgan sxema boʻyicha amalga oshiriladi.

7. XTR summasini shakllantirishda toʻlovlarning quyidagi ketma-ketligiga rioya qilinadi:

ish haqi va unga tenglashtirilgan toʻlovlarga xarajatlarni moliyalashtirish (toʻlash)da — har oyning 1 — 4 va 15 — 18 sanalarida;

yagona ijtimoiy toʻloviga xarajatlarni moliyalashtirish (toʻlash)da — har oyning 1 — 4 sanalarida;

ijtimoiy nafaqalar (pensiyalar, stipendiyalar, 14 yoshgacha bolalari boʻlgan oilalarga nafaqa va kam taʼminlangan oilalarga moddiy yordam va boshqalar)ga xarajatlarni moliyalashtirish (toʻlash)da — har oyning 1 — 20 sanalarida;

oziq-ovqat va dori-darmonlarga xarajatlarni moliyalashtirish (toʻlash)da;

kommunal xizmatlar, yonilgʻi va yoqilgʻi-moylash materiallariga xarajatlarni moliyalashtirish (toʻlash)da;

kapital qoʻyilmalarga xarajatlarni moliyalashtirish (toʻlash)da;

boshqa xarajatlarni moliyalashtirish (toʻlash)da.

Ushbu Nizomning 6-bandi uchinchi xatboshida koʻrsatilgan xarajatlar moddalari boʻyicha budjet tashkiloti yoki budjet mablagʻlari oluvchiga XTR berish toʻlovlarning yuqorida koʻrsatilgan ketma-ketligiga rioya qilingan holda bir oyda bir marta beriladi. Bunda, Oʻzbekiston Respublikasi Moliya vazirligi Gʻaznachiligi ayrim hollarda, qonun hujjatlarida nazarda tutilgan maqsadlarga budjet mablagʻlarini moliyalashtirishning (toʻlashning) shoshilinch zaruriyati va asosi boʻlganda, budjet tashkilotlariga yoki budjet mablagʻlari oluvchilarga muddatdan oldin XTR berishga haqlidir.

8. Gʻaznachilik boʻlinmasi budjet tashkilotiga yoki budjet mablagʻlari oluvchiga quyidagi talablarga rioya qilgan holda minus “–” ishorali XTR beradi:

XTR berilgan budjet tashkiloti yoki budjet mablagʻlari oluvchi tomonidan belgilangan tartibda tegishli xarajat moddalari boʻyicha budjetdan ajratiladigan mablagʻlari kamaytirilganda, xarajatlarning kamaytirilayotgan moddalari boʻyicha yuridik va moliyaviy majburiyatlar qabul qilinmaganda (toʻlovlar boʻlmaganda);

budjet tashkilotining tegishli xarajat moddalari boʻyicha budjetdan ajratiladigan mablagʻlar summasini kamaytirish (aniqlashtirish) uchun Oʻzbekiston Respublikasi Moliya vazirligi yoki hududiy moliya organlari tomonidan chora-tadbirlar qabul qilinganda.

9. Gʻaznachilik boʻlinmalari xarajatlarni moliyalashtirishda (toʻlashda) ushbu Nizomning 7-bandida koʻrsatib oʻtilgan xarajatlar ketma-ketligi va muddatlarini eʼtiborga olib quyidagi usullardan biridan foydalangan holda budjet tashkilotlari va budjet mablagʻlari oluvchilarga XTR beradilar:

a) budjet tashkilotlari va budjet mablagʻlari oluvchilarga maʼlum bir davr uchun berilgan XTRlar toʻgʻrisida eʼlonlar (maʼlumotlar)ni maxsus ajratilgan joylarda (stendlarda, eʼlonlar doskalarida va boshq.) joylashtirish orqali;

b) budjet tashkilotlari elektron tarzda XTRlarni qabul qilishi mumkin boʻlgan, berilgan XTRlar toʻgʻrisida OʻRMV ATdan “UzASBO” DMga maʼlumot taqdim etish orqali;

v) budjet tashkilotlari va budjet mablagʻlari oluvchilarga budjet mablagʻlari boʻyicha tasdiqlangan xarajatlar smetasi doirasida budjetdan ajratiladigan mablagʻlar doirasida, mazkur Nizomning 2-ilovasidagi shakl boʻyicha XTR taqdim etish orqali.

10. Gʻaznachilik boʻlinmalari tasdiqlangan budjetdan ajratiladigan mablagʻlar doirasida XTR berish uchun qonun hujjatlariga muvofiq javobgar boʻladilar.

11. Budjet tashkilotlarning va budjet mablagʻlari oluvchilarning rahbarlari va bosh hisobchilari qonun hujjatlariga muvofiq, ular tomonidan qabul qilingan yuridik majburiyatlar va ularga berilgan XTR doirasida moliyaviy majburiyatlarni qabul qilish va kassa xarajatlarini amalga oshirishga javobgardirlar.