Idoraviy normativ-huquqiy hujjatni davlat reyestridan chiqarish boʻyicha 2014-yil 1-avgustdagi xulosaga muvofiq hamda Oʻzbekiston Respublikasi Prezidentining 2011-yil 23-avgustdagi PQ-1602-sonli “Oʻzbekiston Respublikasi Adliya vazirligi faoliyatini yanada takomillashtirish chora-tadbirlari toʻgʻrisida”gi qarori, Oʻzbekiston Respublikasi Vazirlar Mahkamasining 1997-yil 9-oktabrdagi 469-sonli “Vazirliklar, davlat qoʻmitalari va idoralar meʼyoriy hujjatlarining qonuniyligini taʼminlash chora-tadbirlari toʻgʻrisida”gi hamda 2000-yil 19-maydagi 197-sonli “Vazirliklar, davlat qoʻmitalari va idoralarning meʼyoriy hujjatlarini qabul qilish tartibini takomillashtirish toʻgʻrisida”gi qarorlariga asosan buyuraman:

1. Oʻzbekiston Respublikasi Davlat soliq qoʻmitasiga Oʻzbekiston Respublikasi Adliya vazirligi tomonidan kiritilgan Nazorat-kassa mashinalarini joriy qilish boʻyicha davlat idoralararo komissiyasi tomonidan 1995-yil 14-oktabrda tasdiqlangan (15-1-120-son, 1995-yil 16-oktabr) Nazorat-kassa mashinalarini Oʻzbekiston Respublikasida joriy qilish boʻyicha davlat idoralararo komissiyasining 1995-yil 10-oktabrdagi majlis bayonini (roʻyxat raqami 183, 1995-yil 18-oktabr) qonun hujjatlariga muvofiqlashtirish yuzasidan 2012-yil 28-dekabrdagi 1-6-1056/8-sonli taqdimnomaning talablari bajarilmaganligi hamda Davlat soliq qoʻmitasining Oʻzbekiston Respublikasi Vazirlar Mahkamasiga mazkur idoraviy normativ-huquqiy hujjatni davlat reyestridan chiqarish masalasi yuzasidan 2014-yil 2-iyuldagi 04-11860-sonli murojaati maʼlumot uchun qabul qilinsin.

2. Nazorat-kassa mashinalarini joriy qilish boʻyicha davlat idoralararo komissiyasi tomonidan 1995-yil 14-oktabrda tasdiqlangan (15-1-120-son, 1995-yil 16-oktabr) Nazorat-kassa mashinalarini Oʻzbekiston Respublikasida joriy qilish boʻyicha davlat idoralararo komissiyasining 1995-yil 10-oktabrdagi majlis bayoni (roʻyxat raqami 183, 1995-yil 18-oktabr) Idoraviy normativ-huquqiy hujjatlarning davlat reyestridan chiqarilsin.

3. Mazkur buyruq davlat roʻyxatidan oʻtkazilsin hamda bu haqda Idoraviy normativ-huquqiy hujjatlarning davlat reyestriga tegishli yozuv kiritilsin.

4. Qonun hujjatlarini turkumlash va huquqiy axborot boshqarmasi (D. Saʼdullayev) mazkur buyruqning “Oʻzbekiston Respublikasi qonun hujjatlari toʻplami” – “Sobraniye zakonodatelstva Respubliki Uzbekistan”da nashr etilishini taʼminlasin.

5. Mazkur buyruq rasmiy eʼlon qilingan kundan eʼtiboran kuchga kiradi.

6. Mazkur buyruqning ijrosini nazorat qilish vazirning birinchi oʻrinbosari M. Ikramov zimmasiga yuklansin.