Yuridik va jismoniy shaxslar tomonidan avtomototransport vositalarining oldi-sotdi shartnomalari rasmiylashtirilishini tartibga solish maqsadida Vazirlar Mahkamasi qaror qiladi:

1. Belgilab qoʻyilsinki:

avtomototransport vositalarining oldi-sotdi shartnomalarini rasmiylashtirish faqat notariuslar, shuningdek savdo huquqiga tegishli ruxsatnomaga ega boʻlgan ixtisoslashtirilgan savdo korxonalari (avtomototransport ishlab chiqaruvchi korxonalar, ularning vakillari hamda vositachi (distribyutor) tashkilotlar) tomonidan amalga oshiriladi;

avtomototransport vositalari Davlat mulki qoʻmitasi va uning hududiy boshqarmalari, shuningdek Oʻzbekiston Respublikasi Adliya vazirligi huzuridagi Sud qarorlarini ijro etish, sudlar faoliyatini moddiy-texnika jihatidan va moliyaviy taʼminlash departamenti hududiy boʻlimlari sud ijrochilari tuman (shahar) boʻlinmalarining sud ijrochilari tomonidan kimoshdi savdolari orqali belgilangan tartibda sotilishi mumkin;

avtomototransport vositalarining oldi-sotdi shartnomalarini notarial tasdiqlaganlik uchun boj va toʻlovlarning toʻliq tushishi ustidan nazorat soliq organlari tomonidan amalga oshiriladi.

2. Avtomototransport vositalarining oldi-sotdi shartnomalarini birjalar tomonidan rasmiylashtirilishi, shuningdek ularni birjalar orqali sotish taqiqlansin.

3. Oʻzbekiston Respublikasi Davlat mulki qoʻmitasi bir oy muddatda birja faoliyatini litsenziyalash toʻgʻrisidagi nizom loyihasini ishlab chiqsin va Vazirlar Mahkamasiga kiritsin.

4. Oʻzbekiston Respublikasi Hukumatining ilovaga muvofiq qarorlariga oʻzgartirishlar kiritilsin.

5. Mazkur qarorning bajarilishini nazorat qilish Oʻzbekiston Respublikasi Prezidentining Davlat maslahatchisi A.A. Azizov va Oʻzbekiston Respublikasi Bosh vazirining oʻrinbosari R.S. Azimov zimmasiga yuklansin.

1. Oʻzbekiston Respublikasi Vazirlar Mahkamasining “Avtomototransport vositalarini xarid qilish-sotish, almashtirish va hadya etish bitimlarini rasmiylashtirish tartibi toʻgʻrisida” 1991-yil 16-sentabrdagi 233-son qarorida (Oʻzbekiston Respublikasi QT, 1991-y., 9-son, 30-modda, 1994-y., 9-son, 46-modda, 1997-y., 4-son, 14-modda):

a) toʻrtinchi xatboshidagi “Davlat avtomobil nazorati” va “DAN boshqarmasining” soʻzlari “Davlat yoʻl harakati xavfsizligi xizmati” va “YHX bosh boshqarmasining” soʻzlari bilan almashtirilsin;

b) beshinchi xatboshida “ularning vakillaridan, vositachi (distribyutor) tashkilotlardan, shuningdek, chakana savdo tarmoqlaridan, respublika, viloyat, tumanlararo, taʼminot-savdo bazalaridan va kimoshdi savdolaridan sotib olingan avtomototransportni roʻyxatga olish davlat notarial idorasida xarid qilish-sotish shartnomasini tasdiqlamasdan Davlat avtomobil nazorati organlarida amalga oshiriladi” soʻzlari “ularning vakillaridan, vositachi (distribyutor) tashkilotlardan, shuningdek, kimoshdi savdolaridan sotib olingan avtomototransportni roʻyxatga olish davlat notarial idorasida xarid qilish-sotish shartnomasini tasdiqlamasdan Oʻzbekiston Respublikasi Ichki ishlar vazirligining Davlat yoʻl harakati xavfsizligi xizmati organlarida amalga oshiriladi” soʻzlari bilan almashtirilsin.

2. Oʻzbekiston Respublikasi Vazirlar Mahkamasining 1994-yil 28-sentabrdagi 489-son qarori bilan tasdiqlangan Davlat avtomototransport vositalarini jismoniy va davlat tasarrufida boʻlmagan yuridik shaxslarga sotish tartibida:

a) 5-bandning ikkinchi xatboshi chiqarib tashlansin;

b) 11-bandning birinchi xatboshidan “tanlovlar va birja savdolari” soʻzlari chiqarib tashlansin;

v) 14-band quyidagi tahrirda bayon qilinsin:

“14. Davlat mulki qoʻmitasi yoki uning hududiy boshqarmasi tomonidan berilgan dalolatnoma kimoshdi savdosi orqali sotilgan avtomototransport vositalarining Oʻzbekiston Respublikasi Ichki ishlar vazirligi Davlat yoʻl harakati xavfsizligi xizmati organlarida rasmiylashtirish uchun asos boʻlib xizmat qiladi.

Kimoshdi savdolarida sotilgan davlat avtomototransport vositalarining oldi-sotdi bitishuvi notarial rasmiylashtirilmaydi”;

g) 19-banddan “tanlov va birja savdolari” soʻzlari chiqarib tashlansin.

3. Oʻzbekiston Respublikasi Vazirlar Mahkamasining “Oʻzbekiston Respublikasi Vazirlar Mahkamasining “Avtomototransport vositalarini xarid qilish-sotish, almashtirish va hadya etish bitimlarini rasmiylashtirish tartibi toʻgʻrisida” 1991-yil 16-sentabrdagi 233-son qaroriga oʻzgartirishlar kiritish haqida” 1994-yil 29-sentabrdagi 491-son qarorida (Oʻzbekiston Respublikasi QT, 1994-y., 9-son, 46-modda, 1997-y., 4-son, 14-modda):

a) toʻrtinchi xatboshida “Davlat avtomobil nazorati” va “DAN boshqarmasining” soʻzlari “Davlat yoʻl harakati xavfsizligi xizmati” va “YHX bosh boshqarmasining” soʻzlari bilan almashtirilsin;

b) beshinchi xatboshida “ularning vakillaridan, vositachi (distribyutor) tashkilotlardan, shuningdek, chakana savdo tarmoqlaridan, respublika, viloyat, tumanlararo, taʼminot-savdo bazalaridan va kimoshdi savdolaridan sotib olingan avtomototransportni roʻyxatga olish davlat notarial idorasida xarid qilish-sotish shartnomasini tasdiqlamasdan Davlat avtomobil nazorati organlarida amalga oshiriladi” soʻzlari “ularning vakillaridan, vositachi (distribyutor) tashkilotlardan, shuningdek, kimoshdi savdolaridan sotib olingan avtomototransportni roʻyxatga olish davlat notarial idorasida xarid qilish-sotish shartnomasini tasdiqlamasdan Oʻzbekiston Respublikasi Ichki ishlar vazirligining Davlat yoʻl harakati xavfsizligi xizmati organlarida amalga oshiriladi” soʻzlari bilan almashtirilsin.

4. Oʻzbekiston Respublikasi Vazirlar Mahkamasining “Avtomototransport vositalarini sotib olish, ulardan foydalanish va ularni boshqa shaxslarga berishni tartibga solish toʻgʻrisida” 2001-yil 28-avgustdagi 354-son qarori (Oʻzbekiston Respublikasi QT, 2001-y., 8-son, 5-modda) 1-bandining ikkinchi xatboshi quyidagi tahrirda bayon qilinsin:

“Oʻzbekiston Respublikasi Ichki ishlar vazirligining Davlat yoʻl harakati xavfsizligi xizmati organlarida roʻyxatdan oʻtkazilishi kerak boʻlgan avtomototransport vositalarining oldi-sotdi shartnomalarini rasmiylashtirish faqat notariuslar, shuningdek savdo qilish huquqiga tegishli ruxsatnomaga ega boʻlgan ixtisoslashtirilgan savdo korxonalari (avtomototransport ishlab chiqaruvchi korxonalar, ularning vakillari hamda vositachi (distribyutor) tashkilotlar tomonidan amalga oshiriladi. Avtomototransport vositalari Davlat mulki qoʻmitasi va uning hududiy boshqarmalari, shuningdek Oʻzbekiston Respublikasi Adliya vazirligi huzuridagi Sud qarorlari ijrosi, sudlar faoliyatini moddiy-texnika jihatidan va moliyaviy taʼminlash departamentining hududiy boʻlimlari sud ijrochilarining tuman (shahar) boʻlinmalari sud ijrochilari tomonidan belgilangan tartibda kimoshdi savdolari orqali sotilishi mumkin”.