Oʻzbekiston Respublikasi Hukumati va Gruziya Respublikasi Hukumati, bundan keyin Tomonlar deb ataladilar,

ikkala davlat oʻrtasida shakllangan anʼanaviy doʻstona hamda ishga oid munosabatlarga asoslanib,

atrof muhitni muhofaza qilish sohasidagi hamkorlikni takomillashtirishga va ikkala mamlakatning milliy hamda xalqaro ekologik dasturlarda ishtirok etish boʻyicha birgalikdagi harakatlarini muvofiqlashtirishga yoʻllangan intilishlarining oʻta muhimligi va dolzarbligini eʼtiborga olib,

quyidagilar toʻgʻrisida ahdlashib oldilar:

Tomonlar atrof muhit sohasidagi qonunchilikni, norma, normativlar, standartlarni ham uygʻunlashtirish dasturini ishlab chiqadilar.

Tomonlar atrof muhitni oʻrganishda, tegishli axborotni almashishda, ekologik xavfli vaziyatlar toʻgʻrisida oʻzaro ogohlantirish tizimini yaratishda hamkorlik qiladilar.

Tomonlar tabiat muhitini himoya qilish, ilmiy-texnik ishlarni, monitoringni amalga oshirish, ekspert va maslahat uchrashuvlarini tashkil etish sohasida hamkorlik qiladilar.

Tomonlar atrof muhitni muhofaza qilish va tabiatdan foydalanishni davlat tomonidan boshqarilishi hamda tartibga solinishi, davlat nazorati sohasida hamkorlik qiladilar, tegishli iqtisodiy mexanizmlardan foydalanishda tajriba almashishni amalga oshiradilar, mutaxassislar malakasini oshirishni tashkil etadilar.

Tomonlar tadqiqot ishlarini birgalikda amalga oshirish, ilmiy-tadqiqot ishlari natijalarini almashish sohasida hamkorlik qiladilar.

Tomonlar atrof muhitga xavfli taʼsir etuvchi milliy manbalar toʻgʻrisidagi axborotlar bilan almashinadilar.

Tomonlar favqulodda ekologik vaziyatlarni va sanoatdagi avariyalarni tugatish boʻyicha milliy qutqaruv xizmatlari harakatini muvofiqlashtiradilar.

Tomonlar zaharli, radioaktiv chiqitlar va moddalar joyining oʻzgartirilishi toʻgʻrisidagi axborotni almashishni yoʻlga qoʻyadilar.

Tomonlar davlat hududida Tomonlardan biri yoki uchinchi mamlakatlardan keltirilayotgan barcha tovarlar, materiallar va texnologiyalar Tomonlarning tabiatni muhofaza qilish norma hamda standartlariga, bundaylar yoʻq boʻlgan holda esa Yevropa Iqtisodiy Uyushmasi va Jahon Sogʻliqni Saqlash Tashkiloti norma va standartlariga muvofiq kelishi kerakligiga rozidirlar. Tomonlar tovarlarni tabiatni muhofaza qilish talablariga muvofiqligini qoʻshimcha tekshirish huquqiga egadirlar. Tovarlarni bir Tomondan boshqa Tomon davlat hududiga tashishda, shuningdek, tranzit tashishlarda xavfli yuklarni tashishga aloqador xalqaro norma va qoidalarga rioya qilinishi kerak. Radioaktiv, zaharli va boshqa chiqitlarni olib kirish va tranzit tashish taqiqlanadi.

Tomonlar bojxona xizmatlarining Qizil kitobiga kiritilgan nodir, yoʻq boʻlib ketayotgan hayvonlar, shuningdek oʻsimliklar va ular mahsulotlarining eksport hamda import qilinishiga yoʻl qoʻymaslik boʻyicha birgalikdagi harakatlariga yordam beradilar.

Tomonlar ekologik toza texnologiyalarni tarqatishni iqtisodiy ragʻbatlantirish toʻgʻrisidagi bitimni imzolash uchun tayyorlaydilar.

Munozarali masalalarni ikkala davlatning tabiatni muhofaza qilish organlari xalqaro qoidalar va normalarga muvofiq koʻrib chiqadilar.

Mazkur Memorandum besh yil muddatga tuziladi va imzolangan kundan boshlab kuchga kiradi.

Memorandum, agar Tomonlardan biri uning amalda boʻlishini toʻxtatish toʻgʻrisidagi istagini mazkur Memorandumning amalda boʻlish muddati yoki navbatdagi besh yillik davr tugashidan kamida olti oy oldin yozma tarzda xabardor qilmasa, keyingi besh yillik davrlarga oʻzidan-oʻzi uzaytiriladi.

Mazkur Memorandum 1995-yil 4-sentabrda, Toshkent shahrida, har biri oʻzbek, gruzin va rus tillarida boʻlgan ikki nusxada imzolangan. Bunda barcha matnlar bir xil kuchga egadir. Mazkur Memorandumni sharhlashda rus tilidagi matndan foydalaniladi.