Quyida “Ahdlashuvchi Tomonlar” deb ataluvchi Oʻzbekiston Respublikasi Hukumati va Slovakiya Respublikasi Hukumati,

savdo-iqtisodiy va ilmiy-texnikaviy hamkorlikni rivojlantirish va mustahkamlash istagiga amal qilib,

oʻzaro savdo-iqtisodiy munosabatlarni rivojlantirish uchun shartnomaviy-xuquqiy asoslar va qulay sharoitlar yaratish istagida,

har ikkala respublikaning siyosiy va iqtisodiy tizimida roʻy berayotgan chuqur oʻzgarishlarni eʼtiborga olgan holda,

har ikkala davlat iqtisodiyotini izchil ravishda jahon xoʻjaligiga integratsiyalashga intilib,

xalqaro huquq normalari teng huquqlilik, oʻzaro manfaatdorlik prinsiplariga muvofiq ravishda hamda har bir davlatda amalda boʻlgan qonunchilik doirasida,

tariflar va savdo boʻyicha Bosh Bitim (GATT) Butunjahon savdo tashkiloti (BST) ning xalqaro savdodagi rolini inobatga olgan holda hamda uning norma va qoidalariga amal qilish maqsadida,

quyidagilar xususida kelishib oldilar:

Ahdlashuvchi Tomonlar birinchi navbatda oʻzaro tovar oboroti va koʻrsatiladigan xizmatlarni koʻpaytirishga qaratilgan oʻzaro iqtisodiy munosabatlarni rivojlantirishga yaqindan yordam beradilar.

Ahdlashuvchi Tomonlar oʻz davlatlarida amalda boʻlgan qonunchilik doirasidagi iqtisodiy savdo va ilmiy-texnikaviy hamkorlikning barcha shakllarini taʼminlash, yengillashtirish va ragʻbatlantirishga oid barcha zaruriy choralarni qabul qilishga rozilik bildirdilar.

Ahdlashuvchi Tomonlar boj haqi va boshqa toʻlovlarni, shuningdek chetdan mol olish va chetga mol chiqarishdagi boj haqi va boshqa toʻlovlarni undirish borasida bir-birlari uchun eng qulay rejim yaratadilar.

Eng qulay rejim:

boshqa davlatlar bilan chegarada savdo qilish yoki mintaqalararo savdoni yengillashtirish maqsadida Ahdlashuvchi Tomonlardan biri qoʻshni davlatlarga bergan yoki kelgusida beradigan imtiyoz va yengilliklar;

Ahdlashuvchi Tomonlarning bojxona uyushmasi va erkin savdo zonasidagi ishtirokidan kelib chiquvchi imtiyoz va qulayliklarga taalluqli emas.

Ahdlashuvchi Tomonlar har ikkala davlatning xoʻjalik faoliyati subyektlari (bundan buyon “subyektlar” deb yuritiladi) oʻrtasida tovar ayirboshlash va xizmatlar koʻrsatish har ikkala davlatning qonunchilik normalariga muvofiq ravishda, xalqaro savdo praktikasida qabul qilingan jahon narxlari va prinsiplari boʻyicha tuzilgan kontraktlar asosida amalga oshirilishiga kelishib oldilar.

Ahdlashuvchi Tomonlar davlat subyektlarining tovarlarni yetkazib berish va koʻrsatiladigan xizmatlar yuzasidan savdo bitimlari tuzishlari va ularni amalga oshirishlari uchun qulay sharoitlar yaratadilar.

Subyektlar oʻzaro tovarlar bilan taʼminlash va xizmatlar koʻrsatish borasida oʻz davlatlarida amalda boʻlgan qonunchilikka muvofiq ishchan hamkorlikning istalgan shaklidan (tovon toʻlash asosida barter, lizing, auksion xaridlar va sh. k.) foydalanish huquqiga egadirlar.

Oʻzaro tovar ayirboshlash doirasida Ahdlashuvchi Tomonlar oʻz iqtisodiyotlarining eng muhim ehtiyojlari uchun ahamiyatga ega boʻlgan tovarlarni yetkazib berish va koʻrsatiladigan xizmat turlari roʻyxati borasida tegishli organlar darajasida oʻzaro kelishish imkoniyatiga ega ekanliklarini inkor etmaydilar.

Oʻzbekistonlik va Slovakiyalik tadbirkorlarga xalqaro savdo aloqalarini rivojlantirish sohasida koʻmaklashish maqsadida Ahdlashuvchi Tomonlar oʻz mamlakatlari hududi orqali tovarlar tranzitini tartibga soluvchi masalalarni koʻrib chiqadi.

Ahdlashuvchi Tomonlar oʻzlarining jismoniy va yuridik shaxslari oʻrtasidagi bevosita aloqalar, delegatsiyalar va tadbirkorlarning safar almashuvlari, yarmarkalar, koʻrgazmalarda ishtirok etish hamda axborot almashuvi uchun qulay sharoitlar yaratadilar.

Savdo-iqtisodiy va sanoat sohasidagi hamkorlikni kengaytirish muhim ahamiyatga ega ekanligini nazarda tutib, Ahdlashuvchi Tomonlar oʻz davlatlari qonunchiligini hisobga olgan xolda, oʻz mamlakatlari hududida tashkilotlar, korxonalar, firmalar, banklar, savdo uylari, shirkatlar va kompaniyalarning filiallari va vakolatxonalarini tashkil egish hamda ularning savdo va iqtisodiy faoliyat yuritishlari uchun qulay sharoitlar yaratadilar.

Har ikkala mamlakatdagi bozor iqtisodiy munosabatlarining rivojini hisobga olgan xolda hamda har bir davlatda amalda boʻlgan qonunchilikka muvofiq Ahdlashuvchi Tomonlar:

investitsiyalar yuritishi uchun dastlabki shart-sharoitlar yaratish;

eng muhim loyihalarni amalga oshirish uchun har ikkala davlat investitsiyalarini birlashtirish;

ikkala davlat subyektlarining erkin iqtisodiy zonani rivojlantirishdagi ishtiroki;

xususiylashtirish jarayonidagi oʻzaro manfaatdorlikni tasdiqlaydilar.

Ahdlashuvchi Tomonlar oʻz davlatlarida amalda boʻlgan qonunchilikka muvofiq hamkorlikdagi tadbirkorlikni rivojlantirish jumladan investitsiyalarni ragʻbatlantirish va himoyalash hamda ikki tomonlama soliq solishning oldini olish borasida qulay sharoitlar yaratadilar.

Fundamental va amaliy fanlar, ilgʻor texnika va texnologiyalar sohasidagi ilmiy-texnikaviy hamkorlik iqtisodiy rivojlanishda muhim rol oʻynashini hisobga olgan holda, Ahdlashuvchi Tomonlar oʻzaro ilmiy-texnikaviy aloqalarni keng rivojlantirish uchun zaruriy sharoitlar yaratadilar.

Ilmiy-texnikaviy hamkorlikni amalga oshirishda Ahdlashuvchi Tomonlar oʻz davlatlari hududida amalda boʻlgan qonunchilikka muvofiq sanoat va intelektual mulkka boʻlgan huquqlarning muhofaza qilinishini taʼminlaydilar.

Turizmni rivojlantirish oʻzaro iqtisodiy aloqalarni chuqurlashtirishda muhim rol oʻynashini anglagan holda, Ahdlashuvchi Tomonlar amaldagi qonunchilik doirasida va Birlashgan Millatlar Tashkilotining xalqaro turizm va sayohatlar boʻyicha Konferensiyasi (Rim, 1963-y.) tavsiyalari, shuningdek “Turizm va turistlar kodeksi xartiyasi” (Sofiya. 1985-y.) asosida iqtisodiy aloqalarni rivojlantirishda yaqindan yordam beradilar.

Oʻzbekiston Respublikasi va Slovakiya Respublikasi oʻrtasidagi tijorat va notijorat xarakteridagi barcha hisob-kitoblar erkin muomaladagi valyutada, agar Ahdlashuvchi Tomonlar oʻzga tarzda kelishmasalar, xalqaro bank praktikasida koʻzda tutilgan istalgan koʻrinishda amalga oshiriladi. Har ikkala davlat banklari oʻzaro hisob-kitob qilish tartibi toʻgʻrisida tegishli shartnoma tuzishlari mumkin.

Mazkur Bitimning amalda qoʻllanishini koʻrib chiqish yoki uning zaruriy tartibga keltirilishi va bajarilishi uchun Ahdlashuvchi Tomonlardan birining iltimosiga koʻra ularning vakillari navbatma-navbat oʻz mamlakatlarida uchrashadilar.

1. Ahdlashuvchi Tomonlar oʻz subyektlariga barcha nizolarni birinchi navbatda muzokaralar vositasida doʻstona tarzda hal etishni tavsiya etadilar.

2. Har ikkala davlatda amalda boʻlgan qonunchilik doirasida hamda subyektlar oʻrtasidagi kelishuvlarga muvofiq ravishda Ahdlashuvchi Tomonlar:

a) Ahdlashuvchi Tomonlar subyektlari oʻrtasidagi savdo va shirkat bitimlari, shuningdek qoʻshma korxonalar tuzish va bevosita investitsiyalarni amalga oshirish mobaynida yuzaga keladigan bitimlarni hal egish bilan bogʻliq boʻlgan nizoli masalalarni va boshqa muammolarni tartibga solish uchun arbitraj jalb egish;

b) Birlashgan Millatlar Tashkilotining xalqaro savdo huquqi boʻyicha Komissiyasi (YuNSITRAL) tomonidan ishlab chiqilgan arbitraj qoidalarini qoʻllash va davlatlardan birining arbitraji — chet el arbitraj qarorlarini tan olish va ijro etish boʻyicha Konvensiya (Nyu-York, 1958-y.) qatnashchilarini jalb etishni tavsiya etadilar.

Ushbu Bitimning muddat va shartlari Bitim amalda boʻlgan davrda tuzilgan, ammo u harakatdan toʻxtatilgunga qadar bajarilmagan barcha kontraktlarga nisbatan qoʻllanadi.

Mazkur Bitimga Ahdlashuvchi Tomonlarning oʻzaro roziligiga binoan tegishli qoʻshimcha va toʻldirishlar kiritilishi mumkin.

Mazkur Bitim imzolangan kundan boshlab qonuniy kuchga kiradi va Ahdlashuvchi Tomonlardan biri boshqa Ahdlashuvchi Tomonni Bitimni harakatdan toʻxtatish toʻgʻrisidagi oʻz maqsadlaridan xabardor qilgan kundan boshlab 6 oy mobaynida oʻz kuchini saqlab qoladi.

Ushbu Bitim imzolangandan soʻng Oʻzbekiston Respublikasi va Slovakiya Respublikasi oʻrtasidagi munosabatlar xususida Toshkent shahrida 1992-yil 16-may kuni imzolangan “Oʻzbekiston Respublikasi Hukumati va Chexiya va Slovakiya Federativ Respublikasi Hukumati oʻrtasida savdo-iqtisodiy aloqalar va ilmiy-texnik hamkorlik toʻgʻrisidagi Bitim” oʻz kuchini yoʻqotadi.

Toshkent shahrida, 1995-yil 16-mayda, ikki asl nusxada tuzilgan, ularning har biri oʻzbek, slovak va rus tillarida boʻlib, matnlarning barchasi bir xil kuchga ega. Bitimni talqin qilishda kelishmovchiliklar yuzaga kelgan hollarda rus tilidagi matn asos boʻlib hisoblanadi.