Oʻzbekiston Respublikasi Oliy Majlisi qaror qiladi:

1. Oʻzbekiston Respublikasi Oliy Majlisining qoʻmitalari va komissiyalari toʻgʻrisidagi Nizom tasdiqlansin.

2. Oʻzbekiston Respublikasining 1991-yil 14-iyunda qabul qilingan “Oʻzbekiston Respublikasi Oliy Kengashining Mandat komissiyasi va qoʻmitalari toʻgʻrisida”gi Qonuni (Oʻzbekiston Respublikasi Oliy Kengashining Axborotnomasi, 1991-yil, № 8, 200-modda) oʻz kuchini yoʻqotgan deb topilsin.

Oʻzbekiston Respublikasi Konstitutsiyasining 86-moddasiga muvofiq Oliy Majlis qonun loyihalari tayyorlash ishlarini olib borish, Oliy Majlis muhokamasiga kiritiladigan masalalarni dastlabki tarzda koʻrib chiqish va tayyorlash, qonunlarning va Oliy Majlis qarorlarining ijrosini nazorat qilib turish uchun deputatlar orasidan qoʻmitalar va komissiyalarni saylaydi.

Oliy Majlis qoʻmitalari va komissiyalari Oʻzbekiston Respublikasi oliy davlat hokimiyat vakillik organi boʻlmish Oliy Majlisning samarali faoliyat koʻrsatishiga koʻmaklashishi lozim.

Oliy Majlis qoʻmitalari va komissiyalarining asosiy vazifalari:

Oʻzbekiston Respublikasi qonunlarining va Oliy Majlis qarorlarining loyihalarini ishlab chiqish;

Oliy Majlis tasarrufidagi masalalarni dastlabki tarzda koʻrib chiqish va tayyorlash;

Oʻzbekiston Respublikasi qonunlarini va Oliy Majlis qabul qilgan qarorlarni amalga oshirishga koʻmaklashishdan iborat.

Qoʻmitalar va komissiyalar Oliy Majlis tomonidan Oliy Majlisning vakolat muddati davriga tuziladi.

Qoʻmitalar va komissiyalarning roʻyxati va miqdor tarkibi Oliy Majlis tomonidan belgilanadi. Oliy Majlis vakolat muddati davomida, zarurat boʻlgan hollarda, yangi qoʻmitalar va komissiyalar tuzishi hamda saylashi, ilgari tuzilgan qoʻmitalar va komissiyalarni tugatishi va qayta tashkil etishi, qoʻmitalar va komissiyalar tarkibiga oʻzgartishlar kiritishi mumkin.

Qoʻmitalar va komissiyalar Oliy Majlis tomonidan rais va aʼzolardan iborat tarkibda ochiq ovoz berish yoʻli bilan saylanadi. Qoʻmitaning, komissiyaning rais oʻrinbosari va kotibi qoʻmita, komissiya raisining taqdimiga muvofiq tegishli qoʻmita, komissiya aʼzolari orasidan Oliy Majlis Raisi tomonidan Oliy Majlis Kengashi bilan kelishilgan holda tayinlanadi.

Qoʻmitalar, komissiyalarning (muvaqqatlaridan tashqari) raislari, rais oʻrinbosarlari va kotiblari oʻz faoliyatlarini, qoida tariqasida, doimiy asosda amalga oshiradilar va oʻz vakolatlari davrida haq toʻlanadigan boshqa biron-bir lavozimni egallashlari, tadbirkorlik faoliyati bilan shugʻullanishlari mumkin emas.

Qoʻmitalar va komissiyalarni tuzish chogʻida deputatlarning kasbiy va boshqa xil qiziqishlari, ularning ishlab chiqarishga oid va hayotiy tajribalari, erkin bildirgan xohish-istaklari inobatga olinadi. Qoʻmitalar va komissiyalar tarkibida, qoida tariqasida, fraksiyalar va bloklardan vakil deputatlar boʻlishi taʼminlanadi.

Oliy Majlis deputati, qoida tariqasida, Oliy Majlisning faqat bitta qoʻmitasi yoki komissiyasining aʼzosi etib saylanishi mumkin.

Oliy Majlisning Raisi va uning oʻrinbosarlari qoʻmitalar va komissiyalar tarkibiga saylanishlari mumkin emas.

Qoʻmitalar va komissiyalarning barcha aʼzolari teng huquqlardan foydalanadilar.

Qoʻmita yoki komissiya tarkibiga saylanmagan Oliy Majlis deputati ular ishida maslahat ovozi bilan ishtirok etishga haqlidir.

Deputatlarning qoʻmitalar va komissiyalardagi vakolatlari ularning iltimosiga koʻra, shuningdek ularning oʻz vazifalarini bajarishiga imkon bermaydigan holatlar munosabati bilan muddatidan avval toʻxtatilishi mumkin.

Qoʻmitalar va komissiyalar raislarining taklifiga muvofiq Oliy Majlis Raisi qoʻmitalar va komissiyalarning tarkibini oʻzgartirib, soʻngra bu oʻzgartishlarni Oliy Majlis tasdigʻiga kiritadi.

Qoʻmitalar va komissiyalar Oliy Majlis oldida masʼul va unga hisobdordirlar.

Qoʻmitalar va komissiyalar ishni oʻz rejalariga, Oliy Majlis, uning Raisi va Oliy Majlis Kengashi topshiriqlariga hamda tavsiyalariga muvofiq tashkil etadilar.

Qoʻmitalar va komissiyalarning faoliyatini Oliy Majlis Raisi muvofiqlashtirib turadi.

Qoʻmitalar va komissiyalar oʻz ishlarini masalalarni birgalikda, erkin muhokama qilish va hal etish, oshkoralik hamda qoʻmitalar va komissiyalar aʼzolarining keng tashabbuskorligi asosida tashkil etadilar.

Qoʻmitalar va komissiyalar ishining asosiy tashkiliy shakli ularning majlislaridir.

Qoʻmitalar va komissiyalarning majlislari zaruratga qarab chaqiriladi va Oliy Majlisning majlislari oraligʻida ham, sessiyalar oraligʻidagi davrda ham oʻtkaziladi.

Qoʻmitalar va komissiyalarning majlislari, basharti ularda qoʻmita yoki komissiya tarkibining kamida yarmi hozir boʻlsa vakolatli hisoblanadi. Majlisga kelish imkoni boʻlmagan taqdirda qoʻmita yoki komissiya aʼzosi bu haqda qoʻmita yoki komissiya raisini oldindan xabardor qilib qoʻyadi.

Qoʻmitalar va komissiyalarning majlislari, qoida tariqasida, ochiq oʻtkaziladi. Majlislarga davlat organlari va jamoat birlashmalarining, ilmiy muassasalarning vakillari, mutaxassislar va olimlar taklif etilishi mumkin, ular majlislarda maslahat ovozi huquqi bilan qatnashadilar.

Zarurat boʻlgan hollarda qoʻmita yoki komissiya yopiq majlis oʻtkazish toʻgʻrisida qaror qabul qilishi mumkin.

Qoʻmitalar va komissiyalar masalalarni tayyorlash hamda ularni puxta ishlab chiqish uchun ishchi guruhlari tuzishga haqlidirlar. Ishchi guruhlari tarkibiga Oliy Majlis deputatlari bilan birga vazirliklarning, davlat qoʻmitalarining, idoralarning, boshqa davlat organlari va jamoat birlashmalarining, ilmiy muassasalarning vakillari, olimlar, mutaxassislar kirishi mumkin. Qoʻmitalar va komissiyalar qoʻshma ishchi guruhlari tuzishlari ham mumkin. Ishchi guruhlari tarkibida ishlash davrida mutaxassislar va olimlarning asosiy ish joylaridagi oʻrtacha ish haqi qonun hujjatlariga muvofiq saqlanib qoladi.

Qoʻmitalar va komissiyalar oʻz vakolatlariga kiruvchi masalalarni koʻrib chiqish chogʻida teng huquqlardan foydalanadilar hamda bir xil darajada burchlidirlar.

Qoʻmitalar va komissiyalarning aʼzolari qoʻmitalar va komissiyalar faoliyatida ishtirok etishlari, ularning qarorlarini amalga oshirishga koʻmaklashishlari, qoʻmitalar va komissiyalarning topshiriqlarini bajarishlari shart.

Qoʻmita yoki komissiyaning aʼzosi masalalarni koʻrib chiqish paytida hal qiluvchi ovoz huquqidan foydalanadi, ularni tayyorlash, muhokama qilish va qarorlar qabul qilishda, shuningdek Oliy Majlisning, qoʻmita yoki komissiyaning qarorlarini bajarishni tashkil etishda ishtirok etadi.

Qoʻmita yoki komissiya aʼzosiga qoʻmita yoki komissiya koʻrib chiqayotgan barcha masalalarni hal etishda faol qatnashish uchun sharoit yaratib beriladi, buning uchun zarur hujjatlar va boshqa materiallar unga oldindan yuboriladi.

Qoʻmitalar va komissiyalarning aʼzolari qoʻmitalar va komissiyalarning topshirigʻiga binoan hamda oʻz tashabbusi bilan vakolatlari doirasidagi masalalarni joylarda oʻrganadilar, davlat organlari va jamoat birlashmalarining, shuningdek fuqarolarning takliflarini umumlashtiradilar hamda qoʻmitalar yoki komissiyalarga oʻz xulosalari va takliflarini maʼlum qiladilar.

Qoʻmitalar va komissiyalarning yoki bir necha qoʻmita va komissiyaning tasarrufidagi masalalar qoʻmitalar va komissiyalar tomonidan hamkorlikda tayyorlanishi hamda koʻrib chiqilishi mumkin.

Qoʻmitalar va komissiyalarning qoʻshma majlislarini ularning raislari oʻzaro kelishgan holda boshqaradilar.

Qoʻmita yoki komissiya oʻzi koʻrib chiqayotgan masalalar yuzasidan boshqa qoʻmitalar va komissiyalarning fikrini soʻrab olishi mumkin.

Basharti qoʻmita yoki komissiyalar koʻrib chiqish uchun oʻzlariga topshirilgan masala boshqa qoʻmita yoki komissiyaga ham daxldor deb hisoblashsa yoxud boshqa qoʻmita yoki komissiya koʻrib chiqayotgan masala yuzasidan oʻz fikrini bildirishni zarur deb topishsa Oliy Majlis Raisiga yoki Oliy Majlis Kengashiga tegishli taklif kiritishga haqli.

Boshqa qoʻmitalar va komissiyalarning iltimosiga binoan qoʻmita yoki komissiya oʻz vazifalari doirasidagi masalalar boʻyicha mazkur qoʻmitalar yoki komissiyalar koʻrib chiqayotgan masalalarni tayyorlashda qatnashishi mumkin.

Ayni bir masala boʻyicha qoʻmitalarning, komissiyalarning fikri turlicha boʻlgan taqdirda ular kelishmovchilikni bartaraf etish choralarini koʻradilar. Shu maqsadda mazkur qoʻmitalar va komissiyalar tarkibiga kiruvchi deputatlar orasidan murosaga keltiruvchi guruhlar tuzilishi mumkin. Agar murosaga kelinmasa ular oʻz takliflarini Oliy Majlisning Raisi eʼtiboriga havola etadilar.

Koʻrib chiqilayotgan masalalar yuzasidan qoʻmitalar va komissiya tavsiya tarzida qarorlar qabul qiladilar yoki xulosalar beradilar.

Oliy Majlisning qoʻmitalari va komissiyalarida barcha masalalar qoʻmita yoki komissiya aʼzolari umumiy tarkibining oddiy koʻpchilik ovozi bilan hal etiladi.

Qoʻmitalar yoki komissiyalarning qarorlari, xulosalari va bayonlarini qoʻmita yoki komissiya raisi imzolaydi.

Qoʻmitalar yoki komissiyalar qabul qilgan qoʻshma qarorlarni, ular tomonidan hamkorlikda tayyorlangan xulosalarni, shuningdek qoʻshma majlislarning bayonlarini ularning raislari imzolaydilar.

Qoʻmitalar va komissiyalar qabul qilgan qarorlar tegishli davlat organlariga, jamoat birlashmalariga va boshqa manfaatdor tashkilotlarga yuboriladi.

Qoʻmitalar va komissiyalarning qarorlari qaysi davlat organlari, fuqarolarning oʻzini oʻzi boshqarish organlari, jamoat birlashmalari, korxonalar, muassasalar va tashkilotlarga nisbatan qabul qilingan boʻlsa, oʻsha davlat organlari, fuqarolarning oʻzini oʻzi boshqarish organlari, jamoat birlashmalari, korxonalar, muassasalar va tashkilotlar tomonidan koʻrib chiqilishi shart. Koʻrib chiqish natijalari yoki koʻrilgan choralar haqida qoʻmitalar yoki komissiyalarga, basharti ular boshqa muddat belgilamagan boʻlsa, uzogʻi bilan bir oy muddat ichida xabar qilishi lozim.

Qoʻmitalar va komissiyalar Oliy Majlis, uning Raisi, Oliy Majlis Kengashining topshirigʻiga binoan yoki oʻz tashabbuslari bilan vazifalari doirasidagi masalalar boʻyicha Oʻzbekiston Respublikasi yangi qonunlarining va Oliy Majlis qarorlarining loyihalarini ishlab chiqadilar, qonun hujjatlarini takomillashtirish bilan bogʻliq masalalarni tayyorlaydilar.

Qoʻmitalar va komissiyalar Oliy Majlis sessiyalari kun tartibiga doir takliflarni tayyorlashda ishtirok etadilar.

Qoʻmitalar va komissiyalar oʻzlari Oliy Majlisga kiritgan masalalar boʻyicha yoxud dastlabki tarzda yoki qoʻshimcha ravishda koʻrib chiqish uchun qoʻmitalar yoki komissiyalarga berilgan masalalar boʻyicha oʻzlarining asosiy yoki qoʻshimcha maʼruzachilarni belgilaydilar.

Birgalikda tayyorlangan qonun loyihasini muhokama qilish chogʻida bosh qoʻmita yoki komissiya Oliy Majlisning sessiyasida maʼruza qiladi. Boshqa qoʻmitalar yoki komissiyalar esa qoʻshimcha maʼruza qilishlari mumkin.

Qoʻmitalar va komissiyalar oʻz vazifalari doirasidagi masalalar boʻyicha davlat organlari va jamoat birlashmalaridan, mansabdor shaxslardan hujjatlarni, yozma xulosalarni, hisobot maʼlumotlarini va boshqa materiallarni soʻrab olishga haqlidirlar.

Zarurat boʻlgan hollarda qonun loyihalari ilmiy ekspertizaga yuboriladi, ular yuzasidan Vazirlar Mahkamasining xulosalari, tegishli vazirliklar, davlat qoʻmitalari va idoralarning, jamoat birlashmalarining, shuningdek olimlar va mutaxassislarning fikri soʻrab olinishi mumkin.

Davlat organlari, jamoat birlashmalarining rahbarlari, boshqa mansabdor shaxslar Oliy Majlis qoʻmitalari va komissiyalariga notoʻgʻri axborot berganliklari yoxud axborotni atayin yashirganliklari uchun qonun hujjatlariga muvofiq javobgar boʻladilar.

Qoʻmitalar va komissiyalar vazirliklar, davlat qoʻmitalari hamda idoralarning, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, korxonalar, muassasalar, tashkilotlarning rahbarlarini oʻz majlislariga taklif etish va ularning qonunlar, Oliy Majlisning boshqa hujjatlari, qoʻmitalar va komissiyalarning tavsiyalari qanday bajarilayotgani haqidagi axborotlarini eshitish huquqiga egadirlar.

Qoʻmitalar va komissiyalar tegishli organlar hamda tashkilotlarni koʻrib chiqiladigan masalalar xususida oldindan xabardor qiladilar.

Qoʻmitalar va komissiyalar oʻrganib chiqish uchun oʻzlariga berilgan qonun loyihalarini dastlabki tarzda koʻrib chiqish natijalari yuzasidan Oliy Majlis Kengashiga oʻz xulosalarini taqdim etadilar. Xulosalarda qonun loyihasini Oliy Majlisning navbatdagi sessiyasi kun tartibiga kiritish yoxud qonun loyihasini rad etish yoki qonun loyihasi ustida ishlashni davom ettirish toʻgʻrisidagi taklif boʻladi.

Qoʻmitalar va komissiyalar oʻzlariga Oliy Majlisning Raisi yoki Oliy Majlisning Kengashi yoʻllagan respublika budjetining loyihalarini, uning ijrosi toʻgʻrisidagi hisobotlarni, strategik davlat dasturlari loyihalarini dastlabki tarzda koʻrib chiqadilar, shuningdek ana shu loyihalar va tegishli qonunlar hamda qarorlarning loyihalari yuzasidan oʻz xulosalarini tayyorlaydilar.

Oliy Majlisning, uning Raisi, Oliy Majlis Kengashining topshirigʻiga binoan, qoʻmitalar va komissiyalar Oliy Majlis deputatlari bildirgan taklif, tanqidiy mulohazalar va soʻrovlarning amalga oshirilishini nazorat qiladilar.

Mandat komissiyasi:

Oliy Majlis deputatlarining vakolatlarini tekshiradi va ularning vakolatlarini toʻgʻri deb topish xususidagi, saylovga oid qonun hujjatlari talablari buzilgan taqdirda esa ayrim deputatlar saylovini haqiqiy emas deb topish xususidagi takliflarni Oliy Majlis muhokamasiga taqdim etadi;

deputatning daxlsizligiga va deputatlik faoliyatining boshqa kafolatlariga taalluqli yoxud saylovchilar tomonidan deputatning chaqirib olinishiga doir masalalar yuzasidan, shuningdek deputatning vakolatlarini muddatidan ilgari toʻxtatish yuzasidan xulosalar tayyorlaydi;

Oliy Majlisning, uning Raisi, Oliy Majlis Kengashining topshirigʻiga binoan Oliy Majlis deputatlarining oʻz vazifalarini bajarish borasidagi faoliyatini tekshiradi hamda shu masalalarga doir materiallarni Oliy Majlis muhokamasiga taqdim etadi;

Oliy Majlisning, uning Raisi, Oliy Majlis Kengashining topshirigʻiga binoan deputatlik odobining buzilishi, deputatlarning shaʼni va obroʻsini himoya etish bilan bogʻliq masalalarni koʻrib chiqadi;

Oliy Majlisning, uning Raisi, Oliy Majlis Kengashining topshirigʻiga binoan boshqa masalalarni ham koʻrib chiqadi.

Qoʻmita yoki komissiya raisi:

zarur materiallar tayyorlanishini tashkil etadi, qoʻmitaning yoki komissiyaning majlislarini chaqiradi va ularda raislik qiladi;

qoʻmita yoki komissiya aʼzolariga topshiriqlar beradi, ularga Qoʻmita yoki komissiyaning faoliyati bilan bogʻliq materiallar va hujjatlarni yuboradi;

qoʻmita yoki komissiya aʼzolarini ishchi guruhlarining ishida qatnashish uchun, shuningdek qoʻmita yoki komissiyaning boshqa topshiriqlarini bajarish uchun taklif etadi;

davlat organlari va jamoat birlashmalarining vakillarini, mutaxassislar va olimlarni qoʻmita yoki komissiya ishida qatnashishga taklif etadi;

Oliy Majlis sessiyalarida, Oliy Majlis Kengashining majlislarida, davlat organlari va jamoat birlashmalari bilan boʻladigan munosabatlarda qoʻmita yoki komissiya nomidan vakillik qiladi;

qoʻmita yoki komissiya tomonidan amalga oshirilgan ish toʻgʻrisida har yili Oliy Majlis Kengashiga hisobot taqdim etadi;

qoʻmita yoki komissiya qarorlarini bajarish ishlarini tashkil etadi;

Oliy Majlisga, uning Raisiga, Kengashiga ularning topshiriqlarini bajarish yuzasidan axborot beradi;

qoʻmita yoki komissiyaning qarorlari bajarilganligi va uning tavsiyalari qarab chiqilganligi haqida qoʻmita yoki komissiya aʼzolariga axborot beradi;

oʻz vakolatiga muvofiq boshqa vazifalarni amalga oshiradi.

Qoʻmita yoki komissiya raisining oʻrinbosari raisini topshirigʻiga koʻra uning ayrim vazifalarini bajaradi hamda rais yoʻqligida yoki u oʻz vazifalarini bajara olmaydigan hollarda rais vazifasini bajarib turadi.

Qoʻmita yoki komissiya kotibi:

qoʻmita yoki komissiya ish rejasining loyihasini tayyorlaydi;

uning bajarilishini nazorat qiladi;

qoʻmita yoki komissiyaning ish qogʻozlarini yuritadi;

qoʻmita yoki komissiyaning raisi, rais oʻrinbosari bergan boshqa topshiriqlarni bajaradi.

Oliy Majlisning qoʻmitalari va komissiyalari oʻz faoliyatlarini oshkora amalga oshiradilar, faoliyatlari haqida jamoatchilikni keng xabardor qiladilar. Qoʻmitalar, komissiyalar va ishchi guruhlarining majlislariga ommaviy axborot vositalarining vakillari taklif etilishi mumkin.

Oliy Majlis qoʻmitalari va komissiyalari faoliyatiga tashkiliy, texnikaviy va boshqa xil xizmatlar koʻrsatishni Oʻzbekiston Respublikasi Oliy Majlisining Kotibiyati taʼminlaydi.