Davlat va huquqni muhofaza qilish organlarida ishlash uchun yuqori malakali yuridik kadrlar tayyorlashni yanada yaxshilash, shuningdek bozor iqtisodiyoti sharoitida jumhuriyat xalq xoʻjaligini ular bilan taʼminlash maqsadlarida Vazirlar Mahkamasi qaror qiladi:

1. 1991-yil 10-avgustdan eʼtiboran Oʻzbekiston SSJ Oliy va oʻrta maxsus taʼlim vazirligining V.I.Lenin nomidagi ToshDU huzuridagi yuridik instituti negizida, OʻzSSJ Adliya vazirligi tasarrufiga oʻtkazgan holda, Toshkent davlat yuridik instituti tashkil etilsin.

Jumhuriyatda yuridik kadrlar tayyorlash, davlat, xoʻjalik va ijtimoiy-madaniy qurilish sohalarida ilmiy tadqiqotlarning hamda ilmiy-amaliy ishlanmalarning sifat jihatidan yangi va samarali tizimini yaratish boʻyicha OʻzSSJ Adliya vazirligi bilan yuridik instituti oʻrtasidagi oʻzaro aloqalar haqida 1991-yil 5-avgustda shartnoma tuzilganligi maʼlumot uchun qabul qilinsin.

2. OʻzSSJ Oliy va oʻrta maxsus taʼlim vazirligi bir oy muddat ichida V.I. Lenin nomidagi ToshDU huzuridagi yuridik institutining foydalanishida boʻlgan asosiy fondlar, oborot mablagʻlar, binolar, oʻquv korpuslari, yotoqxonalar va ularga yondosh boʻlgan hududlar va boshqa mulklar OʻzSSJ Adliya vazirligiga oʻtkazilsin.

3. OʻzSSJ Adliya vazirligi bir oy muddat ichida institutning nizomini, tuzilishini hamda shtatlari roʻyxatini ishlab chiqsin va tasdiqlasin.

4. OʻzSSJ Moliya vazirligi Toshkent davlat yuridik institutini mablagʻ bilan taʼminlash masalasini koʻrib chiqsin va hal qilsin.

5. OʻzSSJ Prezidenti huzuridagi Vazirlar Mahkamasining 1991-yil 29-martdagi 73-son qarori oʻz kuchini yoʻqotgan deb hisoblansin.