Engil sanoat birlashmalari va korxonalarini boshqarishni takomillashtirish hamda ularning faoliyati samaradorligini oshirish, xalq isteʼmoli mollari ishlab chiqarish hajmlarini koʻpaytirish maqsadida va Oʻzbekiston SSJ Prezidentining 1991-yil 6-maydagi Farmoniga muvofiq Vazirlar Mahkamasi qaror qiladi:

1. Tarkibida ilovaga muvofiq birlashmalar, korxonalar va tashkilotlar boʻlgan tikuvchilik va trikotaj buyumlar ishlab chiqarish “Oʻzbekkiyim” Oʻzbekiston davlat konserni tashkil etilsin.

“Oʻzbekkiyim” konserni tarkibiga kiruvchi birlashmalar, korxonalar va tashkilotlar faoliyati Oʻzbekiston SSJning amaldagi qonunlariga, korxonalarning oʻzining va jumhuriyatning manfaatlariga zid boʻlmagan boshqa konsernlar va uyushmalarda ishtirok etish huquqiga egadirlar.

2. Belgilansinki, “Oʻzbekkiyim” konserni:

mustaqil ishlab chiqarish-xoʻjalik kompleksi hisoblanadi, yengil sanoat mollari ishlab chiqarish “Oʻzbekyengilsanoat” Oʻzbekiston davlat uyushmasi tarkibiga kiradi. Konsern va uyushmaning aʼzolari oldida ularga nisbatan oʻz majburiyatlari va funksiyalarini bajarish yuzasidan javob beradi;

yuridik shaxs hisoblanadi, bank muassasalarida yigʻma balanslarga, hisob-kitob va boshqa schyotlarga ega boʻladi, ularning huquqiy maqomini belgilovchi “Oʻzbekiston SSJda korxonalar toʻgʻrisida”gi Oʻzbekiston SSJ Qonuniga, boshqa qonunchilik va normativ aktlarga, shuningdek Oʻzbekiston SSJ Prezidenti huzuridagi Vazirlar Mahkamasi bilan kelishgan holda uyushma Kengashi tomonidan tasdiqlanadigan Ustavga muvofiq toʻla xoʻjalik hisobi prinsiplari asosida faoliyat koʻrsatadi;

unga “Oʻzbekyengilsanoat” uyushmasi tomonidan ajratiladigan xomashyo va moddiy resurslarning fond saqlovchisi hisoblanadi.

3. Konsernga taʼsischilari tomonidan berilgan vakolatlarga muvofiq quyidagilar uning faoliyatining asosiy funksiyalari hisoblanadi:

isteʼmol bozorining talablarini hisobga olgan holda konsernning joriy dasturlari hamda iqtisodiy va ijtimoiy rivojlanish istiqbollarini ishlab chiqish, maqsadli kompleks ilmiy-texnikaviy dasturlarini ishlab chiqish va roʻyobga chiqarish;

yaratilgan ishlab chiqarish potensialidan foydalanish samaradorligini, ishlab chiqarish texnologiyasi darajasini, mahsulotning sifatini va texnik darajasini oshirish, korxonalarni xususiylashtirish, ijara va kichik korxonalar, firma savdosi tashkil etish asosida xalq isteʼmoli mollari ishlab chiqarishni yanada rivojlantirish va koʻpaytirish hamda aholining ularga boʻlgan ehtiyojini qondirish;

korxonalar bilan birgalikda moliya mablagʻlaridan, moddiy va mehnat resurslaridan oqilona va samarali foydalanish chora-tadbirlarini amalga oshirish, bozor munosabatlari sharoitida barqaror zararsiz ishlashni taʼminlash boʻyicha amaliy yordam berish. Korxonalarning shartnoma va moliya intizomiga rioya qilishlari ustidan nazoratni amalga oshirish;

birlashmalar bilan korxonalar oʻrtasidagi tarmoq ichida kooperatsiya asosida mahsulot yetkazib berishni rivojlantirish, tayyor mahsulotni sotishni muvofiqlashtirish va bunga koʻmaklashish;

tashqi iqtisodiy aloqalarni rivojlantirish va belgilangan tartibda qoʻshma korxonalar tashkil etish boʻyicha takliflar ishlab chiqish;

tarmoqda ijtimoiy sohani rivojlantirish bilan bogʻliq masalalarning kompleks hal etilishini taʼminlash, kadrlar siyosatini olib borish, kadrlar tayyorlash va ularning malakasini oshirish;

tegishli davlat va boshqa organlarda oʻz tarkibiga kiruvchi korxonalar va tashkilotlarning huquq va manfaatlarini himoya qilishda qatnashish.

4. Xoʻjalik hisobi daromadi (foyda) va nomenklaturadagi mahsulotlarni yetkazib berish boʻyicha shartnoma majburiyatlarining bajarilishi birlashmalar va korxonalar faoliyatini baholashning asosiy koʻrsatkichlari deb hisoblansin.

“Oʻzbekkiyim” konserni tarkibiga kiruvchi birlashmalar, korxonalar va tashkilotlar jumhuriyat, oʻz mehnat jamoalari manfaatlaridan va bozor konyunkturasidan kelib chiqqan holda:

tarmoqning isteʼmolchilarining, savdo tashkilotlarining buyurtmalari boʻyicha tegishli mahsulotlar va xalq isteʼmoli mollari ishlab chiqarish hajmlarini mustaqil ravishda belgilaydilar, firma magazinlarining tavsiyalaridan foydalangan holda ularni yetkazib berish yuzasidan shartnomalar tuzadilar;

mahsulot ishlab chiqarish, ishlar va xizmatlar koʻrsatish xarajatlarini, olinadigan foyda miqdorini belgilaydilar, Oʻzbekiston SSJ qonunlari bilan belgilangan normativlar, shuningdek boshqa majburiy toʻlovlar boʻyicha budjet bilan hisob-kitoblar qilingandan keyin undan foydalanish masalasini mustaqil ravishda hal etadilar;

konsern Kengashi tomonidan belgilangan normativlarga muvofiq foydadan ular bajaradigan funksiyalar uchun, shuningdek markazlashgan rezerv (ehtiyot) jamgʻarmasi tashkil etishga mablagʻlar ajratadilar.

5. Korxonalar va tashkilotlar vakillarining yigʻilishi (konferensiyasi) “Oʻzbekkiyim” konsernini boshqarishning yuqori organi hisoblanadi, unda konsern Kengashi saylanadi.

Konsern Kengashiga birlashmalar, korxonalar va tashkilotlarning rahbarlari, shuningdek boshqaruv aʼzolari kiradilar. Kengash boshqaruvni, uning raisi va oʻrinbosarlarini saylaydi. Boshqaruv raisi “Oʻzbekyengilsanoat” uyushmasining taqdimnomasiga koʻra Oʻzbekiston SSJ Prezidenti huzuridagi Vazirlar Mahkamasi tomonidan tasdiqlanadi.

Konsern tarkibiga kiruvchi korxonalar va tashkilotlarning raxbarlari, shuningdek konsern taftish komissiyasining aʼzolari va uning raisi konsern Kengashining taqdimnomasiga koʻra “Oʻzbekyengilsanoat” uyushmasi boshqaruvi tomonidan tasdiqlanadi.

“Oʻzbekkiyim” konserniga unga yuklatilgan vazifalar va funksiyalarni hisobga olgan holda, konsern Kengashi bilan kelishuv boʻyicha oʻzining tuzilmasi, xodimlari soni va mehnatga haq toʻlash jamgʻarmasini mustaqil belgilashga ruxsat berilsin.

6. OʻzSSJ Moliya vazirligi, Oʻzbekiston sanoat-qurilish banki, OʻzSSJ Davlat narxlar qoʻmitasi va “Oʻzbekkiyim” konserni bir oy muddat ichida korxonalarning moliyaviy ahvolini tahlil qilsinlar va ularni moliyaviy sogʻlomlashtirish boʻyicha yordam koʻrsatsinlar.

7. OʻzSSJ Iqtisodiyot qoʻmitasi, OʻzSSJ Moddiy-texnika taʼminoti davlat-kooperativ qoʻmitasi, OʻzSSJ Moliya vazirligi, “Oʻzglavlegsnabsbit” “Oʻzbekyengilsanoat” uyushmasiga “Oʻzbekkiyim” konserni uchun oʻzlari taqsimlaydigan nomenklatura boʻyicha konsern korxonalarining rivojlanishi va ishlashi uchun xomashyo va moliyaviy resurslarni ajratsinlar.

8. Tashkil etilayotgan “Oʻzbekkiyim” konsernining apparati Paradlar xiyoboni koʻchasi, 5-uydagi OʻzSSJ Engil sanoat vazirligi egallab kelgan xonalarga joylashtirilsin.

9. Qoraqalpogʻiston MSSJ Vazirlar Kengashi, viloyat ijroiya qoʻmitalari, Toshkent shahar ijroiya qoʻmitasi, jumhuriyat vazirliklari va idoralari “Oʻzbekkiyim” konserni birlashmalari va korxonalariga koʻmaklashsinlar hamda ularning rivojlanishi va faoliyatiga doir oʻz vakolatlariga kiruvchi masalalarning oʻz vaqtida hal etilishini taʼminlasinlar.