LexUZ sharhi
Mazkur qaror O‘zbekistan Respublikasi Vazirlar Mahkamasining 2021-yil 22-fevraldagi 87-sonli “O‘zbekiston Respublikasi Hukumatining o‘z ahamiyatini yo‘qotgan ayrim qarorlarini o‘z kuchini yo‘qotgan deb hisoblash to‘g‘risida (O‘zbekiston Respublikasi Prezidentining “O‘z ahamiyatini yo‘qotgan qonunchilik hujjatlarini qayta ko‘rib chiqish tizimini joriy etish orqali mamlakatda ishbilarmonlik muhitini yaxshilash chora-tadbirlari to‘g‘risida” 2020-yil 27-sentabrdagi PF-6075-son Farmoni)”gi qaroriga asosan o‘z kuchini yo‘qotgan.
Suv oqimlarini hosil qiluvchi maydonlarning ko‘p qismida to‘plangan qorning hajmi o‘rtacha ko‘p yillik miqdordan 1,4 — 1,8 baravar ortib ketdi. “Boshgidromet”ning ma’lumotiga ko‘ra 1994-yil fevral oyida respublikamizning butun hududida yog‘ingarchilikning me’yor atrofida va me’yordan ko‘proq bo‘lishi kutilmoqda.
Shu yilning mart, aprel va may oylarida toshqin va sel jarayonlarining hamda ularga bog‘liq bo‘lgan ko‘chki hodisalarining kuchayishi kutiladi.
Sel va toshqin suvlari yetkazishi mumkin bo‘lgan zararning oldini olish hamda aholi yashaydigan joylar, gidrotexnika inshootlari, kanallar, temir yo‘l va avtomobil yo‘llari, ko‘priklar, elektr uzatish va aloqa tarmoqlari, qishloq xo‘jaligi yerlarining zarar ko‘rmasligini ta’minlash ishlarini muvofiqlashtirish maqsadida Vazirlar Mahkamasi qaror qiladi:
1. Qoraqalpog‘iston Respublikasi Vazirlar Kengashi, viloyatlar, tumanlar hokimliklari shu yilning 15-martigacha suvlarni yo‘llar bilan kesishgan joylar, dyukyerlar va novlar orqali o‘tkazib yuborishga alohida e’tibor berib, aholi yashaydigan hududlardagi sel, jala yo‘llarini, ariqlar va zovurlarni tozalashni ta’minlasinlar.
2. Sel va toshqin suvlarini xavf-xatarsiz o‘tkazib yuborish bilan bog‘liq barcha ishlarni amalga oshirish vazirliklar, idoralarga va tegishliligi bo‘yicha korxonalarga yuklatilsin, ular bu ishlarni ixtiyorlaridagi mablag‘ va moddiy-texnika resurslari doirasida bajarsinlar.
3. Qoraqalpog‘iston Respublikasi Vazirlar Kengashi, viloyatlar hokimliklari, vazirliklar va idoralar 1994-yil 15-martdan boshlab vujudga kelishi mumkin bo‘lgan barcha masalalarni tezkorlik bilan hal etish uchun kechayu kunduz ishlaydigan shtablar tuzsinlar, ular ixtiyoriga yetarlicha avtotransport, yonilg‘i-moylash materiallari va aloqa vositalarini ajratsinlar; sel va toshqin suvlari o‘tadigan o‘ta xavfli joylar va ko‘chki hodisalari sodir bo‘lishi mumkin bo‘lgan mintaqalarni aniqlasinlar, bunday joylarda kechayu kunduz navbatchilik qilish va zarur materiallar olib kelinishini tashkil etsinlar.
4. O‘zbekiston Respublikasi Mudofaa vazirligining fuqaro mudofaasi va favqulodda vaziyatlar boshqarmasi, Qoraqalpog‘iston Respublikasi Vazirlar Kengashi, viloyatlar va tumanlar hokimliklari aholini sodir bo‘lishi mumkin bo‘lgan toshqin, sel, ko‘chki hodisalaridan o‘z vaqtida xabardor qilishni ta’minlasinlar va zarur hollarda aholini, chorva mollarini xavfsiz yerlarga vaqtincha ko‘chirish choralarini ko‘rsinlar.
5. “O‘zshartnomasavdo” davlat uyushmasi, “O‘zqishloqxo‘jalikta’minottuzatish” davlat-kooperativ qo‘mitasi materiallarning zarur zaxiralarini tashkil etishda Qoraqalpog‘iston Respublikasi Vazirlar Kengashiga, viloyatlar hokimliklariga, vazirliklar va idoralarga yordam ko‘rsatsinlar.
6. O‘zbekiston Respublikasi Vazirlar Mahkamasi huzuridagi Gidrometeorologiya bosh boshqarmasi, O‘zbekiston Respublikasi Melioratsiya va suv xo‘jaligi vazirligi, Davlat geologiya qo‘mitasi respublika hududida kutilayotgan sel, toshqin va ko‘chki hodisalari haqida toshqinga qarshi favqulodda komissiyani, zarur muhofaza ishlarini amalga oshiruvchi vazirliklar va idoralarni o‘z vaqtida xabardor qilsinlar.
7. O‘zbekiston Respublikasi Moliya vazirligiga, O‘zbekiston Respublikasi Markaziy bankiga, zarurat bo‘lganda, sel va toshqin suvlarini o‘tkazib yuborish chog‘ida muhofaza va tiklash ishlarini bajarish va zarur materiallarni sotib olish uchun Melioratsiya va suv xo‘jaligi vazirligiga respublika budjeti kafolati bilan kreditlar ajratish tavsiya etilsin.