Oʻzbekiston Respublikasi Prezidentining 2011-yil 23-avgustdagi PQ-1602-sonli “Oʻzbekiston Respublikasi Adliya vazirligi faoliyatini yanada takomillashtirish chora-tadbirlari toʻgʻrisida”gi qaroriga (Oʻzbekiston Respublikasi qonun hujjatlari toʻplami, 2012-y., 29-son, 329-modda) muvofiq buyuraman:

1. Fuqarolik holati dalolatnomalarini yozish organlarida ish yuritish tartibi toʻgʻrisidagi yoʻriqnoma ilovaga muvofiq tasdiqlansin.

2. Oʻzbekiston Respublikasi Adliya vazirligi Hayʼatining 2006-yil 22-apreldagi 10-sonli “Oʻzbekiston Respublikasi fuqarolik holati dalolatnomalarini yozish (FHDY) organlarida ish yuritish tartibi toʻgʻrisida yoʻriqnomani tasdiqlash haqida”gi (roʻyxat raqami 1564, 2006-yil 22-aprel) (Oʻzbekiston Respublikasi qonun hujjatlari toʻplami, 2006-y., 17-son, 142-modda) va 2009-yil 1-iyuldagi 16/09-sonli “Oʻzbekiston Respublikasi fuqarolik holati dalolatnomalarini yozish (FHDY) organlarida ish yuritish tartibi toʻgʻrisidagi yoʻriqnomaga oʻzgartirish va qoʻshimchalar kiritish haqida”gi (Oʻzbekiston Respublikasi qonun hujjatlari toʻplami, 2009-y., 27-son, 322-modda) (roʻyxat raqami 1564-1, 2009-yil 1-iyul) qarorlari Adliya vazirligi Hayʼatining 2013-yil 30-dekabrdagi 25/13-sonli qarori bilan oʻz kuchini yoʻqotganligi maʼlumot uchun qabul qilinsin.

3. Mazkur buyruq davlat roʻyxatidan oʻtkazilsin va bu haqda Idoraviy meʼyoriy hujjatlarni davlat roʻyxatidan oʻtkazish boshqarmasi (B. Boliyev) Oʻzbekiston Respublikasi vazirliklari, davlat qoʻmitalari va idoralari normativ-huquqiy hujjatlarining davlat reyestriga tegishli yozuv kiritsin.

4. Qonun hujjatlarini turkumlash va huquqiy axborot boshqarmasi (S. Nuriyev) hamda Notariat, advokatura va FHDY organlari boshqarmasi (D. Yakubova) ushbu normativ-huquqiy hujjatni barcha manfaatdor shaxslarga yetkazilishi va “Oʻzbekiston Respublikasi qonun hujjatlari toʻplami” — “Sobraniye zakonodatelstva Respubliki Uzbekistan”da nashr etilishini taʼminlasin.

5. Mazkur buyruq rasmiy eʼlon qilingan kundan eʼtiboran kuchga kiradi.

6. Mazkur buyruq ijrosini nazorat qilish vazir oʻrinbosari O. Murodov zimmasiga yuklansin.

Ushbu Yoʻriqnoma Oʻzbekiston Respublikasining Oila kodeksi, Vazirlar Mahkamasining 2016-yil 14-noyabrdagi 387-sonli qarori bilan tasdiqlangan Fuqarolik holati dalolatnomalarini qayd etish qoidalariga (bundan buyon matnda Qoidalar deb yuritiladi) muvofiq fuqarolik holati dalolatnomalarini yozish organlarida (bundan buyon matnda FHDY organlari deb yuritiladi) ish yuritish tartibini belgilaydi.

1. Tuman va shahar FHDY boʻlimlari, nikoh uylari hamda Oʻzbekiston Respublikasi Adliya vazirligi huzuridagi Davlat xizmatlari agentligining Qoraqalpogʻiston Respublikasi, viloyatlar va Toshkent shahar hududiy boshqarmalari (bundan buyon matnda Agentlikning hududiy boshqarmalari deb yuritiladi) FHDY arxivlari (bundan buyon matnda FHDY arxivlari deb yuritiladi) FHDY organlari hisoblanadi.

2. FHDY organlari quyidagi harakatlarni amalga oshiradi:

tugʻilganlik, nikoh tuzilganligi, nikohdan ajralganlik va oʻlim haqidagi dalolatnoma yozuvlarini (bundan buyon matnda dalolatnoma yozuvlari deb yuritiladi) qayd etish;

dalolatnoma yozuvlarini tiklash;

dalolatnoma yozuvlarini oʻzgartirish, tuzatish va toʻldirish.

FHDY organlari qonun hujjatlariga muvofiq boshqa harakatlarni ham amalga oshirishi mumkin.

3. Oʻzbekiston Respublikasi Oila kodeksining 203-moddasiga muvofiq, Oʻzbekiston Respublikasining chet elda doimiy yoki vaqtincha yashovchi shaxslarining fuqarolik holati dalolatnomalari konsul tomonidan Oʻzbekiston Respublikasi qonun hujjatlariga muvofiq qayd etiladi.

4. Dalolatnoma yozuvlari shaxsni tasdiqlovchi hujjatlar asosida qayd etiladi, qonun hujjatlarida nazarda tutilgan hollar bundan mustasno.

5. Dalolatnoma yozuvlari ikki nusxada tuziladi va FHDY organlarida qayd etilgan vaqtdan boshlab yetmish besh yil mobaynida saqlanadi.

FHDY organlari ushbu dalolatnoma yozuvlarining saqlanishini taʼminlash maqsadida ularni “FHDY yagona elektron arxivi” axborot tizimiga (bundan buyon matnda elektron axborot tizimi deb yuritiladi) ham kiritadilar.

Dalolatnoma yozuvlari haqida maʼlumotlar elektron axborot tizimiga kiritilganda, uni kiritgan FHDY organi xodimining lavozimi, familiyasi, ismi va otasining ismi hamda maʼlumotlar kiritilgan sana koʻrsatilishi lozim.

Dalolatnoma yozuvlariga oʻzgartirishlar kiritilganda, ularning elektron shakliga shu kunning oʻzida yangi yozuvlar kiritiladi.

6. Dalolatnoma yozuvlarini qayd etish zarur boʻlgan barcha hujjatlar taqdim etilgandan hamda tegishli davlat boji va gerb yigʻimi toʻlanganidan soʻng amalga oshiriladi, qonun hujjatlariga muvofiq davlat boji va gerb yigʻimi toʻlashdan ozod etilgan hollar bundan mustasno.

Dalolatnoma yozuvlarini qayd etishda murojaatchilarning shaxsan ishtiroki talab etiladi, qonun hujjatlarida nazarda tutilgan hollar bundan mustasno.

7. FHDY organlari tomonidan mazkur Yoʻriqnomaning 2-bandida koʻrsatilgan harakatlarni amalga oshirish natijasida tugʻilganlik, nikoh tuzilganligi, nikohdan ajralganlik va oʻlim haqida gerbli guvohnomalar (dastlabki va takroriy ravishda) beriladi.

FHDY organlarida gerbli guvohnomalarning tugab qolishi dalolatnoma yozuvlarini qayd etmaslikka asos boʻlmaydi va dalolatnoma yozuvlari belgilangan tartibda qayd etiladi. Bunda dalolatnoma yozuvining gerbli guvohnoma raqami yoziladigan joyi ochiq qoldiriladi va “Belgilar uchun” ustunida gerbli guvohnoma berilmaganligi haqida yozib qoʻyiladi hamda dalolatnoma yozuvi qayd etilganligi haqida maʼlumotnoma beriladi. Keyinchalik gerbli guvohnoma toʻldirilganida, guvohnoma raqamining yoniga uning berilgan sanasi yozib qoʻyiladi.

8. Barcha FHDY organlarida hujjatlar FHDY organlarida yuritilishi lozim boʻlgan hujjatlar nomenklaturasiga 1, 1a, 1b-ilovalarga muvofiq elektron axborot tizimida elektron shaklda yuritiladi.

Faqat gerbli guvohnomalarni sarflash bilan bogʻliq daftarlar 3 — 6 va 8-ilovalarga muvofiq qogʻoz shaklda ham yuritiladi.

8¹. Elektron shaklda yuritilgan daftarlar yil yakunlangandan soʻng qogʻozga chop etilib (ikki va undan ortiq varaqlardan iborat boʻlgan taqdirda — varaqlari raqamlangan va ip oʻtkazilgan holda), FHDY boʻlimi rahbari tomonidan imzolanadi hamda tegishli hujjatlar yigʻma jildi bilan birga FHDY boʻlimlarida saqlanadi, qogʻoz shaklidagi alfavit daftarlari bundan mustasno.

9. Gerbli guvohnomalarni Oʻzbekiston Respublikasi Markaziy banki huzuridagi “Davlat belgisi” davlat ishlab chiqarish birlashmasidan (bundan buyon matnda “Davlat belgisi” DICHB deb yuritiladi) qabul qilish, hisobga olish, saqlash va topshirish (joʻnatish) Oʻzbekiston Respublikasi adliya vazirining buyrugʻi bilan vazirlikning Ishlar boshqarmasi masʼul xodimi zimmasiga yuklatiladi.

“Davlat belgisi” DICHBdan qabul qilingan gerbli guvohnomalar Ishlar boshqarmasi tomonidan shu kunning oʻzida Qabul qilingan gerbli guvohnomalarni kirim qilish daftariga (2-ilova) kirim qilinadi.

Gerbli guvohnomalarni Oʻzbekiston Respublikasi Adliya vazirligidan qabul qilib olish, hisobga olish, saqlash va topshirish Oʻzbekiston Respublikasi Adliya vazirligi huzuridagi Davlat xizmatlari agentligi (bundan buyon matnda Agentlik deb yuritiladi) tomonidan amalga oshiriladi.

Gerbli guvohnomalarni Agentlikdan qabul qilib olish, hisobga olish, saqlash va topshirish Agentlikning hududiy boshqarmalari rahbarlarining buyrugʻi bilan tuzilgan komissiya (bundan buyon matnda komissiya deb yuritiladi) tomonidan amalga oshiriladi.

10. Gerbli guvohnomalar komissiya tomonidan oʻramlar soni va oʻram yorligʻining butunligi tekshirilib qabul qilinadi. Agar oʻramlar buzilgan boʻlsa, oʻram yorligʻida koʻrsatilgan gerbli guvohnoma raqamlari va soni toʻgʻriligi, guvohnomalar soni yukxat bilan toʻgʻri kelishi tekshirilishi va bu haqda uch nusxada dalolatnoma tuzilishi lozim.

11. Qabul qilingan gerbli guvohnomalar komissiya tomonidan shu kunning oʻzida Agentlikdan qabul qilingan gerbli guvohnomalarni kirim qilish daftariga (3-ilova) hamda elektron axborot tizimiga kirim qilinadi.

Agentlikning hududiy boshqarmasidan qabul qilingan gerbli guvohnomalar tuman (shahar) hokimliklarida, tuman (shahar) hokimliklaridan qabul qilingan gerbli guvohnomalar FHDY organlarida, FHDY organlaridan qabul qilingan gerbli guvohnomalar shaharcha, qishloq, ovul fuqarolar yigʻinlarida (bundan buyon matnda QFYlar deb yuritiladi) xuddi shu tarzda Agentlikning hududiy boshqarmasidan (FHDY organidan) qabul qilingan gerbli guvohnomalarni kirim qilish daftariga (4-ilova) kirim qilinadi.

Oʻzbekiston Respublikasining konsullik muassasalari gerbli guvohnomalar bilan, ehtiyojiga qarab, Toshkent shahri uchun tayyorlangan seriyadagi gerbli guvohnomalar hisobidan Oʻzbekiston Respublikasi Tashqi ishlar vazirligi orqali taʼminlanadi.

12. Agentlikning hududiy boshqarmasida gerbli guvohnomalarni tuman (shahar) hokimliklariga (Agentlikning Toshkent shahar hududiy boshqarmasida Oʻzbekiston Respublikasi Tashqi ishlar vazirligiga ham), tuman (shahar) hokimliklarida FHDY organlariga, FHDY organlarida esa QFYlarga tarqatish daftarlari yuritiladi. Qogʻoz shaklidagi daftarlar raqamlangan, ip oʻtkazib tikilgan va Agentlikning hududiy boshqarmasi rahbari yoki oʻrinbosari, tegishli tuman (shahar) hokimlari oʻrinbosari tomonidan uning familiyasi, ismi, otasining ismi va sana koʻrsatilgan holda imzolanib, muhrlangan boʻlishi lozim.

13. Gerbli guvohnomalar FHDY organlariga ularning kelgusi chorak uchun ehtiyojini hisobga olgan holda Agentlikning hududiy boshqarmasi tomonidan beriladi.

Gerbli guvohnomalar tegishli hokimlikning ishonchnomasi asosida toʻgʻridan-toʻgʻri FHDY organlari rahbarlariga, ular vaqtincha boʻlmaganida (xizmat safari, mehnat taʼtili, kasallik va h. k.) tegishli buyruq bilan ularning vazifasini bajarish vaqtincha yuklatilgan xodimga Gerbli guvohnomalarni tarqatish daftariga (5-ilova) ularning lavozimi, familiyasi yozilib, imzo qoʻydirgan holda topshiriladi va bu haqda elektron axborot tizimiga maʼlumot kiritiladi.

14. Gerbli guvohnomalar QFYlarga ularning kelgusi chorak uchun ehtiyojini hisobga olgan holda FHDY organlari tomonidan beriladi.

Gerbli guvohnomalar QFY raislariga, ular vaqtincha boʻlmaganida (xizmat safari, mehnat taʼtili, kasallik va h. k.) tegishli buyruq bilan ularning vazifasini bajarish vaqtincha yuklatilgan xodimga Gerbli guvohnomalarni tarqatish daftariga (5-ilova) ularning lavozimi, familiyasi yozilib, imzo qoʻydirgan holda beriladi va bu haqda elektron axborot tizimiga maʼlumot kiritiladi.

15. Gerbli guvohnomalarning hisobga olinishi, saqlanishi va sarflanishi boʻyicha masʼuliyat Agentlikning hududiy boshqarmasida boshqarma rahbarining oʻrinbosari, hokimlikda hokimning masʼul oʻrinbosari, FHDY organlarida FHDY organi rahbarlari va QFYlarda QFY raislari zimmasiga yuklatiladi. Ushbu shaxslar uzrli sabablarga koʻra vaqtincha ishda boʻlmaganida (xizmat safari, mehnat taʼtili, kasallik va h.k.) masʼuliyat tegishli buyruq bilan boshqa shaxs zimmasiga yuklatilishi lozim.

16. FHDY organlari tomonidan Agentlikning hududiy boshqarmasidan gerbli guvohnomalarni qabul qilib olishda komissiya aʼzolari ishtirokida har bir guvohnoma oʻrami alohida ochilgan holda tekshirib koʻriladi. Guvohnomalarning yetishmasligi yoki nuqsonlar borligi (himoya kataklarining va bosma matnning yoʻqligi yoki buzilganligi, tartib raqamlarining takroriyligi yoxud boshqa seriyalar yoki tartib raqamlari boʻlgan, notoʻgʻri shriftli, notoʻgʻri kesilgan va notoʻgʻri shaklli, seriya va tartib raqamlari yoʻq boʻlgan yoki oʻram yorligʻiga boshqacha tarzda nomuvofiq boʻlgan guvohnomalar) aniqlangan taqdirda, komissiya tomonidan uch nusxada dalolatnoma tuziladi va shu kunning oʻzida Agentlikka pochta va faks orqali maxsus xabar yuboriladi. Dalolatnomaning birinchi nusxasi oʻram yorligʻining kseronusxasi bilan Agentlikning hududiy boshqarmasida qoldiriladi. Dalolatnomaning ikkinchi va uchinchi nusxalari nuqsonli guvohnomalar chiqqan oʻram yorligʻi, nuqsoni bor guvohnomalar ilova qilingan xat bilan uch kun ichida Agentlikka joʻnatiladi. Bunda dalolatnomaning ikkinchi nusxasi Agentlikning Moddiy-texnika taʼminoti boʻlimida qoldiriladi, uchinchi nusxasi oʻram yorligʻi va nuqsoni bor guvohnomalar bilan “Davlat belgisi” DICHBga yuborish uchun Adliya vazirligining Ishlar boshqarmasiga joʻnatiladi.

17. FHDY organlarining Agentlikning hududiy boshqarmasidan qabul qilingan gerbli guvohnomalarni kirim qilish daftari raqamlangan, ip oʻtkazib tikilgan va Agentlikning hududiy boshqarmasi rahbari yoki oʻrinbosari tomonidan uning familiyasi, ismi, otasining ismi va sana koʻrsatilgan holda imzolanib, muhrlangan boʻlishi lozim. QFYlarning FHDY organidan qabul qilingan gerbli guvohnomalarni kirim qilish daftari raqamlangan, ip oʻtkazib tikilgan va FHDY organi rahbari tomonidan uning familiyasi, ismi, otasining ismi va sana koʻrsatilgan holda imzolanib, muhrlangan boʻlishi lozim.

Agentlikning hududiy boshqarmasidan qabul qilingan gerbli guvohnomalar, tuman (shahar) hokimliklari tomonidan, tuman (shahar) hokimliklaridan qabul qilingan gerbli guvohnomalar FHDY organlari tomonidan va FHDY organlaridan qabul qilingan gerbli guvohnomalar QFYlar tomonidan shu kunning oʻzida ularning hisobga olinishi, sarflanishi va saqlanishi uchun masʼul shaxs tomonidan kirim qilinadi.

18. FHDY organida gerbli guvohnomalarning hisobga olinishi, sarflanishi va saqlanishi uchun masʼul shaxs oʻzgargan hollarda gerbli guvohnomalarni va ularning hisobot hujjatlarini qabul qilish-topshirish ishlari Agentlikning hududiy boshqarmasi rahbarining oʻrinbosari va tuman (shahar) hokimligi masʼul vakili ishtirokida amalga oshiriladi va bu haqda uch nusxada dalolatnoma tuzilgan paytdan boshlab gerbli guvohnomalarni hisobga olish, saqlash va sarflash masʼuliyati yangi masʼul xodim zimmasiga yuklatiladi. Dalolatnomaning bir nusxasi FHDY organida, ikkinchi nusxasi tuman (shahar) hokimligida, uchinchi nusxasi Agentlikning hududiy boshqarmasida saqlanadi.

QFY raisi almashgan hollarda esa, gerbli guvohnomalarni va ularning hisobot hujjatlarini qabul qilish-topshirish mazkur QFY joylashgan hududdagi FHDY organi rahbari yoki uning vazifasini bajaruvchi xodim ishtirokida amalga oshiriladi va bu haqda uch nusxada dalolatnoma tuziladi. Dalolatnomaning bir nusxasi QFYda, ikkinchi nusxasi FHDY organida, uchinchi nusxasi esa Agentlikning hududiy boshqarmasida saqlanadi.

19. Gerbli guvohnomalar Agentlikning hududiy boshqarmasida maxsus jihozlangan, shu jumladan poʻlat eshik oʻrnatilgan va begona shaxslar kirishi taqiqlangan alohida xonalarda, FHDY organlari va QFYlarda esa, poʻlat seyflarda saqlanishi zarur.

Gerbli guvohnomalar bilan ishlash huquqiga ularning hisobga olinishi, saqlanishi va sarflanishi uchun masʼul boʻlgan shaxslar hamda ularning hozirligida Agentlikning hududiy boshqarmasi, tuman (shahar) hokimliklari va Agentlikning masʼul xodimlari egadirlar.

Gerbli guvohnomalarni rasmiylashtirish bilan bogʻliq harakatlar amalga oshirilayotgan vaqtdan tashqari, ular saqlanadigan xona va poʻlat seyflar muhrlangan boʻlishi lozim.

20. FHDY organlari faoliyati Agentlikning hududiy boshqarmasi yoki Agentlik tomonidan oʻrganilganda gerbli guvohnomalarning hisobga olinishi, saqlanishi va sarflanishi holatlari tekshirilishi va natijasi haqida alohida maʼlumotnoma tuzilishi shart.

21. Gerbli guvohnomalar, dalolatnoma yozuvlari va FHDY organlarida yuritiladigan boshqa hujjatlarning, shuningdek muhrlar va shtamplarning yoʻqolganligi yoki noqonuniy sarflanganligi (foydalanilganligi) aniqlanganda, FHDY organi tomonidan bu haqda darhol Agentlikning hududiy boshqarmasiga xabar beriladi, bunda Agentlikning hududiy boshqarmasi tomonidan 24 soat ichida Agentlikka va tegishli huquqni muhofaza qiluvchi organlarga maxsus xabar berilishi va besh kun muddat ichida xizmat tekshiruvi oʻtkazilishi lozim.

Maxsus xabar Agentlikka kelib tushgan kundan boshlab besh kun muddat ichida aniqlangan holatlar boʻyicha barcha FHDY organlari va davlat notarial idoralari hamda zarur hollarda, boshqa tashkilotlar xabardor etiladi.

22. Xizmat tekshiruvi xulosasi uch nusxada tuzilib, bir nusxasi Agentlikning hududiy boshqarmasida, ikkinchi nusxasi tegishli FHDY organida saqlanadi, uchinchi nusxasi esa, Agentlikka taqdim etiladi.

Xizmat tekshiruvini oʻtkazish davomida gerbli guvohnomalar, dalolatnoma yozuvlari va FHDY organlarida yuritiladigan boshqa hujjatlarning, shuningdek muhrlar va shtamplarning yoʻqolganligi yoki noqonuniy sarflanganligi (foydalanilganligi) holatlariga imkon bergan shart-sharoitlarga aniqlik kiritiladi, bunda masʼul xodimlarning oʻz xizmat vazifasini lozim darajada bajarganligi, qatʼiy hisobda yuritiladigan hujjatlarni saqlash qoidalariga rioya etilganligi, sodir boʻlgan holatlarga imkon bergan shart-sharoitlarni bartaraf etish boʻyicha amalga oshirilgan harakatlar aniqlashtirilishi zarur.

23. FHDY organlari va QFYlarda sarflangan gerbli guvohnomalarning hisobini olib borish uchun Gerbli guvohnomalarni sarflash daftari (6-ilova) yuritiladi.

24. FHDY organlarining Gerbli guvohnomalarni sarflash daftari raqamlangan, ishonch yozuvi yopishtirilgan holda ip oʻtkazib tikilgan va Agentlikning hududiy boshqarmasi rahbari yoki uning oʻrinbosari tomonidan, QFYlarning Gerbli guvohnomalarni sarflash daftarlari esa, tegishli FHDY organi rahbari tomonidan imzolanib, muhrlangan boʻlishi lozim. Ishonch yozuvida sarflash daftari necha varaqdan iboratligi, sana, imzolagan shaxsning familiyasi, ismi va otasining ismi koʻrsatilishi lozim.

25. FHDY organlari tomonidan Gerbli guvohnomalarni sarflash daftarlari toʻliq toʻldirilib, tugatilganidan keyin Agentlikning hududiy boshqarmasi tomonidan yangi sarflash daftarlari beriladi. Berilayotgan daftarlar raqamlanib, ularni tarqatish boʻyicha alohida kitobga qayd qilinadi va qabul qilib olgan shaxs tomonidan imzolanadi.

26. Oʻtgan yildan ortib qolgan gerbli guvohnomalar Gerbli guvohnomalarni sarflash daftarida joriy yilning birinchi ish kunidan 1-tartib raqamidan boshlab qayd etiladi.

27. Gerbli guvohnomalarning har bir alohida ochilgan oʻrami Gerbli guvohnomalarni sarflash daftarida yangi ochilgan oʻramni aks ettirish namunasiga asosan (7-ilova) sarflanadi.

28. Takroriy beriladigan gerbli guvohnomalar Takroriy guvohnomalarni sarflash daftariga (8-ilova) qayd etiladi.

Dalolatnoma yozuviga oʻzgartirish, tuzatish va qoʻshimchalar kiritish, familiya, ism, ota ismini oʻzgartirish, shuningdek dalolatnoma yozuvini tiklash munosabati bilan beriladigan gerbli guvohnomalar ham Takroriy guvohnomalarni sarflash daftariga qayd etiladi.

FHDY arxivlarida ham xuddi shu tartibda Takroriy guvohnomalarni sarflash daftarlari yuritiladi.

Takroriy beriladigan gerbli guvohnomalarning yil oxiridagi qoldigʻi mazkur Yoʻriqnomaning 26-bandida belgilangan tartibda sarflanadi.

29. Yozuvlar Gerbli guvohnomalarni sarflash daftariga hamda elektron axborot tizimiga gerbli guvohnomalarni toʻldirish oldidan kiritiladi. Gerbli guvohnomalarni sarflash daftarini toʻldirishda yoʻl qoʻyilgan xato bir chiziq bilan oʻchiriladi va keyingi qatorga toʻgʻri yozuv kiritiladi. Kiritilgan har bir tuzatish shu varaqning pastki qismida izohlanib, FHDY organi rahbari tomonidan imzolanib, muhr bilan tasdiqlanishi zarur.

30. Gerbli guvohnomalarni sarflashda guvohnoma raqamlarining ketma-ketligini buzish, Gerbli guvohnomalarni sarflash daftaridagi yozuvlarni oʻchirish, boʻyash, ustidan qogʻoz yopishtirish taqiqlanadi.

Gerbli guvohnomalarni sarflash daftarida ochiq qatorlar qoldirib ketishga yoʻl qoʻyilmaydi.

31. Gerbli guvohnomani toʻldirish vaqtida yoki toʻldirilgandan keyin undagi yozuvlarni boʻyash, oʻchirish, tuzatish kiritish hamda ushbu holatlarga izoh berib muhr bilan tasdiqlashga yoʻl qoʻyilmaydi. Toʻldirish vaqtida buzilgan gerbli guvohnomalar boʻyicha (QFYlar tomonidan topshirilgan guvohnomalar boʻyicha ham) ikki nusxada dalolatnoma tuzilib, har chorakda gerbli guvohnomalar hisoboti bilan birga Agentlikning hududiy boshqarmasiga (QFYlar tomonidan FHDY organiga) topshiriladi.

Agentlikning hududiy boshqarmasida buzilgan gerbli guvohnomalar seriyasi, tartib raqamlari qirqib olinib, dalolatnomaning birinchi nusxasiga ilova qilingandan keyin komissiya ishtirokida yoqib yuborish yoʻli bilan yoʻq qilinadi. Bunda dalolatnomaning birinchi nusxasi Agentlikning hududiy boshqarmasida, ikkinchi nusxasi esa FHDY organida saqlanadi.

32. Har oyda va har chorakda qayd etilgan dalolatnoma yozuvlari haqida, shuningdek har chorakda sarflangan va qoldiqdagi gerbli guvohnomalar toʻgʻrisida hisobotlar tuziladi va tegishliligi boʻyicha FHDY organlari, Agentlikning hududiy boshqarmasi va Agentlikka topshiriladi. Hisobotlarning toʻgʻriligi uchun QFYlarda ularning raislari, FHDY organlarida ularning rahbarlari, Agentlikning hududiy boshqarmasida rahbarning oʻrinbosari masʼul hisoblanadi.

33. FHDY organlarida Dalolatnoma yozuvlari boʻyicha alfavit daftari (9-ilova) yuritiladi. Qayd etilgan dalolatnoma yozuvlari va ularga kiritilgan oʻzgartirishlar shu kunning oʻzida tegishli alfavit daftariga kiritiladi.

34. Qogʻoz shaklida yuritilgan alfavit daftarlari raqamlangan, ishonch yozuvi yopishtirilgan holda ip oʻtkazib tikilgan va Agentlikning hududiy boshqarmasi rahbari yoki uning oʻrinbosari tomonidan imzolanib, muhrlangan boʻlishi lozim. Ishonch yozuvida Qogʻoz shaklida yuritilgan alfavit daftari necha varaqdan iboratligi, sana, Agentlikning hududiy boshqarmasi rahbari yoki uning oʻrinbosari familiyasi, ismi va otasining ismi koʻrsatilishi zarur.

35. Alfavit daftarlari tugʻilganlik, nikoh tuzilganligi, nikohdan ajralganlik, oʻlim haqida qayd etilgan dalolatnoma yozuvlari asosida elektron shaklda yuritiladi.

36. Dalolatnoma yozuvlarida familiya va ism oʻzgartirilgan hollarda yangi familiya va ism ushbu dalolatnoma yozuvlari qayd etilgan yildagi alfavit daftariga kiritiladi. Avvalgi familiya va ism alfavit daftaridan oʻchirilmaydi.

37. Alfavit daftarining muqovasida mazkur daftar qaysi dalolatnoma yozuvi boʻyicha va qaysi yil uchun yuritilayotganligi yozib qoʻyiladi.

Elektron shaklda yuritilgan alfavit daftarlari yil yakunlangandan soʻng, keyingi yilning 15-yanvaridan kechiktirmasdan ikki nusxada chop etilib, bir nusxasi FHDY boʻlimida saqlanadi, ikkinchisi FHDY arxiviga topshiriladi.

38. QFYlar tomonidan qayd etilgan oʻlim haqidagi dalolatnoma yozuvlari boʻyicha familiya va ismlar har oylik hisobotdan keyin tegishli FHDY organining alfavit daftariga FHDY organi masʼul xodimi nazorati ostida kiritib boriladi.

39. Nikoh tuzilganligi va nikohdan ajralganlik haqidagi alfavit daftariga er hamda xotinning familiya va ismlari alohida-alohida kiritiladi.

40. Boshqa FHDY organlari tomonidan rasmiylashtirilgan guvohnomalar uchun Boshqa FHDY organlaridan kelgan gerbli guvohnomalar uchun alfavit daftari (10-ilova) yuritiladi.

41. Boshqa FHDY organlaridan kelib tushgan xabarnomalar boʻyicha dalolatnoma yozuviga oʻzgartirish kiritilganida bu haqda shu kunning oʻzida tegishli alfavit daftariga yozuv kiritiladi.

42. FHDY organiga kelgan barcha xat, xabarnoma va arizalar shu kunning oʻzida Xat, xabarnoma va arizalarni roʻyxatga olish daftariga (11-ilova) kirim qilinishi va qonun hujjatlarida belgilangan muddatlarda ijro etilishi lozim. Kirim qilingan barcha hujjatlarning birinchi varagʻi pastki oʻng burchagiga kirim qilingan sana va kirim raqami yozib qoʻyiladi.

Ijro etilgan xatdagi chiqish raqami kirim raqami bilan bir xil boʻladi.

43. Tugʻilganlik, nikoh tuzilganligi, nikohdan ajralganlik va oʻlim haqidagi takroriy guvohnoma berishni soʻrab murojaat qilingan arizalarni roʻyxatga olish daftarlari har bir fuqarolik holati dalolatnomalari uchun alohida yuritiladi.

44. FHDY organining oʻz tashabbusiga koʻra joʻnatilayotgan xat, xabarnoma va arizalar FHDY organidan joʻnatilayotgan xatlarni roʻyxatga olish daftariga (12-ilova) kirim qilinadi.

45. FHDY organlari boshqa FHDY organlarining xabarnomalari kelib tushgan kunning oʻzida dalolatnoma yozuvlariga tegishli oʻzgartirishlar kiritishi shart.

46. Tugʻilishni qayd etish uchun tugʻilganlik haqidagi tibbiy maʼlumotnoma, ota-onalarning shaxsini tasdiqlovchi hujjatlar, nikoh tuzilganligi haqidagi guvohnoma yoki otalikni belgilash haqidagi ariza yoxud nikohda boʻlmagan onaning arizasi taqdim etiladi.

Mazkur bandda koʻrsatilgan hujjatlar taqdim etilmagan hollarda FHDY organi tomonidan ariza beruvchiga dalolatnoma yozuvini qayd etish rad qilinganligi haqida asoslantirilgan maʼlumotnoma beriladi.

Ota-onalardan birining shaxsini tasdiqlovchi hujjat boʻlmaganda ota yoki ona haqida maʼlumotlar nikoh tuzilganligi yoki avvalgi bolalarining tugʻilganligi haqidagi guvohnomalari asosida koʻrsatiladi.

47. Tugʻilishni qayd etish uchun bir oylik muddat oʻtkazib, bola oʻn olti yoshga toʻlgunga qadar murojaat etilgan hollarda tugʻilishni qayd etish rad qilinmaydi va umumiy asoslarda amalga oshiriladi. Bola bir yoshga toʻlganidan soʻng, uning tugʻilishi bola tugʻilgan joyda yoki ota-onasidan birining doimiy yashash joyida qayd etiladi.

48. Tugʻruqxonadan tashqari joylarda va tibbiy yordamsiz tugʻilgan bolaning tugʻilishini qayd etish uchastka shifokori (feldsher yoki akusher) tomonidan berilgan tugʻilganlik haqidagi tibbiy maʼlumotnoma asosida amalga oshiriladi.

49. Bolaning tugʻilishini qayd etish uchun yetarli asoslar mavjud boʻlmagan taqdirda, yaʼni tugʻilganlik faktini tasdiqlovchi hujjatlar mavjud boʻlmaganda, hujjatlarda jiddiy tafovutlar mavjud boʻlganda va boshqa hollarda bolaning u yoki bu onadan tugʻilganlik faktini qayd etish sudning hal qiluv qaroriga asosan amalga oshiriladi.

Bola 16 yoshdan oshgan va tugʻilishi qayd etilmagan hollarda ham bolaning u yoki bu onadan tugʻilganlik faktini qayd etish sudning hal qiluv qaroriga asosan amalga oshiriladi.

50. Tugʻilishni qayd etish bilan bir vaqtda, nikohda boʻlmagan ota-onadan tugʻilgan bolaga otalikni belgilash ota va onaning FHDY organiga birgalikda bergan arizasi asosida amalga oshiriladi.

51. Agar bolaning onasi boshqa shaxs bilan qonuniy nikohda turgan boʻlsa, otalikni belgilash toʻgʻrisidagi arizaga nikohda turgan erning u bilan qonuniy nikohda boʻlgan onadan tugʻilgan bolaga nisbatan otalikni belgilashga yoki bolaning tugʻilishini yolgʻiz ona arizasi asosida qayd etilishiga notarial tasdiqlangan roziligi ilova qilinishi yoki u FHDY organiga kelib bunga yozma ravishda oʻz roziligini bildirishi lozim. Bunday rozilik FHDY organi rahbari tomonidan tasdiqlanadi.

Masalan, fuqaro B. Turdimatovning rozilik arizasida quyidagilar koʻrsatilgan boʻlishi lozim:

Oila kodeksining 60-moddasi 3-qismiga muvofiq agar nikoh tugaganidan keyin uch yuz kun ichida bola tugʻilsa va bu davrda bolaning onasi yangi nikohga kirgan boʻlsa, bola yangi nikohda tugʻilgan hisoblanadi. Bunday hollarda bolaning tugʻilishini qayd etishda sobiq erdan rozilik olinishi talab etilmaydi.

52. Tugʻilganlik haqida dalolatnoma yozuvi toʻldirilgach, ariza beruvchi tomonidan oʻqib chiqilib imzolanadi va unga shu vaqtning oʻzida tugʻilganlik haqida guvohnoma va Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasining tuman (shahar) boʻlimiga topshirish uchun Tugʻilganlik haqida maʼlumotnoma (13-ilova) beriladi.

Tugʻilganlik haqida maʼlumotnoma yoʻqolgan yoki yaroqsiz holga kelgan hollarda maʼlumotnoma takroran berilishi mumkin. Bunda maʼlumotnomaning yuqori oʻng qismida “takroriy” degan soʻz yozib qoʻyiladi.

53. Tugʻilganlik haqidagi tibbiy maʼlumotnoma yoki bolaning u yoki bu onadan tugʻilganlik faktini belgilash haqidagi sudning hal qiluv qarori tugʻilganlik haqidagi dalolatnoma yozuvi birinchi nusxasining orqa tomoniga tikiladi va u bilan birga saqlanadi.

54. Tugʻilishni qayd etish uchun yolgʻiz (qonuniy nikohda boʻlmagan) ona tomonidan FHDY organiga onaning shaxsini tasdiqlovchi hujjat va yozma ariza (14-ilova) taqdim etiladi.

Agar tugʻilgan bolaning onasi voyaga yetmagan boʻlsa, tugʻilishni qayd etish bolaning tugʻilganligi haqida tibbiy maʼlumotnoma hamda vasiylik va homiylik organining arizasiga asosan onaning yashash joyidagi FHDY organi tomonidan qayd etiladi. Bunda bolani tuqqan onaning shaxsini tasdiqlovchi hujjati yoki tugʻilganlik haqidagi guvohnomasi bilan birga yashash va oʻqish joyidan rasmi yelimlangan holdagi maʼlumotnomalar taqdim etilishi lozim.

55. Yolgʻiz onaning arizasida ona va otaning familiyasi bir xilda — onaning familiyasi boʻyicha koʻrsatilishi lozim.

Bolaning familiyasi esa onaning familiyasi yoki milliy anʼanalarga koʻra ona tomonidan boboning ismi boʻyicha berilishi mumkin.

56. Tugʻilganlik haqida dalolatnoma yozuvini qayd etishda yolgʻiz ona shaxsan ishtirok etolmagan taqdirda onaning arizadagi imzosi tibbiy muassasa yoki jazoni ijro etish muassasasi mansabdor shaxsining imzosi va ushbu muassasaning gerbli muhri bilan yoxud notarial tartibda tasdiqlangan boʻlishi shart.

57. Yolgʻiz onalarning arizalari Yolgʻiz onalarning arizalarini roʻyxatga olish daftariga (15-ilova) qayd etilib, arizaning pastki oʻng burchagiga kirim qilingan sana va kirim raqami yozib qoʻyiladi hamda ketma-ketligi boʻyicha tikib boriladi.

Arizaning yuqori oʻng burchagiga dalolatnoma yozuvi raqami va sanasi, berilgan gerbli guvohnoma seriyasi va raqami yozib qoʻyiladi.

58. Yolgʻiz onaga farzandining tugʻilganligi haqida dalolatnoma yozuvi qayd etilganligi toʻgʻrisida maʼlumotnoma (16-ilova) beriladi.

59. Oʻn olti yoshgacha boʻlgan bolaning tugʻilishini qayd etish uchun FHDY organiga tugʻilishni qayd etish muddatini oʻtkazib yuborganlik sabablari koʻrsatilgan ariza (17-ilova) va quyidagi hujjatlar taqdim etiladi:

bolaning tugʻilganligi haqida tibbiy maʼlumotnoma;

bolaning sogʻligʻi toʻgʻrisida maʼlumotnoma;

bolaning taʼlim olayotganligi toʻgʻrisida maʼlumotnoma;

tegishli FHDY arxividan ushbu bolaga nisbatan tugʻilganlik haqida dalolatnoma yozuvi qayd etilmaganligi toʻgʻrisida maʼlumotnoma.

60. Chet elda tugʻilgan, lekin tugʻilishi oʻsha davlatlarda belgilangan tartibda qayd etilmagan bolaning tugʻilishini qayd etishda mazkur Yoʻriqnomaning 59-bandida koʻrsatilgan hujjatlar talab etiladi.

61. Topib olingan (tashlab ketilgan) bolaning tugʻilganligini qayd etish uchun ichki ishlar organi, vasiylik va homiylik organlari, bola parvarishlanayotgan muassasa maʼmuriyati yoki tibbiy muassasa tomonidan bola topib olingan (tashlab ketilgan) joydagi FHDY organiga quyidagi hujjatlarni ilova qilgan holda ariza (18-ilova) beriladi:

ichki ishlar organi yoki vasiylik va homiylik organining bolaning topib olingan vaqti, joyi va topib olingan paytdagi holati toʻgʻrisidagi dalolatnomasi;

tibbiy muassasaning topib olingan yoki tashlab ketilgan bolaning yoshi, jinsi, vazni va boʻyi toʻgʻrisidagi maʼlumotnomasi.

62. Oʻzaro qonuniy nikohda boʻlmagan ota-onaning Otalikni belgilash haqidagi arizasi (19-ilova) uni qabul qilgan FHDY organi xodimi tomonidan imzolanib, tartib raqami va sana qoʻyiladi hamda Otalikni belgilash haqidagi arizalarni roʻyxatga olish daftariga (20-ilova) kirim qilinib, ketma-ket tikib boriladi.

63. Otalikni belgilash haqidagi ariza FHDY organiga bola tugʻilgungacha, bolaning tugʻilishini qayd etish bilan bir vaqtda yoki bolaning tugʻilishi qayd etilgandan soʻng berilishi mumkin. Ariza FHDY organining masʼul xodimi tomonidan undagi maʼlumotlarni ota-onaning shaxsini tasdiqlovchi hujjatlari bilan solishtirib qabul qilinadi.

64. Otalikni belgilashda ota-onadan biri ishtirok etmagan taqdirda, uning arizadagi imzosi belgilangan tartibda (tibbiy muassasa, FHDY organi, harbiy qism, jazoni ijro etish muassasasi rahbari imzosi va gerbli muhri bilan yoki notarial tartibda) tasdiqlanishi zarur.

Otalikni ishonchnoma orqali belgilashga yoʻl qoʻyilmaydi.

65. Sudning otalikni belgilash haqidagi hal qiluv qaroriga asosan bolaning tugʻilganligi haqidagi dalolatnoma yozuviga otasi toʻgʻrisidagi maʼlumotlarni kiritish mazkur hal qiluv qarori qonuniy kuchga kirgandan keyin amalga oshiriladi. Bunda ariza beruvchi tomonidan sudning hal qiluv qarori va bolaning tugʻilganlik haqidagi guvohnomasi taqdim qilinishi zarur.

66. Tugʻilganlik haqidagi dalolatnoma yozuvi yolgʻiz onaning arizasiga asosan qayd etilgandan keyin bolaning ota-onasi qonuniy nikohdan oʻtib, ona erining familiyasiga oʻtgan boʻlsa va ular otalikni belgilash haqida birgalikdagi ariza bilan murojaat etsa, dalolatnoma yozuvining ona ustunidagi onaning familiyasi haqidagi yozuvga oʻzgartirish kiritiladi. Bu haqda onadan qoʻshimcha ariza olish talab etilmaydi.

67. Otalik belgilangandan keyin ariza beruvchi(lar)ga Otalik belgilanganligi haqida maʼlumotnoma (21-ilova) beriladi.

68. Tugʻilishni qayd etish bilan bir vaqtda rasmiylashtirilmagan hollarda, otalikni belgilash bolaning tugʻilganlik haqidagi dalolatnoma yozuviga oʻzgartirish kiritish qoidalarini qoʻllash orqali amalga oshiriladi.

Agar otalikni belgilash 16 yoshga toʻlgan shaxsga nisbatan amalga oshirilayotgan boʻlsa, u holda ota haqidagi maʼlumotlar oʻzgartirilishi lozim. Bola haqidagi maʼlumotlar familiya, ism va ota ismini oʻzgartirish tartibi va qoidalariga asosan kiritiladi.

Oʻzgartirishlar kiritgan FHDY organi tomonidan bu haqda tugʻilganlik haqidagi dalolatnoma yozuvining ikkinchi nusxasiga tegishli oʻzgartirishlarni kiritish uchun FHDY arxiviga yetti kun ichida Otalik belgilanganligi haqida xabarnoma (22-ilova) yuboriladi.

69. Sudning farzandlikka olish toʻgʻrisidagi hal qiluv qarori qonuniy kuchga kirgan kundan boshlab oʻn kun ichida FHDY organi farzandlikka olingan bolaning tugʻilishi qayd etilgan dalolatnoma yozuviga zarur oʻzgartirishlar kiritishi lozim.

70. Farzandlikka olishni rasmiylashtirish uchun FHDY organiga sudning qonuniy kuchga kirgan hal qiluv qaroridan koʻchirma, farzandlikka olinuvchining tugʻilganlik haqidagi guvohnomasi, shuningdek farzandlikka oluvchilarning shaxsini tasdiqlovchi hujjatlari taqdim etiladi. Farzandlikka oluvchilar ikki yoki undan koʻp bolani bir vaqtda farzandlikka olgan hollarda har bir bola uchun alohida sudning hal qiluv qarori taqdim etilishi, agar ushbu masalada sud tomonidan bitta hal qiluv qarori qabul qilingan boʻlsa, mazkur hal qiluv qarorining nusxalari farzandlikka olinayotgan bolalarning soniga mutanosib miqdorda taqdim etilishi hamda har bir qarorga alohida kirim va ijro haqida belgi qoʻyilishi lozim.

71. Bir viloyatda (tuman, shaharda) doimiy yashovchi farzandlikka oluvchi(lar) ikkinchi viloyatda (tuman, shaharda) yashayotgan bolani farzandlikka olayotgan boʻlsa va oʻz(lar)ining doimiy yashash joyidagi FHDY organiga murojaat etsa, sudning qonuniy kuchga kirgan hal qiluv qarori va bolaning tugʻilganlik haqidagi guvohnomasi tugʻilganlik haqida dalolatnoma yozuvi qayd etilgan FHDY organiga tegishli oʻzgartirishlarni kiritish va yangi guvohnoma berish uchun yuboriladi.

72. Oʻn yoshdan oshmagan bolaning tugʻilgan joyi sudning hal qiluv qarori asosida Oʻzbekiston Respublikasi hududi doirasida oʻzgartirilgan boʻlsa, u holda farzandlikka oluvchi(lar)ning yashash joyidagi FHDY organida tiklangan dalolatnoma yozuvi qayd etiladi va yetti kun ichida dastlabki dalolatnoma yozuvi qayd etilgan FHDY organiga uni bekor qilish haqida xabarnoma (22a-ilova) yuboriladi.

Agar oʻn yoshdan oshmagan bolaning tugʻilgan sanasi sudning hal qiluv qarori asosida bir yildan ortiq boʻlmagan farq bilan oʻzgartirilsa va ushbu sana bolaning tugʻilganlik haqidagi dalolatnoma yozuvi qayd qilingan sanadan keyin qilib belgilansa, u holda FHDY organi tomonidan tiklangan dalolatnoma yozuvi qayd etilib, dastlabki dalolatnoma yozuvi bekor qilinadi va yetti kun ichida dalolatnoma yozuvining ikkinchi nusxasi saqlanayotgan FHDY arxiviga uni bekor qilish haqida xabarnoma yuboriladi.

73. Sudning hal qiluv qarorlari ular taqdim etilgan kunning oʻzida Farzandlikka olish boʻyicha sudning hal qiluv qarorlarini roʻyxatga olish daftarida (23-ilova) roʻyxatga olinadi va uning pastki oʻng burchagiga roʻyxatga olingan raqami va sanasi yozib qoʻyiladi.

74. Farzandlikka olingan bolaning tugʻilganlik haqidagi dastlabki guvohnomasiga qiya chiziq tortilib, farzandlikka olinganligi sababli, bekor qilinganligi haqida yozib qoʻyiladi.

75. Sudning hal qiluv qarorining yuqori oʻng burchagiga tugʻilganlik haqida dalolatnoma yozuvining qayd etilgan raqami va sanasi, berilgan guvohnomaning seriyasi, raqami va sanasi yozib qoʻyiladi.

76. Ijrosi taʼminlangan hal qiluv qarori bolaning tugʻilganlik haqidagi dastlabki guvohnomasi bilan birgalikda farzandlikka olish boʻyicha alohida yigʻmajildga tartib bilan tikiladi.

77. Bola yolgʻiz ona (ota) tomonidan farzandlikka olingan hollarda, agar sudning hal qiluv qarorida tugʻilganlik haqidagi dalolatnoma yozuvining ota (ona) ustunini toʻldirish boʻyicha koʻrsatma berilmagan boʻlsa, ota (ona) haqida maʼlumotlar yolgʻiz ona (ota)ning qoʻshimcha arizasi asosida toʻldiriladi. Ushbu qoʻshimcha ariza ham farzandlikka olish boʻyicha yigʻmajildga tikiladi.

78. Sudning hal qiluv qarorida koʻrsatilgan maʼlumotlarda nomuvofiqliklar aniqlangan hollarda, farzandlikka olishni rasmiylashtirish mazkur nomuvofiqliklar bartaraf etilganidan keyin amalga oshiriladi.

79. Farzandlikka olish rasmiylashtirilgandan soʻng farzandlikka oluvchi(lar)ga FHDY organi tomonidan farzandlikka olinuvchining tugʻilganlik haqidagi yangi guvohnomasi va zarur boʻlganda Farzandlikka olinganlik haqida maʼlumotnoma (24-ilova) beriladi.

80. Farzandlikka olingan bolaning tugʻilganlik haqidagi dalolatnoma yozuvining ikkinchi nusxasiga tegishli oʻzgartirishlar kiritish uchun tegishli FHDY arxiviga yetti kun muddat ichida Farzandlikka olinganlik haqida xabarnoma (25-ilova) yuboriladi. Xabarnomaning nusxasi farzandlikka olish boʻyicha yigʻmajildga tikiladi.

81. Nikohlanuvchi shaxslar tomonidan taqdim etilgan Nikoh tuzilganligini qayd etish haqidagi ariza (26-ilova) shu kunning oʻzida Nikoh tuzilganligini qayd etish haqidagi arizalarni roʻyxatga olish daftariga (27-ilova) kirim qilinadi.

82. Nikohlanuvchi shaxslarga tibbiy koʻrikdan oʻtish uchun berilgan yoʻllanmalarning raqami arizaning kirim raqamiga “/” belgisi (drob) orqali tartib bilan qoʻshib boriladi.

83. Nikohni qayd etish haqidagi ariza FHDY organi xodimi ishtirokida imzolanishi hamda u tomonidan arizada koʻrsatilgan maʼlumotlar ariza beruvchilarning shaxsini tasdiqlovchi hujjatlari bilan tekshirib qabul qilinishi lozim.

84. Arizaning old tomoni topshirish vaqtida toʻldirilib, oʻsha kundagi sana qoʻyiladi. Arizaning orqa tomoni nikohlanuvchi shaxslarning tibbiy koʻrikdan oʻtganligi toʻgʻrisidagi maʼlumotnomalar taqdim etilgan vaqtda toʻldiriladi va shu kundagi sana qoʻyiladi.

Tibbiy koʻrik natijasi boʻyicha nikohlanuvchi shaxslarda yoki ularning birida ruhiy kasallik mavjudligi aniqlansa, FHDY organi ruhiy kasalligi aniqlangan nikohlanuvchi shaxsning yashash joyidagi tuman, shahar tibbiyot birlashmasidan uning ruhiyat buzilishi sababli sud tomonidan muomalaga layoqatsiz deb topilganligi haqida maʼlumot mavjud yoki mavjud emasligini aniqlashi lozim.

85. Ichki ishlar organi tomonidan shaxsni tasdiqlovchi hujjat oʻrniga vaqtincha berilgan maʼlumotnomalar bilan nikoh tuzilganligini qayd etishga yoʻl qoʻyilmaydi.

86. Uzrli sabablar boʻlganda FHDY organi bir oy oʻtgunga qadar nikoh tuzishga ruxsat berishi mumkin. Bunda uzrli sabablarni tasdiqlovchi — bolalarining tugʻilganligi haqidagi guvohnomalari, tibbiy muassasaning kelinning homiladorligi haqidagi maʼlumotnomasi, xizmat safari toʻgʻrisidagi va shu kabi hujjatlar taqdim etiladi.

87. Alohida hollarda (homiladorlik, bola tugʻilishi, bir tarafning kasalligi va boshqalar) nikoh tuzilganligi ariza berilgan kuni qayd etilishi mumkin. Bunday holda nikoh tuzilganligini qayd etish haqidagi arizaning yuqori chap burchagiga asoslantirilgan yozuv kiritiladi va FHDY organi rahbarining imzosi bilan tasdiqlanadi.

88. Nikoh tuzilganligi qayd etilgunga qadar nikoh tuzilganligini qayd etish haqidagi arizalar alohida yigʻmajildlarda saqlanadi.

89. Oʻzbekiston Respublikasi fuqarolarining chet el fuqarolari bilan nikoh tuzilganligini qayd etishda arizaga chet el fuqarosining shaxsini tasdiqlovchi hujjatining nusxasi va uning tarjimasi hamda chet el fuqarosining oilaviy ahvolini tasdiqlovchi hujjatlar belgilangan tartibda legalizatsiya qilingan yoki apostil qoʻyilgan holda ilova qilinadi.

90. Belgilangan muddatda yoʻqlanmagan arizalar alohida yigʻmajildga tikib boriladi.

Nikoh tuzilganligini qayd etish tayinlangan kundan boshlab, uch oy ichida yoʻqlangan arizalar boʻyicha nikoh tuzilganligi qayd etiladi. Bunday holda nikoh tuzilganligini qayd etish haqidagi arizaning orqa tarafidagi boʻsh joyga nikohlanuvchi shaxslar tomonidan belgilangan muddatda kelmaganlik sabablari, nikoh tuzilganligini qayd ettirish istagi va shu kunning sanasi yozilib, imzo qoʻyiladi.

91. Nikoh tuzilganligini qayd etish haqidagi ariza berilgan kundan boshlab toʻrt oy ichida yoʻqlanmagan arizalar Muddatida yoʻqlanmagan nikoh tuzilganligini qayd etish haqidagi arizalarni yoʻq qilish boʻyicha dalolatnoma (28-ilova) tuzgan holda yoqib yuborish yoʻli bilan yoʻq qilinadi. Mazkur dalolatnomalar alohida yigʻmajildga tikib boriladi.

92. Nikoh tuzilganligini qayd etish haqidagi ariza berilgan kundan boshlab toʻrt oylik muddat oʻtgandan keyin nikoh tuzish istagini bildirgan shaxslar nikoh tuzilganligini qayd etish haqidagi ariza bilan umumiy asoslarda qayta murojaat etishlari lozim.

93. Nikohlari qayd etilgan shaxslarning arizalari ularning tibbiy koʻrikdan oʻtganligi toʻgʻrisidagi maʼlumotnomalar va taqdim qilingan hujjatlardan nusxalar bilan birgalikda, qayd etilgan dalolatnoma yozuvi tartibiga qatʼiy amal qilgan holda mazkur hujjatlarning soniga qarab, oylik, choraklik yoki yillik yigʻmajildlarga tikib boriladi. Mazkur yigʻmajildlar muqovasining ichki chap tomonida qayd etilgan nikohlar haqidagi maʼlumotlar (29-ilova) yozib boriladi.

94. Alohida hollarda, istisno tariqasida (agar ota-onasi va nikohlanuvchi shaxslar Oʻzbekiston Respublikasining turli hududlarida yoxud uning tashqarisida yashab turgan boʻlsalar) nikohlanuvchi shaxslarning iltimosi va otasi yoki onasining yozma arizasiga koʻra, nikoh tuzilganligi ota-onaning yoki ulardan birining yashash joyidagi FHDY organida qayd etilishi mumkin. Bunda nikoh tuzilganligini qayd etgan FHDY organi tomonidan nikohlanuvchi shaxslarning yashab turgan joylaridagi FHDY arxivlariga yetti kun ichida xabarnoma yuborilishi lozim. FHDY arxivlari tomonidan tegishli alfavit daftariga ushbu xabarnomalar asosida yozuv kiritiladi.

Turli viloyatlarda (Qoraqalpogʻiston Respublikasi, Toshkent shahrida) yashovchi shaxslar oʻrtasida nikoh tuzilganligi qayd etilgan hollarda ham mazkur bandning birinchi xatboshisida belgilangan tartibda tegishli FHDY arxiviga xabarnoma yuboriladi.

95. Nikoh tuzilganligi qayd etilishi munosabati bilan shu kunning oʻzida nikohlanuvchi shaxslarning shaxsini tasdiqlovchi hujjatlariga bu haqda belgi qoʻyiladi va ularga qaytarib beriladi.

FHDY organi tomonidan nikohlanuvchi shaxslarning shaxsini tasdiqlovchi hujjatlarni ularni keyinchalik rasmiylashtirish uchun olib qolishga yoʻl qoʻyilmaydi.

95¹. Sudning nikoh haqiqiy emas deb topilganligi toʻgʻrisidagi qonuniy kuchga kirgan qarori asosida FHDY organi nikoh qayd etilganligi haqidagi dalolatnoma yozuviga bu haqda belgi qoʻyadi va dalolatnoma yozuvining ikkinchi nusxasi saqlanayotgan FHDY arxiviga yetti kun ichida xabarnoma (29a-ilova) yuboradi.

96. FHDY organlarida nikohdan ajralishni qayd etish boʻyicha ikkita roʻyxatga olish daftari yuritiladi.

Er-xotinlarning oʻzaro roziligi asosida, er (xotin) uch yildan kam boʻlmagan muddatga ozodlikdan mahrum qilinganligi toʻgʻrisida sudning qonuniy kuchga kirgan hukmi hamda sud tomonidan muomalaga layoqatsiz yoki bedarak yoʻqolgan deb topilganligi haqidagi qonuniy kuchga kirgan hal qiluv qarorlari asosida er (xotin) tomonidan berilgan arizalar Nikohdan ajralishni qayd etish haqidagi arizalarni roʻyxatga olish daftariga (30-ilova) kirim qilinadi.

Sudlarning 1998-yil 1-sentabrgacha va 2010-yil 15-sentabrdan keyin qabul qilingan nikohdan ajratish haqidagi hal qiluv qarorlari asosida nikohdan ajralishni qayd etish haqidagi arizalar Sudning nikohdan ajratish haqidagi hal qiluv qarori asosida nikohdan ajralishni qayd etish haqidagi arizalarni roʻyxatga olish daftariga (31-ilova) kirim qilinadi.

96¹. 1998-yil 1-sentabrdan 2010-yil 15-sentabrgacha boʻlgan davrda qonuniy kuchga kirgan sud qarorlari boʻyicha nikohdan ajratishni qayd etish boʻyicha murojaat kelib tushganda, ushbu harakat yoʻqolgan dalolatnoma yozuvlarini tiklash tartibi va qoidalariga binoan amalga oshiriladi.

97. Nikohdan ajralganlik haqidagi dastlabki dalolatnoma yozuvini qayd etishda ishtirok etmagan er (xotin) tomonidan ushbu dalolatnoma yozuviga qoʻshimchalar kiritish haqidagi arizalar (32-ilova) Dastlabki dalolatnoma yozuvlariga qoʻshimchalar kiritish haqidagi arizalarni roʻyxatga olish daftariga (33-ilova) kirim qilinadi.

98. Nikohdan ajralishni qayd etish haqidagi arizalar nikohdan ajralish qayd etish tayinlangan kunga qadar dastlabki dalolatnoma yozuvlari boʻyicha hujjatlar yigʻmajildida saqlanadi.

99. Nikohdan ajralishni rasmiylashtirish boʻyicha hujjatlar uchun uchta yigʻmajild yuritiladi.

Birinchi yigʻmajildga umumiy asoslarda berilgan nikohdan ajralishni qayd etish boʻyicha arizalar va ularga ilova qilingan hujjatlar dastlabki dalolatnoma yozuvlariga muvofiq tartib bilan tikiladi va uning ichki chap tomonida tegishli maʼlumotlar (34-ilova) yozib boriladi.

Ikkinchi yigʻmajildga nikohdan ajralganlik haqidagi dastlabki dalolatnoma yozuvini qayd etishda ishtirok etmagan er (xotin) tomonidan ushbu dalolatnoma yozuviga qoʻshimchalar kiritish haqidagi arizalar tikiladi va uning ichki chap tomonida tegishli maʼlumotlar (35-ilova) yozib boriladi.

Uchinchi yigʻmajildga muddatida yoʻqlanmagan arizalar tikib boriladi.

100. Voyaga yetmagan farzandlari hamda mulkiy nizolari boʻlmagan er-xotinlarning oʻzaro roziligi asosida nikohdan ajralishni qayd etish haqida birgalikdagi arizasi (36-ilova) kelib tushgan kuni Nikohdan ajralishni qayd etish haqidagi arizalarni roʻyxatga olish daftariga kirim qilinadi va arizaning yuqori oʻng burchagiga FHDY organi xodimining imzosi qoʻyilib, nikohdan ajralishni qayd etish tayinlangan sana yoziladi.

101. Er yoki xotin nikohdan ajralishni qayd etish tayinlangan (uch oylik muddat tugagan) kunda biror-bir sababga koʻra FHDY organiga kela olmaydigan alohida hollarda, arizaning orqa tarafiga sababini koʻrsatib, nikohdan ajralishni uning ishtirokisiz qayd etish haqida yozib qoldiradi. Nikohdan ajralishni er (xotin) ishtirokida qayd etish haqidagi yozuvga xotinning (erning) roziligi haqidagi imzosi boʻlishi zarur.

Bu holda nikohdan ajralishni qayd etish vaqtida nikohdan ajralganlik haqidagi dalolatnoma yozuvining “Belgilar uchun” ustunida yozuvni qayd etishda ishtirok etmagan tomon haqida yozib qoʻyiladi.

Dastlabki dalolatnoma yozuvini toʻldirishda ishtirok etmagan tomon mazkur Yoʻriqnomaning 97-bandida nazarda tutilgan tartibda ariza bilan murojaat qilgan taqdirda, dalolatnoma yozuvining unga tegishli qismi toʻldirilib, imzo qoʻydiriladi va unga nikohdan ajralganlik haqida guvohnoma rasmiylashtirilib, shaxsini tasdiqlovchi hujjatiga nikohdan ajralish qayd etilganligi haqida belgi qoʻyiladi.

Dalolatnoma yozuvining toʻldirilmagan qismiga yozuvlar kiritgan FHDY organi tomonidan dalolatnoma yozuvining ikkinchi nusxasiga shunday yozuvlar kiritish uchun tegishli FHDY arxiviga 7 kun ichida xabarnoma (36a-ilova) yuboriladi.

102. Nikohdan ajralishni qayd etish haqidagi arizaning yuqori oʻng burchagiga dalolatnoma yozuvi raqami va sanasi yozib qoʻyiladi.

103. Nikohdan ajralishni qayd etish tayinlangan kundan boshlab, uch oy ichida yoʻqlangan arizalar boʻyicha nikohdan ajralish qayd etilishi mumkin. Bunda nikohdan ajralishni qayd etish haqidagi arizaning orqa tarafiga ariza beruvchi(lar) tomonidan belgilangan muddatda kelmaganlik sababi, nikohdan ajralishni qayd ettirish istagi va shu kundagi sana yozilib, imzo(lar) qoʻyiladi.

104. Nikohdan ajralishni qayd etish tayinlangan kundan boshlab, uch oy oʻtgach yoʻqlanmagan arizalar Muddatida yoʻqlanmagan nikohdan ajralishni qayd etish haqidagi arizalarni yoʻq qilish boʻyicha dalolatnoma (37-ilova) tuzgan holda yoqib yuborish yoʻli bilan yoʻq qilinadi. Mazkur dalolatnomalar Muddatida yoʻqlanmagan arizalarni yoʻq qilish dalolatnomalari yigʻmajildiga tikib qoʻyiladi.

105. Ariza berilgan kundan boshlab, olti oylik muddatdan keyin nikohdan ajralishni qayd etish istagini bildirgan shaxslar nikohdan ajralishni qayd etish haqida ariza bilan umumiy asoslarda qayta murojaat etishlari lozim.

106. Nikohdan ajralishni sudning qonuniy kuchga kirgan hal qiluv qarori asosida qayd etish er yoki xotinning yoxud er yoki xotindan birining ishonchnoma asosida harakat qiluvchi vakilining nikohdan ajralishni qayd etish toʻgʻrisidagi arizasi (38-ilova) asosida amalga oshiriladi. Bunda arizaga sudning hal qiluv qarori ilova qilinadi.

Jazoni ijro etish muassasasida jazoni oʻtayotgan er (xotin)ning ishonchnoma asosida harakat qiluvchi vakilining arizasi asosida nikohdan ajralishni qayd etish jazoni ijro etish muassasasida jazoni oʻtayotgan er (xotin)ning oxirgi yashash joyidagi yoki xotin (er)ning doimiy yashash joyidagi FHDY organi tomonidan qayd qilinadi.

Sudning hal qiluv qarorida nikohgacha boʻlgan familiyani qaytarish masalasi koʻrsatilmagan boʻlsa, ariza beruvchining nikohgacha boʻlgan familiyani qaytarish toʻgʻrisidagi istagi nikohdan ajralish haqidagi arizada koʻrsatilishi lozim.

107. Sud tomonidan muomalaga layoqatsiz yoki bedarak yoʻqolgan deb topilgan er (xotin) bilan nikohdan ajralishni qayd etish uchun xotin (er) muomalaga layoqatsiz er (xotin) vasiysining yoki bedarak yoʻqolgan er (xotin) mol-mulki boshqaruvchisining manzili, shuningdek nikohdan ajratishda tanlanadigan familiya koʻrsatilgan va sudning qonuniy kuchga kirgan hal qiluv qarorining nusxasi ilova qilingan holda shaxs doimiy yashash joyidagi FHDY organiga ariza (39-ilova) bilan murojaat qilishi lozim.

FHDY organi er-xotinni yarashtirish boʻyicha tegishli choralar koʻrish uchun er-xotinning birga yashash joyidagi fuqarolar yigʻinining yarashtirish komissiyasini, agar ular birga yashamayotgan boʻlsa, har birining yashash joyidagi fuqarolar yigʻinining yarashtirish komissiyasini nikohdan ajratish toʻgʻrisidagi ariza berilgan kundan eʼtiboran uch kundan kechiktirmay yozma ravishda xabardor qilishi kerak.

108. Sodir qilgan jinoyati uchun uch yildan kam boʻlmagan muddatga ozodlikdan mahrum qilingan er (xotin) bilan nikohdan ajralishni qayd etish uchun xotin (er) mahkum(a)ning jazoni oʻtayotgan joyi, shuningdek nikohdan ajratishda tanlanadigan familiya koʻrsatilgan va sudning qonuniy kuchga kirgan hukmining nusxasi ilova qilingan holda shaxs doimiy yashash joyidagi FHDY organiga ariza (40-ilova) bilan murojaat qilinishi lozim.

109. Er yoki xotindan birining arizasi asosida nikohdan ajratish haqidagi arizani qabul qilgan FHDY organi mahkum(a)ni, muomalaga layoqatsiz er (xotin) vasiysini yoki bedarak yoʻqolgan er (xotin) mol-mulki boshqaruvchisini xabardor qilish hamda uning roziligini aniqlash uchun shu kunning oʻzida ariza beruvchi tomonidan koʻrsatilgan manzil boʻyicha xabarnoma (41, 41a-ilovalar) yuboradi.

Muomalaga layoqatsiz er (xotin) vasiysi yoki bedarak yoʻqolgan er (xotin) mol-mulki boshqaruvchisi tayinlanmaganda, u holda xabarnoma tegishli vasiylik va homiylik organiga yuboriladi.

Xabarnomada bolalari toʻgʻrisida, birgalikdagi umumiy mol-mulkini boʻlish haqida yoki yordamga muhtoj, mehnatga layoqatsiz er(xotin)ga taʼminoti uchun mablagʻ toʻlash haqida nizo mavjudligi toʻgʻrisida maʼlumotni taqdim etish vaqti koʻrsatiladi.

Xabarnomada belgilangan muddat ichida javob kelmasligi FXDYO organi tomonidan nikohdan ajralishni qayd qilinishiga toʻsqinlik qilmaydi.

Xabarnoma nusxasi ariza bilan birga tikib qoʻyiladi.

Er yoki xotindan birining arizasi asosida nikohdan ajratish FHDY organiga ariza bilan murojaat etgan kundan bir oy oʻtgach, lekin uzogʻi uch oy ichida uning ishtirokida qayd etadi.

Bolalar toʻgʻrisida, birgalikdagi umumiy mol-mulkini boʻlish haqida yoki yordamga muhtoj, mehnatga layoqatsiz er(xotin)ga taʼminoti uchun mablagʻ toʻlash haqida nizo mavjud boʻlgan taqdirda FHDY organi ariza beruvchiga nikohdan ajralishni qayd etish sud tomonidan amalga oshirilishi haqida asoslantirilgan xulosa taqdim etadi.

110. MDH mamlakatlari va chet el davlatlari sudi tomonidan qonuniy kuchga kirgan hal qiluv qarori asosida Oʻzbekiston Respublikasi fuqarosi bilan nikohdan ajratish (qaror qachon chiqqanidan qatʼi nazar) agar davlatlararo bitimda boshqa hol nazarda tutilmagan boʻlsa, ariza beruvchining turar joyidagi FHDY organida qayd etiladi.

Oʻzbekiston Respublikasida qayd etilgan nikohdan chet el davlatining vakolatli organi qarori asosida ajrashgan shaxslar nikohdan ajratilganligini tasdiqlovchi hujjati (guvohnoma, maʼlumotnoma, sertifikat va h.k.)ning legalizatsiya qilingan yoki apostil qoʻyilgan kseronusxasi uning tarjimasi bilan birga, nikoh tuzilganligi qayd etilgan FHDY organiga taqdim etishi lozim. Bunda FHDY organi tomonidan nikoh tuzilganligi haqidagi dalolatnoma yozuviga tegishli yozuv kiritiladi, murojaat qilgan shaxsning shaxsini tasdiqlovchi hujjatiga nikohdan ajratilganligi haqida belgi qoʻyiladi hamda unga bu haqda maʼlumotnoma beriladi.

111. Barcha holatlarda nikohdan ajralishni qayd etgan FHDY organi tomonidan nikoh tuzilganligini qayd etgan FHDY organiga va tegishli FHDY arxiviga bu haqda yetti kun ichida xabarnoma (42-ilova) yuboriladi. Ushbu xabarnoma asosida FHDY organi va FHDY arxivi tomonidan nikoh tuzilganligi haqidagi dalolatnoma yozuviga va tegishli alfavit daftariga yozuv kiritiladi.

Er (xotin) Toshkent shahri va Toshkent viloyatida doimiy propiska qilinishi lozim boʻlgan shaxslar — Oʻzbekiston Respublikasi fuqarolari toifalari roʻyxatining 5-bandiga muvofiq Toshkent shahrida yoki Toshkent viloyatida doimiy propiska qilinganidan soʻng bir yil ichida nikohdan ajrashgan taqdirda FHDY organi tomonidan er (xotin) Toshkent shahrida yoki Toshkent viloyatida doimiy propiskaga olingan joydagi tegishli ichki ishlar organiga bu haqda yetti kun ichida xabarnoma (42a-ilova) yuboriladi.

112. Oʻlimni qayd etish oʻlim haqidagi tibbiy guvohnoma yoki sudning shaxsni vafot etgan deb eʼlon qilish haqidagi hal qiluv qaroriga asosan amalga oshiriladi.

Oʻlimni qayd etish uchun asos boʻlgan hujjat oʻlim haqidagi dalolatnoma yozuvining ikkinchi nusxasi bilan birga tikiladi va tegishli FHDY arxivida saqlanadi.

113. Oʻlimni qayd etish uchun FHDY organiga oʻn olti yoshgacha boʻlgan vafot etgan shaxsning tugʻilganlik haqidagi guvohnomasi, oʻn olti yoshdan oshgan vafot etgan shaxsning esa shaxsini va harbiy xizmatga aloqadorligini tasdiqlovchi hujjatlari taqdim etiladi. Hujjatlar taqdim etilmagan hollarda oʻlimni qayd etish rad etilmaydi. Bunda dalolatnoma yozuvining “Belgilar uchun” ustuniga shaxsni va (yoki) harbiy xizmatga aloqadorligini tasdiqlovchi hujjat (lar) topshirilmaganligi va dalolatnoma yozuvining oʻlim haqida tibbiy guvohnomaga yoki sudning shaxsni vafot etgan deb eʼlon qilish haqidagi hal qiluv qaroriga asosan qayd etilganligi yozib qoʻyiladi.

114. Oʻlim haqidagi tibbiy guvohnoma berilgan vaqtdan boshlab uch kundan keyin murojaat etilganida, FHDY organi tomonidan oʻlimni qayd etish rad qilinmaydi va umumiy asoslarda amalga oshiriladi.

115. Oʻlim haqidagi tibbiy guvohnoma berilgan vaqtdan boshlab uch kundan keyin, biroq bir yilgacha boʻlgan muddatda murojaat etilganida, oʻlim marhumning oxirgi yashash joyi yoki oʻlim sodir boʻlgan joydagi FHDY organi tomonidan, bir yildan keyin murojaat etilganida esa, marhumning oxirgi yashash joyidagi FHDY organi tomonidan qayd etiladi. Bunda FHDY organi vafot etgan shaxsning oʻlim sodir boʻlgan joydagi tegishli FHDY organidan unga nisbatan oʻlim haqidagi dalolatnoma yozuvi qayd etilmaganligini aniqlash lozim.

116. Sudning shaxsni vafot etgan deb eʼlon qilish haqidagi hal qiluv qaroriga asosan oʻlimni qayd etish mazkur hal qiluv qarorini qabul qilgan sud joylashgan yerdagi FHDY organi tomonidan amalga oshiriladi.

117. Oʻlim haqidagi dalolatnoma yozuvi qayd etilgandan soʻng, oʻlim haqida gerbli guvohnoma rasmiylashtiriladi va murojaat qilgan shaxsga taqdim etiladi. Ayni bir vaqtda Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasining tuman (shahar) boʻlimiga va dafn etish joyiga topshirish uchun maʼlumotnomalar (43-ilova) beriladi.

118. Chet elda vafot etgan shaxsga mazkur Yoʻriqnomaning 117-bandida nazarda tutilgan maʼlumotnomalar uning oxirgi yashash joyidagi FHDY organi tomonidan beriladi. Ushbu maʼlumotnomalar FHDY organidan joʻnatilayotgan xatlarni roʻyxatga olish daftariga kirim qilinadi va ularning nusxasi tegishli yigʻmajildga muqovasining ichki chap tomonida roʻyxati koʻrsatilgan holda tikiladi.

119. Vafot etgan shaxslarning shaxsini tasdiqlovchi hujjatlari (pasport, Oʻzbekiston Respublikasida yashash guvohnomasi) FHDY organi tomonidan har oylik hisobot yakunida ikki nusxada roʻyxat (44-ilova) bilan ichki ishlar organlariga topshiriladi.

Vafot etgan shaxslarning harbiy xizmatga aloqadorlikni tasdiqlovchi hujjatlari ham xuddi shu tartibda roʻyxatga (45-ilova) kiritilgan holda mudofaa ishlari organlariga topshiriladi.

Shaxsini tasdiqlovchi hujjatlari (pasport, Oʻzbekiston Respublikasida yashash guvohnomasi) va harbiy xizmatga aloqadorlikni tasdiqlovchi hujjatlari topshirilmagan vafot etgan shaxslarning oʻlimi haqidagi maʼlumotlar ham tegishli roʻyxatlar (44a, 45a-ilovalar) asosida ichki ishlar va mudofaa ishlari organlariga topshiriladi.

Fuqarolar yigʻinlari tomonidan vafot etgan shaxslarning shaxsini tasdiqlovchi hujjatlari (pasport, Oʻzbekiston Respublikasida yashash guvohnomasi) va harbiy xizmatga aloqadorlikni tasdiqlovchi hujjatlari har oyda oʻlim haqidagi dalolatnoma yozuvlarining ikkala nusxasi va hisobotlar bilan birga FHDY organlariga topshiriladi.

120. Vafot etgan shaxslarning roʻyxatlari hamda hujjatlari ichki ishlar va mudofaa ishlari organlariga topshirilganda, roʻyxatlarning ikkinchi nusxasida qabul qilingan sana va qabul qilgan xodimning lavozimi, familiyasi, ismi va imzosi koʻrsatiladi.

121. Shaxsning oʻlimi uning doimiy yashash joyi boʻyicha emas, balki vafot etgan joyi boʻyicha qayd etilganda, uning pasporti va harbiy xizmatga aloqadorlikni tasdiqlovchi hujjati oʻlim haqidagi dalolatnoma yozuvini qayd etgan FHDY organi joylashgan hududdagi ichki ishlar va mudofaa ishlari organlariga yuboriladi.

122. Bolaning tugʻilishi bir oy muddat ichida qayd etilmasdan u vafot etganda, unga tugʻilish haqidagi dalolatnoma yozuvi hamda bir vaqtning oʻzida oʻlim haqidagi dalolatnoma yozuvi rasmiylashtirilib, talab qilinganda oʻlim haqidagi guvohnoma beriladi.

123. FHDY organi tomonidan oʻlim haqidagi dalolatnoma yozuvi qayd etilganidan soʻng, vafot etgan shaxsning tugʻilganlik haqidagi dalolatnoma yozuvining “Belgilar uchun” ustuniga uning vafot etganligi haqida yozuv kiritiladi. Agar vafot etgan shaxsning tugʻilishi Oʻzbekiston Respublikasi doirasida boshqa FHDY organi tomonidan qayd etilgan boʻlsa, bu haqda oʻlimni qayd etgan FHDY organi tomonidan tugʻilishni qayd etgan FHDY organiga xabarnoma (45b-ilova) yuboriladi.

Agar vafot etgan shaxsning tugʻilganlik haqidagi dalolatnoma yozuvini qayd etgan FHDY organi haqida yetarlicha maʼlumotlar mavjud boʻlmasa, unda xabarnoma uning shaxsini tasdiqlovchi hujjatida koʻrsatilgan tugʻilgan joyi boʻyicha tegishli FHDY arxiviga yuboriladi.

FHDY arxivi tomonidan tegishli alfavit daftarlari boʻyicha tekshiruv oʻtkazilib, tugʻilganlik haqida dalolatnoma yozuvi mavjudligi aniqlansa, dalolatnoma yozuvining ikkinchi nusxasiga yozuv kiritiladi va dalolatnoma yozuvining birinchi nusxasi saqlanayotgan FHDY organiga xabarnoma yuboriladi. Dalolatnoma yozuvi mavjud boʻlmaganda oʻlim haqida alfavit daftariga bu haqda maʼlumot kiritiladi.

124. Oʻn olti yoshgacha vafot etgan bolalarning tugʻilganlik haqidagi guvohnomalari har chorakda ikki nusxada tuziladigan dalolatnoma asosida yoqib yuborish yoʻli bilan yoʻq qilinadi. Dalolatnomada vafot etgan bolaning familiyasi, ismi, dalolatnoma yozuvi raqami va sanasi, guvohnomaning seriyasi va raqami koʻrsatilishi shart.

Dalolatnomaning birinchi nusxasi Agentlikning hududiy boshqarmasiga topshiriladi, ikkinchi nusxasi esa yoqilayotgan guvohnomalarning qirqib olingan seriyasi va raqamlari yopishtirilgan holda FHDY organida saqlanadi.

125. Dalolatnoma yozuviga oʻzgartirish, tuzatish va qoʻshimchalar kiritish haqidagi ariza (46-ilova) ariza beruvchining yashash joyidagi yoki tegishli dalolatnoma yozuvi qayd etilgan FHDY organi tomonidan qabul qilinadi.

Dalolatnoma yozuviga oʻzgartirish, tuzatish va qoʻshimchalar kiritishni ishonchnoma orqali amalga oshirishga yoʻl qoʻyilmaydi.

126. Qabul qilingan arizalar shu kunning oʻzida Dalolatnoma yozuvlariga oʻzgartirish, tuzatish va qoʻshimchalar kiritish haqidagi arizalarni roʻyxatga olish daftariga (47-ilova) kirim qilinib, ariza va taqdim etilgan hujjatlar alohida yigʻmajildga tartib bilan tikiladi.

127. Oʻn olti yoshga toʻlmagan bolaning tugʻilganlik haqidagi dalolatnoma yozuviga oʻzgartirish, tuzatish va qoʻshimchalar kiritish ota-onasining birgalikdagi yoki ularning oʻrnini bosuvchi shaxslarning arizasi (48-ilova) asosida amalga oshiriladi.

Oʻn yoshga toʻlgan bolaning ismi yoki familiyasini oʻzgartirishga faqat uning roziligi bilan yoʻl qoʻyiladi. Bunda bolaning roziligi ota-onasi yoki ularning oʻrnini bosuvchi shaxslar tomonidan berilgan arizada uning shaxsiy imzosi bilan ifodalanadi.

Bola oʻn olti yoshga toʻlishi bilan shaxsini tasdiqlovchi hujjatini olgunga qadar, tugʻilganlik haqidagi dalolatnoma yozuvida xatolarni tuzatish yoki ismiga qoʻshimcha kiritish, bolaning arizasi, yashash joyidan rasmi yelimlangan holdagi maʼlumotnoma va tugʻilganlik haqidagi guvohnomasi asosida amalga oshiriladi.

128. Agar shaxs Oʻzbekiston Respublikasining “Davlat tili haqida”gi Qonunining (Oʻzbekiston Respublikasi Oliy Majlisining Axborotnomasi, 1995-y., 12-son, 257-modda) 15-moddasiga koʻra ismiga “-xon”, “-xoʻja”, “-xoji”, “-bek”, “-bonu”, “-bibi”, “-begim”, “-zoda”, “mir-”, “abdu-” qoʻshimchalarini, ota ismini yozishda “-yevich”, “-ovich”, “-yevna”, “-ovna”, “qizi”, “oʻgʻli”, “-iy”, “-zoda” qoʻshimchalarini kiritishni yoki shu kabi qoʻshimchalarni olib tashlashni istasa, bu holat shaxsning yoshidan qatʼi nazar, dalolatnoma yozuviga qoʻshimcha kiritish yoʻli bilan amalga oshiriladi.

129. Agar dalolatnoma yozuvida shaxsning ismi qisqartirilib, erkalash shaklida yoki imloviy xato bilan yozilgan boʻlsa, dalolatnoma yozuviga tuzatish kiritish ushbu shaxsning arizasi asosida amalga oshiriladi.

130. Nikoh tuzilganligini qayd etishda erining (xotinining) familiyasini umumiy familiya sifatida tanlagan, lekin shaxsini tasdiqlovchi hujjati oʻzgarishsiz qolgan xotinning (erning) oʻzining nikohgacha boʻlgan familiyasiga qaytish haqidagi talabi nikoh tuzilganligi haqidagi dalolatnoma yozuviga oʻzgartirish kiritish orqali qanoatlantiriladi.

131. Nikohdan ajralganlik haqidagi dalolatnoma yozuvining “Nikohdan ajralgandan keyingi familiyasi” ustunida nikohgacha boʻlgan familiyasi koʻrsatilgan, lekin shaxsini tasdiqlovchi hujjati oʻzgarishsiz qolgan er yoki xotinning nikohdan ajralgunga qadar boʻlgan familiyasiga qaytish haqidagi talabi nikohdan ajralganlik haqidagi dalolatnoma yozuviga oʻzgartirish kiritish orqali qanoatlantiriladi.

132. Shaxsning jinsi oʻzgarganida dalolatnoma yozuviga tuzatish kiritish faqat tibbiy muassasaning xulosasiga asosan amalga oshiriladi.

133. FHDY organi tomonidan ariza 15 kun ichida koʻrib chiqilishi lozim, uzrli sabablar mavjud boʻlganda (oʻzgartirish kiritilishiga asos boʻlgan dalolatnoma yozuvlaridan nusxalar mavjud emasligi va boshqalarda) arizani koʻrib chiqish muddati FHDY organi mudiri tomonidan bir oygacha uzaytirilishi mumkin.

Dalolatnoma yozuviga oʻzgartirish, tuzatish va qoʻshimchalar kiritishga yetarli asoslar mavjud boʻlganda, tegishli oʻzgartirishlar kiritiladi va ariza beruvchiga yangi guvohnoma rasmiylashtirib beriladi.

Dalolatnoma yozuviga oʻzgartirish, tuzatish va qoʻshimchalar kiritish sababli beriladigan yangi guvohnomaga “takroriy” deb belgi qoʻyilmaydi.

134. Oʻzgartirish, tuzatish va qoʻshimchalar kiritilishi lozim boʻlgan dalolatnoma yozuvlari Oʻzbekiston Respublikasi hududidan tashqarida boʻlgan, shuningdek nikoh tuzilganligi va oʻlim haqidagi, aka-ukalar va opa-singillarning tugʻilganlik haqidagi va boshqa dalolatnoma yozuvlarida tafovutlar boʻlgan hollarda, FHDY organi rahbari tomonidan oʻzgartirishlar qayd etiladigan dalolatnoma yozuvlarining soniga muvofiq nusxada Dalolatnoma yozuviga oʻzgartirish, tuzatish va qoʻshimchalar kiritish toʻgʻrisida xulosa (49-ilova) tuziladi.

Dalolatnoma yozuviga oʻzgartirish, tuzatish va qoʻshimchalar kiritish toʻgʻrisida xulosa tuzilishi lozim boʻlgan arizalar boʻyicha hujjatlar alohida yigʻmajildga tikilib, yigʻmajild muqovasining ichki chap tomoniga ularning roʻyxati yozib qoʻyiladi.

135. Dalolatnoma yozuviga oʻzgartirish, tuzatish va qoʻshimchalar kiritish uchun asos boʻlgan holatlar haqida dalolatnoma yozuvining “Belgilar uchun” ustunida qisqa va aniq izoh yozilib, FHDY organi masʼul xodimining familiyasi koʻrsatilib, imzolanishi va gerbli muhr bilan tasdiqlanishi zarur.

136. Dalolatnoma yozuviga oʻzgartirish, tuzatish va qoʻshimchalar kiritilganda, tegishli alfavit daftariga oʻzgartirilgan familiya va ism avvalgi yozuvlar oʻchirilmagan holda kiritiladi.

Oʻzgartirish, tuzatish va qoʻshimchalar kiritilishi lozim boʻlgan dalolatnoma yozuvlari nusxasi yigʻmajildga tikilishi lozim.

137. Dalolatnoma yozuviga oʻzgartirish, tuzatish va qoʻshimchalar kiritgan FHDY organi tomonidan dalolatnoma yozuvining ikkinchi nusxasiga oʻzgartirish, tuzatish va qoʻshimchalar kiritish uchun tegishli FHDY arxiviga uch kun ichida Dalolatnoma yozuviga oʻzgartirish, tuzatish va qoʻshimchalar kiritilganligi toʻgʻrisidagi xabarnoma (50-ilova) yuboriladi. FHDY arxiviga yuborilgan xabarnoma nusxasi ariza bilan birga tikilishi lozim.

138. Ariza beruvchining talabiga koʻra unga FHDY organi tomonidan Dalolatnoma yozuviga oʻzgartirish, tuzatish va qoʻshimchalar kiritilganligi toʻgʻrisida maʼlumotnoma (51-ilova) beriladi.

139. Oʻn olti yoshga toʻlgan shaxsning dalolatnoma yozuviga uning familiya, ismi va ota ismi hamda tugʻilgan sanasi va joyi haqidagi yozuvlarga oʻzgartirish, tuzatish va qoʻshimchalar kiritilgandan soʻng, FHDY organi tomonidan yetti kun muddat ichida ushbu shaxsning doimiy yashash joyidagi ichki ishlar va mudofaa ishlari organlariga xabarnoma (52-ilova) yuboriladi.

140. Dalolatnoma yozuvi boshqa FHDY organida qayd etilgan shaxs dalolatnoma yozuvlariga oʻzgartirish, tuzatish va qoʻshimchalar kiritish haqida ariza bilan doimiy yashash joyidagi FHDY organiga murojaat qilgan taqdirda, mazkur ariza Xat, xabarnoma va arizalarni roʻyxatga olish daftariga kirim qilinadi va shu kunning oʻzida ijro uchun arizaning kseronusxasi olingan holda, arizaning asli va uning asosli ekanligini tasdiqlovchi hujjatlar dalolatnoma yozuvi qayd etilgan FHDY organiga yuboriladi.

141. Shaxsning yashash joyidagi FHDY organidan kelgan hujjatlar dalolatnoma yozuvi qayd etilgan FHDY organi tomonidan shu kunning oʻzida Dalolatnoma yozuvlariga oʻzgartirish, tuzatish va qoʻshimchalar kiritish toʻgʻrisidagi arizalarni roʻyxatga olish daftariga kirim qilinadi va tegishli dalolatnoma yozuvlariga oʻzgartirish kiritilib, yangi guvohnoma rasmiylashtiriladi.

142. Dalolatnoma yozuvi qayd etilgan FHDY organi tomonidan rasmiylashtirilgan yangi guvohnoma bir ish kuni ichida Dalolatnoma yozuviga oʻzgartirish, tuzatish va qoʻshimchalar kiritilganligi toʻgʻrisida maʼlumotnoma bilan birga shaxsning yashash joyidagi FHDY organiga yuboriladi.

143. Arizaning asli saqlanayotgan FHDY organi uning yuqori oʻng burchagiga yangi guvohnomaning seriyasi, raqami, berilgan sanasi yoziladi. Yangi guvohnoma ariza beruvchiga imzo qoʻydirilgan holda topshiriladi.

143¹. Dalolatnoma yozuviga oʻzgartirish, tuzatish va qoʻshimchalar kiritish uchun yetarli asoslar mavjud boʻlmagan yoki manfaatdor shaxslar oʻrtasida nizo mavjud boʻlgan hollarda FHDY organi tomonidan Dalolatnoma yozuviga oʻzgartirish, tuzatish va qoʻshimchalar kiritishni rad etish toʻgʻrisida xulosa (52a-ilova) tuziladi va murojaat qiluvchiga beriladi.

144. Familiya, ism va ota ismini oʻzgartirish uchun FHDY organiga Familiya, ism va ota ismini oʻzgartirish haqida ariza (53-ilova) bilan murojaat qilinadi va shu kunning oʻzida Familiya, ism va ota ismini oʻzgartirish haqida arizalarni roʻyxatga olish daftariga (54-ilova) kirim qilinib, ariza va taqdim qilingan hujjatlar oʻzgartirish kiritilishi lozim boʻlgan dalolatnoma yozuvi nusxasi bilan alohida yigʻmajildga tartib bilan tikiladi.

Familiya, ism, ota ismini ishonchnoma orqali oʻzgartirishga yoʻl qoʻyilmaydi.

145. Oʻzgartirish kiritilishi lozim boʻlgan dalolatnoma yozuvi boshqa FHDY organida qayd etilgan boʻlsa, soʻrovnoma orqali uning nusxasi olinadi.

146. Yigʻmajildning ichki chap tomoniga unda tikilgan hujjatlarning roʻyxati yozilib, ilova qilingan hujjatlar ketma-ket tikiladi. Yigʻmajildning orqa tomoniga uning necha varaqdan iboratligi yozilib, FHDY organi rahbari tomonidan tasdiqlanadi va shu kunning oʻzida ichki ishlar organiga tekshirish va xulosa berish uchun yuboriladi.

Kuzatuv xatining (55-ilova) nusxasi ichki ishlar organining javob xati va xulosasi bilan birga yigʻmajildga tikib qoʻyiladi.

147. Arizaga ilova etilgan hujjatlar va ichki ishlar organining xulosasiga asosan FHDY organi rahbari tomonidan Familiya, ism, ota ismini oʻzgartirish (rad etish) toʻgʻrisida xulosa (56-ilova) tuziladi.

148. Familiya, ism, ota ismini oʻzgartirish toʻgʻrisidagi xulosaga asosan, tegishli (tugʻilganlik, nikoh tuzilganligi yoki nikohdan ajralganlik, 16 yoshga toʻlmagan bolalarning tugʻilganlik haqidagi) dalolatnoma yozuvlariga ariza beruvchining yangi familiya, ism, ota ismi kiritilib, ular asosida yangi guvohnomalar beriladi. Bunda Familiya, ism, ota ismining oʻzgartirilganligi tegishli alfavit daftarlariga kiritilishi lozim.

149. Oʻzgartirish kiritilishi lozim boʻlgan dalolatnoma yozuvi boshqa FHDY organida qayd etilgan boʻlsa, Familiya, ism, ota ismini oʻzgartirish toʻgʻrisidagi xulosaning nusxasi Familiya, ism, ota ismini oʻzgartirganlik sababli dalolatnoma yozuviga oʻzgartirish kiritish haqida xabarnoma (57-ilova) bilan birga tegishli FHDY organiga yuboriladi.

Familiya, ism, ota ismini oʻzgartirganlik sababli dalolatnoma yozuviga oʻzgartirish kiritish haqida xabarnoma kelib tushgan FHDY organi uch kun ichida tegishli dalolatnoma yozuviga oʻzgartirish kiritadi va yangi guvohnoma rasmiylashtirib, uni ariza beruvchining yashash joyidagi FHDY organiga yuboradi.

150. Familiya, ism, ota ismi oʻzgartirilgan shaxsga Familiya, ism, ota ismini oʻzgartirganlik haqida maʼlumotnoma (58-ilova) beriladi.

Shaxsning familiya, ism, ota ismi oʻzgartirilgach, dalolatnoma yozuvining ikkinchi nusxasiga oʻzgartirishlarni kiritish uchun tegishli FHDY arxiviga ham Familiya, ism, ota ismini oʻzgartirganlik sababli dalolatnoma yozuviga oʻzgartirish kiritish haqida xabarnoma yuboriladi.

Familiya, ism, ota ismini oʻzgartirganlik sababli dalolatnoma yozuviga oʻzgartirish kiritish haqida xabarnomalarning nusxalari yigʻma jildga tikib qoʻyiladi.

151. Shaxsning familiya, ism va ota ismini oʻzgartirish haqida arizasini qabul qilgan FHDY organi tomonidan ariza beruvchiga yangi guvohnoma berilganidan soʻng ichki ishlar va mudofaa ishlari organlariga yetti kun ichida xabarnoma (59 — 60-ilovalar) yuboriladi.

Bunda yangi guvohnoma berilayotganda familiya, ism va ota ismi oʻzgartirilgan shaxsning pasportiga uni almashtirish lozimligi haqida belgi qoʻyiladi. Agar ariza beruvchi nikohda turgan boʻlsa, boshqa er (xotin)ning pasportidagi oilaviy ahvoli haqida qoʻyilgan belgi ham tekshirilishi, zaruratga koʻra oʻzgartirilishi lozim.

Familiya, ism, ota ismini oʻzgartirganlik sababli berilgan yangi guvohnomaning seriyasi, raqami va berilgan sanasi familiya, ism, ota ismini oʻzgartirish toʻgʻrisidagi xulosaga yozib qoʻyiladi.

152. Familiya, ism, ota ismini oʻzgartirganlik sababli beriladigan yangi guvohnomalar Takroriy guvohnomalarni sarflash daftarida qayd etiladi. Bunda yangi guvohnomaga “takroriy” deb belgi qoʻyilmaydi.

153. Familiya, ism, ota ismi oʻzgartirilgan shaxs ikkinchi marta FHDY organiga mazkur masalada bir yil oʻtgandan soʻng murojaat etishi mumkin.

154. Dalolatnoma yozuvlarini tiklash deganda ilgari shunday yozuv boʻlganligini tasdiqlovchi yetarli asoslar boʻlganida, yoʻqolgan yozuvlarni qayta tiklab qoʻyish tushuniladi.

Tugʻilganlik, nikoh tuzilganligi, nikohdan ajralganlik haqidagi dalolatnoma yozuvlari bu yozuvlar kimga nisbatan tuzilgan boʻlsa, faqat ana shu shaxslarning arizasiga (61-62-ilovalar) koʻra tiklanadi.

Agar oʻn olti yoshgacha boʻlgan bolaning tugʻilganlik haqidagi dalolatnoma yozuvi yoʻqolgan boʻlsa, yozuv bolaning ota-onasi, vasiysi, homiysi, bolalar muassasasi maʼmuriyatining arizasiga binoan tiklanadi.

Oʻlim haqidagi dalolatnoma yozuvini tiklash sudning hal qiluv qaroriga asosan amalga oshiriladi.

Dalolatnoma yozuvini ishonchnoma orqali tiklashga yoʻl qoʻyilmaydi.

155. Dalolatnoma yozuvlarini tiklash tegishliligiga koʻra Qoidalarning 139, 143 va 144-bandlarida nazarda tutilgan hujjatlar asosida amalga oshiriladi. Bunda ariza beruvchining iltimosini asoslovchi boshqa hujjatlar sifatida gerbli guvohnomalar yoki harbiy xizmatga aloqadorlikni tasdiqlovchi hujjatlar, ularning kseronusxasi (nusxasi), ariza beruvchining oʻqish yoki ish joyidan berilgan maʼlumotnoma, uy daftaridan olingan koʻchirmalar, ichki ishlar organlarining maʼlumotnomasi, FHDY organlari tomonidan shaxsni tasdiqlovchi hujjatlarga nikoh va nikohdan ajralish qayd etilganligi haqida belgi qoʻyilganligini tasdiqlovchi hujjatlar va boshqa shu kabi hujjatlar qabul qilinishi mumkin.

156. Dalolatnoma yozuvini tiklash haqidagi ariza qabul qilingan kunning oʻzida Dalolatnoma yozuvlarini tiklash haqidagi arizalarni roʻyxatga olish daftariga (63-ilova) kirim qilinadi.

FHDY organi zaruratga qarab FHDY organlari va boshqa tegishli tashkilotlardan dalolatnoma yozuvini tiklashga asos boʻluvchi hujjatlardan nusxalar va maʼlumotlar soʻrab olishi mumkin.

Arizani qabul qilgan FHDY organi ilgari mavjud boʻlgan dalolatnoma yozuvining yoʻqolganligi sabablariga aniqlik kiritishi lozim.

157. Agar ariza beruvchi tomonidan tugʻilganlik haqidagi guvohnoma yoki uning kseronusxasi (nusxasi), harbiy xizmatga aloqadorlikni tasdiqlovchi hujjatlar yoki ularning nusxalari taqdim etilgan boʻlsa, ushbu guvohnoma kimga nisbatan va qaysi FHDY organi tomonidan sarflanganligiga, harbiy hujjat qaysi hujjat asosida berilganligiga aniqlik kiritish uchun tegishli FHDY organi va FHDY arxiviga hamda mudofaa ishlari organiga soʻrov (64-ilova) yuboriladi.

158. Tugʻilganlik haqidagi dalolatnoma yozuvini tiklashda shaxs tugʻilgan joydagi tibbiy muassasaga (tugʻruqxonaga) uning tugʻilganligi qayd etilgan yoki etilmaganligi haqida, taʼlim muassasasiga shaxsning qanday hujjat asosida oʻqishga qabul qilinganligi haqida, shuningdek tegishli ichki ishlar organiga shaxsni tasdiqlovchi hujjat qaysi hujjat asosida berilganligi haqida soʻrov yuboriladi.

159. Ariza beruvchining ota-onasiga tegishli nikoh tuzilganligi haqidagi dalolatnoma yozuvini oʻrganishda uning “umumiy farzandlar toʻgʻrisida maʼlumot” ustuniga, aka-ukalari, opa-singillarining tugʻilganlik haqidagi dalolatnoma yozuvlarini oʻrganishda esa, ularning “onaning nechanchi bolasi” ustunlariga (bolalarning tugʻilishi ketma-ketligiga) alohida eʼtibor qaratilishi lozim.

160. Nikoh tuzilganligi va nikohdan ajralganlik haqidagi dalolatnoma yozuvlarini tiklashda er-xotinning farzandlarining tugʻilganlik haqidagi dalolatnoma yozuvlari va ularning shaxsini tasdiqlovchi hujjatlari tekshiriladi. Bunda shaxsni tasdiqlovchi hujjatlar almashtirilgan yoki almashtirilmaganligiga eʼtibor beriladi, almashtirilgan boʻlsa, buning sabablariga aniqlik kiritiladi. Shuningdek, ichki ishlar organlariga ushbu er-xotinning oilaviy ahvoli haqida maʼlumotlar bor yoki yoʻqligi yuzasidan soʻrov yuboriladi.

161. Agar ariza beruvchi tomonidan nikoh tuzilganligi va nikohdan ajralganlik haqidagi guvohnoma yoki ularning kseronusxasi (nusxasi) tegishli dalolatnoma yozuvini tiklashni asoslovchi hujjat sifatida taqdim etilgan boʻlsa, ushbu guvohnoma kimlarga nisbatan va qaysi FHDY organi tomonidan rasmiylashtirilganligi, shaxsini tasdiqlovchi hujjatlarga qaysi FHDY organi tomonidan belgi qoʻyilganligiga aniqlik kiritilishi lozim. Bunda tegishli FHDY organi va FHDY arxivlariga ushbu guvohnomalar va qoʻyilgan belgilar yuzasidan soʻrov yuboriladi.

161¹. FHDY organi tomonidan 1998-yil 1-sentabrdan 2010-yil 15-sentabrgacha boʻlgan davrda qonuniy kuchga kirgan sud qarorlari boʻyicha nikohdan ajralganlik haqidagi dalolatnoma yozuvi tiklanganda, nikohdan ajralganlik haqidagi gerbli guvohnomaning “Bu haqda ________ yil _______ oyining ______ kunida ______________ -son bilan dalolatnoma yozuvi qayd etildi” ustunida qonuniy kuchga kirgan sud qarorining sanasi, qavs ichida esa tiklangan dalolatnoma yozuvining raqami va sanasi yozib qoʻyiladi.

162. Dalolatnoma yozuvlarini tiklash uchun yetarli asoslar boʻlmasa, FHDY organi tomonidan tiklashni rad qilish haqida xulosa (64a-ilova) tuziladi, xulosada rad qilish sabablari aniq koʻrsatiladi va ariza beruvchiga sudga murojaat qilish huquqiga ega ekanligi tushuntiriladi.

163. Dalolatnoma yozuvlarini tiklash ularni tiklash uchun asos boʻlgan barcha holatlar FHDY organi tomonidan aniqlanganidan keyingina amalga oshiriladi. Bunda FHDY organi tomonidan dalolatnoma yozuvini tiklash haqida asoslantirilgan xulosa (65-66-ilovalar) tuziladi.

Tiklangan dalolatnoma yozuvining “Belgilar uchun” ustunida tiklash uchun asos boʻlgan xulosaning sanasi va yigʻmajild raqami koʻrsatiladi hamda tegishli alfavit daftarlariga bu haqda maʼlumot kiritiladi.

163¹. Konsul tomonidan Oʻzbekiston Respublikasining chet elda yashovchi fuqarolaridan qabul qilingan dalolatnoma yozuvlarini tiklash haqidagi arizalar ariza beruvchilarning Oʻzbekiston Respublikasidagi oxirgi yashash joyidagi FHDY organi tomonidan koʻrib chiqiladi.

FHDY organi tomonidan kelib tushgan ariza Dalolatnoma yozuvlarini tiklash haqidagi arizalarni roʻyxatga olish daftariga kirim qilinadi.

Dalolatnoma yozuvlarini tiklash uchun asos boʻlgan barcha holatlar FHDY organi tomonidan aniqlangandan keyingina tiklash amalga oshirilib, yangi guvohnoma rasmiylashtiriladi va belgilangan tartibda konsullik muassasasiga yuboriladi.

164. Tugʻilganlik haqidagi dalolatnoma yozuvi tiklanganda, dalolatnoma yozuviga bolaning ota-onasi toʻgʻrisidagi maʼlumotlar ularning shaxsini tasdiqlovchi hujjatlari asosida, agar ular (ulardan biri) vafot etgan boʻlsa, ularning oʻlim haqidagi guvohnomalari yoki maʼlumotnomalari asosida toʻldirilishi lozim.

165. Har yil yakunlari boʻyicha tiklangan dalolatnoma yozuvlarining ikkinchi nusxalari tegishli FHDY arxiviga topshiriladi. FHDY arxivi tomonidan ushbu tiklangan dalolatnoma yozuvlari haqida tegishli alfavit daftarlariga maʼlumotlar kiritiladi.

166. FHDY organi tomonidan manfaatdor shaxslarning arizalariga koʻra va qayd etilgan dalolatnoma yozuvlari asosida takroriy guvohnoma va maʼlumotnomalar beriladi.

Takroriy guvohnomaga dalolatnoma yozuvida mavjud boʻlgan maʼlumotlar oʻzgarishsiz koʻchiriladi va guvohnomaning ichki qismi oʻng tomonining yuqori qismiga “takroriy” deb belgi qoʻyiladi.

Dalolatnoma yozuvlaridan nusxalar (koʻchirmalar) hokimliklar, Agentlik, sud, huquqni muhofaza qiluvchi organlari, ish yurituvida mavjud boʻlgan ishlar munosabati bilan notariuslar, shuningdek FHDY organlari va Oʻzbekiston Respublikasi konsullik muassasalarining soʻroviga koʻra beriladi (yuboriladi).

167. Tugʻilganlik haqidagi maʼlumotnomalar va takroriy guvohnomalar fuqaroning oʻziga, voyaga yetmagan shaxslarning qonuniy vakillariga yoki notarial tartibda tasdiqlangan ishonchnoma orqali boshqa shaxslarga ularning arizasi (67-ilova) asosida beriladi.

Chet elda yashovchi fuqaro tomonidan berilgan hamda chet tilida tuzilgan ishonchnoma belgilangan tartibda legalizatsiya qilingan yoki apostil qoʻyilgan boʻlishi lozim.

168. Dalolatnoma yozuvining ayrim ustunlari toʻldirilmagan boʻlsa, u holda takroriy guvohnomaning tegishli ustunlariga chiziqlar qoʻyiladi.

Agar tugʻilganlik haqidagi dalolatnoma yozuvining “otasining ismi” ustuni mavjud boʻlmagan, biroq ushbu dalolatnoma yozuvi asosida rasmiylashtirilgan tugʻilganlik haqidagi guvohnomaning tegishli ustuni mavjud boʻlib, unda otasining ismi koʻrsatilgan boʻlsa, tugʻilganlik haqida takroriy guvohnomada shaxsni tasdiqlovchi hujjat asosida otasining ismi koʻrsatiladi.

169. Vafot etgan shaxslarga nisbatan tugʻilganlik haqida takroriy guvohnomalar berilmaydi. Zarur hollarda, vafot etgan shaxsning yaqin qarindoshlari va merosxoʻrlariga tugʻilganlik haqidagi maʼlumotnoma beriladi.

170. Nikoh qayd etilganligi hamda nikohdan ajralganlik haqidagi takroriy guvohnoma yoki maʼlumotnoma dalolatnoma yozuvi qayd etilgan tegishli shaxslarning oʻzlariga yoki qonunchilikda belgilangan tartibda tasdiqlangan ishonchnoma orqali boshqa shaxslarga ularning arizasi (68-ilova) asosida beriladi.

Nikohdan ajratilganda nikoh tuzilganligi haqida takroriy guvohnoma berilmaydi. Bunday hollarda nikoh tuzilganligi haqidagi maʼlumotnoma berilishi mumkin.

Zarur hollarda, nikohlangan yoki ajrashgan shaxslarning ota-onalari va farzandlariga ularning arizasi asosida nikoh tuzilganligi yoki nikohdan ajralganlik qayd etilganligi haqida maʼlumotnoma beriladi.

171. Nikoh tuzilganligi haqida dalolatnoma yozuvida nikohdan ajralish qayd etilganligi haqida belgi boʻlgan hollarda takroriy guvohnoma berilmaydi. Bunda avvalgi nikoh tuzilganligi haqidagi dalolatnoma yozuvi asosida maʼlumotnoma beriladi.

172. Oʻlim haqidagi takroriy guvohnomalar yoki maʼlumotnoma marhumning yaqin qarindoshlariga va merosxoʻrlariga yoki qonunchilikda belgilangan tartibda tasdiqlangan ishonchnoma orqali boshqa shaxslarga ularning arizasi (69-ilova) asosida beriladi.

173. Takroriy guvohnoma yoki maʼlumotnoma olish uchun murojaat etgan shaxs FHDY organiga shaxsini tasdiqlovchi hujjatini taqdim etadi.

174. Takroriy guvohnoma yaroqsiz holga kelgan (shikastlangan, yozuvlari koʻrinmaydigan, yongan va shu kabi) gerbli guvohnomalar oʻrniga berilganda, yaroqsiz holga kelgan guvohnomalar FHDY organiga topshiriladi va ushbu guvohnomalar Fuqarolar tomonidan taqdim etilgan yaroqsiz holga kelgan (shikastlangan, yozuvlari koʻrinmaydigan, yongan va shu kabi) gerbli guvohnomalarni yoʻq qilish boʻyicha dalolatnoma (70-ilova) tuzgan holda yoqib yuborish yoʻli bilan yoʻq qilinadi va bu haqda tegishli gerbli guvohnomalarni sarflash daftariga maʼlumot kiritiladi. Tuzilgan dalolatnomalar alohida yigʻmajildga tikib boriladi.

175. Tegishli dalolatnoma yozuvi FHDY organida mavjud boʻlmagan hollarda, takroriy guvohnoma yoki maʼlumotnoma berish haqidagi ariza ushbu FHDY organida tegishli dalolatnoma yozuvi yoʻqligi haqidagi maʼlumotnoma (71-ilova) bilan birga, dalolatnoma yozuvining ikkinchi nusxasi saqlanadigan FHDY arxiviga yuboriladi.

176. Dalolatnoma yozuvlaridan nusxa yoki ulardan koʻchirmalar hokimliklar, Agentlik, sud, huquqni muhofaza qiluvchi organlar, yurituvida mavjud boʻlgan ishlar munosabati bilan notariuslar, shuningdek FHDY organlari va Oʻzbekiston Respublikasi konsullik muassasalarining soʻrovlariga koʻra berilishi (yuborilishi) mumkin.

Dalolatnoma yozuvidagi barcha maʼlumotlar dalolatnoma yozuvidan nusxaga (koʻchirmaga) oʻzgarishsiz koʻchiriladi va uning orqa tarafi pastki qismiga asliga toʻgʻriligini koʻrsatuvchi belgi qoʻyilib, FHDY organi rahbarining imzosi va gerbli muhr bilan tasdiqlanadi hamda koʻchirilgan sana yozib qoʻyiladi.

Fuqarolarga dalolatnoma yozuvlaridan nusxalar berilishiga yoʻl qoʻyilmaydi. Shuningdek, begona shaxslarga fuqarolik holati dalolatnomalari qayd etilganligi va ularga kiritilgan oʻzgartirish, tuzatish va qoʻshimchalar kiritilganigi haqida maʼlumot berish taqiqlanadi.

177. FHDY arxivida dalolatnoma yozuvini qidirish dalolatnoma yozuvi qayd etilgan deb koʻrsatilgan yil, undan oldingi hamda keyingi uch yillikda qayd etilgan dastlabki va tiklangan dalolatnoma yozuvlari boʻyicha amalga oshiriladi.

178. Ish yurituvda boʻlgan hujjatlar FHDY organlari faoliyatiga oid hujjatlarni saqlash muddatlari (72-ilova) oʻtgach, hokimlik va Agentlikning hududiy boshqarmasi xodimi ishtirokida tuzilgan komissiya tomonidan yoqib yuborish yoʻli bilan yoʻq qilinadi, qonun hujjatlarida FHDY arxiviga va Oʻzbekiston Respublikasining Markaziy arxiviga topshirilishi nazarda tutilgan hujjatlar bundan mustasno.

179. FHDY arxivi va FHDY organlari arxivlari joylashtirilgan xonalar temir stellajlar bilan jihozlangan, quyosh nuri va zaxdan saqlangan, shamollatib turishga moslashtirilgan, deraza va eshigiga temir panjara oʻrnatilgan boʻlishi lozim.

FHDY arxivida elektr isitgichlar va shamlardan foydalanish taqiqlanadi. Arxiv xonasi va dalolatnoma yozuvlari har yetti kunda chang yutgich yordamida tozalanishi lozim.

180. Arxiv xonasiga kirish va dalolatnoma yozuvlaridan foydalanish huquqiga arxiv mudiri, FHDY organi rahbari va arxiv uchun masʼul xodimlar, shuningdek ularning hozirligida hokimlik, Agentlikning hududiy boshqarmasi va Agentlikning masʼul xodimlari (tegishli buyruq asosida) haqli. Boshqa shaxslarning arxiv xonasiga kirishi qatʼiyan man etiladi.

181. FHDY arxivlari va FHDY organlari arxivlarida mavjud dalolatnoma yozuvlari daftarlarining roʻyxati (arxiv fondi) tuziladi.

182. Dalolatnoma yozuvlari daftar shaklida tikish uchun tayyorlanganida dalolatnoma yozuvlarining qayd etilgan yili, turi va dalolatnoma yozuvlari ketma-ketligiga rioya etilgan va hisobga olish varagʻi qoʻshilgan holda tikiladi.

Daftarga tikilgan dalolatnoma yozuvlari raqamlanib (qora qalamda yuqori oʻng burchagiga), ishonch yozuvida “Jami “___” varaqda dalolatnoma yozuvi tikilib, raqamlandi” deb koʻrsatiladi va FHDY organining rahbari tomonidan imzolanib, gerbli muhr bilan tasdiqlanadi.

Daftar muqovasiga uning nomi va undagi dalolatnoma yozuvlari haqida (73-ilova) yozib qoʻyiladi.

183. Dalolatnoma yozuvlari daftarlari FHDY arxivida har bir tuman, shahar, QFYlar boʻyicha xronologik tartibda, dalolatnoma yozuvlari turlari alohida ajratilgan holda saqlanadi.

184. FHDY arxiviga kelib tushgan dalolatnoma yozuvlariga tegishli oʻzgartirish kiritish haqidagi xabarnomalar shu kunning oʻzida Xat, xabarnoma va arizalarni roʻyxatga olish daftariga kirim qilinib, ijrosi taʼminlanishi lozim.

Oʻzgartirish kiritilishi lozim boʻlgan dalolatnoma yozuvi tegishli hududiy statistika boshqarmasidan kelib tushmagan taqdirda, oʻzgartirish kiritish haqidagi xabarnoma tegishli dalolatnoma yozuvi kelib tushgunga qadar yigʻmajildda saqlanishi lozim.

185. FHDY arxividagi mavjud dalolatnoma yozuvlari daftarlari raqamlanib, Arxiv fondi daftariga (74-ilova) kiritiladi.

185¹. Hujjatlar yigʻmajildlari nomenklaturasi fuqarolik holati dalolatnoma yozuvlarini qayd qilish va ular bilan bogʻliq boʻlgan boshqa harakatlardan tashkil topgan hujjatlardan shakllantiriladi.

185². Hujjatlar yigʻmajildlari nomenklaturasi FHDY organining nomi koʻrsatilgan holda Agentlikning hududiy boshqarmasi rahbari yoki oʻrinbosari tomonidan tasdiqlanadi.

Hujjatlar yigʻmajildlari nomenklaturasi bir kalendar yil davomida amalda boʻladi va har yili yangidan tasdiqlanadi. Hujjatlar yigʻmajildlari nomenklaturasi ikki nusxada tuziladi. Birinchi nusxa Agentlikning hududiy boshqarmasida, ikkinchi nusxasi esa FHDY organida saqlanadi.

185³. Yigʻmajildlar quyidagicha shakllantirilishi va yuritilishi zarur:

yigʻmajildlarga koʻrib chiqilgan va natijasiga koʻra ijro etilgan yoki rad qilingan hujjatlarni joylashtirish;

bitta masalaning hal qilinishiga taalluqli barcha hujjatlarni ularning ilovalari bilan birgalikda joylashtirish;

yigʻmajildlarda bir kalendar yilga oid hujjatlarni guruhlash;

yigʻmajild varaqlarining jami 250 varaqdan oshmasligini taʼminlash, agar ortsa, mazkur yigʻmajildning navbatdagi jildini yuritish.

185⁴. Yigʻmajild oxirida alohida toza varaq tikilgan varaqlar soni yoziladi. Ushbu varaqqa FHDY organi mudiri tomonidan imzolanadi hamda muhr bilan tasdiqlanadi.

Yigʻmajild muqovasidagi sana hujjatlar yigʻmajildini yuritish boshlangan va tugallangan kun, oy va yilga muvofiq kelishi kerak.

185⁵. FHDY organlari faoliyatiga oid hujjatlarning saqlash muddatlari tugaganda, ular Agentlikning hududiy boshqarmasining doimiy faoliyat olib boruvchi ekspert komissiyasi ishtirokida dalolatnoma asosida yoʻq qilinadi.

Dalolatnoma ekspert komissiyasi aʼzolari va FHDY organi rahbari tomonidan imzolanadi hamda unga FHDY organining gerbli muhri qoʻyiladi.

186. Mazkur Yoʻriqnoma talablari buzilishida aybdor boʻlgan shaxslar qonun hujjatlariga muvofiq javobgar boʻladi.

I/1. Gerbli guvohnomalarni sarflash daftari.

I/2. Alfavit daftari.

I/3. Yolgʻiz onalarning arizalarini roʻyxatga olish daftari va hujjatlar yigʻmajildi.

I/4. Otalikni belgilash boʻyicha arizalarni roʻyxatga olish daftari va hujjatlar yigʻmajildi.

I/5. Farzandlikka olish boʻyicha sudning hal qiluv qarorlarini roʻyxatga olish daftari va hujjatlar yigʻmajildi.

I/6. Tugʻilishni muddatini oʻtkazib qayd etish bilan bogʻliq hujjatlarni roʻyxatga olish daftari (16 yoshgacha) va hujjatlar yigʻmajildi.

I/7. Topib olingan (tashlab ketilgan) hujjatlarni roʻyxatga olish daftari va hujjatlar yigʻmajildi.

II/1. Gerbli guvohnomalarni sarflash daftari.

II/2. Alfavit daftari.

II/3. Nikohni qayd etish haqidagi arizalarni roʻyxatga olish daftari va hujjatlar yigʻmajildi.

II/4. Qayd etilgan nikohlar boʻyicha arizalar yigʻmajildi.

II/5. Muddatida qayd etilmagan arizalar yigʻmajildi.

II/6. Muddatida yoʻqlanmagan arizalarni yoʻq qilish dalolatnomalari yigʻmajildi.

II/7. Sudning nikoh haqiqiy emas deb topilganligi toʻgʻrisidagi ijro qilingan qarorlar yigʻmajildi.

III/1. Gerbli guvohnomalarni sarflash daftari.

III/2. Alfavit daftari.

III/3. Er-xotinning nikohdan ajralish haqidagi birgalikdagi yoki ulardan birining arizalarini roʻyxatga olish daftari va hujjatlar yigʻmajildi.

III/4. Dastlabki dalolatnoma yozuvini qayd etish boʻyicha sud qarorlarini ijro etish yuzasidan berilgan arizalarni roʻyxatga olish daftari.

III/5. Dastlabki dalolatnoma yozuvlari boʻyicha hujjatlar yigʻmajildi.

III/6. Dastlabki dalolatnoma yozuvlariga qoʻshimchalar kiritish haqidagi arizalarni roʻyxatga olish daftari va hujjatlar yigʻmajildi.

III/7. Muddatida qayd etilmagan arizalar yigʻmajildi.

III/8. Muddatida yoʻqlanmagan arizalarni yoʻq qilish dalolatnomalari yigʻmajildi.

III/9. Qayd etilgan nikoh tuzilganligi haqida dalolatnoma yozuviga chet el davlatining vakolatli organi tomonidan nikohdan ajratilganligini tasdiqlovchi hujjatlar asosida belgi qoʻyish haqida ariza hujjatlari yigʻmajildi.

IV/1. Gerbli guvohnomalarni sarflash daftari.

IV/2. Alfavit daftari.

IV/3. Vafot etganlarning roʻyxatlari:

a) ichki ishlar organiga (44 va 44-a-ilovalar);

b) mudofaa ishlari organiga (45 va 45-a-ilovalar);

v) budjetdan tashqari Pensiya jamgʻarmasining tuman (shahar) boʻlimiga.

IV/4. 16 yoshgacha vafot etganlarning tugʻilganlik haqidagi guvohnomalari.

IV/5. 16 yoshgacha vafot etganlarning tugʻilganlik haqida guvohnomalarini yoʻq qilish dalolatnomalari.

IV/6. Muddatini oʻtkazib oʻlimni qayd etish boʻyicha hujjatlar yigʻmajildi.

IV/7. Oʻlim qayd etilgan shaxsi aniqlanmaganlarning tanib olish haqidagi hujjatlar yigʻmajildi.

V/1. Dalolatnoma yozuvlariga oʻzgartirish, tuzatish va qoʻshimchalar kiritish toʻgʻrisidagi arizalarni roʻyxatga olish daftari va hujjatlar yigʻmajildi.

V/2. Dalolatnoma yozuvlariga oʻzgartirish, tuzatish va qoʻshimchalar kiritish toʻgʻrisidagi xulosalar yigʻmajildi.

VI/1. Familiya, ism va ota ismini oʻzgartirish haqidagi arizalarni roʻyxatga olish daftari.

VI/2. Familiya, ism va ota ismini oʻzgartirish haqidagi qanoatlantirilgan arizalar hujjatlar yigʻmajildlari.

VI/3. Familiya, ism va ota ismini oʻzgartirish haqidagi rad etilgan arizalar hujjatlar yigʻmajildlari.

VII/1. Dalolatnoma yozuvini tiklash haqidagi arizalarni roʻyxatga olish daftari.

VII/2. Dalolatnoma yozuvini tiklash haqidagi qanoatlantirilgan arizalar hujjatlar yigʻmajildlari.

VII/3. Dalolatnoma yozuvini tiklash haqidagi rad etilgan arizalar hujjatlar yigʻmajildlari.

VIII/1. Arxiv fondi.

VIII/2. Agentlikning hududiy boshqarmasidan qabul qilingan gerbli guvohnomalarni kirim qilish va tarqatish daftari (QFYning FHDY organidan qabul qilingan gerbli guvohnomalarni kirim qilish va sarflash daftarlari).

VIII/3. Xat, xabarnoma va arizalarni roʻyxatga olish daftari va hujjatlar yigʻmajildi (kirim daftari).

VIII/4. FHDY organidan joʻnatilayotgan xatlarni roʻyxatga olish daftari va hujjatlar yigʻmajildi (chiqish daftari).

VIII/5. Tugʻilganlik haqida takroriy guvohnoma soʻralgan arizalarni roʻyxatga olish daftari va hujjatlar yigʻmajildi.

VIII/6. Nikoh tuzilganligi haqida takroriy guvohnoma soʻralgan arizalarni roʻyxatga olish daftari va hujjatlar yigʻmajildi.

VIII/7. Nikohdan ajralganlik haqida takroriy guvohnoma soʻralgan arizalarni roʻyxatga olish daftari va hujjatlar yigʻmajildi.

VIII/8. Oʻlim haqida takroriy guvohnoma soʻralgan arizalarni roʻyxatga olish daftari va hujjatlar yigʻmajildi.

VIII/9. “Fuqarolik, oilaviy va jinoiy ishlar boʻyicha huquqiy yordam va huquqiy munosabatlar toʻgʻrisida”gi konvensiya (1993-yil 22-yanvar, Minsk sh.) boʻyicha kelgan hujjatlar va ularning ijrosiga oid yigʻmajild va roʻyxatga olish daftari.

VIII/10. Boshqa FHDY organlaridan kelgan gerbli guvohnomalar va maʼlumotnomalar uchun alfavit daftari.

VIII/11. Arxivda saqlash muddati oʻtgan hujjatlarni yoʻq qilish dalolatnomalari yigʻmajildi.

VIII/12. Qonun hujjatlari va adabiyotlarni roʻyxatga olish daftari.

IX/1. 97-shakl boʻyicha hisobotlar yigʻmajildi.

IX/2. 12 (A, B)-shakl boʻyicha hisobotlar yigʻmajildi.

IX/3. 1-shakl boʻyicha hisobotlar yigʻmajildi.

IX/4. Moliyaviy hisobotlar (davlat boji, gerb yigʻimi va pullik xizmat) yigʻmajildi.

IX/5. FHDY organida oʻtkazilgan tekshirishlar natijalari yigʻmajildi.

X/1. Ish rejalar (yarim yillik, yillik) va u boʻyicha bajarilgan ishlarning maʼlumotnomalari yigʻmajildi.

X/2. FHDY sohasiga taalluqli normativ-huquqiy hujjatlar.

X/3. Hokimlik, Agentlik va uning hududiy boshqarmasidan kelgan topshiriq va koʻrsatmalar.

X/4. Qishloq fuqarolar yigʻinlari bilan olib borilgan ishlar.

X/5. FHDY organi xodimlarining ish taqsimoti va mansab yoʻriqnomalari.

X/6. FHDY organining moddiy-texnik bazasiga oid maʼlumotlar.

X/7. Topshirish-qabul qilish dalolatnomalari.

X/8. Viloyat (shahar) FHDY arxivlariga topshirilgan alfavit daftarlarining roʻyxati.

I/1. Gerbli guvohnomalarni sarflash daftari.

I/2. Alfavit daftari.

I/3. Nikohni qayd etish haqidagi arizalarni roʻyxatga olish daftari va hujjatlar yigʻmajildi.

I/4. Qayd etilgan nikohlar boʻyicha arizalar yigʻmajildi.

I/5. Muddatida qayd etilmagan arizalar yigʻmajildi.

I/6. Muddatida yoʻqlanmagan arizalarni yoʻq qilish dalolatnomalari yigʻmajildi.

I/7. Sudning nikoh haqiqiy emas deb topilganligi toʻgʻrisidagi ijro qilingan qarorlar yigʻmajildi.

II/1. Dalolatnoma yozuvlariga oʻzgartirish, tuzatish va qoʻshimchalar kiritish toʻgʻrisidagi arizalarni roʻyxatga olish daftari va hujjatlar yigʻmajildi.

II/2. Dalolatnoma yozuvlariga oʻzgartirish, tuzatish va qoʻshimchalar kiritish toʻgʻrisidagi xulosalar yigʻmajildi.

III. Qayd etilgan nikoh tuzilganligi haqida dalolatnoma yozuviga chet el davlatining vakolatli organi tomonidan nikohdan ajratilganligini tasdiqlovchi hujjatlar asosida belgi qoʻyish haqida ariza hujjatlari yigʻmajildi.

IV/1. Arxiv fondi.

IV/2. Agentlikning hududiy boshqarmasidan qabul qilingan gerbli guvohnomalarni kirim qilish va tarqatish daftari.

IV/3. Xat, xabarnoma va arizalarni roʻyxatga olish daftari va hujjatlar yigʻmajildi (kirim daftari).

IV/4. Nikoh uyidan joʻnatilayotgan xatlarni roʻyxatga olish daftari va hujjatlar yigʻmajildi (chiqish daftari).

IV/5. Nikoh tuzilganligi haqida takroriy guvohnoma soʻralgan arizalarni roʻyxatga olish daftari va hujjatlar yigʻmajildi.

IV/6. “Fuqarolik, oilaviy va jinoiy ishlar boʻyicha huquqiy yordam va huquqiy munosabatlar toʻgʻrisida”gi konvensiya (1993-yil 22-yanvar, Minsk sh.) boʻyicha kelgan hujjatlar va ularning ijrosiga oid yigʻmajild va roʻyxatga olish daftari.

IV/7. Arxivda saqlash muddati oʻtgan hujjatlarni yoʻq qilish dalolatnomalari yigʻmajildi.

IV/8. Qonun hujjatlari va adabiyotlarni roʻyxatga olish daftari.

V/1. 97-shakl boʻyicha hisobotlar yigʻmajildi.

V/2. 12 (A, B)-shakl boʻyicha hisobotlar yigʻmajildi.

V/3. 1-shakl boʻyicha hisobotlar yigʻmajildi.

V/4. Moliyaviy hisobotlar (davlat boji, gerb yigʻimi va pullik xizmat) yigʻmajildi.

V/5. Nikoh uyida oʻtkazilgan tekshirishlar natijalari yigʻmajildi.

VI/1. Ish rejalar (yarim yillik, yillik) va u boʻyicha bajarilgan ishlarning maʼlumotnomalari yigʻmajildi.

VI/2. FHDY sohasiga taalluqli normativ-huquqiy hujjatlar.

VI/3. Hokimlik, Agentlik va uning hududiy boshqarmasidan kelgan topshiriq va koʻrsatmalar.

VI/4. Nikoh uyi xodimlarining ish taqsimoti va mansab yoʻriqnomalari.

VI/5. Nikoh uyining moddiy-texnik bazasiga oid maʼlumotlar.

VI/6. Topshirish-qabul qilish dalolatnomalari.

VI/7. Viloyat (shahar) FHDY arxivlariga topshirilgan alfavit daftarlarining roʻyxati.

VI/8. Saqlash muddati tugagan hujjatlarni yoʻq qilish haqidagi dalolatnomalar yigʻmajildi.

I/1. Gerbli guvohnomalarni sarflash daftari.

I/2. Alfavit daftari.

I/3. Vafot etgan shaxslarning oʻlimi toʻgʻrisida tugʻilganlik haqida dalolatnoma yozuvlariga maʼlumot kiritish yuzasidan xabarnomalar yigʻmajildi.

I/4. Otalikni belgilash boʻyicha arizalarni roʻyxatga olish daftari va hujjatlar yigʻmajildi.

I/5. Farzandlikka olish boʻyicha sudning hal qiluv qarorlarini roʻyxatga olish daftari va hujjatlar yigʻmajildi.

II/1. Gerbli guvohnomalarni sarflash daftari.

II/2. Alfavit daftari.

II/3. Turli hududlarda qayd etilgan shaxslarning nikohlari haqida xabarnomalar yigʻmajildi.

III/1. Gerbli guvohnomalarni sarflash daftari.

III/2. Alfavit daftari.

III/3. Dastlabki dalolatnoma yozuvlariga qoʻshimchalar kiritish haqidagi xabarnomalar yigʻmajildi.

III/4. Qayd etilgan nikoh tuzilganligi haqida dalolatnoma yozuviga chet el davlatining vakolatli organi tomonidan nikohdan ajratilganligini tasdiqlovchi hujjatlar asosida belgi qoʻyish haqida ariza hujjatlari yigʻmajildi.

IV/1. Gerbli guvohnomalarni sarflash daftari.

IV/2. Alfavit daftari.