LexUZ sharhi
Mazkur qaror O‘zbekiston Respublikasi Vazirlar Mahkamasining 2021-yil 22-fevraldagi 87-sonli “O‘zbekiston Respublikasi Hukumatining o‘z ahamiyatini yo‘qotgan ayrim qarorlarini o‘z kuchini yo‘qotgan deb hisoblash to‘g‘risida (O‘zbekiston Respublikasi Prezidentining “O‘z ahamiyatini yo‘qotgan qonunchilik hujjatlarini qayta ko‘rib chiqish tizimini joriy etish orqali mamlakatda ishbilarmonlik muhitini yaxshilash chora-tadbirlari to‘g‘risida” 2020-yil 27-sentabrdagi PF-6075-son Farmoni)”gi qaroriga asosan o‘z kuchini yo‘qotgan.
Toshkent shahar Sobir Rahimov tumanida amalga oshirilayotgan obodonchilik ishlari dasturi doirasida O‘zbekiston davlat tabiat muzeyini boshqa joyga ko‘chirish munosabati bilan muzeyning kelgusida faoliyat yuritishi uchun qulay shart-sharoitlar yaratish maqsadida Vazirlar Mahkamasi qaror qiladi:
1. O‘zbekiston Respublikasi Madaniyat va sport ishlari vazirligi, Davlat mulki qo‘mitasi, Moliya vazirligi va Fanlar akademiyasining Toshkent shahri, A. Niyozov ko‘chasi, 1-uyda joylashgan Fiziologiya va biofizika instituti binosini O‘zbekiston davlat tabiat muzeyi balansiga berish to‘g‘risidagi taklifiga rozilik berilsin.
2. O‘zbekiston Respublikasi Fanlar akademiyasi Toshkent shahri, A. Niyozov ko‘chasi, 1-uyda joylashgan Fiziologiya va biofizika instituti binosini O‘zbekiston davlat tabiat muzeyi balansiga bepul o‘tkazib bersin.
3. Mazkur binoni balansdan balansga o‘tkazish jarayonida ushbu binoning qiymati daromad (foyda) solig‘ini va qo‘shimcha qiymat solig‘ini hisoblab chiqishda soliq solish obyekti hisoblanmaydi.
4. O‘zbekiston davlat tabiat muzeyini Fanlar akademiyasining Fiziologiya va biofizika instituti binosiga ko‘chirish va ajratilgan binoni ta’mirlash ishlari amalda bajarilgan haqiqiy xarajatlardan kelib chiqib, O‘zbekiston Respublikasi Vazirlar Mahkamasining zaxira jamg‘armasi hisobidan qoplansin.
O‘zbekiston Respublikasi Fanlar akademiyasi Fiziologiya va biofizika institutini boshqa binoga ko‘chirish va tegishli ta’mirlash ishlarini bajarish uchun mablag‘lar ajratishni 2004-yil uchun tasdiqlangan budjet mablag‘lari doirasida hal etsin.
5. O‘zbekiston Respublikasi Vazirlar Mahkamasining “O‘zbekiston Respublikasi Fanlar akademiyasining ilmiy va moddiy-texnika bazasini mustahkamlash chora-tadbirlari to‘g‘risida” 2004-yil 7-sentabrdagi 420-son qarori 1-ilovasidagi ro‘yxatning 5-bandi (Fiziologiya va biofizika instituti) o‘z kuchini yo‘qotgan deb hisoblansin.