“Tadbirkorlik faoliyati sohasidagi ruxsat berish tartib-taomillari toʻgʻrisida”gi Oʻzbekiston Respublikasi Qonunini bajarish hamda Oʻzbekiston Respublikasi Vazirlar Mahkamasining “Tadbirkorlik faoliyati sohasidagi ruxsat berish tartib-taomillari toʻgʻrisida”gi Oʻzbekiston Respublikasi Qonunini amalga oshirish chora-tadbirlari haqida” 2013-yil 15-avgustdagi 225-son qaroriga muvofiq, shuningdek tadbirkorlik subyektlari tomonidan temir yoʻl transporti sohasida ruxsat berish tartibotlaridan oʻtishning yagona tartibini belgilash maqsadida Vazirlar Mahkamasi qaror qiladi:

1. Quyidagilar:

Oʻzbekiston Respublikasida Temir yoʻllarda yuk va yoʻlovchilar tashish xavfsizligini nazorat qilish davlat inspeksiyasi tomonidan obyektlar, mahsulotlar va texnologiyalarning loyihalarini hamda ularni foydalanishga qabul qilib olish ishlarini ularning temir yoʻl transporti sohasida belgilangan talablarga muvofiqligi yuzasidan ekspertizadan oʻtkazish tartibi toʻgʻrisidagi nizom 1-ilovaga muvofiq;

Lokomotivlar, yuk va izotermik vagonlarning xizmat qilish muddatlarini uzaytirishga texnik yechimlardan ishlab chiqarishda foydalanishni Oʻzbekiston Respublikasi Temir yoʻllarda yuk va yoʻlovchilar tashish xavfsizligini nazorat qilish davlat inspeksiyasi bilan kelishish tartibi toʻgʻrisidagi nizom 2-ilovaga muvofiq tasdiqlansin.

2. “Oʻzdavtemiryoʻlnazorat” davlat inspeksiyasi, vazirliklar va idoralar oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsinlar.

3. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari B.I. Zakirov zimmasiga yuklansin.

1. Ushbu Nizom oʻtkazilgan ekspertiza natijalari boʻyicha obyektlar, mahsulotlar va texnologiyalarning loyihalarni hamda ularni foydalanishga qabul qilib olish ishlarini amalga oshirish huquqini beradigan ushbu Nizomga 1 va 2-ilovalarga* muvofiq sxema va shakl boʻyicha xulosa (keyingi oʻrinlarda xulosa deb ataladi) berish uchun Oʻzbekiston Respublikasi Temir yoʻllarda yuk va yoʻlovchilar tashish xavfsizligini nazorat qilish davlat inspeksiyasi (keyingi oʻrinlarda “Oʻzdavtemiryoʻlnazorat” davlat inspeksiyasi deb ataladi) tomonidan obyektlar, mahsulotlar va texnologiyalarning loyihalarini hamda ularni foydalanishga qabul qilib olish ishlarini ularning temir yoʻl transporti sohasida belgilangan talablarga muvofiqligi yuzasidan ekspertizadan oʻtkazish tartibini belgilaydi.

2. Ushbu Nizomda quyidagi asosiy tushunchalardan foydalaniladi:

ariza beruvchi — xulosa olish uchun hujjatlarni “Oʻzdavtemiryoʻlnazorat” davlat inspeksiyasiga taqdim etadigan tadbirkorlik subyekti — yuridik shaxs;

temir yoʻl transporti obyekti (keyingi oʻrinlarda obyekt deb ataladi) — foydalanilayotgan temir yoʻl infratuzilmasi (temir yoʻl infratuzilmasining uchastkalari); temir yoʻl infratuzilmasining tarkibiy qismlari (yoʻllar, temir yoʻl elektr taʼminoti, boshqarish, nazorat qilish, signalizatsiya va aloqa, stansiya kichik tizimlari); tashkil etilgan temir yoʻl harakat tarkibi va uning tarkibiy qismlari (poyezdlar, monyovrli tarkiblar, tirkamalarning kichik tizimlari); umumiy foydalanishdagi temir yoʻl transporti, egalari jismoniy shaxslar hisoblanadigan idoraviy temir yoʻl kirish yoʻllari hamda va temir yoʻl kirish yoʻllari, shuningdek texnologik temir yoʻl transporti;

temir yoʻl transporti mahsuloti (keyingi oʻrinlarda mahsulot deb ataladi) — temir yoʻl transporti uchun yangidan tayyorlanadigan mahsulotlar: temir yoʻl harakat tarkibi va (yoki) uning tarkibiy qismlari, shuningdek temir yoʻl transporti infratuzilmasi kichik tizimlarining tarkibiy qismlari elementlari yoki uning kichik tizimlari tarkibiy qismlari elementlarining yigʻindisi;

temir yoʻl transporti texnologiyasi (keyingi oʻrinlarda texnologiya deb ataladi) — temir yoʻl transporti sohasida foydalaniladigan metodlar va jarayonlar yigʻindisi, shuningdek temir yoʻl transporti mahsulotini tayyorlashga, unga xizmat koʻrsatishga, uni taʼmirlashga va (yoki) undan foydalanishga yoʻnaltirilgan tashkiliy chora-tadbirlar, operatsiyalar va usullar kompleksini oʻz ichiga oladigan texnik ishlab chiqarish usullarining ilmiy tavsifi;

ekspertiza — loyihalar hujjatlarini va obyektlar, mahsulotlar va texnologiyalarni qabul qilib olish ishlari hujjatlarini ularning temir yoʻl transporti sohasidagi talablarga muvofiqligi yuzasidan “Oʻzdavtemiryoʻlnazorat” davlat inspeksiyasi tomonidan koʻrib chiqish. Ekspertizani amalga oshirish davomida taqdim etilgan hujjatlarning va texnik tartibga solish sohasidagi normativ hujjatlarning qonun hujjatlari talablariga muvofiqligi aniqlanadi.

3. Xulosa 5 yil muddatga beriladi.

4. Ariza beruvchi tomonidan loyihalarni hamda obyektlar, mahsulotlar va texnologiyalarni qabul qilib olish ishlarini amalga oshirishda ruxsat berish talablari va shartlariga quyidagilar kiradi:

loyihalarni hamda obyektlar, mahsulotlar va texnologiyalarni qabul qilib olish ishlarini amalga oshirishda qonun hujjatlariga majburiy rioya etish;

harakat xavfsizligini, texnika xavfsizligini, yongʻin xavfsizligi talablari va normalarini, ishlab chiqarish sanitariyasi va ekologiyasini taʼminlash;

texnik asbob-uskunalarning, moslamalar va instrumentlarning, shuningdek xizmat koʻrsatuvchi xodimlarning temir yoʻl transportida belgilangan talablarga muvofiqligi;

loyihalarni hamda obyektlar, mahsulotlar va texnologiyalarni qabul qilib olish ishlarini xulosada koʻrsatilgan doirada amalga oshirish;

ariza beruvchining nomi yoki joylashgan joyi (pochta manzili) oʻzgarganligi qayta roʻyxatdan oʻtkazilgandan keyin yetti ish kuni mobaynida “Oʻzdavtemiryoʻlnazorat” davlat inspeksiyasini xabardor qilish.

5. Xulosa olish uchun ariza beruvchi “Oʻzdavtemiryoʻlnazorat” davlat inspeksiyasiga quyidagi hujjatlarni taqdim etadi:

ariza beruvchining nomi, joylashgan joyi (pochta manzili) va tashkiliy-huquqiy shakli koʻrsatilgan xulosa berish toʻgʻrisidagi ariza; ushbu Nizomning 3-ilovasiga* muvofiq shakl boʻyicha obyektlar, mahsulotlar va texnologiyalarning loyihalari hamda foydalanishga qabul qilib olish ishlari;

yuridik shaxsning davlat roʻyxatidan oʻtkazilganligi toʻgʻrisidagi guvohnoma nusxasi;

tashkilot rahbariyati tomonidan belgilangan tashkilotning ichki nazorati boʻyicha ariza beruvchining talablari keltirilgan holda, temir yoʻl transporti sohasidagi ishlarni bajarish uchun tashkilot rahbari tomonidan tasdiqlangan, ariza beruvchi tomonidan ishlab chiqilgan, temir yoʻl transporti sohasida amalga oshiriladigan ishlarni bajarish texnologiyasi (temir yoʻl harakat tarkibining xizmat muddatini uzaytirish uchun texnik diagnostika metodikasi).

6. Ariza beruvchidan ushbu Nizomning 5-bandida nazarda tutilmagan hujjatlarni talab qilishga yoʻl qoʻyilmaydi.

7. Xulosa olish uchun zarur boʻlgan hujjatlar ariza beruvchi tomonidan “Oʻzdavtemiryoʻlnazorat” davlat inspeksiyasiga bevosita, ularning olinganligi toʻgʻrisidagi xabarnoma bilan, pochta aloqasi vositasi orqali yoki elektron shaklda taqdim etiladi. Elektron shaklda taqdim etilgan hujjatlar ariza beruvchining elektron raqamli imzosi bilan tasdiqlanadi.

8. Xulosa olish uchun “Oʻzdavtemiryoʻlnazorat” davlat inspeksiyasiga taqdim etilgan hujjatlar roʻyxat boʻyicha qabul qilinadi, roʻyxat “Oʻzdavtemiryoʻlnazorat” davlat inspeksiyasi tomonidan hujjatlar qabul qilingan sana toʻgʻrisidagi belgi bilan ariza beruvchiga darhol beriladi (yuboriladi).

9. “Oʻzdavtemiryoʻlnazorat” davlat inspeksiyasi arizani koʻrib chiqadi, loyihalarni hamda obyektlar, mahsulotlar va texnologiyalarni qabul qilib olish ishlarini ekspertizadan oʻtkazadi, soʻngra ushbu Nizomning 5-bandida nazarda tutilgan hujjatlar qabul qilib olingan sanadan boshlab oʻn besh ish kunidan oshmaydigan muddatda xulosa beradi yoki xulosa berishni rad etadi. Ariza koʻrib chiqilganligi uchun yigʻim undirilmaydi.

10. Agar “Oʻzdavtemiryoʻlnazorat” davlat inspeksiyasi ushbu Nizomning 9-bandida nazarda tutilgan muddat mobaynida ariza beruvchiga xulosani bermasa yoki uni berishni rad etmasa, u holda ushbu muddat oʻtgach ariza beruvchi, bu toʻgʻrida “Oʻzdavtemiryoʻlnazorat” davlat inspeksiyasini yozma ravishda xabardor qilgan holda, oʻzi amalga oshirish uchun xulosa olmoqchi boʻlgan loyihalarni hamda obyektlar, mahsulotlar va texnologiyalarni qabul qilib olish ishlarini amalga oshirish huquqiga ega.

Ushbu bandning birinchi xatboshida nazarda tutilgan holatda, “Oʻzdavtemiryoʻlnazorat” davlat inspeksiyasi ariza beruvchining yozma shakldagi xabarnomasini olgach, besh ish kuni mobaynida unga xulosa berishi shart. Xulosa olingungacha, qabul qilib olingan sanasi koʻrsatilgan holdagi taqdim etilgan hujjatlar roʻyxati hamda ariza beruvchi tomonidan “Oʻzdavtemiryoʻlnazorat” davlat inspeksiyasiga yuborilgan xabarnoma xulosaga tenglashtiriladi hamda loyihalarni hamda obyektlar, mahsulotlar va texnologiyalarni qabul qilib olish ishlarini amalga oshirish uchun asos hisoblanadi.

11. “Oʻzdavtemiryoʻlnazorat” davlat inspeksiyasi rahbari (boshligʻi yoki uning oʻrinbosari), “Oʻzdavtemiryoʻlnazorat” davlat inspeksiyasining mutaxassislari tomonidan tayyorlangan ushbu Nizomga 4-ilovaga* binoan shakl boʻyicha muvofiqlik toʻgʻrisidagi dalolatnoma asosida xulosani imzolaydi yoki uni berishni rad etadi.

“Oʻzdavtemiryoʻlnazorat” davlat inspeksiyasi rahbarining (boshligʻi yoki uning oʻrinbosarining) imzosi gerbli muhr bilan tasdiqlanadi.

12. “Oʻzdavtemiryoʻlnazorat” davlat inspeksiyasi ariza beruvchiga xulosani beradi (yuboradi) yoki uni tegishli qaror qabul qilingan sanadan boshlab bir ish kunidan kechikmay xulosa berishning rad etilgani toʻgʻrisida yozma shaklda xabardor qiladi. Xulosa berilganligi va uning amal qilish muddati uzaytirilganligi uchun yigʻim undirilmaydi.

13. Xulosa berish quyidagi asoslar boʻyicha rad etilishi mumkin:

ariza beruvchi tomonidan ushbu Nizomning 5-bandida koʻrsatilgan hujjatlar toʻliq hajmda taqdim etilmaganda;

ariza beruvchi ruxsat berish talablari va shartlariga muvofiq boʻlmaganda;

ariza beruvchi tomonidan taqdim etilgan hujjatlarda ishonchsiz yoki buzilgan maʼlumotlar mavjud boʻlganda.

Xulosa berishning boshqa asoslarga koʻra, shu jumladan maqsadga muvofiq emasligi sabablariga koʻra rad etilishiga yoʻl qoʻyilmaydi.

14. Xulosa berishni rad etish toʻgʻrisida qaror qabul qilingan taqdirda rad etish toʻgʻrisidagi xabarnoma ariza beruvchiga, rad etishning sabablari, qonunchilikning aniq normalari va ariza beruvchi koʻrsatib oʻtilgan sabablarni bartaraf etib hujjatlarni takroran koʻrib chiqish uchun taqdim etishi mumkin boʻlgan muddat koʻrsatilgan holda yozma shaklda yuboriladi (taqdim etiladi). Ariza beruvchi rad etish sabablarini bartaraf etishga va hujjatlarni takroran koʻrib chiqish uchun taqdim etishga haqli boʻlgan muddat xulosa berishni rad etish toʻgʻrisidagi yozma xabarnoma olingan kundan boshlab oʻn ish kunidan kam boʻlishi mumkin emas.

15. Xulosa berishni rad etish uchun asos boʻlgan sabablar belgilangan muddatda ariza beruvchi tomonidan bartaraf etilgan taqdirda hujjatlarni takroran koʻrib chiqish, xulosa berish yoki uni berishni rad etish “Oʻzdavtemiryoʻlnazorat” davlat inspeksiyasi tomonidan rad etish sabablari bartaraf etilganligi toʻgʻrisida ariza va rad etish sabablari bartaraf etilganligini tasdiqlovchi tegishli hujjatlar olingan kundan boshlab oʻn ish kunidan oshmaydigan muddatda amalga oshiriladi. Tadbirkorlik subyektining arizasi takroran koʻrib chiqilganligi uchun yigʻim undirilmaydi.

16. Hujjatlarni takroran koʻrib chiqishda ariza beruvchiga ilgari yozma shaklda bayon qilinmagan rad etish sabablarining “Oʻzdavtemiryoʻlnazorat” davlat inspeksiyasi tomonidan koʻrsatilishiga yoʻl qoʻyilmaydi, ilgari koʻrsatilgan sabablarning bartaraf etilganini tasdiqlovchi hujjatlar bilan bogʻliq holdagi rad etish sabablarining koʻrsatilishi bundan mustasno.

17. Xulosa berishining rad etilgani toʻgʻrisidagi yozma xabarnomada koʻrsatilgan muddat oʻtgandan keyin ariza beruvchi bergan ariza yangidan berilgan ariza hisoblanadi va “Oʻzdavtemiryoʻlnazorat” davlat inspeksiyasi tomonidan umumiy asoslarda koʻrib chiqiladi.

18. Ariza beruvchi xulosa berishning rad etilgani, shuningdek “Oʻzdavtemiryoʻlnazorat” davlat inspeksiyasi mansabdor shaxsining harakati (harakatsizligi) toʻgʻrisida belgilangan tartibda shikoyat qilish huquqiga ega.

19. Ariza beruvchi qayta tashkil etilganda, uning nomi yoki joylashgan joyi (pochta manzili) oʻzgarganda ariza beruvchi yoki uning huquqiy vorisi qayta rasmiylashtirishdan oʻtgandan keyin yetti ish kuni mobaynida “Oʻzdavtemiryoʻlnazorat” davlat inspeksiyasiga, koʻrsatilgan maʼlumotlarni tasdiqlovchi tegishli hujjatlarni ilova qilgan holda, xulosani qayta rasmiylashtirish toʻgʻrisida ariza berishi shart.

Hujjatlar ariza beruvchi tomonidan “Oʻzdavtemiryoʻlnazorat” davlat inspeksiyasiga ushbu Nizomning 7-bandida nazarda tutilgan tartibda taqdim etiladi.

Tadbirkorlik subyektidan ushbu bandda nazarda tutilmagan hujjatlarni taqdim etishni talab qilishga yoʻl qoʻyilmaydi.

20. Xulosa qayta rasmiylashtirilgungacha xulosani qayta rasmiylashtirish toʻgʻrisida ariza bergan yoki uning huquqiy vorisi xulosada koʻrsatilgan loyihalarni hamda obyektlar, mahsulotlar va texnologiyalarni qabul qilib olish ishlarini ariza qabul qilib olingan sanasi “Oʻzdavtemiryoʻlnazorat” davlat inspeksiyasi tomonidan koʻrsatilgan holdagi xulosani qayta rasmiylashtirish toʻgʻrisida berilgan ariza asosida amalga oshiradi.

21. Xulosani qayta rasmiylashtirishda “Oʻzdavtemiryoʻlnazorat” davlat inspeksiyasi berilgan xulosalar reyestriga tegishli oʻzgartirishlar kiritadi. Xulosalarni qayta rasmiylashtirish va berish tegishli hujjatlar ilova qilingan holda xulosani qayta rasmiylashtirish toʻgʻrisidagi ariza “Oʻzdavtemiryoʻlnazorat” davlat inspeksiyasi tomonidan olingan kundan boshlab besh ish kunidan koʻp boʻlmagan muddatda amalga oshiriladi.

22. Xulosani qayta rasmiylashtirilganlik uchun yigʻim undirilmaydi.

23. Arizaning amal qilish muddati tugagach u ariza beruvchining arizasiga koʻra uzaytirilishi mumkin. Xulosaning amal qilish muddatini uzaytirish toʻgʻrisidagi ariza “Oʻzdavtemiryoʻlnazorat” davlat inspeksiyasiga xulosaning amal qilish muddati oʻtgungacha berilishi kerak. Xulosaning amal qilish muddatini uzaytirish uni berish uchun nazarda tutilgan tartibda amalga oshiriladi.

24. Xulosa yoʻqolganda yoki yaroqsiz holga kelganda ariza beruvchining arizasi boʻyicha xulosaning dublikati beriladi.

25. “Oʻzdavtemiryoʻlnazorat” davlat inspeksiyasi xulosa dublikatini ariza, shuningdek u yaroqsiz holga kelganda xulosaning asl nusxasi olingan kundan boshlab besh ish kunidan koʻp boʻlmagan muddatda berishi (yuborishi) shart. Xulosa dublikati berilganligi uchun yigʻim undirilmaydi.

26. Xulosaning amal qilish muddatini toʻxtatib turish, toʻxtatish va xulosani bekor qilish “Tadbirkorlik faoliyati sohasidagi ruxsat berish tartib-taomillari toʻgʻrisida”gi Oʻzbekiston Respublikasi Qonunining tegishli ravishda 22, 23 va 25-moddalarida nazarda tutilgan holatlarda va tartibda amalga oshiriladi.

27. Quyidagilar xulosaning amal qilishini belgilangan tartibda toʻxtatish uchun asos boʻladigan ruxsat berish talablari va shartlarining bir marta qoʻpol ravishda buzilishiga kiradi:

“Oʻzdavtemiryoʻlnazorat” davlat inspeksiyasi tomonidan belgilangan tartibda oʻtkaziladigan ruxsat berish talablari va shartlariga rioya etilishini tekshirishlardan bosh tortish;

ular yuzasidan xulosa berilgan loyihalarni hamda obyektlar, mahsulotlar va texnologiyalarni qabul qilib olish ishlarini amalga oshirish natijasida fuqarolarning hayoti va sogʻligʻiga zarar yetkazish yoxud bunday zarar yetkazilishining aniq xavfini tugʻdirish.

28. “Oʻzdavtemiryoʻlnazorat” davlat inspeksiyasi berilgan xulosalar reyestrini yuritadi va uni oʻzining rasmiy veb-saytida joylashtiradi.

29. Berilgan xulosalar reyestrida quyidagilar koʻrsatilgan boʻlishi kerak:

ariza beruvchining nomi, joylashgan joyi (pochta manzili) va tashkiliy-huquqiy shakli, telefoni;

xulosaning berilgan sanasi va tartib raqami;

xulosaning amal qilish muddati;

xulosani qayta rasmiylashtirish, amal qilish muddatini uzaytirish, amal qilishini toʻxtatib turish va tiklashning asosi va sanasi;

xulosaning amal qilish muddatini toʻxtatishning asosi va sanasi;

xulosani bekor qilishning asosi va sanasi;

xulosa dublikatini berishning asosi va sanasi.

30. Ushbu Nizom talablarining buzilishida aybdor boʻlgan shaxslar qonun hujjatlariga muvofiq javob beradilar.

1. Ushbu Nizom amalga oshirilgan kelishish natijalari boʻyicha muayyan muddatga, ushbu Nizomga 1 va 2-ilovalarga* muvofiq sxema va shakl boʻyicha harakatlanadigan temir yoʻl tarkibining xizmat qilish muddatlarini uzaytirishga texnik yechimlardan ishlab chiqarishda foydalanish huquqini beruvchi guvohnomani (keyingi oʻrinlarda guvohnoma deb ataladi) berish uchun tashkilotlarning lokomotivlari, yuk va izotermik vagonlarining (keyingi oʻrinlarda harakatlanadigan temir yoʻl tarkibi deb ataladi) xizmat qilish muddatlarini uzaytirishga texnik yechimlardan ishlab chiqarishda foydalanishni Oʻzbekiston Respublikasi Temir yoʻllarda yuk va yoʻlovchilar tashish xavfsizligini nazorat qilish davlat inspeksiyasi bilan kelishish tartibini belgilaydi.

2. Ushbu Nizomda quyidagi asosiy tushunchalardan foydalaniladi:

ariza beruvchi — xizmat qilish muddati tamom boʻlgan yoki tamom boʻlayotgan oʻzining harakatlanadigan temir yoʻl tarkibiga ega boʻlgan, “Oʻzdavtemiryoʻlnazorat” davlat inspeksiyasiga guvohnoma olish uchun hujjatlarni taqdim etuvchi tadbirkorlik subyekti — yuridik shaxs;

harakatlanadigan temir yoʻl tarkibi xizmat qilishining belgilangan muddati — belgilangan xalqaro normalarga va ushbu Nizomga 3-ilovaga* muvofiq tayyorlovchi zavod tomonidan nazarda tutilgan, unga erishilganda harakatlanadigan temir yoʻl tarkibidan foydalanish, texnik holatidan qatʼi nazar, toʻxtatilishi kerak boʻlgan foydalanishning kalendar davom etishi;

harakatlanadigan temir yoʻl tarkibining xizmat qilish muddati — harakatlanadigan temir yoʻl tarkibidan foydalanish boshlangandan boshlab foydalanishning kalendar davom etishi yoki cheklangan holatga oʻtgunga qadar taʼmirlashdan keyin uning tiklanishi;

ixtisoslashtirilgan ekspert tashkilot — harakatlanadigan temir yoʻl tarkibiga texnik tashxis qoʻyish boʻyicha ishlarni bajarish vakolati berilgan tashkilot;

texnik yechim — maxsus ekspert tashkiloti tomonidan berilgan, ariza beruvchi bilan kelishilgan hamda texnik asos va harakatlanadigan temir yoʻl tarkibi xizmat qilishining belgilangan muddatini uzaytirish shartlari mavjud boʻlgan hujjat.

3. Guvohnomaning amal qilish muddati — harakatlanadigan temir yoʻl tarkibi xizmat qilishini uzaytirish muddatiga muvofiqdir.

4. Harakatlanadigan temir yoʻl tarkibi xizmat qilishining yangi muddatini hisoblash guvohnoma berilgan sanadan belgilanadi.

5. Lokomotivlar, yuk va izotermik vagonlarning xizmat muddatini uzaytirishda quyidagilar ruxsat berish talablari va shartlariga kiradi:

lokomotivlar, yuk va izotermik vagonlarning xizmat qilish muddatini uzaytirishda qonunchilikka majburiy rioya qilish;

harakat xavfsizligini, texnika xavfsizligini, yongʻin xavfsizligi, ishlab chiqarish sanitariyasi va ekologiya talablari va normalarini taʼminlash;

guvohnomada koʻrsatilgan doiralarda lokomotivlar, yuk va izotermik vagonlarning xizmat qilish muddatini uzaytirish boʻyicha tadbirlarni amalga oshirish;

qayta roʻyxatdan oʻtgandan keyin ariza beruvchining nomi yoki turgan joyi (pochta manzili) oʻzgarganligi toʻgʻrisida yetti ish kuni mobaynida “Oʻzdavtemiryoʻlnazorat” davlat inspeksiyasini xabardor qilish.

6. Guvohnomani olish uchun ariza beruvchi “Oʻzdavtemiryoʻlnazorat” davlat inspeksiyasiga quyidagi hujjatlarni taqdim etadi:

ushbu Nizomga 4-ilovaga* muvofiq shakl boʻyicha quyidagilar: ariza beruvchining nomi, joylashgan joyi (pochta manzili) va tashkiliy huquqiy shakli; xizmat qilish muddatini uzaytirish taklif etilayotgan harakatlanadigan temir yoʻl tarkibining soni va tipi (seriyasi) koʻrsatilgan holda guvohnoma berish toʻgʻrisidagi ariza;

ushbu Nizomga 5-ilovaga* (lokomotivlar uchun), 6-ilovaga* (vagonlar uchun) muvofiq shakllar boʻyicha ixtisoslashtirilgan ekspert tashkilot tomonidan rasmiylashtiriladigan harakatlanadigan temir yoʻl tarkibining xizmat qilish muddatini uzaytirish toʻgʻrisidagi texnik yechim.

7. Ariza beruvchidan ushbu Nizomning 6-bandida nazarda tutilmagan hujjatlarni talab etishga yoʻl qoʻyilmaydi.

8. Guvohnoma olish uchun zarur boʻlgan hujjatlar ariza beruvchi tomonidan “Oʻzdavtemiryoʻlnazorat” davlat inspeksiyasiga bevosita, ular olinganligi toʻgʻrisidagi xabarnoma bilan pochta aloqasi yoki elektron shaklda taqdim etiladi. Elektron shaklda taqdim etilgan hujjatlar ariza beruvchining elektron raqamli imzosi bilan tasdiqlanadi.

9. Guvohnoma olish uchun “Oʻzdavtemiryoʻlnazorat” davlat inspeksiyasiga taqdim etilgan hujjatlar roʻyxat boʻyicha qabul qilinadi va roʻyxat “Oʻzdavtemiryoʻlnazorat” davlat inspeksiyasi tomonidan hujjatlar qabul qilingan sana toʻgʻrisida belgi qoʻyilgan holda darhol ariza beruvchiga beriladi (yuboriladi).

10. “Oʻzdavtemiryoʻlnazorat” davlat inspeksiyasi ushbu Nizomning 6-bandida nazarda tutilgan hujjatlarni qabul qilish sanasidan boshlab besh ish kunidan ortiq boʻlmagan muddatda, shu jumladan ushbu Nizomning 23-bandida nazarda tutilgan arizani koʻrib chiqish muddatida arizani koʻrib chiqadi, guvohnomani beradi yoki uni berishni rad etadi. Ariza koʻrib chiqilganligi uchun yigʻim undirilmaydi.

11. Agar “Oʻzdavtemiryoʻlnazorat” davlat inspeksiyasi ushbu Nizomning 10-bandida nazarda tutilgan muddat mobaynida ariza beruvchiga guvohnomani bermasa yoki uni berishni rad etmasa, u holda ushbu muddat tamom boʻlgandan keyin ariza beruvchi bu haqda “Oʻzdavtemiryoʻlnazorat” davlat inspeksiyasini yozma ravishda xabardor qilgan holda texnik yechimda koʻrsatilgan muddatda ariza berilgan harakatlanadigan temir yoʻl tarkibining xizmat qilish muddatlarini uzaytirish huquqiga ega boʻladi.

Ushbu bandning birinchi xatboshida nazarda tutilgan holatda “Oʻzdavtemiryoʻlnazorat” davlat inspeksiyasi ariza beruvchining yozma xabarnomasi olingandan keyin besh ish kuni mobaynida unga guvohnoma berishi shart. Guvohnoma olingunga qadar taqdim etilgan hujjatlarning roʻyxati ular qabul qilingan sana toʻgʻrisida qoʻyilgan belgi va ariza beruvchi tomonidan “Oʻzdavtemiryoʻlnazorat” davlat inspeksiyasiga yuborilgan yozma xabarnoma bilan birgalikda guvohnomaga tenglashtiriladi va texnik yechimda koʻrsatilgan muddatda ariza berilgan harakatlanadigan temir yoʻl tarkibining xizmat qilish muddatlarini uzaytirish uchun asos hisoblanadi.

12. “Oʻzdavtemiryoʻlnazorat” davlat inspeksiyasi rahbari (boshligʻi yoki uning oʻrinbosari) “Oʻzdavtemiryoʻlnazorat” davlat inspeksiyasining mutaxassislari tomonidan tayyorlangan 7-ilovaga* muvofiq shakl boʻyicha muvofiqlik toʻgʻrisidagi dalolatnoma asosida guvohnomani imzolaydi yoki uni berishni rad etadi.

13. “Oʻzdavtemiryoʻlnazorat” davlat inspeksiyasi rahbarining (boshligʻi yoki uning oʻrinbosarining) imzosi gerbli muhr bilan tasdiqlanadi.

14. “Oʻzdavtemiryoʻlnazorat” davlat inspeksiyasi tegishli qaror qabul qilingan sanadan boshlab bir ish kunidan kechikmay ariza beruvchiga guvohnomani beradi (yuboradi) yoki uni berish rad etilganligi toʻgʻrisida yozma shaklda uni xabardor qiladi. Guvohnoma berilganligi uchun yigʻim undirilmaydi.

15. Guvohnomani berish quyidagi asoslar boʻyicha rad etilishi mumkin:

ariza beruvchi tomonidan ushbu Nizomning 6-bandida koʻrsatilgan hujjatlarning toʻliq boʻlmagan hajmda taqdim etilishi;

ariza beruvchining ruxsat berish talablari va shartlariga nomuvofiqligi;

ariza beruvchi tomonidan taqdim etilgan hujjatlarda ishonchsiz yoki buzilgan maʼlumotlar mavjudligi.

Boshqa asoslar boʻyicha, shu jumladan maqsadga muvofiq emasligi sababi bilan xulosa berish rad etilishiga yoʻl qoʻyilmaydi.

16. Guvohnomani berish rad etilishi toʻgʻrisida qaror qabul qilingan taqdirda rad etish toʻgʻrisidagi xabarnoma ariza beruvchiga rad etishning sabablari, qonun hujjatlarining aniq normalari va ariza beruvchi koʻrsatib oʻtilgan sabablarni bartaraf etib hujjatlarni takroran koʻrib chiqish uchun taqdim etishi mumkin boʻlgan muddat koʻrsatilgan holda yozma shaklda yuboriladi (topshiriladi). Ariza beruvchi rad etish sabablarini bartaraf etishga va hujjatlarni takroran koʻrib chiqish uchun taqdim etishga haqli boʻlgan muddat guvohnoma berish rad etilganligi toʻgʻrisidagi yozma xabarnoma olingan kundan boshlab oʻn ish kunidan kam boʻlishi mumkin emas.

17. Ariza beruvchi tomonidan guvohnomani berish rad etilishi uchun asos boʻlgan sabablar belgilangan muddatda bartaraf etilgan taqdirda hujjatlarni takroran koʻrib chiqish, guvohnomani berish yoki uni berishni rad etish “Oʻzdavtemiryoʻlnazorat” davlat inspeksiyasi tomonidan rad etish sabablari bartaraf etilganligi toʻgʻrisidagi ariza va rad etish sabablari bartaraf etilganligini tasdiqlovchi tegishli hujjatlar olingan kundan boshlab oʻn ish kunidan ortiq boʻlmagan muddatda amalga oshiriladi. Ariza takroran koʻrib chiqilganligi uchun yigʻim undirilmaydi.

18. Hujjatlarni takroran koʻrib chiqishda “Oʻzdavtemiryoʻlnazorat” davlat inspeksiyasi tomonidan oldin ariza beruvchiga yozma shaklda bayon qilinmagan rad etish sabablari koʻrsatilishiga yoʻl qoʻyilmaydi, oldin koʻrsatilgan sabablar bartaraf etilganligini tasdiqlovchi hujjatlar bilan bogʻliq rad etish sabablarini koʻrsatish bundan mustasno.

19. Guvohnomani berish rad etilishi toʻgʻrisidagi yozma xabarnomada koʻrsatilgan muddat tamom boʻlgandan keyin ariza beruvchi tomonidan berilgan ariza yangidan berilgan ariza hisoblanadi va “Oʻzdavtemiryoʻlnazorat” davlat inspeksiyasi tomonidan umumiy asoslarda koʻrib chiqiladi.

20. Ariza beruvchi guvohnomani berish rad etilishi, shuningdek “Oʻzdavtemiryoʻlnazorat” davlat inspeksiyasi mansabdor shaxsining harakati (harakatsizligi) yuzasidan belgilangan tartibda shikoyat qilish huquqiga ega.

21. “Oʻzdavtemiryoʻlnazorat” davlat inspeksiyasi guvohnomani berishda “Oʻzbekiston temir yoʻllari” davlat-aksiyadorlik kompaniyasi bilan oʻzaro hamkorlikni tashkil etadi.

22. “Bir oyna” boʻyicha guvohnomani berishda “Oʻzdavtemiryoʻlnazorat” davlat inspeksiyasi bilan “Oʻzbekiston temir yoʻllari” davlat-aksiyadorlik kompaniyasining oʻzaro hamkorligi ayirboshlash vositasida, shu jumladan elektron pochta, guvohnoma berish toʻgʻrisidagi qarorni qabul qilish uchun zarur boʻlgan maʼlumotlarni ayirboshlash orqali amalga oshiriladi.

23. “Oʻzbekiston temir yoʻllari” davlat-aksiyadorlik kompaniyasi “Oʻzdavtemiryoʻlnazorat” davlat inspeksiyasidan hujjatlar olingan kundan boshlab ikki ish kuni mobaynida hujjatlarni koʻrib chiqishi va texnik yechimni kelishishi yoxud “Oʻzdavtemiryoʻlnazorat” davlat inspeksiyasiga asoslangan yozma mulohazalar va takliflarni taqdim etishi shart.

24. Ariza beruvchi — yuridik shaxs qayta tashkil etilgan, uning nomi yoki turgan joyi (pochta manzili) oʻzgargan taqdirda ariza beruvchi yoki uning huquqiy vorisi qayta roʻyxatdan oʻtkazilgandan keyin yetti ish kuni mobaynida koʻrsatib oʻtilgan maʼlumotlarni tasdiqlaydigan tegishli hujjatlarni ilova qilgan holda guvohnomani qayta rasmiylashtirish toʻgʻrisida “Oʻzdavtemiryoʻlnazorat” davlat inspeksiyasiga ariza berishi shart.

Ariza beruvchi tomonidan hujjatlar “Oʻzdavtemiryoʻlnazorat” davlat inspeksiyasiga ushbu Nizomning 8-bandida koʻrsatilgan tartibda taqdim etiladi.

Tadbirkorlik subyektidan ushbu bandda nazarda tutilmagan hujjatlar taqdim etilishini talab qilishga yoʻl qoʻyilmaydi.

25. Guvohnoma qayta rasmiylashtirilgunga qadar guvohnomani qayta rasmiylashtirish toʻgʻrisida ariza bergan ariza beruvchi yoki uning huquqiy vorisi ariza qabul qilingan sana toʻgʻrisida “Oʻzdavtemiryoʻlnazorat” davlat inspeksiyasining belgisi bilan birgalikda guvohnomani qayta rasmiylashtirish toʻgʻrisida berilgan ariza asosida guvohnomada koʻrsatilgan lokomotivlar, yuk va izotermik vagonlarning xizmat qilish muddatini uzaytiradi.

26. Guvohnomani qayta rasmiylashtirishda “Oʻzdavtemiryoʻlnazorat” davlat inspeksiyasi berilgan guvohnomalar reyestriga oʻzgartirishlar kiritadi. Guvohnomani qayta rasmiylashtirish va berish tegishli hujjatlar ilova qilingan holda guvohnomani qayta rasmiylashtirish toʻgʻrisidagi ariza “Oʻzdavtemiryoʻlnazorat” davlat inspeksiyasi tomonidan olingan kundan boshlab besh ish kunidan ortiq boʻlmagan muddatda amalga oshiriladi.

27. Guvohnoma qayta rasmiylashtirilganligi uchun yigʻim undirilmaydi.

28. Guvohnomaning amal qilish muddati tamom boʻlgach u ariza beruvchining arizasiga koʻra uzaytirilishi mumkin. Guvohnomaning amal qilish muddatini uzaytirish toʻgʻrisidagi ariza “Oʻzdavtemiryoʻlnazorat” davlat inspeksiyasiga guvohnomaning amal qilish muddati tamom boʻlgunga qadar berilishi kerak. Guvohnomaning amal qilish muddatini uzaytirish uni berish uchun nazarda tutilgan tartibda amalga oshiriladi.

29. Guvohnoma yoʻqolgan yoki yaroqsiz holga kelgan taqdirda ariza beruvchining arizasiga koʻra unga guvohnomaning dublikati beriladi.

30. “Oʻzdavtemiryoʻlnazorat” davlat inspeksiyasi guvohnomaning dublikatini ariza, shuningdek u yaroqsiz holga kelgan taqdirda guvohnomaning asl nusxasi olingan kundan boshlab besh ish kunidan ortiq boʻlmagan muddatda beradi (yuboradi). Guvohnomaning dublikati berilganligi uchun yigʻim undirilmaydi.

31. Guvohnomaning amal qilishini toʻxtatib turish va toʻxtatish, guvohnomani bekor qilish “Tadbirkorlik faoliyati sohasidagi ruxsat berish tartib-taomillari toʻgʻrisida”gi Oʻzbekiston Respublikasi Qonunining tegishli ravishda 22, 23 va 25-moddalariga muvofiq nazarda tutilgan hollarda va tartibda amalga oshiriladi.

32. Quyidagilar guvohnomaning amal qilishini belgilangan tartibda toʻxtatish uchun asos boʻluvchi ruxsat berish talablari va shartlari bir marta qoʻpol ravishda buzilishiga tegishlidir:

“Oʻzdavtemiryoʻlnazorat” davlat inspeksiyasi tomonidan belgilangan tartibda oʻtkaziladigan ruxsat berish talablari va shartlariga rioya etishni tekshirishdan bosh tortish;

guvohnoma berilgan harakatlanadigan temir yoʻl tarkibining xizmat qilish muddatlarini uzaytirishga texnik yechimlardan ishlab chiqarishda foydalanish natijasida fuqarolarning hayoti va sogʻligʻiga zarar yetkazilishi yoxud bunday zarar yetkazilishining real xavfi yaratilishi.

33. “Oʻzdavtemiryoʻlnazorat” davlat inspeksiyasi berilgan guvohnomalar reyestrini yuritadi va uni oʻzining rasmiy veb-saytiga joylashtiradi.

34. Berilgan guvohnomalar reyestrida quyidagilar koʻrsatilishi kerak:

ariza beruvchining nomi, joylashgan joyi (pochta manzili) va tashkiliy-huquqiy shakli, telefoni;

guvohnoma berilgan sana va uning tartib raqami;

guvohnomaning amal qilish muddati;

guvohnomani qayta rasmiylashtirishning asosi va sanasi;

guvohnoma dublikatini berishning asosi va sanasi.

35. Ixtisoslashtirilgan ekspert tashkilot xizmat qilish muddatini uzaytirishga taqdim etilgan harakatlanadigan temir yoʻl tarkibining oʻtkazilgan texnik tashxisi xolisligi, ishonchliligi, asoslanganligi, toʻliqligi, tayinlangan taʼmirlashning turi va hajmi hamda texnik yechim bilan belgilangan harakatlanadigan temir yoʻl tarkibi xizmat qilishining yangi muddati toʻgʻri tanlanganligi uchun javob beradi.

36. Ushbu Nizom talablari buzilishida aybdor boʻlgan shaxslar qonun hujjatlariga muvofiq javob beradilar.