Oʻzbekiston Respublikasi Prezidentining “Eksport qiluvchi korxonalarni ragʻbatlantirishni kuchaytirish va raqobatbardosh mahsulotlarni eksportga yetkazib berishni kengaytirish borasida qoʻshimcha chora-tadbirlar toʻgʻrisida” 2012-yil 26-martdagi PQ-1731-son qarorini bajarish yuzasidan Vazirlar Mahkamasi qaror qiladi:

1. Oʻzbekiston Respublikasi Hukumatining ilovaga muvofiq ayrim qarorlariga oʻzgartirishlar va qoʻshimcha kiritilsin.

2. Vazirliklar va idoralar bir oy muddatda oʻz idoraviy normativ-huquqiy hujjatlarini ushbu qarorga muvofiqlashtirsinlar.

3. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov zimmasiga yuklansin.

1. Vazirlar Mahkamasining 2000-yil 29-iyundagi 245-son qarori (Oʻzbekiston Respublikasi QT, 2000-y., 6-son, 33-modda) bilan tasdiqlangan Xoʻjalik yurituvchi subyektlar tomonidan xorijiy valyutadagi tushumni majburiy sotish tartibida:

a) 2-bandning “e” kichik bandi quyidagi tahrirda bayon qilinsin:

“e) Oʻzbekiston Respublikasi hududida oʻz ishlab chiqarishi uchun foydalanish nazarda tutilgan tovarlar (ishlar, xizmatlar)ni yetkazib berish yuzasidan kontraktni xorijiy valyutada tuzgan korxonalar boʻyicha xorijiy valyutadagi tushum deganda ushbu kontraktlar boʻyicha tushgan mablagʻlar tushuniladi”;

b) 4-bandning “a” kichik bandi quyidagi tahrirda bayon qilinsin:

“a) korxonalar boʻyicha:

Oʻzbekiston Respublikasi tashqarisida bojxona tartibotlari, yuklarni transportda tashish, sugʻurtalash, ekspeditsiya qilish, vositachilik haqi, xorijiy banklarning va Oʻzbekiston Respublikasi vakolatli banklarining kreditlari uchun foizlar, shu jumladan kafillarning foizlari (muddati oʻtkazib yuborilgan va muddati kechiktirilgan qarzlar boʻyicha foizlar bundan mustasno) boʻyicha kontraktlarga muvofiq xorijiy valyutada toʻlangan xarajatlar miqdoriga;

yangi qurilish, faoliyat koʻrsatib turgan ishlab chiqarishlarni modernizatsiyalash va texnologik jihatdan yangilash yuzasidan valyutadagi kreditlar uchun asosiy qarz toʻliq qaytarib boʻlingungacha boʻlgan davrda, asosiy qarzni qaytarishga joriy toʻlovlar boʻyicha yoʻnaltirilayotgan mablagʻlar summasiga kamayadi”.

2. Vazirlar Mahkamasining 2000-yil 21-noyabrdagi 456-son qarori (Oʻzbekiston Respublikasi QT, 2000-y., 11-son, 72-modda) bilan tasdiqlangan Xom ashyo, materiallar, butlovchi buyumlar va asbob-uskunalar xarid qilish boʻyicha tender savdolari oʻtkazish toʻgʻrisidagi Nizomning 6-bandiga “soʻmlarda” soʻzidan keyin “xalqaro moliya institutlari, donor mamlakatlar, xorijiy davlatlar Hukumatlari, boshqa norezidentlar mablagʻlari hisobiga Oʻzbekiston Respublikasi hududida amalga oshirilayotgan loyihalar boʻyicha xalqaro tenderlarda qatnashayotganlar bilan esa — kontraktda koʻrsatilgan valyutada” soʻzlari qoʻshilsin.