O‘zbekiston Respublikasining “Telekommunikatsiyalar to‘g‘risida”gi Qonuniga muvofiq va Telekommunikatsiyalar tizimi faoliyati hamda uni boshqarish samaradorligini oshirish, sohani zamonaviylashtirish va rivojlantirish uchun xorijiy sarmoyalarni keng jalb etish maqsadida:

1. “Mahalliy telekom” va “Xalqaro telekom” aksiyadorlik kompaniyalari, ular tarkibiga kiruvchi aksiyadorlik jamiyatlari aksiyadorlarining umumiy yig‘ilishlari qarorlari, shuningdek, O‘zbekiston Respublikasi Davlat mulki qo‘mitasi hamda O‘zbekiston pochta va Telekommunikatsiyalar agentligining “Mahalliy telekom” va “Xalqaro telekom” aksiyadorlik kompaniyalari asosida “O‘zbektelekom” aksiyadorlik kompaniyasini tashkil qilish to‘g‘risidagi taklifiga rozilik berilsin.

2. “O‘zbektelekom” aksiyadorlik kompaniyasining asosiy vazifalari etib quyidagilar belgilansin:

mahalliy, shaharlararo va xalqaro elektraloqa, shu jumladan ma’lumotlarni uzatish, shuningdek, televideniye va radio dasturlarini translatsiya qilish xizmatlariga bo‘lgan talabni qondirish, ular turlarini kengaytirish va sifatini oshirish;

aloqa vositalari va tarmoqlarini zamonaviylashtirish hamda texnik qayta jihozlash, shu jumladan xorijiy sarmoyalarni keng jalb etish va qo‘shma korxonalar tashkil qilish, telekommunikatsiya tizimlarini tuzish va faoliyat ko‘rsatishi sohasidagi jahon yutuqlarini joriy etish asosida:

telekommunikatsiyalar sohasida bozor islohotlarini yanada rivojlantirish, respublika axborot tizimlarini jahon telekommunikatsiyalar va axborot tarmog‘iga integratsiyalashuvini ta’minlash;

telekommunikatsiya vositalari faoliyatining axborot xavfsizligini ta’minlash.

3. Belgilab qo‘yilsinki, “O‘zbektelekom” aksiyadorlik kompaniyasi:

yuridik shaxs huquqiga ega bo‘lgan ochiq turdagi aksiyadorlik jamiyati shaklida ta’sis etiladi;

“Mahalliy telekom” va “Xalqaro telekom” aksiyadorlik kompaniyalari tuzgan shartnomalari hamda majburiyatlarning huquqiy vorisi hisoblanadi.

4. O‘zbekiston Respublikasi Prezidentining “Axborot tizimlari sohasini qayta tashkil etish va boshqarishni takomillashtirishga oid chora-tadbirlar to‘g‘risida” 1997-yil 23-iyuldagi PF-1823-sonli farmonining “Mahalliy telekom” va “Xalqaro telekom” aksiyadorlik kompaniyalarini tuzishga oid 3-bandi o‘z kuchini yo‘qotgan deb hisoblansin.

5. O‘zbekiston Respublikasi Vazirlar Mahkamasi bir hafta muddatda mazkur Farmonni amalga oshirish yuzasidan qaror qabul qilsin.