Oʻzbekiston Arxitektorlar uyushmasi faoliyati uchun zarur shart-sharoitlar yaratish va uning moddiy-texnika bazasini mustahkamlash maqsadida Vazirlar Mahkamasi qaror qiladi:

1. Oʻzbekiston Arxitektorlar uyushmasi, Oʻzbekiston Respublikasi Davlat mulki qoʻmitasi, “Davarxitektqurilish” qoʻmitasi va “Konstant Investments” masʼuliyati cheklangan jamiyatning:

“Konstant Investments” masʼuliyati cheklangan jamiyat balansidagi Toshkent shahar, Uchtepa tumani, 24-mavze manzilida joylashgan va mukammal taʼmirlangan binoni tegishli hududi bilan Oʻzbekiston Arxitektorlar uyushmasi balansiga davlat mulki sifatida tasarruf etish huquqisiz oʻtkazish;

Oʻzbekiston Arxitektorlar uyushmasi balansidagi Toshkent shahar, M-l, Mustaqillik shoh koʻchasi, 7-uy manzilida joylashgan bino qismini mazkur bandning ikkinchi xatboshida koʻrsatilgan bino evaziga “Konstant Investments” masʼuliyati cheklangan jamiyat balansiga mulk huquqi bilan topshirish toʻgʻrisidagi takliflari maʼqullansin.

2. Belgilansinki:

Oʻzbekiston Arxitektorlar uyushmasi tomonidan Toshkent shahar, M-l, Mustaqillik shoh koʻchasi, 7-uy manzilida joylashgan bino qismining va “Konstant Investments” masʼuliyati cheklangan jamiyat tomonidan Toshkent shahar, Uchtepa tumani, 24-mavzedagi binoning tegishli hududi bilan bozor bahosi qonunchilikda belgilangan tartibda aniqlanadi;

“Konstant Investments” masʼuliyati cheklangan jamiyat mulkining bahosi unga berilayotgan bino qismi bahosidan yuqori boʻlgan taqdirda ular oʻrtasidagi tafovut ushbu jamiyatning taklifiga koʻra qoplanmaydi.

3. Oʻzbekiston Respublikasi Davlat mulki qoʻmitasi, Oʻzbekiston Arxitektorlar uyushmasi va “Konstant Investments” masʼuliyati cheklangan jamiyat uch tomonlama shartnomaga asosan mazkur qarorning 1-bandida koʻrsatilgan binolarni tegishli hududi bilan birga topshirish va qabul qilish hamda binolar boʻyicha huquqlarni davlat roʻyxatidan oʻtkazish ishlarining belgilangan tartibda amalga oshirilishini taʼminlasinlar.

4. Oʻzbekiston Respublikasi Vazirlar Mahkamasining “Oʻzbekiston Arxitektorlar uyushmasining faoliyatini qoʻllab-quvvatlash chora-tadbirlari toʻgʻrisida”gi 1998-yil 16-iyundagi 254-son qarori 3-bandining toʻrtinchi xatboshi oʻz kuchini yoʻqotgan deb hisoblansin.

5. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari B.A. Xoʻjayev zimmasiga yuklansin.