O‘zbekiston Respublikasi Prezidenti I.A.Karimovning taklifiga binoan Chexiya Respublikasining Bosh vaziri M.Zeman Chexiya Respublikasi sanoat va bank sohasi tadbirkorlari delegatsiyasi hamrohligida 1999-yil 20-apreldan 21-aprelgacha O‘zbekiston Respublikasida rasmiy tashrif bilan bo‘ldi.
O‘zbekiston Respublikasi Prezidenti va Chexiya Respublikasi Bosh vaziri o‘rtasidagi muzokaralar O‘zbekiston Respublikasi va Chexiya Respublikasi tyenglik va o‘zaro foyda prinsiplari asosida ikkala mamlakat o‘rtasidagi o‘zaro foydali munosabatlarni mustahkamlash hamda iqtisodiy hamkorlikni chuqurlashtirish niyatida yakdil ekanliklarini ko‘rsatdi.
Muzokaralarning yakunlari bo‘yicha O‘zbekiston Respublikasi Prezidenti I.A.Karimov va Chexiya Respublikasining Bosh vaziri M.Zeman quyidagilar to‘g‘risida bayon qiladilar:
1. Tomonlar sheriklik va o‘zaro ishonchga asoslangan ikki tomonlama siyosiy, iqtisodiy, ijtimoiy, ilmiy-texnikaviy va madaniy munosabatlarni rivojlantirishga ko‘maklashadilar, shuningdek ularning suvereniteti, mustaqilligi, hududiy yaxlitligi va chegaralarining buzilmasligini yanada mustahkamlashda, iqtisodiy islohotlarni, demokratik o‘zgarishlarni amalga oshirishda bir-birlarining sa’y-harakatlarini qo‘llab-quvvatlaydilar hamda bu yo‘nalishlarda hamkorlikni rivojlantirishga tayyor ekanliklarini ifodalaydilar.
Tomonlar xalqaro tashkilot va forumlar doirasidagi hamkorlikning yuqorida ko‘rsatilgan maqsadlarga erishishdagi ahamiyatini ta’kidlaydilar.
2. Tomonlardan har biri umumiy manfaatlarda iqtisodiy hamkorlikni rivojlantirishga alohida ahamiyat beradi. Shu maqsadda Tomonlar tegishli korxona va tashkilotlar o‘rtasidagi hamkorlikning barcha shakllariga ko‘maklashadilar hamda bir Tomon xo‘jalik yurituvchi subyektlarining boshqa Tomon davlati hududidagi faoliyatini mustahkamlashga va rivojlantirishga qaratilgan eng qulay iqtisodiy sharoitlarni yaratish uchun o‘z milliy qonunlariga muvofiq bor kuchlari bilan harakat qiladilar.
3. Tomonlar O‘zbekiston Respublikasi va Chexiya Respublikasi o‘rtasidagi iqtisodiy hamkorlikni yanada rivojlantirishga qaratilgan investitsiyalar, eng ilg‘or hamkorlik shakllariga o‘tishga ko‘maklashish uchun xususiy va boshqa sarmoyalar oqimini ta’minlash maqsadida eng qisqa muddatlarda ikki tomonlama soliq solishning oldini olish to‘g‘risida bitim tuzishga imkoniyat yaratadilar.
4. Tomonlar ikki tomonlama iqtisodiy hamkorlikning ustuvor, chunonchi quyidagi sohalariga alohida e’tibor berish lozim deb hisoblaydilar:
5. Tomonlar muayyan loyihalarni amalga oshirish maqsadida ikkala mamlakatning tegishli davlat organlari va xo‘jalik yurituvchi subyektlari o‘rtasidagi hamkorlikni har tomonlama rag‘batlantiradilar.
6. Tomonlar o‘zaro hamkorlikni uzoq muddatli muvaffaqiyatli rivojlantirish manfaatlarida Savdo-iqtisodiy va ilmiy-texnikaviy hamkorlik bo‘yicha aralash komissiya tuzish to‘g‘risida kelishib oldilar.
7. Tomonlar erishilgan kelishuvlarni amalda bajarishning samaradorligini oshirish, shuningdek ikki tomonlama munosabatlarning shartnoma-huquq negizini yanada rivojlantirish zaruratini tan oladilar.
8. Tomonlar tranzit va transport kommunikatsiyalari sohasidagi hamkorlikni chuqurlashtirish niyatidalar. O‘zbekiston Respublikasi va Chexiya Respublikasi bir-birlarining fuqaro aviatsiyasi, temir yo‘l va avtomobil transportining transport operatsiyalarini ta’minlaydilar hamda bu masalalar bo‘yicha alohida bitimlar tuzadilar.
9. Tomonlar siyosiy ekstremizm aktlarini qoralaydilar. 1998-yil 17-iyundagi O‘zbekiston Respublikasi Hukumati va Chexiya Respublikasi Hukumati o‘rtasida jinoyatchilikka qarshi kurashda hamkorlik qilish to‘g‘risida bitimga muvofiq Tomonlar jinoyatchilikka, ayniqsa uyushgan jinoyatchilik, terrorizm, narkotik vositalar va psixotrop moddalarning noqonuniy savdosi, havo transporti xavfsizligiga qarshi aktlar, odamlarni garovga olish, yuklar, radioaktiv moddalar, qurol, san’at asarlari, madaniy va tarixiy boyliklarni noqonuniy olib kirish va olib chiqishga, shuningdek noqonuniy migratsiya va shaxslarning noqonuniy bo‘lishiga qarshi kurashda hamkorlik qiladilar.
10. O‘zaro foydali manfaatni hisobga olib, Tomonlar mudofaa va mudofaa sanoati sohasida hamkorlik qiladilar.
11. Tomonlar xalqlar yaqinlashuvining muhim vositasi sifatidagi madaniy aloqalarni rivojlantirishga katta ahamiyat berib, fan, madaniyat, ta’lim, sog‘liqni saqlash, turizm, sport sohalaridagi ikki tomonlama aloqalarni hamda erkin axborot almashishni rag‘batlantiradilar.
12. Tomonlar ular xalqlarining ravnaqi yo‘lida o‘zaro qiziqish uyg‘otuvchi boshqa soha va yo‘nalishlarda, demokratik o‘zgarishlar va iqtisodiy islohotlar sohasida birgalikdagi harakat va hamkorlikni chuqurlashtiradilar.