Koreya Respublikasi bilan mehnat migratsiyasi sohasida oʻzaro manfaatli hamkorlikni yanada rivojlantirish maqsadida:

1. 2012-yil 13-dekabrda Oʻzbekiston Respublikasi Mehnat va aholini ijtimoiy muhofaza qilish vazirligi hamda Koreya Respublikasi Bandlik va mehnat vazirligi oʻrtasida bandlikka ruxsat berish tizimi boʻyicha ishchilarni Koreya Respublikasiga yuborish toʻgʻrisida Anglashuv memorandumi imzolanganligi maʼlumot uchun qabul qilinsin.

2. Memorandumga muvofiq Oʻzbekiston Respublikasi fuqarolarini Koreya Respublikasiga yuborish boʻyicha vakolatli organ etib Oʻzbekiston Respublikasi Mehnat va aholini ijtimoiy muhofaza qilish vazirligi huzuridagi Tashqi mehnat migratsiyasi masalalari agentligi belgilansin.

Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, Ichki ishlar vazirligi, shuningdek manfaatdor vazirlik va idoralar Oʻzbekiston Respublikasi Mehnat va aholini ijtimoiy muhofaza qilish vazirligi huzuridagi Tashqi mehnat migratsiyasi masalalari agentligiga Memorandumga muvofiq bandlikka ruxsat berish tizimi boʻyicha test sinovlarini oʻtkazish va koʻnikmalarni baholashda koʻmaklashsinlar.

3. Belgilab qoʻyilsinki, bandlikka ruxsat berish tizimi boʻyicha Memorandumga muvofiq oʻtkaziladigan test sinovlarida qatnashganlik va koʻnikmalarni baholaganlik uchun toʻlanadigan Oʻzbekiston Respublikasi fuqarolarining mablagʻlari Koreya Inson resurslarini rivojlantirish xizmatining daromadi hisoblanadi va Oʻzbekiston Respublikasi hududida soliqqa tortilmaydi.

4. Memorandumni amalga oshirish doirasida test oʻtkazish va mehnat migrantlarining koʻnikmalarini baholash uchun olib kirilayotgan test materiallari Oʻzbekiston Respublikasi Vazirlar Mahkamasi tomonidan tasdiqlanadigan roʻyxat boʻyicha bojxona toʻlovlari (bojxona rasmiylashtiruvi yigʻimlaridan tashqari) toʻlashdan ozod qilinsin.

5. Oʻzbekiston Respublikasi Tashqi ishlar vazirligi Mehnat va aholini ijtimoiy muhofaza qilish vazirligi huzuridagi Tashqi mehnat migratsiyasi masalalari agentligining buyurtmanomalariga binoan, Koreya Respublikasi Bandlik va mehnat vazirligi hamda Koreya Inson resurslarini rivojlantirish xizmatining Memorandumni amalga oshirishda qatnashuvchi xodimlari uchun konsullik va boshqa yigʻimlarni undirmagan holda kirish vizalarini rasmiylashtirishni belgilangan tartibda taʼminlasin.

6. Oʻzbekiston Respublikasi Ichki ishlar vazirligi Mehnat va aholini ijtimoiy muhofaza qilish vazirligi huzuridagi Tashqi mehnat migratsiyasi masalalari agentligining buyurtmanomalariga binoan, Koreya Respublikasi Bandlik va mehnat vazirligi hamda Koreya Inson resurslarini rivojlantirish xizmatining Memorandumni amalga oshirishda qatnashuvchi xodimlari uchun davlat boji undirilmasdan koʻp martalik vizalar berilishini va muddati uzaytirilishini, shuningdek ular Oʻzbekiston Respublikasida vaqtincha turgan joyi boʻyicha roʻyxatga olinishi va uning muddati uzaytirilishini taʼminlasin.

7. Mazkur qarorning bajarilishini nazorat qilish Oʻzbekiston Respublikasi Bosh vaziri Sh. M. Mirziyoyev zimmasiga yuklansin.