Oʻzbekiston Respublikasining 2002-yil 5-apreldagi “Chiqindilar toʻgʻrisida”gi 362-II-sonli va Oʻzbekiston Respublikasining 2013-yil 22-apreldagi “Fuqarolarning oʻzini oʻzi boshqarish organlari toʻgʻrisida”gi 915-II-sonli qonunlari hamda Oʻzbekiston Respublikasi Prezidentining 1998-yil 2-martdagi “Sanitariya qonunlarini buzganligi uchun javobgarlikni kuchaytirish toʻgʻrisida”gi PF-1933-sonli Farmoni, Oʻzbekiston Respublikasi Vazirlar Mahkamasining 2010-yil 28-oktabrdagi “Tovarlar (ishlar, xizmatlar)ga tartibga solinadigan narxlar (tariflar)ni deklaratsiya qilish (tasdiqlash) va belgilash tartibini yanada takomillashtirish chora-tadbirlari toʻgʻrisida”gi 239-son qarori, Oʻzbekiston Respublikasi Bosh vaziri tomonidan 2012-yil 14-sentabrda tasdiqlagan Vazirlar Mahkamasining 194-sonli yigʻilish bayoni ijrosini taʼminlash hamda Chiqindilarni fuqarolar xayoti va sogʻligʻiga, atrof-muhitga zararli taʼsirini oldini olish, chiqindilar hosil boʻlishini kamaytirish, shahar hududini ekologik hamda sanitariya holatini, tozaligini amalga oshirish maqsadida qaror qilaman:

1. Shahar hududidagi barcha mahalla fuqarolar yigʻinlarida fuqarolar tomonidan chiqarilayotgan maishiy chiqindilarni, koʻp qavatli uylar oldiga qurilgan chiqindi yigʻish joylaridan va mahallalardan “Signal” tartibida tashib chiqib ketish tashkil etilsin.

2. Mulkchilik shaklidan qatʼi nazar, barcha korxona, tashkilot, oʻquv yurtlari, maktab va maktabgacha taʼlim muassasalari, birlashmalar hamda mahalla fuqarolar yigʻinlari raislariga:

oʻzlariga biriktirilgan hududlarni ekologik sharoiti hamda sanitariya holatini yaxshilash, chiqindilarni oʻz vaqtida olib chiqib ketish uchun oʻrnatilgan tartib asosida haq toʻlashni taʼminlash yuzasidan shahar “Quvasoy Kommunal” xizmat koʻrsatish korxonasi bilan shartnoma tuzish, kelgusida toʻlovlarni oʻz vaqtida toʻlab borishlikni taʼminlash vazifalari yuklatilsin.

3. “Quvasoy Kommunal” xizmat koʻrsatish korxonasi (D. Olimov)ga:

shahar Markaziy chiqindixonasini va shahar hududida joylashgan maishiy chiqindilar toʻplash xandaqlarini zamonaviy talablar asosida taʼmirlash;

ularni barcha sanitariya-gigiyena va boshqa meʼyoriy hujjatlar talablari asosida saqlash va foydalanishni yoʻlga qoʻyish;

shahar aholisi, korxona va tashkilotlar bilan chiqindilarni olib ketish yuzasidan xoʻjalik shartnomalarini tuzish hamda shartnoma asosida maishiy chiqindilarni shahar hududidan oʻz vaqtida olib chiqib ketish va ularni belgilangan tartibda joylashtirish;

chiqindilarni olib ketish uchun xizmat haqlari miqdorini qonunda belgilangan tartibda ishlab chiqib, mahalliy davlat hokimiyati organlari tomonidan narxlarni tartibga soluvchi organ bilan kelishish;

chiqindilarni tegishli tartibda saralash va qayta ishlashni tashkil qilish hamda aholi, korxona va tashkilotlarga sifatli xizmat koʻrsatishni taʼminlash;

koʻrsatilayotgan xizmat sifatini va samaradorligini oshirib borish maqsadida, ish faoliyati davomida paydo boʻladigan boʻsh aylanma mablagʻlar hisobidan korxonani moddiy texnik bazasini rivojlantirib borish, qoʻshimcha va yangi texnika, transport, asbob-uskunalar va jihozlar xarid qilib borish;

oʻz faoliyati davomida “Zararsiz chiqindilarning vujudga kelishi meʼyorlari”, sanitariya-gigena qoidalari va boshqa meʼyoriy hujjatlarga qatʼiy amal qilgan holda ish olib borilishini taʼminlash vazifalari yuklatilsin.

4. “Arsif” qishlogʻi hududidagi qishloq xoʻjaligida foydalanilmaydigan adirliklarning 301-konturidan 6.0 ga yer maydoni shahar markaziy chiqindixonasini, yangi tashkil etilgan “Quvasoy Kommunal” xizmat koʻrsatish korxonasiga vaqtinchalik foydalanish uchun biriktirib berilsin.

5. “Hamkorbank” OATB Quvasoy filiali boshqaruvchisi (F. Maxsudov)ga:

Quvasoy shahar “Quvasoy Kommunal” xizmat koʻrsatish korxonasiga lizing asosida bosqichma-bosqich texnikalarni olib berish tavsiya etilsin.

6. Shahar Moliya boʻlimi (A. Abidov) va shahar Obodonlashtirish boshqarmasi boshligʻi (A. Abdullayev)larga:

“Quvasoy Kommunal” xizmat koʻrsatish korxonasi bilan chiqindi olib chiqish yuzasidan shartnoma tuzgan shahar aholisi hamda korxona va tashkilotlar bilan oʻzaro hisob-kitoblarni oʻz nihoyasiga yetkazib, debitor va kreditorlik qarzdorliklarini “Quvasoy Kommunal” xizmat koʻrsatish korxonasiga belgilangan tartibda qonuniy rasmiylashtirish vazifasi yuklatilsin.

7. Shahar “Mahalla” jamoat fondi va mahalla fuqarolar yigʻinlari raislariga:

mahalla fuqarolar yigʻinlari hududlarida maishiy chiqindilarni samarali va oʻz vaqtida olib chiqib ketishni tashkil etish hamda hudud doirasida obodonlashtirishga, koʻkalamzorlashtirishga va sanitariya holatini yaxshilashga qaratilgan tadbirlar rejalarini tasdiqlash;

shahardagi barcha mahalla fuqarolar yigʻinidan, shahar “Quvasoy Kommunal” xizmat koʻrsatish korxonasiga, korxona va tashkilotlaridan chiqadigan maishiy chiqindilarni olib chiqib ketishni oʻz vaqtida tashkil etish va xizmatlar uchun toʻlov hamda qarzdorliklarni oʻz vaqtida undirilishida ixtiyoriylik asosida amaliy yordam berish;

mahalla faollaridan jamoatchi nazoratchi guruhlar tashkil etilib, ular yordamida mahallaning doimo toza va ozoda saqlanishini, belgilanmagan joylariga axlat tashlashni va markaziy shoh koʻchalariga axlat chiqindilarini toʻkish holatlarini nazoratga olish;

8. Uy-joy mulkdorlar shirkatlari raislariga:

shirkatlar hududida mavjud axlat maydonlariga chiqindi tashlash vaqti va shartlarini koʻrsatuvchi koʻrsatkichlar oʻrnatish;

axlat tashlash maydonlarini yoritish uchun chiroqlar oʻrnatish;

axlat tashlash va tashib ketish uchun yoʻlaklar tashkil etish;

sugʻorish tarmoqlari, yoʻlaklar, gulzorlar, tozalanadigan hudud sanitariya holatlarini barqarorlashtirishda “Quvasoy Kommunal” xizmat koʻrsatish korxonasiga amaliy yordam koʻrsatsin.

9. Shahar Ichki ishlar boʻlimi (A. Nasrdinov)ga:

shahar hududida fuqarolar tomonidan maishiy chiqindilarga oid sanitariya tartibini buzganligi uchun Oʻzbekiston Respublikasi Maʼmuriy javobgarlik toʻgʻrisidagi kodeksining 161-moddasida belgilangan taʼsirchan choralar koʻrish amaliyotini kuchaytirish vazifasi topshirilsin.

10. Fargʻona viloyat Oʻsimlik va xayvonot dunyosini muhofaza qilish qoʻmitasi Quvasoy shahar inspektori (R. Isroilov), shahar Davlat sanitariya epidemiologiya nazorat Markazi bosh vrachi (R. Axmedov)larga:

shaharda maishiy chiqindilarni chiqarib tashlashga oid sanitariya-ekologiya meʼyor va qoidalariga rioya etilishi yuzasidan faoliyatini muvofiqlashtirib borsinlar.

11. Shahar hokimligi “Isfayram” roʻznomasi (Q. Axmadaliyev)ga:

shaharda sanitariya barqarorligini taʼminlash, obodonlashtirishga va maishiy chiqindilarga oid masalalarni roʻznoma sahifalarida chop etilishi yoʻlga qoʻyilsin.

12. Ushbu qaror ijrosini nazorat qilishni oʻz zimmamda qoldiraman.