Bundan keyin Tomonlar deb atalayotgan Oʻzbekiston Respublikasi Hukumati va Gruziya Hukumati,

taʼlim sohasida anʼanaviy yaqin va samarali aloqalarni hisobga olib,

Tomonlar taʼlim tizimlarining teng huquqlik, mustaqillik va yaxlitlik prinsiplaridagi oʻzaro manfaatli hamkorligini yanada mustahkamlash va rivojlantirishga har ikki tomon intilishini izhor etib,

oʻzlarining taʼlim siyosatidagi oʻzaro munosabatlarda umuminsoniy qadriyatlarning, Inson huquqlarining umumiy bayonnomasining, Bola huquqlari toʻgʻrisidagi konvensiyaning soʻzsiz ustuvorligini tan olib va ularning amalda bajarilishiga intilib,

taʼlim sohasida ilmiylik va insonparvarlikni taʼminlashga, ikkala davlatda yashayotgan xalqlarning madaniy-taʼlim talablarini qondirishga muhim ahamiyat berib,

oʻz mamlakatlari xalqlari oʻrtasidagi doʻstlik va hamkorlik munosabatlarini bundan keyin ham oʻzaro teng huquqlilik va hurmat asosida rivojlantirish va mustahkamlashni xohlab,

quyidagilar toʻgʻrisida kelishib oldilar:

Tomonlar, taʼlim siyosatida soʻzsiz mustaqillik boʻlishini eʼtirof etib, taraqqiyot masalalarida hamkorlik qiladilar, pedagogika fani va taʼlim sohasida tajriba va axborot almashadilar, mintaqaviy boshqaruv organlari, taʼlim muassasalari va tashkilotlarni yoʻlga qoʻyishga har xil yoʻllar bilan koʻmaklashadilar.

Tomonlar tegishli ilmiy-tadqiqot institutlari va oliy oʻquv yurtlari oʻrtasida bevosita shartnomalar tuzish prinsipiga amal qiladilar, bunda hamkorlikning aniq yoʻnalishlari va mavzulari, institutlar va oʻquv yurtlari oʻrtasidagi kvotalar va moliyaviy shartlar toʻgʻrisida kelishib olinadi.

Tomonlar talabalar bilan oʻzaro almashishga koʻmaklashadilar, buning uchun birgalikda alohida bitimlar tuzish orqali qabul qilish, oʻqitish, kvota va moliyaviy shartlar tartiblarini ishlab chiqadilar. Bu tartiblar har yili tegishli vazirliklar oʻrtasida aniqlanib turadi.

Tomonlar birgalikda mehnat va dam olishni tashkil etish, festivallar, spartakiadalar, ijodiy tanlovlar, mavzuli olimpiadalar, boshqa tadbirlar oʻtkazish yoʻli bilan oʻquvchi va pedagoglarning turizm-ekskursiyalar borasidagi aloqalarini kengaytirishga koʻmaklashadilar.

Tomonlar umumiy, hunar-texnik, oʻrta maxsus va oliy maʼlumot toʻgʻrisidagi hujjatlarni, va shuningdek fan nomzodlari va fan doktorlari diplomlarini oʻzaro tan olish va teng qiymatliligini belgilash bilan bogʻliq boʻlgan masalalarni koʻrib chiqadilar.

Tomonlar boshqa Tomon davlatining davlat tilini, adabiyotini va tarixini oʻrganishni xohlovchilarga mumkin boʻlgan yordamni koʻrsatadilar.

Darsliklarda va boshqa pedagogik adabiyotda tegishlicha aks ettirish maqsadida Tomonlar oʻz mamlakatlarining tarix, geografiyasi, siyosiy taraqqiyoti boʻyicha axborot bilan almashib turadilar.

Ushbu Bitim qoidalarining amalda bajarilishiga oid moliyaviy masalalar Tomonlarning yoki ularning tegishli vazirliklari va idoralarining oʻzaro kelishuviga muvofiq hal qilinadi.

Oʻzaro muvofiqlashtirish va birga harakat qilishni taʼminlash, axborot va tajriba bilan almashish va shuningdek qoʻshma seminarlar va boshqa tadbirlarni tashkil qilish uchun Tomonlar shu bilan bogʻliq boʻlgan aniq masalalarni uygʻunlashtirish uchun ekspertlar va delegatsiyalar bilan almashib turadilar.

Ushbu Bitim yoki uning ayrim moddalari bajarilishining borishini oʻrganish va shuningdek hamkorlikni yanada kengaytirish boʻyicha takliflar tayyorlash, unga qoʻshimcha va oʻzgartishlar kiritish uchun Tomonlar zarurat tugʻilganda va oʻzaro kelishgan holda qoʻshma komissiya tuzishlari yoki aloqalarning boshqa shakllaridan foydalanishlari mumkin.

Bitim imzolangan vaqtdan kuchga kiradi va 5 yillik muddatga tuziladi. Agar Tomonlardan bittasi ushbu Bitim amalini toʻxtatish xohishi borligi toʻgʻrisida tegishli muddat tamom boʻlishidan kamida 6 oy ilgari boshqa Tomonni yozma ravishda xabardor qilmasa, uning amal qilishi keyingi besh yillik davrlarga choʻziladi.

Toshkent shahrida 1997-yil 23-mayda ikki nusxada, har biri oʻzbek, gruzin va rus tillarida tuzildi, bunda barcha matnlar bir xil kuchga ega. Ushbu Bitimning qoidalarini talqin qilish maqsadida rus tilidagi matn qoʻllaniladi.