Oʻzbekiston Respublikasi Prezidentining “Chet tillarni oʻrganish tizimini yanada takomillashtirish chora-tadbirlari toʻgʻrisida” 2012-yil 10-dekabrdagi PQ-1875-son qarorini bajarish yuzasidan, shuningdek chet tillarni oʻrganish imkonini yanada kengaytirishni taʼminlash, nodavlat taʼlim muassasalarining chet tillarni oʻqitish sohasidagi faoliyatini litsenziyalash tartibini soddalashtirish maqsadida Vazirlar Mahkamasi qaror qiladi:

1. Belgilab qoʻyilsinki, 2013-yil 1-avgustdan boshlab nodavlat taʼlim muassasalarining chet tillarni oʻrganish boʻyicha oʻquv kurslarini tashkil etish sohasidagi faoliyatini litsenziyalash Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari tomonidan amalga oshiriladi.

2. Quyidagilar:

Nodavlat taʼlim muassasalarining chet tillarni oʻrganish boʻyicha oʻquv kurslarini tashkil etish sohasidagi faoliyatini litsenziyalash tartibi toʻgʻrisidagi Nizom 1-ilovaga muvofiq;

Nodavlat taʼlim muassasalarining chet tillarni oʻrganish boʻyicha oʻquv kurslarini tashkil etish sohasidagi faoliyatini litsenziyalash boʻyicha hududiy komissiya toʻgʻrisidagi Nizom 2-ilovaga muvofiq;

Nodavlat taʼlim muassasalarining chet tillarni oʻrganish boʻyicha oʻquv kurslarini tashkil etish sohasidagi faoliyatini litsenziyalash boʻyicha hududiy komissiyaning Namunaviy tarkibi 3-ilovaga muvofiq tasdiqlansin.

3. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari oʻn kun muddatda nodavlat taʼlim muassasalarining chet tillarni oʻrganish boʻyicha oʻquv kurslarini tashkil etish sohasidagi faoliyatini litsenziyalash boʻyicha hududiy komissiyalarning (keyingi oʻrinlarda hududiy komissiyalar deb ataladi) tarkibini tasdiqlasinlar.

4. Vazirlar Mahkamasining nodavlat taʼlim muassasalari faoliyatini litsenziyalash komissiyasi:

bir oy muddatda Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan birgalikda hududiy komissiyalar faoliyatini tashkil etish boʻyicha zarur tadbirlarni amalga oshirsin;

hududiy komissiyalar faoliyati muvofiqlashtirilishini va doimiy monitoring olib borilishini taʼminlasin;

ushbu qarorning bajarilishi toʻgʻrisida 2014-yil yanvar va iyul oylarida Oʻzbekiston Respublikasi Vazirlar Mahkamasiga axborot bersin.

5. Oʻzbekiston Respublikasi Hukumatining 4-ilovaga muvofiq ayrim qarorlariga oʻzgartirish va qoʻshimchalar kiritilsin.

6. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari A.I. Ikramov zimmasiga yuklansin.

1. Mazkur Nizom nodavlat taʼlim muassasalarining chet tillarni oʻrganish boʻyicha oʻquv kurslarini tashkil etish sohasidagi faoliyatini litsenziyalash tartibini belgilaydi.

2. Litsenziyalarni berish, litsenziyaning amal qilishini toʻxtatib turish yoki toʻxtatish, shuningdek uni bekor qilish va qayta rasmiylashtirish toʻgʻrisidagi qarorlar Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari huzuridagi hududiy komissiyalar (keyingi oʻrinlarda hududiy komissiya deb ataladi) tomonidan qabul qilinadi.

Hududiy komissiya faoliyati Oʻzbekiston Respublikasi Vazirlar Mahkamasi tomonidan tasdiqlanadigan Nodavlat taʼlim muassasalarining chet tillarni oʻrganish boʻyicha oʻquv kurslarini tashkil etish sohasidagi faoliyatini litsenziyalash boʻyicha hududiy komissiya toʻgʻrisidagi Nizomga muvofiq tashkil etiladi.

Oʻrta maxsus, kasb-hunar taʼlimi hududiy boshqarmasi hududiy komissiyaning ishchi organi funksiyasini (keyingi oʻrinlarda ishchi organ deb ataladi) bajaradi.

3. Litsenziya talabgori chet tillarni oʻrganish boʻyicha oʻquv kurslarini tashkil etish sohasidagi faoliyati bilan bir vaqtda taʼlim turi boʻyicha boshqa faoliyatni amalga oshirgan taqdirda bevosita Vazirlar Mahkamasining nodavlat taʼlim muassasalari faoliyatini litsenziyalash komissiyasiga litsenziya berish toʻgʻrisida ariza bilan murojaat qilish huquqiga ega.

4. Nodavlat taʼlim muassasalarining chet tillarni oʻrganish boʻyicha oʻquv kurslarini tashkil etish sohasidagi faoliyatini amalga oshirish huquqiga namunaviy (oddiy) litsenziyalar beriladi.

5. Litsenziya nodavlat taʼlim muassasalariga chet tillarni oʻrganish boʻyicha oʻquv kurslarini tashkil etish sohasida taʼlimning har bir turi uchun alohida beriladi.

6. Nodavlat taʼlim muassasalarining chet tillarni oʻrganish boʻyicha oʻquv kurslarini tashkil etish sohasidagi faoliyatini amalga oshirish huquqiga litsenziya 5 yil muddatga beriladi, litsenziyaning muddati tugagandan keyin belgilangan tartibda uzaytirilishi mumkin.

7. Quyidagilar nodavlat taʼlim muassasalarining chet tillarni oʻrganish boʻyicha oʻquv kurslarini tashkil etish sohasidagi faoliyatini amalga oshirishda litsenziya talablari va shartlari hisoblanadi:

Oʻzbekiston Respublikasining taʼlim sohasidagi qonun hujjatlariga majburiy rioya qilish;

taʼlim dasturlarini chet tillarga oʻqitish boʻyicha davlat talablariga muvofiq amalga oshirish;

taʼlimning majburiy ravishda dunyoviy xarakterda boʻlishi, taʼlim jarayonida urushni, zoʻravonlikni targʻib qilishdan foydalanishga, fuqarolarning konstitutsiyaviy huquqlari va erkinligi kamsitilishiga, mamlakatdagi xavfsizlikka va ijtimoiy-siyosiy barqarorlikka, jamiyatning huquqiy va maʼnaviy asoslariga, fuqarolar osoyishtaligiga, millatlararo va dinlararo totuvlikka raxna solinishiga, Oʻzbekiston toʻgʻrisida notoʻgʻri axborotlar tarqatilishiga hamda uning tarixiy, madaniy va maʼnaviy qadriyatlari buzib koʻrsatilishiga yoʻl qoʻymaslik;

litsenziya talabgorida litsenziyalanayotgan faoliyatni bajarish uchun moʻljallangan, unga mulkiy yoki boshqa ashyoviy huquq bilan tegishli boʻlgan, belgilangan talablarga muvofiq binolar (xonalar)ning mavjudligi;

chet tilini tegishli bazaviy maʼlumotga ega boʻlgan, malakasi taʼlim dasturlarining belgilangan darajasini taʼminlaydigan, shuningdek ularda Vazirlar Mahkamasi huzuridagi Davlat test markazi tomonidan beriladigan chet tilini bilish va egallab olganlik darajasi toʻgʻrisidagi davlat namunasidagi malaka sertifikati mavjud boʻlgan shaxslar tomonidan oʻqitish;

oʻquv va tarbiya jarayonini davlat talablariga, oʻquv rejalariga va taʼlim dasturlariga muvofiq tashkil etish;

litsenziya talabgorida taʼlim dasturlarining belgilangan darajasini amalga oshirish uchun zarur boʻlgan oʻquv, oʻquv-metodik adabiyotlar va boshqa kutubxona-axborot resurslari hamda taʼlim jarayonlarini taʼminlash vositalari mavjudligi;

auditoriyalarni, oʻquv xonalarini zamonaviy axborot-kommunikatsiya asbob-uskunalari, oʻqitishning texnik vositalari va anjomlar bilan jihozlash.

8. Litsenziya bitimida ushbu Nizomning 7-bandida qayd etilganlardan kelib chiqadigan litsenziya talablari va shartlari koʻrsatiladi.

9. Litsenziya olish uchun litsenziya talabgori ishchi organga quyidagi hujjatlarni taqdim etadi:

litsenziya berish toʻgʻrisidagi ariza, unda quyidagilar koʻrsatiladi: yuridik shaxsning nomi va tashkiliy-huquqiy shakli, uning joylashgan joyi (pochta manzili), taʼlim faoliyatini amalga oshirish joyi manzili, bank muassasasining nomi va bankdagi hisob raqami, faoliyatning litsenziyalanayotgan turi, shuningdek chet tillarni oʻqitish boʻyicha kurslar roʻyxati;

yuridik shaxsning davlat roʻyxatidan oʻtkazilganligi toʻgʻrisidagi guvohnomaning nusxasi;

faoliyatning litsenziyalanayotgan turi amalga oshiriladigan binolarga (xonalarga) mulkiy yoki boshqa ashyoviy huquqlarning mavjudligini, shuningdek mazkur binolar (xonalar)ning belgilangan talablarga muvofiqligini tasdiqlovchi hujjatlar;

yongʻin va sanitariya-epidemiologiya nazorati organlarining mavjud binolar va xonalarning yongʻin xavfsizligi talablariga va sanitariya-gigiyena normalariga muvofiqligi toʻgʻrisidagi xulosalari;

nodavlat taʼlim muassasasi ustavining nusxasi;

oʻquv rejalari va dasturlari;

chet tillarga oʻqitgan hollarda pedagogik kadrlar toʻgʻrisida maʼlumot (maʼlumoti toʻgʻrisidagi hujjatlarning nusxasi va Oʻzbekiston Respublikasi Vazirlar Mahkamasi huzuridagi Davlat test markazi tomonidan beriladigan bilimlar darajasi va chet tilini bilish va egallab olganlik darajasi toʻgʻrisidagi davlat namunasidagi malaka sertifikatining nusxalari);

oʻquv jarayonini taʼminlash uchun zarur boʻlgan moddiy vositalarning (yoki ularni moliyalashtirishning aniq manbai) mavjudligini tasdiqlovchi hujjatlar;

ariza koʻrib chiqilganligi uchun litsenziya talabgori tomonidan yigʻim toʻlanganligini tasdiqlovchi hujjat.

10. Hujjatlar litsenziya talabgori tomonidan ishchi organga bevosita yoxud ularning olinganligi toʻgʻrisidagi bildirishnoma bilan pochta aloqasi vositasi orqali yetkazib beriladi.

Hujjatlar ishchi organning masʼul shaxsi tomonidan roʻyxat boʻyicha qabul qilinadi, roʻyxatning nusxasi hujjatlar qabul qilib olingan sana toʻgʻrisida belgi qoʻyilgan holda ariza beruvchiga yuboriladi (topshiriladi).

11. Ishonchsiz yoki notoʻgʻri maʼlumotlar taqdim etilganligi uchun litsenziya talabgori qonun hujjatlariga muvofiq javob beradi.

12. Litsenziya talabgorining arizasi koʻrib chiqilganligi uchun Oʻzbekiston Respublikasi qonun hujjatlarida belgilangan eng kam oylik ish haqining ikki baravari miqdorida yigʻim undiriladi.

Litsenziatning litsenziya berish toʻgʻrisidagi arizasi koʻrib chiqilganligi uchun yigʻim summasi ishchi organning hisob raqamiga oʻtkaziladi.

Litsenziya talabgori berilgan arizadan voz kechgan taqdirda toʻlangan yigʻim summasi qaytarib berilmaydi.

13. Nodavlat taʼlim muassasalarining chet tillarni oʻrganish boʻyicha oʻquv kurslarini tashkil etish sohasidagi faoliyatini litsenziyalash ushbu Nizomga ilova qilinayotgan sxemaga asosan amalga oshiriladi.

Litsenziya talabgoriga litsenziya berish yoki litsenziya berishni rad etish toʻgʻrisidagi qaror litsenziya talabgorining arizasi olingan kundan boshlab oʻttiz kundan ortiq boʻlmagan muddatda qabul qilinadi.

Ishchi organ ariza olingan kundan boshlab oʻn besh kundan ortiq boʻlmagan muddatda hujjatlarni koʻrib chiqadi, ular boʻyicha ekspert xulosasi tayyorlaydi va litsenziya talabgoriga litsenziya berish yoki litsenziya berishni rad etish toʻgʻrisidagi taklifni tegishli qaror protokoli loyihasi bilan birga koʻrib chiqish uchun komissiyaga taklif taqdim etadi.

Hududiy komissiya ishchi organning taklifi olingandan keyin oʻn besh kundan ortiq boʻlmagan muddatda uni koʻrib chiqadi va qabul qilingan qaror toʻgʻrisidagi protokolni tasdiqlaydi. Hududiy komissiya qabul qilgan qaror protokolini komissiya raisi (uning oʻrinbosari) imzolaydi. Zarur hollarda hududiy komissiya qarori soʻrov yoʻli bilan qabul qilinishi mumkin.

14. Ishchi organ litsenziya talabgorini qabul qilingan qaror toʻgʻrisida tegishli qaror qabul qilingandan keyin uch kun mobaynida xabardor qiladi.

Litsenziya berish yuzasidan qaror qabul qilingani toʻgʻrisidagi bildirishnoma litsenziya talabgoriga bank hisob raqami rekvizitlari, davlat bojini toʻlash muddatlari koʻrsatilgan holda yozma shaklda joʻnatiladi (taqdim etiladi).

Litsenziya berish toʻgʻrisida qabul qilingan qaror toʻgʻrisidagi bildirishnoma bilan bir vaqtda litsenziya talabgoriga imzolash uchun litsenziya bitimi yuboriladi.

Litsenziyalovchi organ va litsenziatning oʻzaro huquqlari hamda majburiyatlarini belgilovchi litsenziya bitimi ishchi organ va litsenziat oʻrtasida tuziladi va unda quyidagilar boʻlishi kerak:

bitimni imzolagan shaxslarning familiyasi, ismi, otasining ismi, lavozimi;

tomonlarning rekvizitlari;

litsenziya berilayotgan aniq taʼlim turining nomi va taʼlim faoliyati yoʻnalishlarining roʻyxati;

litsenziyaning amal qilish muddati;

litsenziatga qoʻyiladigan litsenziya talablari va shartlari;

litsenziat tomonidan taʼlim faoliyatini amalga oshirish joyi (pochta manzili);

litsenziya bitimi talablari va shartlari buzilganligi uchun tomonlarning javobgarligi;

litsenziat tomonidan litsenziya bitimi talablari va shartlari bajarilishini ishchi organ tomonidan nazorat qilish tartibi.

Litsenziya bitimi ikki nusxada — litsenziat va ishchi organ uchun bir nusxadan tuziladi.

15. Litsenziyalar blankalari qatʼiy hisobot beriladigan hujjatlar hisoblanadi, hisobga olish seriyasiga, tartib raqamiga va himoyalanganlik darajasiga ega boʻladi. Litsenziya blankalari namunalari Vazirlar Mahkamasining nodavlat taʼlim muassasalari faoliyatini litsenziyalash komissiyasi ishchi organi tomonidan ishlab chiqiladi. Blankalar namunalari Vazirlar Mahkamasining nodavlat taʼlim muassasalari faoliyatini litsenziyalash komissiyasi tomonidan tasdiqlanadi va Oʻzbekiston Respublikasi Vazirlar Mahkamasi huzuridagi Davlat test markazi buyurtmasi boʻyicha bosmaxona usulida “Davlat belgisi” davlat-ishlab chiqarish birlashmasida tayyorlanadi.

Ishchi organ litsenziya blankalarini Vazirlar Mahkamasi huzuridagi Davlat test markazidan oladi va unga berilgan litsenziyalar toʻgʻrisida hisobot beradi. Hisobot shakllari Oʻzbekiston Respublikasi Vazirlar Mahkamasi huzuridagi Davlat test markazi tomonidan belgilanadi.

Ishchi organ rahbari litsenziya blankalarining hisobga olinishi, saqlanishi va ulardan maqsadli foydalanilishi uchun shaxsan javob beradi.

Litsenziyalar ishchi organ tomonidan rasmiylashtiriladi va hududiy komissiya raisi tomonidan imzolanadi.

16. Litsenziya litsenziya talabgori tomonidan davlat boji toʻlanganini tasdiqlovchi hujjat taqdim etilgandan va u litsenziya bitimini imzolagandan keyin uch kun muddatda beriladi.

17. Agar litsenziat litsenziya berish toʻgʻrisida qaror qabul qilinganligi haqidagi bildirishnoma yuborilgan (topshirilgan) vaqtdan boshlab uch oy mobaynida litsenziyalovchi organga litsenziya berilganligi uchun davlat boji toʻlanganligini tasdiqlovchi hujjatni taqdim etmasa yoxud litsenziya bitimini imzolamasa, hududiy komissiya litsenziyani bekor qilish toʻgʻrisida qaror qabul qilishga haqlidir.

18. Litsenziya berish “Faoliyatning ayrim turlarini litsenziyalash toʻgʻrisida”gi Oʻzbekiston Respublikasi Qonunining 17-moddasida nazarda tutilgan asoslar boʻyicha rad etilishi mumkin.

Litsenziya talabgori litsenziya berish rad etilishi toʻgʻrisidagi qaror, shuningdek ishchi organ mansabdor shaxsining xatti-harakati (harakatsizligi) yuzasidan qonun hujjatlarida belgilangan tartibda shikoyat qilish huquqiga egadir.

19. Litsenziya berish rad etilishi toʻgʻrisida qaror qabul qilingan taqdirda, rad etish toʻgʻrisidagi bildirishnoma litsenziya talabgoriga rad etishning aniq sabablari va litsenziya talabgori koʻrsatib oʻtilgan sabablarni bartaraf etib hujjatlarni takroran koʻrib chiqishga taqdim etishi uchun yetarli boʻlgan muddat koʻrsatilgan holda yozma shaklda yuboriladi (topshiriladi). Litsenziya berishni rad etish haqidagi xabarnomada koʻrsatilgan muddat kamchiliklarni bartaraf etish uchun zarur boʻlgan vaqtga mutanosib boʻlishi kerak.

20. Litsenziya berish rad etilishiga asos boʻlgan sabablar litsenziya talabgori tomonidan bartaraf etilgan taqdirda, hujjatlarni takroran koʻrib chiqish litsenziya talabgorining arizasi barcha zarur hujjatlar bilan birgalikda olingan kundan boshlab oʻn kundan ortiq boʻlmagan muddatda amalga oshiriladi.

Bunda ishchi organ hujjatlar takroran taqdim etilgandan keyin toʻrt kun mobaynida ular boʻyicha ekspert xulosasi tayyorlaydi va litsenziya talabgoriga litsenziya berish yoki berishni rad etish toʻgʻrisidagi taklifni tegishli qaror protokoli loyihasi bilan birga koʻrib chiqish uchun hududiy komissiyaga taklif taqdim etadi.

Hududiy komissiya ishchi organ taklifi olingandan keyin olti kun muddatda uni koʻrib chiqadi va qabul qilingan qaror toʻgʻrisidagi protokolni tasdiqlaydi. Hududiy komissiya qabul qilgan qaror protokoli komissiya raisi (uning oʻrinbosari) tomonidan imzolanadi.

Litsenziya talabgorlarining arizalari takroran koʻrib chiqilganligi uchun yigʻim undirilmaydi.

Litsenziya talabgorining arizasini qayta koʻrib chiqishda ilgari litsenziya berishni rad etish toʻgʻrisidagi bildirishnomada koʻrsatilmagan yangi asoslar boʻyicha litsenziya berishni rad etishga yoʻl qoʻyilmaydi.

Litsenziya berish rad etilganligi toʻgʻrisidagi bildirishnomada koʻrsatilgan muddat oʻtgandan keyin berilgan ariza yangidan berilgan ariza hisoblanadi.

21. Litsenziat oʻzgartirilgan, uning nomi yoki joylashgan joyi (pochta manzili) oʻzgargan taqdirda, litsenziat yoki uning huquqiy vorisi qayta roʻyxatdan oʻtkazilgandan keyin bir oy muddatda ishchi organga koʻrsatib oʻtilgan maʼlumotlarni tasdiqlovchi tegishli hujjatlar ilova qilingan holda litsenziyani qayta rasmiylashtirish toʻgʻrisida ariza berishi shart.

Yangidan vujudga kelgan yuridik shaxsni davlat roʻyxatidan oʻtkazish sanasida chet tillarni oʻrganish boʻyicha oʻquv kurslarini tashkil etish sohasidagi faoliyatini amalga oshirish huquqini beruvchi litsenziyaga ega boʻlgan litsenziatlar qoʻshib yuborilgan taqdirda, litsenziyani ushbu bandning birinchi xatboshida nazarda tutilgan tartibda qayta rasmiylashtirishga yoʻl qoʻyiladi.

22. Litsenziat litsenziya qayta rasmiylashtirilgunga qadar unda koʻrsatilgan faoliyatni ilgari berilgan litsenziya asosida amalga oshiradi.

23. Litsenziyani qayta rasmiylashtirishda ishchi organ litsenziyalar reyestriga tegishli oʻzgartirishlar kiritadi. Litsenziyani qayta rasmiylashtirish ishchi organ tomonidan tegishli hujjatlar ilova qilingan holda litsenziyani qayta rasmiylashtirish toʻgʻrisida ariza olingan kundan boshlab besh kun mobaynida amalga oshiriladi.

Litsenziyani qayta rasmiylashtirishda litsenziya talabgorining litsenziya berish toʻgʻrisidagi arizasi koʻrib chiqilganligi uchun toʻlanadigan summaning yarmi miqdorida yigʻim undiriladi. Yigʻim summasi ishchi organ hisob raqamiga oʻtkaziladi.

24. Litsenziyaning amal qilish muddatini uzaytirish litsenziatning arizasiga koʻra amalga oshiriladi.

Litsenziyaning amal qilish muddatini uzaytirish toʻgʻrisidagi ariza ishchi organga litsenziyaning amal qilish muddati tugagunga qadar ikki oydan kechikmay berilishi kerak.

Litsenziyaning amal qilish muddatini uzaytirish yoki uzaytirishni rad etish toʻgʻrisidagi qaror litsenziya berish uchun nazarda tutilgan tartibda qabul qilinadi.

25. Amal qilish muddati oʻtmagan yoʻqolgan yoki yaroqsiz holga kelgan litsenziya oʻrniga litsenziatning arizasiga koʻra uning dublikati berilishi mumkin.

Litsenziya dublikatlari berishda litsenziya berish toʻgʻrisidagi ariza koʻrib chiqilganligi uchun toʻlanadigan summaning yarmi miqdorida yigʻim undiriladi. Yigʻim summasi ishchi organ hisob raqamiga oʻtkaziladi.

26. Litsenziya shartlari va talablariga litsenziat tomonidan rioya etilishini nazorat qilish hududiy komissiya tomonidan tasdiqlangan jadval boʻyicha ishchi organ tomonidan amalga oshiriladi.

27. Litsenziya talablari va shartlariga rioya etilishini nazorat qilishni amalga oshirishda ishchi organ oʻz vakolatlari doirasida qonun hujjatlarida belgilangan tartibda quyidagi huquqlarga ega:

litsenziya talablari va shartlariga litsenziat tomonidan rioya etilishini rejali tekshirish;

litsenziya talablari va shartlari litsenziat tomonidan buzilganligidan dalolat beruvchi hollar mavjud boʻlgan taqdirda litsenziat tomonidan litsenziya talablari va shartlariga rioya etilishini rejadan tashqari tekshirish;

litsenziya talablari va shartlariga rioya etilishini tekshirish chogʻida paydo boʻladigan masalalar boʻyicha zarur axborotni litsenziatdan soʻrash va olish;

tekshirishlar natijalari asosida, litsenziya talablari va shartlarining litsenziat tomonidan aniq buzilishlarini koʻrsatgan holda, dalolatnomalar (maʼlumotnomalar) tuzish;

litsenziatga aniqlangan buzilishlarni bartaraf etish majburiyatini yuklovchi qarorlar chiqarish, bunday buzilishlarni bartaraf etish muddatlarini belgilash;

litsenziyaning amal qilishini toʻxtatib turish va toʻxtatish yoxud litsenziyani bekor qilish toʻgʻrisidagi takliflarni hududiy komissiyaga koʻrib chiqish uchun kiritish.

28. Litsenziya talablari va shartlariga rioya etilishini tekshirishda ishchi organning tekshiruvchi xodimlari tomonidan ikki nusxada dalolatnoma tuziladi, ularning bittasi litsenziatga beriladi, ikkinchi nusxasi ishchi organda qoladi.

29. Litsenziyaning amal qilishini toʻxtatib turish va toʻxtatish, litsenziyani bekor qilish “Faoliyatning ayrim turlarini litsenziyalash toʻgʻrisida”gi Oʻzbekiston Respublikasi Qonunining 22 — 24-moddalarida nazarda tutilgan hollarda va tartibda komissiya qaroriga koʻra amalga oshiriladi.

30. Hududiy komissiyaning litsenziyaning amal qilishini toʻxtatib turish yoki toʻxtatish, uni bekor qilish toʻgʻrisidagi qarori yuzasidan sudga shikoyat qilinishi mumkin. Hududiy komissiya qarori sud tomonidan asossiz deb eʼtirof etilgan taqdirda hududiy komissiya litsenziat oldida litsenziat koʻrgan zarar miqdorida javob beradi.

31. Ishchi organ taʼlim turlari boʻyicha litsenziyalar reyestrini yuritadi.

Litsenziyalar reyestrida quyidagilar koʻrsatilishi kerak:

yuridik shaxsning nomi, uning tashkiliy-huquqiy shakli, pochta manzili, telefoni;

soliq toʻlovchining identifikatsiya tartib raqami;

litsenziyalarning berilgan sanasi va tartib raqami;

litsenziyalarning amal qilish muddati;

litsenziyalarni qayta rasmiylashtirish, ularning amal qilish muddatini uzaytirish, amal qilishini toʻxtatib turish va tiklashning asoslari va sanasi;

litsenziyalarning amal qilishini toʻxtatish asosi va sanasi;

litsenziyalarni bekor qilish asosi va sanasi;

dublikat berish asosi va sanasi.

32. Litsenziyalarning reyestrlarida mavjud boʻlgan maʼlumotlar litsenziyalovchi organning veb-saytiga joylashtiriladi va tanishib chiqish uchun ochiq boʻladi

33. Nodavlat taʼlim muassasalarining chet tillarni oʻrganish boʻyicha oʻquv kurslari faoliyatini amalga oshirish huquqiga litsenziya berganlik va uning amal qilish muddatini uzaytirganlik uchun Oʻzbekiston Respublikasi qonun hujjatlarida belgilangan eng kam oylik ish haqining oʻn baravari miqdorida davlat boji undiriladi.

Davlat boji respublika budjeti daromadiga oʻtkaziladi.

1. Nodavlat taʼlim muassasalarining chet tillarni oʻrganish boʻyicha oʻquv kurslarini tashkil etish sohasidagi faoliyatini litsenziyalash boʻyicha hududiy komissiya (keyingi oʻrinlarda hududiy komissiya deb ataladi) Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari huzurida tashkil etiladi.

Hududiy komissiya nodavlat taʼlim muassasalarining chet tillarni oʻrganish boʻyicha oʻquv kurslarini tashkil etish sohasidagi faoliyatiga litsenziyalarni berish, litsenziyaning amal qilishini toʻxtatib turish yoki toʻxtatish, shuningdek uni bekor qilish va qayta rasmiylashtirish toʻgʻrisida qarorlar qabul qiladi.

2. Hududiy komissiya oʻz faoliyatini Oʻzbekiston Respublikasi Konstitutsiyasiga, Oʻzbekiston Respublikasi qonunlariga, Oʻzbekiston Respublikasi Oliy Majlisi palatalarining qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Vazirlar Mahkamasining qarorlari va mazkur Nizomga muvofiq amalga oshiradi.

3. Hududiy komissiyaning shaxsiy tarkibi Vazirlar Mahkamasining nodavlat taʼlim muassasalari faoliyatini litsenziyalash komissiyasi tomonidan belgilanadigan namunaviy tarkib asosida shakllantiriladi hamda Qoraqalpogʻiston Respublikasi Vazirlar Kengashi Raisi, viloyatlar va Toshkent shahar hokimlari qarorlari bilan tasdiqlanadi.

4. Hududiy komissiya faoliyatini muvofiqlashtirish va monitoringini olib borish Vazirlar Mahkamasining nodavlat taʼlim muassasalari faoliyatini litsenziyalash komissiyasi tomonidan amalga oshiriladi.

5. Oʻrta maxsus, kasb-hunar taʼlimi hududiy boshqarmalari hududiy komissiyalarning ishchi organi (keyingi oʻrinlarda ishchi organi deb ataladi) funksiyasini bajaradilar.

6. Quyidagilar hududiy komissiyaning asosiy funksiyalari hisoblanadi:

litsenziya talabgorining litsenziya berish toʻgʻrisidagi arizasini koʻrib chiqish;

nodavlat taʼlim muassasalarining chet tillarni oʻrganish boʻyicha oʻquv kurslarini tashkil etish sohasidagi faoliyatini amalga oshirish huquqiga litsenziyalar berish, ularning amal qilishini toʻxtatib turish va toʻxtatish, litsenziyalarni bekor qilish va qayta rasmiylashtirish toʻgʻrisidagi qarorlar qabul qilish;

yoʻqolgan yoki yaroqsiz holga kelgan litsenziya oʻrniga dublikat berish toʻgʻrisida qaror qabul qilish;

nodavlat taʼlim muassasalarining chet tillarni oʻrganish boʻyicha oʻquv kurslarini tashkil etish sohasidagi hujjatlarini ekspertizadan oʻtkazish uchun ekspert guruhlarini shakllantirishda ishchi organga koʻmaklashish;

litsenziat tomonidan litsenziya talablari va shartlariga rioya qilinishi ustidan nazorat qilish;

ishchi organ tomonidan litsenziya talabgorlari hujjatlari boʻyicha tayyorlangan ekspert xulosalarini oʻrganish va ular boʻyicha tegishli qarorlar qabul qilish;

nodavlat taʼlim muassasalari tomonidan chet tillarni oʻrganish boʻyicha oʻquv kurslarini tashkil etish va ularning faoliyati boʻyicha litsenziya bitimi talablari va shartlari bajarilishi tekshirilishini tashkil etish.

7. Hududiy komissiya quyidagi huquqlarga ega:

oʻz vakolatlari doirasida davlat boshqaruvi organlarining hududiy boʻlinmalaridan zarur materiallarni soʻrash;

zarur hollarda, ishchi organdan nodavlat taʼlim muassasasi faoliyati toʻgʻrisidagi maʼlumotlarni aniqlashtirish uchun qoʻshimcha hujjatlarni soʻrash;

litsenziya talabgori tomonidan taqdim etilgan hujjatlarni ekspertiza qilish uchun mutaxassislarni jalb etish;

ishchi organ faoliyatini nazorat qilish.

8. Hududiy komissiyaning majlislari hujjatlarning kelib tushishiga qarab, biroq oyida kamida bir marta oʻtkaziladi. Zarur hollarda navbatdan tashqari majlislar oʻtkazilishi mumkin.

9. Nodavlat taʼlim muassasalarining chet tillarni oʻrganish boʻyicha oʻquv kurslarini tashkil etish va ularning faoliyati hujjatlari boʻyicha ekspert xulosasi hamda ishchi organ tomonidan tayyorlangan, hududiy komissiyaning tegishli qarori loyihasi bilan litsenziyalar berish yoki litsenziyalar berishni rad etish toʻgʻrisidagi taklif hududiy komissiyalar aʼzolariga tanishish uchun majlis boshlanishidan kamida 3 kun oldin yetkaziladi.

10. Hududiy komissiyaning majlisi uning aʼzolarining majlisda kamida 2/3 qismi ishtirok etishi shartlarida oʻtkaziladi. Hududiy komissiya qarori koʻpchilik ovoz bilan qabul qilinadi.

11. Hududiy komissiyaning aʼzosi uning qaroriga rozi boʻlmaganda komissiya aʼzosi protokolga ilova qilinadigan oʻz fikrini yozma ravishda bayon qilishi mumkin.

12. Hududiy komissiyaning qarori protokol bilan rasmiylashtiriladi.

13. Hududiy komissiyaning raisi boʻlmaganda uning funksiyasini rais oʻrinbosari bajaradi.

14. Hududiy komissiya har chorakda hisobotdan keyingi oyning 10-kunigacha Vazirlar Mahkamasining nodavlat taʼlim muassasalari faoliyatini litsenziyalash komissiyasi ishchi organiga belgilangan shakl boʻyicha oʻz faoliyati toʻgʻrisida hisobot taqdim etadi.

1. Vazirlar Mahkamasining 2002-yil 28-iyundagi 236-son qarori (Oʻzbekiston Respublikasi QT, 2002-y., 6-son, 36-modda) bilan tasdiqlangan Amalga oshirilishi uchun litsenziyalar talab qilinadigan faoliyat turlarining roʻyxatidagi “Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari” boʻlimiga quyidagi mazmundagi xatboshi qoʻshilsin:

“Nodavlat taʼlim muassasalarining chet tillarni oʻrganish boʻyicha oʻquv kurslarini tashkil etish sohasidagi faoliyati”.