Ulugʻ Vatan urushi qatnashchilarining, baynalmilalchi jangchilar va halok boʻlgan harbiy xizmatchilar oilalarining turmush sharoitini yanada yaxshilash maqsadida hamda sovet xalqining Ulugʻ Vatan urushidagi Gʻalabasining 45 yilligini nishonlash uchun:

Oʻzbekiston SSJ Vazirlar Kengashi, vazirliklar, idoralar, Qoraqalpogʻiston MSSJ Vazirlar Kengashi, xalq deputatlari viloyat Sovetlari va shahar Soveti ijroiya qoʻmitalari, jumhuriyat hududida joylashgan korxonalar va tashkilotlar 1990-yilda Ulugʻ Vatan urushi nogironlarini va halok boʻlgan harbiy xizmatchilarning oilalarini uy-joy bilan taʼminlasinlar, 1991-yilda esa Ulugʻ Vatan urushining barcha qatnashchilarini hamda ularga tenglashtirilgan 1990-yil 1-yanvargacha hisobga olingan kishilarni uy-joy bilan taʼminlasinlar.

1990-yil 1-iyulidan boshlab Ulugʻ Vatan urushi qatnashchilari, baynalmilalchi jangchilar va halok boʻlgan harbiy xizmatchilarning oilalari kvartira haqi toʻlashdan ozod qilinsin. Ulugʻ Vatan urushi nogironlari uchun koʻzda tutilgan imtiyozlar barcha urush qatnashchilari va baynalmilalchi jangchilarning kommunal xizmat (suv, gaz, elektr va issiqlik energiya taʼminoti) haqini toʻlashga, markaziy isitish sistemasiga ulanmagan uylarda yashovchilar uchun aholiga sotish uchun belgilab quyilgan norma doirasida xarid qilinadigan yoqilgʻi haqiga joriy etilsin.

Qoraqalpogʻiston MSSJ Vazirlar Kengashi, xalq deputatlari viloyat Sovetlari va Toshkent shahar Soveti ijroiya qoʻmitalari, vazirliklar va idoralar, korxonalar va tashkilotlar:

Ulugʻ Vatan urushi qatnashchilari hozirgi vaqtda yashayotgan davlat va idoralarga qarashli uylar hamda kvartiralarni ularga shaxsiy mulk qilib topshirsinlar;

1990-yil davomida Ulugʻ Vatan urushi nogironlarining va halok boʻlgan harbiy xizmatchilar oilalarining, 1991-yilda esa barcha Ulugʻ Vatan qatnashchilarining hamda ularga tenglashtirilgan shaxslarning uy-joy, maishiy sharoitini xalq deputatlari mahalliy Sovetlari ijroiya qoʻmitalarining, korxonalar, tashkilotlar, kolxozlar, sovxozlarning mablagʻlari hamda boshqa manbalar hisobidan uy-joy qurish va remont qilish yoʻli bilan yaxshilashni taʼminlasin.

Oʻzbekiston SSJ Vazirlar Kengashi 1990-yilda:

1990-yil 1-iyuldan boshlab Oʻzbekiston SSJ Ijtimoiy taʼminot vazirligi sistemasidagi urush veteranlari uchun sanatoriylar, pansionatlar va statsionarlarda ovqatlanishga, dori-darmonlarga va yumshoq jihozlarga xarajatlar normasini Ulugʻ Vatan urushi nogironlari gospitallari uchun koʻzda tutilgan normalarga tenglashtirsin;

Ulugʻ Vatan urushi qatnashchilariga, baynalmilalchi jangchilarga shaxsiy foydalanish uchun sotishga bozor fondidan 1750 ta yengil avtomashina ajratsin;

Oʻzbekiston SSJ Ijtimoiy taʼminot vazirligiga I guruh nogironlariga kajavalar sotib olish uchun chet el valyutasida 100 ming soʻm ajratsin.

Oʻzbekiston SSJ Aloqa vazirligi, Qoraqalpogʻiston MSSJ Vazirlar Kengashi, xalq deputatlari viloyat Sovetlari va Toshkent shahar Soveti ijroiya qoʻmitalari 1990-1991-yillarda 1990-yil 1-yanvarigacha hisobga olingan barcha Ulugʻ Vatan urushi qatnashchilarining, baynalmilalchi jangchilarning va halok boʻlgan harbiy xizmatchilar oilalarining kvartiralari telefonlashtirilishini taʼminlasinlar.

Vazirliklar va idoralarga markazlashtirilgan moddiy ragʻbatlantirish fondi mablagʻidan, korxonalar va tashkilotlarga — moddiy ragʻbatlantirish (mehnatga haq toʻlash yagona fondi) fondlari mablagʻlaridan, noishlab chiqarish sohasidagi muassasalarga esa smeta xarajatlarini tejash hisobidan Ulugʻ Vatan urushi qatnashchilarini shu yilning may oyidan kechiktirmay qiymati 100 soʻmgacha turadigan esdalik sovgʻalar bilan mukofotlashga ruxsat etilsin.

Xalq deputatlari mahalliy Sovetlarining ijroiya qoʻmitalari Vatan urushi qatnashchilari boʻlgan ishlamayotgan pensionyerlar uchun ijtimoiy-madaniy tadbirlarga ajratilgan mablagʻ hisobidan sovgʻa sotib olsinlar.

Oʻzbekiston SSJ Vazirlar Kengashi sotsialistik Vatanni himoya qilishda Sovet Ittifoqi Qahramonlari va uch daraja Shuhrat ordenlari bilan mukofotlangan jangchilarning alohida xizmatlarini hisobga olib, ularning uy-joy sharoitlarini, ularga tibbiy, savdo va maishiy xizmat koʻrsatishni yaxshilash bilan bogʻliq barcha masalalarni hal etishning 1990-yilga belgilangan tadbirlarini birinchi navbatda bajarishni taʼminlasin.