Oʻzbekiston Respublikasi Hukumati va Rossiya Federatsiyasi Hukumati, keyingi oʻrinlarda "Tomonlar" deb ataladilar,

narkotik moddalar va psixotrop moddalar (keyingi oʻrinlarda narkotik moddalar deb ataladi) ning noqonuniy muomalada boʻlishi, ularning suisteʼmol qilinishi Tomonlar xalqlarining sogʻligʻi va farovon turmushiga jiddiy xavf tugʻdirishini anglab,

narkotik moddalarning noqonuniy muomalada boʻlishining oʻsganligi va uni suisteʼmol qilish bilan bogʻliq muammolarning kuchayayotganligidan chuqur tashvishlanib,

narkotik moddalarning noqonuniy muomalada boʻlishi va ularni suiisteʼmol qilish bilan kurashda Tomonlarning hamkorligini mustahkamlash ikkala davlat xalqlarining tub manfaatlariga javob beradi deb hisoblab,

1961-yilda qabul qilingan Narkotik moddalar toʻgʻrisidagi Yagona konvensiyani, unga 1972-yildagi bayonnomaga muvofiq kiritilgan tuzatishlarni, 1971-yildagi Psixotrop moddalar toʻgʻrisidagi Konvensiyani, Birlashgan Millatlar Tashkilotining 1988-yildagi Narkotik moddalar va psixotrop moddalarning noqonuniy muomalada boʻlishiga qarshi kurash toʻgʻrisidagi Konvensiyasini, shuningdek Birlashgan Millatlar Tashkilotining tegishli organlari va forumlarining bu masaladagi qarorlarini eʼtiborga olib,

xalqaro huquqning umumiy tan olingan prinsiplari va meʼyorlariga amal qilib.

Mustaqil Davlatlar hamdoʻstligi qatnashchilari boʻlgan davlatlar hududlarida uyushgan jinoyatchilik va xavfli jinoyatlarning boshqa turlari bilan kurashning birgalikdagi choralari yuzasidan 2000-yilgacha boʻlgan davr uchun Davlatlararo dasturidagi vazifalardan kelib chiqib,

Oʻzbekiston Respublikasi Hukumati bilan Rossiya Federatsiyasi Hukumati 1995-yil 27-iyuldagi jinoyatchilikka qarshi kurash toʻgʻrisidagi Bitimga asosan,

quyidagilar toʻgʻrisida kelishib oldilar:

Ushbu Bitimda nazarda tutilgan hamkorlik Tomonlarning vakolatli organlari oʻrtasidagi toʻgʻridan-toʻgʻri aloqalar va kelishuvlar yoʻli bilan amalga oshiriladi.

Oʻzbekiston Respublikasi tomonidan:

Ichki ishlar vazirligi;

Prokuratura;

Davlat soliq qoʻmitasining Bosh bojxona boshqarmasi;

Sogʻliqni saqlash vazirligi;

Milliy xavfsizlik xizmati vakolatli organlar boʻlib hisoblanadilar.

Rossiya Federatsiyasi tomonidan:

Tashqi ishlar vazirligi;

Ichki ishlar vazirligi;

Sogʻliqni saqlash vazirligi;

Bosh prokuratura;

Federal xavfsizlik xizmati;

Federal chegara xizmati;

Davlat bojxona qoʻmitasi;

Tashqi iqtisodiy aloqalar vazirligi vakolatli organlar boʻlib hisoblanadilar.

Tomonlar narkotik moddalar ustidan nazorat oʻrnatish masalalari boʻyicha oʻz milliy siyosatlarini muvofiqlashtirishga va xalqaro forumlarda oʻzaro kelishilgan nuqtai-nazarlari bilan chiqishga intiladilar.

Tomonlardan har birining vakolatli organlari, zarurat tugʻilganida, oʻzaro manfaatlarni ifodalovchi oʻzlarining milliy qonunchiliklariga muvofiq:

1) narkotik moddalarning noqonuniy muomalaga kirib qolish manbalarini aniqlash shakllari va usullari toʻgʻrisida hamda ular tarqalishining oldini olishda qoʻllaniladigan usullar toʻgʻrisida, isteʼmolchilarni aniqlash uslublari haqidagi; narkotik moddalarni tayyorlovchilar va sotuvchilarni aniqlovchi tezkor-qidiruv faoliyatini tashkil etish toʻgʻrisidagi;

2) Tomonlardan birining davlati hududidan ikkinchi Tomon davlatining hududiga narkotik moddalarning noqonuniy olib oʻtilishi yoki olib oʻtish maqsadlari bilan bogʻliq boʻlgan aniq omillar va voqealar haqidagi;

3) narkotik moddalarni olib oʻtishda yashirish yoʻllari va narkotik moddalarni aniqlash usullari haqidagi;

4) narkotik moddalarni tayyorlovchilar va tashuvchilar aniqlanganligi haqidagi, narkotik moddalarning noqonuniy muomalada boʻlishiga taalluqlilikda gumon qilinayotgan shaxslar, tashkilotlar va muassasalar, shuningdek ularning boshqa Tomon davlati hududidagi shubhali aloqalari haqidagi;

5) narkotik moddalarni suiisteʼmol qilishga yoki narkotik moddalarning noqonuniy muomalada boʻlishiga qarshi kurash haqidagi qonunlarni buzgan shaxslarga yoki shaxslar guruhiga nisbatan ishlar qoʻzgʻatilganligi, tergovi yakunlanganligi yoki sud toʻxtami haqidagi;

6) narkotik moddalarning noqonuniy muomalada boʻlishidan olingan daromadlarni qonuniylashtiruvchi shaxslar yoki guruhning faoliyati toʻgʻrisidagi oʻzaro bir-birlarini qiziqtirishi mumkin boʻlgan axborotlarni ayirboshlaydilar.

Tomonlarning milliy qonunchiligiga binoan vakolat berilgan organlari maqsadga muvofiq deb hisoblaganlarida oʻzaro nazoratli etkazib berish yoki boshqa shu kabi usullarni qoʻllaydilar.

Tomonlar oʻz davlatlari hududida olingan narkotik moddalarning namunalarini ularning kelib chiqishini aniqlash maqsadida tahlil qilish va oʻrganish uchun oʻzlarining xalqaro standartlarga muvofiq holda ishlovchi laboratoriyalari ixtiyoriga topshiradilar. Shu taxlitda olingan maʼlumotlarni Tomonlar oʻzaro bir-birlariga taqdim etadilar.

Tomonlarning vakolatli organlari oʻzlarining milliy qonunchiliklariga muvofiq rasmiy soʻrovlar boʻyicha tezkor-qidiruv tadbirlarini amalga oshiradilar.

Tomonlar 1996-yildagi Narkotik moddalar toʻgʻrisidagi Yagona konvensiya va unga kiritilgan oʻzgartirishlar talablariga xilof ravishda narkotik moddalarni ishlab chiqarish uchun etishtirilayotgan narkotik moddalar dalalarini va ekinlarini aniqlash va nazorat qilish ishida hamkorlik qiladilar.

Tomonlar ushbu Bitimni amalga oshirish doirasida samarali oʻzaro hamkorlikni taʼminlash maqsadida vakolatli organlari oʻrtasida toʻgʻridan-toʻgʻri aloqalar oʻrnatadilar.

Tomonlarning vakolatli organlari giyohvandlikni davolash, uning oldini olish va giyohvandlik kasaliga mubtalo boʻlgan shaxslarni ijtimoiy tiklashning yangi usullarini ishlab chiqish va amalga kiritishda oʻzaro hamkorlik qiladilar.

Tomonlar bu sohada axborotlarni ayirboshlashga yordam qiladilar, uni ragʻbatlantiradilar, shuningdek mutaxassislar delegatsiyalarini ayirboshlaydilar.

Tomonlar oʻzlarining vakolatli organlari orqali narkotik moddalar ustidan nazorat qilish sohasida tajriba almashish, xodimlarni oʻqitish va ularning malakasini oshirish. stajirovkalar hamda maslahatlashuvlar oʻtkazishda hamkorlik qiladilar.

1. Tomonlar nazoratda turgan narkotik moddalar, psixotrop va boshqa moddalarning milliy Roʻyxatlarini ayirboshlaydilar va ularga kiritilgan oʻzgarishlar haqida bir-birlarini xabardor qiladilar.

2. Tomonlardan biri nazoratda turgan narkotik moddalar, ruhiyatga taʼsir etuvchi va boshqa moddalarning roʻyxatini toʻldirsa, ikkinchi Tomon oʻzining tegishli milliy Roʻyxatlariga xuddi shunday qoʻshimcha kiritish imkoniyatini koʻrib chiqadi.

Tomonlar narkotik moddalarning eksport va import savdosini narkotik moddalarni nazorat qilish sohasidagi universal konvensiyalar boʻyicha oʻzlarining majburiyatlariga muvofiq ravishda amalga oshiradilar.

Tomonlar narkotik moddalarni nazorat qilish sohasidagi oʻz davlatlari qonunchiligi va amaliyoti haqidagi axborotni oʻzaro almashadilar.

Qonun hujjatlaridan tashqari, ushbu Bitimga asoslanib taqdim etilgan hujjatlar va axborotlar xoh yozma, xoh ogʻzaki boʻlsin daxlsiz hisoblanadi va faqatgina ularni taqdim etgan vakolatli organning yozma roziligi bilangina ilmiy va boshqa maqsadlarda foydalanilishi mumkin.

1. Ushbu Bitim doirasida axborotni taqdim etish Tomonning oʻz tashabbusiga koʻra yoki ikkinchi Tomonning rasmiy soʻrovi asosida amalga oshiriladi.

2. Axborotni olishga rasmiy soʻrov yozma ravishda yoki teletayp, faksimil yoxud kompyuter aloqa vositasida berilishi lozim.

Kechiktirib boʻlmaydigan holatlarda, telefon aloqasi orqali berilgan ogʻzaki rasmiy soʻrov qabul qilinishi mumkin, ammo bu soʻrov darhol yozma ravishda tasdiqlanishi lozim.

3. Axborot olishga rasmiy soʻrov:

soʻrovchi vakolatli organning nomi;

soʻralayotgan vakolatli organning nomi;

masala mohiyatining bayoni va uning asoslanishi, shuningdek uni bajarish uchun zarur boʻlgan boshqa maʼlumotlarni oʻz ichiga olishi lozim.

1. Ushbu Bitim doirasida soʻralayotgan Tomon rasmiy soʻrovni bajarish oʻz davlatining suvereniteti, xavfsizligi yoki boshqa muhim manfaatlariga zarar etkazadi yoki uning qonunchiligiga yoxud xalqaro majburiyatlariga xilof deb hisoblasa, rasmiy soʻrovni bajarishni toʻliq yoki qisman rad etishi mumkin.

2. Basharti soʻrovni bajarishni rad etish xususida qaror qabul qilinsa, soʻrayotgan Tomon buning sabablarini koʻrsatgan holda yozma tarzda xabardor qilinadi.

Narkotiklarni nazorat qilish boʻyicha Oʻzbekiston Respublikasi Davlat komissiyasi va Rossiya Federatsiyasi Tashqi ishlar vazirligi oʻzaro kelishgan holda ushbu Bitimda nazarda tutilgan hamkorlikni muvofiqlashtirish va uning samaradorligini oshirish maqsadida maslahatlashuvlar oʻtkazadilar.

Tomonlarning vakolatli organlari ushbu Bitimni bajarish maqsadida ishchi guruhlari tashkil qilishlari, ekspertlarning uchrashuvlarini oʻtkazishlari va oʻzaro bitimlar tuzishlari mumkin.

Ushbu Bitimning qoidalari Tomonlarning narkotik moddalar ustidan nazorat qilish masalalarida hamkorlikning boshqa oʻzaro maqbul shakllari va uslublarini belgilash yoki qoʻllashni ragʻbatlantirishlariga monelik qilmaydi.

1. Ushbu Bitim uni amalga kiritish uchun Tomonlarning ichki davlat tartiblarining bajarilganligi haqidagi soʻnggi yozma xabarnomasi olingan sanadan boshlab kuchga kiradi.

2. Ushbu Bitimga Tomonlarning oʻzaro kelishuvi asosida diplomatik notalar almashish yoʻli bilan oʻzgartirishlar va qoʻshimchalar kiritilishi mumkin. Bunday tuzatishlar ushbu Bitimning kuchga kirishi uchun nazarda tutilgan tartiblarga muvofiq kuchga kiritiladi.

Ushbu Bitim besh yil muddatga tuziladi, bundan keyin avtomatik ravishda bir yillik muddatlarga uzaytirilib boriladi va Tomonlardan birontasi uning amalda boʻlishini tugatish maqsadi yuzasidan yozma xabarnoma yuborganidan keyin 180 kun oʻtguniga qadar amalda boʻladi.

Moskva shahrida 1997-yil 12-martda oʻzbek va rus tillarida boʻlgan ikki nusxada tuzildi, bunda ikkala matn bir xil kuchga egadir.