Oʻzbekiston Respublikasi Hukumati bilan Bolgariya Respublikasi Hukumati, bundan keyin Tomonlar deb ataluvchilar,

transport sohasida ikki tomonlama hamkorlikni faollashtirish orqali savdo-iqtisodiy aloqalarni rivojlantirishga koʻmaklashish istagini ifodalab,

Oʻzbekiston Respublikasi bilan Bolgariya Respublikasi Tomonlari boʻlgan 1996-yilgi Seraxs koʻp tomonlama bitimining, shuningdek transport sohasidagi ikki tomonlama bitimlarning qoidalarini bajara borib,

transport vazirlarining 1997-yildagi Burgas uchrashuvining Oʻzaro anglash toʻgʻrisidagi Memorandumini yodda tutib hamda qoʻllab-quvvatlab,

transport sohasida hukumatlararo yangi ikki tomonlama bitimlar imzolashga hozirlikni jadallatishga tayyor ekanligini bildirib,

koʻp tomonlama bitimlar tuzish orqali Yevropa-Kavkaz-Osiyo qitʼalararo aloqalarini taraqqiy ettirishning shartnomaviy-huquqiy asosini barpo etish zarurligiga inonib,

transport sohasida hamkorlikni amalga oshirish yuzasidan konkret ishlarni boshlash istagini izhor etib, shuningdek,

erishilgan ahdnomalarni bajarish orqali Oʻzbekiston Respublikasi bilan Bolgariya Respublikasi oʻrtasida hamda ularning hududi orqali tranzit tashishlarni amalga oshirish yuzasidan konkret ishlarni boshlash maqsadida,

oʻzlarining quyidagi prinsiplarga amal qilish niyatida ekanliklarini bildiradilar:

1. Tomonlar ikkala davlatning transport taraqqiyotiga mutasaddi boʻlgan idoralari, shuningdek tashishni bajarish va transport jarayonini amalga oshirishdan manfaatdor yoki unga bogʻliq idoralar orasida toʻgʻridan toʻgʻri aloqalarning oʻrnatilishi va faollashuvini tezlatishga yoʻnaltirilgan har qanday tashabbusni ragʻbatlantirish niyatidalar.

2. Tomonlar oʻz transport korxonalari, kompaniyalari va ekspeditorlik tashkilotlariga kontraktlar tuzishda koʻmaklashish va oʻzaro ahdlashuvlarni bajarish uchun qulay sharoitlarni yaratish imkoniyatlarini koʻrib chiqish niyatidalar.

3. Tomonlar transport korxonalari, kompaniyalari va ekspeditorlik tashkilotlariga tranzit tashishlarga bogʻliq boʻlgan barcha xizmatlar uchun imtiyoz tariflari va chegirmalari berilishiga koʻmaklashish niyatidalar.

4. Bolgar tomoni zarur omborxonalar va tegishli port xizmatlari, shuningdek Oʻzbekistondan borgan yuklarni qayta ishlash, joylashtirish va tashishga bogʻliq boʻlgan xizmatlarni taqdim etishga va oʻzbek tomoniga kontraktlar tuzishda eng qulay sharoitlar taqdim etilishiga koʻmaklashishga tayyorligini bildiradi.

5. Tomonlar ushbu Memorandum qoidalarini amalga oshirish uchun, shuningdek transport sohasida bundan keyingi hamkorlikni rivojlantirish uchun zarur boʻlgan axborotni almashish Tomonlarning vakolatli organlari tarafidan va, lozim topilsa, ishchi guruh majlislari doirasida amalga oshirilishiga kelishib oldilar.

6. Lozim hollarda har bir Tomon boshqa Tomonning transport korxonalariga ishlarning tashkil qilinishi va berilayotgan imkoniyatlar bilan tanishishda koʻmaklashadi.

7. Yevropa-Kavkaz-Osiyo qitʼalararo aloqasini barpo etishdan birgalikda manfaatdorlikni hisobga olib, Tomonlar transport yoʻlagini rivojlantirish boʻyicha asosiy koʻp tomonlama hujjatlarni ishlab chiqish yuzasidan Boku shahrida oliy darajada konferensiya oʻtkazish haqidagi tashabbusni qoʻllab-quvvatlaydilar.

8. Ushbu Memorandum qoidalarini bajarish ikkala Tomonning xoʻjalik yurituvchi subyektlari oʻrtasida oʻzaro manfaatdorlik negizida tuziladigan shartnomalar asosida amalga oshiriladi.

9. Ahdlashuvlarni amalda roʻyobga chiqarish maqsadida Tomonlar transport boʻyicha ishchi guruhini barpo etish imkoniyatlarini koʻrib chiqishga kelishdilar. Bu guruh ular tarafidan tayinlanadigan ekspertlar va ikkala Tomonning vakolatli vazirliklari hamda idoralari vakillaridan iborat boʻladi.

Savdo-iqtisodiy va ilmiy-texnikaviy hamkorlik boʻyicha oʻzbek-bolgar Hukumatlararo Komissiyasi tuzilgach, lozim topilsa, mazkur guruh shu Hukumatlararo Komissiya tarkibida Transport boʻyicha doimiy ishchi guruh sifatida oʻz ishini davom ettirishi mumkin.

10. Ushbu Memorandum qoidalarini bajarish quyidagilarga yuklatiladi:

oʻzbek tomonidan:

“Oʻzbekiston temir yoʻllari” Davlat temir yoʻl aksionerlik kompaniyasiga,

“Oʻzavtotrans” Davlat aksionerlik korporatsiyasiga,

“Oʻzbekiston havo yoʻllari” milliy aviakompaniyasiga;

bolgar tomonidan:

Transport vazirligiga.

Ushbu Memorandum Tomonlar uni kuchga kiritish uchun lozim boʻlgan ichki davlat protseduralari bajarib boʻlingani toʻgʻrisida ikkinchi bildirishnoma olgan kundan boshlab kuchga kiradi.

Sofiya shahrida 1998-yil 24-iyunda ikki nusxada, oʻzbek, bolgar va rus tillarida tuzildi, barcha matnlar bir xil kuchga ega.