Oʻzbekiston Respublikasi Vazirlar Mahkamasining 2009-yil 22-avgustdagi 245-son “Elektr va issiqlik energiyasidan foydalanish qoidalarini tasdiqlash toʻgʻrisida”gi qaroriga (Oʻzbekiston Respublikasi qonun hujjatlari toʻplami, 2009-y., 35-son, 382-modda) muvofiq Oʻzbekiston Respublikasi Elektr energetikada nazorat boʻyicha davlat inspeksiyasi, Oʻzbekiston Respublikasi Vazirlar Mahkamasi huzuridagi Neft mahsulotlari va gazdan foydalanishni nazorat qilish davlat inspeksiyasi, Oʻzbekiston “Oʻzkommunxizmat” agentligi hamda Oʻzbekiston Respublikasi Vazirlar Mahkamasi huzuridagi Yer qaʼrini geologik oʻrganish, sanoatda, konchilikda va kommunal-maishiy sektorda ishlarning bexatar olib borilishini nazorat qilish davlat inspeksiyasi qaror qiladilar:

1. Elektr energetikada nazorat boʻyicha davlat inspeksiyasi, Vazirlar Mahkamasi huzuridagi Neft mahsulotlari va gazdan foydalanishni nazorat qilish davlat inspeksiyasi, Oʻzbekiston “Oʻzkommunxizmat” agentligi va Sanoatda, konchilikda va kommunal-maishiy sektorda ishlarning bexatar olib borilishini nazorat qilish davlat inspeksiyasining 2007-yil 7-maydagi 90, 29-P, 26, 71-son qarori (roʻyxat raqami 1687, 2007-yil 7-iyun) (Oʻzbekiston Respublikasi qonun hujjatlari toʻplami, 2007-y., 23-son, 245-modda) bilan tasdiqlangan Issiqlik energiyasini ishlab chiqish, uzatish uchun yoqilgʻi, elektr energiyasi, issiqlik energiyasi va suv sarflarining meʼyorlarini hamda issiqlik yuklamalarini, shuningdek texnologik yoʻqotishlarni aniqlash tartibi toʻgʻrisida nizomning 23-bandi birinchi xatboshisi quyidagi tahrirda bayon etilsin:

“Issiqlik energiyasini ishlab chiqish va uzatish uchun issiqlik yuklamalarini, yoqilgʻi, elektr energiyasi, issiqlik energiyasi va suv sarfi meʼyorlari hamda texnologik yoʻqotishlarning meʼyorlarini aniqlash mazkur Nizom talablari, Oʻzbekiston Respublikasi Vazirlar Mahkamasining 2009-yil 22-avgustdagi 245-son “Elektr va issiqlik energiyasidan foydalanish qoidalarini tasdiqlash toʻgʻrisida”gi qaroriga (Oʻzbekiston Respublikasi qonun hujjatlari toʻplami, 2009-y., 35-son, 382-modda), Oʻzbekiston Respublikasi elektr stansiyalari va tarmoqlarini texnikaviy ekspluatatsiya qilish qoidalari. I boʻlim (roʻyxat raqami 1405, 2004-yil 10-sentabr) (Oʻzbekiston Respublikasi qonun hujjatlari toʻplami, 2004-y., 36-son, 405-modda), Oʻzbekiston Respublikasi elektr stansiyalari va tarmoqlarini texnikaviy ekspluatatsiya qilish qoidalari. II boʻlim (Oʻzbekiston Respublikasi Adliya vazirligining 2004-yil 6-dekabrdagi 20-15-319/24-son xatiga asosan texnik qoida va normalarga tegishli deb topilgan), Issiqlik energiyasini va issiqlik eltuvchilarni hisobga olish qoidalari (Oʻzbekiston Respublikasi Adliya vazirligining 2010-yil 28-iyundagi 6-24/13-5638/6-son xatiga asosan texnik qoida va normalarga tegishli deb topilgan) hamda issiqlik taʼminoti tashkiloti va isteʼmolchi oʻrtasida issiqlik energiyasini yetkazib berish toʻgʻrisidagi shartnomaga muvofiq tartibga solinadi.”.

2. Mazkur qaror rasmiy eʼlon qilingan kundan eʼtiboran kuchga kiradi.