Oʻzbekiston Respublikasi Prezidentining “Chet tillarni oʻrganish tizimini yanada takomillashtirish chora-tadbirlari toʻgʻrisida” 2012-yil 10-dekabrdagi PQ-1875-son qarorini bajarish yuzasidan Vazirlar Mahkamasi qaror qiladi:

1. Vazirlar Mahkamasining “Xalq taʼlimi xodimlari mehnatiga haq toʻlash shartlarini tartibga solish toʻgʻrisida” 1994-yil 29-sentabrdagi 490-son qaroriga ilovaga muvofiq oʻzgartirish va qoʻshimchalar kiritilsin hamda ular 2013-yil 1-sentabrdan boshlab amalga kiritilsin.

2. Taʼlim muassasalarining pedagog xodimlariga ustamalar belgilash bilan bogʻliq xarajatlar 2013/2014 oʻquv yilidan boshlab Oʻzbekiston Respublikasi Davlat budjetida “Maorif” tarmogʻi boʻyicha nazarda tutilgan budjet mablagʻlari hisobiga amalga oshiriladi.

3. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari A.I. Ikramov zimmasiga yuklansin.

1. 2-bandning ikkinchi xatboshidagi “xalq taʼlimi” soʻzlari “taʼlim sohalari” soʻzlari bilan almashtirilsin.

2. 3-ilovada:

a) ilovaning nomi quyidagi tahrirda bayon qilinsin:

“Taʼlim muassasalarining qoʻshimcha toʻlovlar belgilangan pedagog xodimlari lavozimlari roʻyxati, mazkur toʻlovlarning turlari va miqdorlari”;

b) 3-band quyidagi tahrirda bayon qilinsin:

“3. Taʼlim muassasalarining chet tillar, xorijiy filologiya, chet tili va tarjima yoʻnalishlarining kasbiy va maxsus fanlari professor-oʻqituvchilari va oʻqituvchilariga qishloq joylarda joylashgan taʼlim muassasalarida – lavozim maoshlariga bazaviy lavozim maoshining (tarif stavkasining) 30 foizi miqdorida, qolgan taʼlim muassasalarida – bazaviy lavozim maoshining (tarif stavkasining) 15 foizi miqdorida oylik ustamalar belgilanadi, bunda quyidagilar majburiydir:

asosiy ishidan ajralgan holda kamida 144 soat davom etadigan dastur boʻyicha belgilangan tartibda malaka oshirish;

tegishli taʼlim muassasasida pedagogik faoliyat olib borish uchun zarur malaka va chet tilini bilishni aniqlash boʻyicha Davlat test markazi tomonidan oʻtkaziladigan test sinovlaridan oʻtish. Test sinovlarini oʻtkazish tartibi Davlat test markazi tomonidan belgilanadi;

malaka oshirish toʻgʻrisidagi davlat namunasidagi sertifikat mavjudligi”;

v) quyidagi mazmundagi 4-band qoʻshilsin:

“4. Davlat budjeti mablagʻlari hisobiga moliyalashtiriladigan oliy taʼlim muassasalarida professor-oʻqituvchilar tarkibiga (chet tillar, xorijiy filologiya, chet tili va tarjima yoʻnalishlarining kasbiy va maxsus fanlari oʻqituvchilari bundan mustasno), shu jumladan mehnatga soatbay haq toʻlash shartlarida oʻquv mashgʻulotlari olib boruvchi professor-oʻqituvchilar tarkibiga chet tilida ayrim maxsus oʻquv fanlarini oʻqitganlik uchun fanni oʻqitish kursining davomiyligiga va chet tilini oʻqitish kasb mahoratiga qarab budjet mablagʻlari hisobiga ularning lavozim maoshlariga bazaviy lavozim maoshining (mehnatga soatbay haq toʻlash miqdorining) 25 foizidan 40 foizigacha boʻlgan miqdorda oylik ustamalar belgilanadi.

Shtatdagi professor-oʻqituvchilar tarkibi uchun chet tilida oʻquv fanini oʻqitish kursining davomiyligi bir semestrda kamida 36 soatni tashkil etishi kerak.

Professor-oʻqituvchilar tarkibining lavozim maoshlariga yuqorida koʻrsatib oʻtilgan ustamalar tegishli fakultetlarning dekanlari taqdimnomalari boʻyicha oliy taʼlim muassasasining rektori (direktori) tomonidan belgilanadi”.