Oʻzbekiston Respublikasi Prezidentining 2012-yil 25-dekabrdagi PQ–1887-son “Oʻzbekiston Respublikasining 2013-yilgi asosiy makroiqtisodiy koʻrsatkichlari va Davlat budjeti parametrlari toʻgʻrisida”gi qarorning (Oʻzbekiston Respublikasi qonun hujjatlari toʻplami, 2012-y., 52-son, 587-modda) 4-bandiga muvofiq Oʻzbekiston Respublikasi Moliya vazirligi, Iqtisodiyot vazirligi va Davlat soliq qoʻmitasi qaror qiladilar:

1. Maxsus investitsiya ustama haqini “Oʻzbekneftgaz” MXKning maxsus schyotiga oʻtkazish tartibi toʻgʻrisidagi nizom ilovaga muvofiq tasdiqlansin.

2. Mazkur qaror rasmiy eʼlon qilingan kundan eʼtiboran kuchga kiradi.

Mazkur Nizom Oʻzbekiston Respublikasi Prezidentining 2012-yil 25-dekabrdagi PQ–1887-son “Oʻzbekiston Respublikasining 2013-yilgi asosiy makroiqtisodiy koʻrsatkichlari prognozi va Davlat budjeti parametrlari toʻgʻrisida”gi qarori (Oʻzbekiston Respublikasi qonun hujjatlari toʻplami, 2012-y., 52-son, 587-modda) 4-bandiga muvofiq maxsus investitsiya ustama haqini “Oʻzbekneftgaz” MXKning maxsus schyotiga oʻtkazish tartibini belgilaydi.

1. Mazkur Nizomda quyidagi tushunchalar qoʻllaniladi:

tabiiy gaz yetkazib beruvchi — tabiiy gaz sotishni amalga oshiruvchi “Oʻztransgaz” aksiyadorlik kompaniyasi va uning tarkibiy tuzilmasiga kiruvchi tashkilotlar;

avtomobil gaz toʻldirgich kompressor stansiyasi — tabiiy gaz isteʼmolchisi hisoblanib, siqilgan tabiiy gaz bilan avtotransport vositalari yonilgʻi tizimi ballonlarini toʻldirish uchun moʻljallangan texnologik tizimga ega boʻlgan stansiya (shu jumladan oʻz balansida avtomobil gaz toʻldirgich kompressor stansiyalari boʻlgan yuridik shaxslar);

maxsus investitsiya ustama haqi — miqdori Oʻzbekiston Respublikasi Prezidentining qarorlari bilan tasdiqlanadigan, tabiiy gaz yetkazib beruvchi tomonidan avtomobil gaz toʻldirgich kompressor stansiyalariga sotiladigan tabiiy gazning ulgurji-sotish narxiga qoʻyiladigan ustama.

2. Maxsus investitsiya ustama haqi summasi tabiiy gaz yetkazib beruvchi tomonidan quyidagi formula orqali aniqlanadi:

MIUS — maxsus investitsiya ustama haqi summasi;

Mmius — oʻrnatilgan tartibda tasdiqlangan maxsus investitsiya ustama haqi miqdori;

V — tabiiy gaz yetkazib beruvchi tomonidan avtomobil gaz toʻldirgich kompressor stansiyalariga sotiladigan tabiiy gaz hajmi.

3. Maxsus investitsiya ustama haqi summasi:

barcha turdagi soliqlar va boshqa majburiy toʻlovlarni hisoblashda tabiiy gaz yetkazib beruvchining soliq solinadigan bazasiga kiritilmaydi hamda Oʻzbekiston Respublikasi Moliya vazirligining 2002-yil 27-dekabrdagi 140-son “Moliyaviy hisobot shakllari va ularni toʻldirish boʻyicha qoidalarni tasdiqlash toʻgʻrisida”gi buyrugʻi (roʻyxat raqami 1209, 2003-yil 24-yanvar) (Oʻzbekiston Respublikasi vazirliklari, davlat qoʻmitalari va idoralarining meʼyoriy hujjatlari axborotnomasi, 2003-y., 1-2-son) bilan tasdiqlangan 2-son shaklga muvofiq Moliyaviy natijalar toʻgʻrisida hisobotda koʻrsatilmaydi;

“Oʻzbekneftgaz” MXK va uning tarkibiga kiruvchi tashkilotlar uchun maqsadli tushum hisoblanadi va soliqqa tortilmaydi;

avtomobil gaz toʻldirgich kompressor stansiyalari tomonidan tabiiy gaz yetkazib beruvchidan qabul qilingan tabiiy gaz hajmlari uchun toʻlanishi lozim.

Avtomobil gaz toʻldirgich kompressor stansiyalari barcha turdagi soliqlar va boshqa majburiy toʻlovlarni oʻrnatilgan tartibda toʻlaydilar. Bunda, yagona soliq toʻlovi tushumdan transport vositalari uchun siqilgan gazni ishlatganlik uchun olinadigan soliqni chegirgan holda toʻlanadi.

4. Avtomobil gaz toʻldirgich kompressor stansiyalari maxsus investitsiya ustama haqi summalarini tabiiy gaz yetkazib beruvchining maxsus schyotiga oʻtkazib berilishini, yetkazib berish shartnomasida belgilangan muddatlarda amalga oshiradi.

5. Tabiiy gaz yetkazib beruvchi avtomobil gaz toʻldirgich kompressor stansiyalaridan kelib tushgan maxsus investitsiya ustama haqi summalarini “Oʻzbekneftgaz” MXK tomonidan xizmat koʻrsatuvchi bankda ochilgan maxsus schyotga oʻtkazadi.

6. “Oʻzbekneftgaz” MXK maxsus schyotida jamlanadigan maxsus investitsiya ustama haqi summalari investitsiya dasturlariga kiritilgan obyektlarni moliyalashtirish, ishlab chiqarish quvvatlarini modernizatsiya qilish va texnologik jihatdan qayta jihozlashda, shuningdek ushbu maqsadlarga jalb etilgan kreditlar va budjet qarzlarini toʻlashda foydalaniladi.

7. Maxsus investitsiya ustama haqi summalari:

tabiiy gaz yetkazib beruvchi tomonidan avtomobil gaz toʻldirgich kompressor stansiyalariga taqdim etiladigan hisob-fakturada alohida qatorda qayd etiladi;

avtomobil gaz toʻldirgich kompressor stansiyalari tomonidan tabiiy gaz uchun toʻlov amalga oshirilayotgan bir vaqtda, alohida toʻlov topshiriqnomasi orqali “toʻlov maqsadi” satrida toʻlovning mazkur Nizomga asosan amalga oshirilganligini koʻrsatgan holda oʻtkazib beriladi;

mazkur Nizomga muvofiq maxsus investitsiya ustama haqidan foydalanish maqsadlariga tegishli boʻlmagan boshqa toʻlovlarga yoʻnaltirilmaydi.

8. Maxsus investitsiya ustama haqini toʻgʻri hisoblanishi ustidan nazorat tabiiy gaz yetkazib beruvchi tomonidan qonun hujjatlariga muvofiq amalga oshiriladi.

9. Mazkur Nizomga rioya qilinishi yuzasidan javobgarlik bevosita avtomobil gaz toʻldirgich kompressor stansiyalari, “Oʻzbekneftgaz” MXK va uning tarkibiga kiruvchi tashkilotlarning rahbarlari va bosh buxgalterlariga yuklatiladi.

10. Mazkur Nizom “Oʻzbekneftgaz” MXK bilan kelishilgan.