Oʻzbekiston Respublikasi hududida havo kemalari parvozlarining xavfsizligini taʼminlash va lazerli nur tarqatgichlarni noqonuniy ishlatishning oldini olish maqsadida Vazirlar Mahkamasi qaror qiladi:

1. Belgilansinki, Oʻzbekiston Respublikasi hududida quyidagilar taqiqlansin:

a) xalqaro standartlar boʻyicha xavflilik darajasi 3R, 3B va 4-klassga (sinfga) mansub boʻlgan lazer nurli koʻrsatkichlar sifatida foydalaniladigan portativ lazerli nur tarqatgichlarni (TIF TN kodi 9013200000) ishlab chiqarish, tayyorlash, saqlash, tashish, joʻnatish, Oʻzbekiston Respublikasidan olib chiqish, oʻtkazish yoki Oʻzbekiston Respublikasiga olib kirish hamda ulardan foydalanish;

b) jismoniy shaxslar tomonidan foydalanishi mumkin boʻlgan lazerli koʻrsatkichlar nurini:

koʻchalarda, xiyobonlarda, istirohat bogʻlarida, jamoat transportida, boshqa jamoat joylarida odamlar va hayvonlarning yuziga (koʻziga) yoʻnaltirish;

ommaviy tadbirlar, jumladan, konsert-tomosha tadbirlari, sport musobaqalari oʻtkazilayotgan maydonlar va inshootlarda ularning ishtirokchilari, tomoshabinlar yoki boshqa shaxslarning yuziga (koʻziga) qaratish;

turar va noturar joylarning derazalariga, har qanday turdagi transport vositalariga (havo kemasi, temir yoʻl transporti, avtomototransport va boshqalar) va ularni boshqarayotgan shaxslarga yoʻnaltirish;

videokuzatuv kameralari va xavfsizlik tizimlariga yoʻnaltirish.

2. Oʻzbekiston Respublikasi Iqtisodiyot va moliya vazirligi huzuridagi Bojxona qoʻmitasi, Soliq qoʻmitasi, Davlat xavfsizlik xizmatining Chegara qoʻshinlari hamda Ichki ishlar vazirligi lazerli koʻrsatkichlarni qonunga xilof ravishda ishlab chiqarish, tayyorlash, foydalanish, saqlash, tashish, joʻnatish, Oʻzbekiston Respublikasidan olib chiqish, oʻtkazish yoki Oʻzbekiston Respublikasiga olib kirish hamda sotish holatlarini aniqlash va bartaraf etish, aybdor shaxslarni javobgarlikka tortish boʻyicha zarur chora-tadbirlar koʻrsinlar.

3. Oʻzbekiston Respublikasi Parvozlar xavfsizligini nazorat qilish davlat inspeksiyasi ikki oy muddatda idoraviy normativ-huquqiy hujjatlarga uchuvchilarning kabinalari lazerli koʻrsatkichlar bilan nurlangan taqdirda havo kemalari ekipajlarining ishlash tartibini nazarda tutuvchi qoʻshimchalar kiritsin.

4. Oʻzbekiston Respublikasi Taʼlim va ilm-fan vazirligi, Oʻzbekiston Milliy teleradiokompaniyasi, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari oʻquvchilar va yoshlar, ularning ota-onalari oʻrtasida lazerli koʻrsatkichlarni odamga va parvoz qilayotgan havo kemalariga qaratishning salbiy oqibatlari toʻgʻrisida tushuntirish ishlari olib borilishini taʼminlasinlar.

5. Ushbu qarorning bajarilishini nazorat qilish Oʻzbekiston Respublikasi Bosh vazirining oʻrinbosari — iqtisodiyot va moliya vaziri J.A. Qoʻchqorov zimmasiga yuklansin.