Oʻzbekiston Respublikasi Favqulodda vaziyatlar vazirligi, Davlat chegaralarini himoya qilish qoʻmitasi, Oʻzbekiston Respublikasi Ichki ishlar vazirligining ichki va qorovullik qoʻshinlari Bosh boshqarmalari hamda Mudofaa vazirligining harbiy okruglari tashkil etilganligi munosabati bilan va Oʻzbekiston Respublikasi Qurolli Kuchlarida, harbiy idoralarda va vazirliklar hamda idoralarning harbiylashtirilgan tarkibiy boʻlinmalarida qonunchilikka rioya etilishi ustidan prokuror nazoratining toʻlaligi va samaradorligini taʼminlash maqsadida:

1. .Oʻzbekiston Respublikasi Qurolli Kuchlarining Harbiy prokuraturasi negizida mavjud lavozimlar soni va mehnat haqi fondi doirasida Oʻzbekiston Respublikasining Harbiy prokuraturasi tashkil qilinib, uning tarkibida harbiy okruglarning toʻrtta harbiy prokuraturasi tuzilsin.

Oʻzbekiston Respublikasi Prokuraturasi rahbariyati tarkibiga Bosh prokurorning oʻrinbosari — Oʻzbekiston Harbiy prokurori lavozimi qoʻshimcha ravishda kiritilsin.

2. Oʻzbekiston Respublikasi Harbiy prokuraturasining tuzilmasi 1, 2-ilovalarga* muvofiq tasdiqlansin.

3. Oʻzbekiston Respublikasining Prokuraturasi (U. Xudoyqulov) ikki hafta muddatda Oʻzbekiston Respublikasining Harbiy prokuraturasi toʻgʻrisidagi Nizomni ishlab chiqib, tasdiqlasin.

4. Oʻzbekiston Respublikasi Adliya vazirligi (S. Mirsafoyev) Oʻzbekiston Respublikasi Prokuraturasi (U. Xudoyqulov) bilan birgalikda bir oy muddatda amaldagi qonun hujjatlariga oʻzgartish va qoʻshimchalar toʻgʻrisidagi takliflarni kiritsin.

5. Oʻzbekiston Respublikasi Mudofaa vazirligi (H. Tursunov) Oʻzbekiston Respublikasi Harbiy prokuraturasi va uning tarkibiy boʻlinmalarini zarur moliyaviy, moddiy-texnikaviy jihatdan taʼminlasin, shaxsiy tarkibning harbiy xizmatchilar huquqiy maqomi hamda pul va boshqa taʼminotning barcha turlari saqlab qolinsin.

6. Ushbu Farmonning bajarilishini nazorat qilish Oʻzbekiston Respublikasi Prezidentining Davlat maslahatchisi A. Nosirov zimmasiga yuklansin.