Oʻzbekiston Respublikasining “Pochta aloqasi toʻgʻrisida”gi Qonuni (Oʻzbekiston Respublikasi qonun hujjatlari toʻplami, 2009-yil, 17-son, 209-modda), Oʻzbekiston Respublikasi Prezidentining 2012-yil 16-oktabrdagi PF–4475-son “Oʻzbekiston Respublikasi Aloqa, axborotlashtirish va telekommunikatsiya texnologiyalari davlat qoʻmitasini tashkil etish toʻgʻrisida”gi Farmoni, Oʻzbekiston Respublikasi Prezidentining 2012-yil 23-oktabrdagi PQ–1836-son “Oʻzbekiston Respublikasi Aloqa, axborotlashtirish va telekommunikatsiya texnologiyalari davlat qoʻmitasi faoliyatini tashkil etish toʻgʻrisida”gi qaroriga muvofiq Oʻzbekiston Respublikasi Aloqa, axborotlashtirish va telekommunikatsiya texnologiyalari davlat qoʻmitasi qaror qiladi:

1. Pochta, kuryerlik joʻnatmalari pochta xavfsizligi yuzasidan nazoratni amalga oshirish tartibi toʻgʻrisidagi yoʻriqnoma ilovaga muvofiq tasdiqlansin.

2. Mazkur qaror rasmiy eʼlon qilingan kundan eʼtiboran kuchga kiradi.

Ushbu Yoʻriqnoma Oʻzbekiston Respublikasining “Pochta aloqasi toʻgʻrisida”gi Qonuni, Oʻzbekiston Respublikasi Prezidentining 2015-yil 4-fevraldagi PF-4702-son “Oʻzbekiston Respublikasi Axborot texnologiyalari va kommunikatsiyalarini rivojlantirish vazirligini tashkil etish toʻgʻrisida”gi Farmoni va Oʻzbekiston Respublikasi Vazirlar Mahkamasining 2018-yil 1-maydagi 318-son “Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi hamda Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi huzuridagi Aloqa, axborotlashtirish va telekommunikatsiya texnologiyalari sohasida nazorat boʻyicha inspeksiya toʻgʻrisidagi nizomlarni tasdiqlash haqida”gi qaroriga muvofiq pochta aloqasi operatorlari va provayderlari tomonidan pochta, kuryerlik joʻnatmalarida odamlar hayoti va sogʻligʻi uchun xavfli boʻlgan predmetlar va moddalarni aniqlash boʻyicha nazoratni tashkil etish va oʻtkazish tartibini belgilaydi.

1. Ushbu Yoʻriqnomada quyidagi asosiy tushunchalar qoʻllaniladi:

pochta, kuryerlik joʻnatmalari nazorati — pochta, kuryerlik joʻnatmalarini ularda xavfli pochta, kuryerlik joʻnatmalarini aniqlash maqsadida vizual koʻrikdan oʻtkazish va texnik nazorat vositalarini qoʻllash orqali tekshirish;

xavfli pochta, kuryerlik joʻnatmalari – Pochta aloqasi xizmatlarini koʻrsatish qoidalarining (roʻyxat raqami 2219, 2011-yil 18-aprel) (Oʻzbekiston Respublikasi qonun hujjatlari toʻplami, 2011-y., 16-son, 167-modda) 3-ilovasi 1-bandi “a” va “b” kichik bandlarida koʻrsatib oʻtilgan predmetlar va moddalar yoki ularning belgilarini oʻz ichiga olgan joʻnatmalar;

vakolatli organlar — Oʻzbekiston Respublikasi Ichki ishlar vazirligi, Favqulodda vaziyatlar vazirligi, Davlat xavfsizlik xizmati, Oʻzbekiston Respublikasi Sanitariya-epidemiologik osoyishtalik va jamoat salomatligi xizmati;

texnik nazorat vositalari — xavfli pochta, kuryerlik joʻnatmalarini aniqlash uchun qoʻllaniladigan maxsus texnika (metallodetektorlar, rentgen texnikasi, dozimetrlar, gaz analizatorlari va boshqalar).

2. Pochta, kuryerlik joʻnatmalari nazorati ularni qabul qilish, saralash va ishlov berishni amalga oshiruvchi pochta aloqasi operatorlari, provayderlariga yuklatiladi.

3. Pochta aloqasi operatorlari, provayderlari pochta, kuryerlik joʻnatmalari nazoratini amalga oshirish uchun ish joylari ajratilishini tashkillashtiradi.

Pochta, kuryerlik joʻnatmalari nazorati uchun kerakli boʻlgan joylarning miqdori pochta aloqasi operatori, provayderi tomonidan nazorat qilinishi kerak boʻlgan pochta, kuryerlik joʻnatmalari hajmidan kelib chiqqan holda belgilanadi.

4. Pochta, kuryerlik joʻnatmalari nazorati joylari quyidagilar bilan jihozlangan boʻlishi kerak:

noqulay sanitariya-epidemiologik sharoitga, karantin va observatsiya zonalariga ega mamlakatlar roʻyxati (bunday mamlakatlar roʻyxati Respublika karantin va oʻta xavfli infeksiyalarni profilaktika qilish markazining maʼlumotlari boʻyicha tuziladi);

pochta, kuryerlik joʻnatmalari yuqori eʼtiborni talab etadigan mamlakatlar roʻyxati (bunday mamlakatlar roʻyxati Oʻzbekiston Respublikasi Tashqi ishlar vazirligining maʼlumotlari boʻyicha tuziladi);

Pochta aloqasi xizmatlarini koʻrsatish qoidalarining (roʻyxat raqami 2219, 2011-yil 18-aprel) 3-ilovasi 1-bandi “a” va “b” kichik bandlarida koʻrsatib oʻtilgan predmetlar va moddalar, shuningdek ularning belgilari roʻyxati;

texnik nazorat vositalari;

ushbu Yoʻriqnomaning 1-ilovasiga muvofiq favqulodda vaziyatlar yuzaga kelganda xabardor qilish sxemasi (bundan buyon matnda xabardor qilish sxemasi deb yuritiladi);

xavfli pochta, kuryerlik joʻnatmalari aniqlanganda xatti-harakatlar toʻgʻrisidagi qoʻllanma;

xavfli pochta, kuryerlik joʻnatmalarini ajratib qoʻyish vositalari;

yakka tartibda himoyalanish vositalari;

vakolatli organlarning tezkor boʻlinmalari (navbatchi qismlari) bilan bogʻlanish telefonlarining roʻyxati.

5. Pochta aloqasi operatorlari, provayderlari kelib tushadigan pochta, kuryerlik joʻnatmalarini kiruvchi pochta, kuryerlik joʻnatmalarini qabul qilish, ularga ishlov berish (saralash)da, shuningdek joʻnatiladigan pochtani joʻnatishdan oldin amalga oshiriladigan vizual koʻrikdan oʻtkazish yoʻli bilan qabul qilish hamda shubhali pochta, kuryerlik joʻnatmalarini texnik nazorat vositalari bilan tekshirishning tartib-taomillarini tashkil qilishga majburdir.

6. Pochta aloqasi operatori, provayderi tomonidan xavfli pochta, kuryerlik joʻnatmalari aniqlanganda, bunday joʻnatmalar mazkur Yoʻriqnomada oʻrnatilgan talablarga rioya qilingan va ushbu Yoʻriqnomaning 2-ilovasiga muvofiq shaklda dalolatnoma tuzilgan holda ajratib qoʻyiladi.

Dalolatnoma pochta aloqasi operatori, provayderi tomonidan ikki nusxada tuziladi, birinchi nusxasi xavfli pochta, kuryerlik joʻnatmasi aniqlangan boʻlinmalarning hujjatlariga qoʻshib qoʻyiladi, dalolatnomaning ikkinchi nusxasi ushbu joʻnatmalar olingan operator yoki provayder vakiliga beriladi.

7. Pochta, kuryerlik joʻnatmalarida joʻnatilishi taqiqlangan predmetlar va moddalar aniqlangan taqdirda, Pochta aloqasi xizmatlarini koʻrsatish qoidalarining (roʻyxat raqami 2219, 2011-yil 18-aprel) 184-bandiga muvofiq huquqni muhofaza qiluvchi organlarning xodimlari pochta aloqasi obyektining rahbari (uning oʻrinbosari) ishtirokida, bayonnoma tuzish bilan qonun hujjatlariga muvofiq taqiqlangan predmetlar va moddalarning olib qoʻyilishini amalga oshiradi va bayonnomaning bir nusxasi joʻnatuvchiga yuboriladi. Yuborish taqiqlangan predmetlar va moddalarning olib qoʻyilishi yoki yoʻq qilinganligi toʻgʻrisida hududiy pochta aloqasi tashkilotlarining rahbarlari oʻn kun muddat ichida yozma shaklda joʻnatuvchi yoki adresatga xabar beradi, koʻrsatilgan predmetlar va moddalar topilganligi fakti boʻyicha huquqni muhofaza qiluvchi organlar tomonidan tezkor-qidiruv tadbirlarini oʻtkazish toʻgʻrisida qaror qabul qilingan hollar bundan mustasno.

8. Vizual koʻrikdan oʻtkazuvchi xodim quyidagilarga alohida ahamiyat berishga majburdir:

cheklovchi yozuvlar (masalan, “Oʼz qoʼliga topshirilsin. Buyurtma bildirishnoma bilan” — “Vruchit lichno. S zakaznim uvedomleniyem” va hokazo) boʻlgan pochta, kuryerlik joʻnatmalari;

yozuv mashinkasida yomon yozilgan yoki pochta manzillari qoʻlda yozilgan, pochta manzillari toʻliq yozilmagan pochta, kuryerlik joʻnatmalari;

joʻnatuvchilarning pochta manzillari va familiyalari koʻrsatilmagan pochta, kuryerlik joʻnatmalari;

pochta manzillari kesilgan va yopishtirilgan harflardan tuzilgan pochta, kuryerlik joʻnatmalari;

mashhur madaniyat va sanʼat arboblari, atoqli davlat, ijtimoiy-siyosiy va diniy arboblar, siyosiy partiyalar yetakchilariga moʻljallangan pochta, kuryerlik joʻnatmalari;

oʻrovlash usuli: shoshilib berkitilgan konvert yoki ortiq darajada oʻrovlangan va berkitilgan (plastik oʻrov, kanop ip); qogʻoz oʻrovdagi posilkalar va hokazo; konvertlarni yopishqoq tasma bilan puxta berkitish yoki ikkinchi (qoʻsh) konvertdan foydalanish;

ortiqcha miqdordagi pochta markalarining mavjudligi;

ogʻirlikning siljigan markaziga ega, konvert tekisligi boʻyicha notekis yoʻgʻonlashishga ega yoki ogʻir pochta, kuryerlik joʻnatmalari;

bukilmaydigan paketlar;

oʻrovdan chiqib turgan metall simlar yoki folga va ulardan qolgan teshiklar;

marsipan hidlari yoki boshqa kuchli hidlar;

mexanizmlarning chiqillashi yoki hushtak ovozi va vishillashni eslatadigan tovushlarning (soatlar, vaqt datchiklari yoki siqilgan gazlar) mavjudligi;

pochta, kuryerlik joʻnatmalarining oʻrovidagi yogʻ dogʻlari (izlari).

9. Vizual koʻrikdan oʻtkazuvchi xodim umumiy xavfsizlik choralariga rioya qilishi kerak.

10. Kelib tushgan pochta, kuryerlik joʻnatmalari pochtaga ishlov berish va saralashni amalga oshiruvchi pochta aloqasi operatori, provayderining xodimlari tomonidan tekshirib chiqiladi.

11. Texnik nazorat vositalari uchun masʼul shaxs (bundan buyon matnda masʼul xodim deb yuritiladi) pochta aloqasi operatori, provayderining buyrugʻi bilan xavfsizlik uchun masʼul boʻlgan xodimlar orasidan tayinlanadi.

Masʼul xodimlar xavfli pochta, kuryerlik joʻnatmalarni aniqlash usullari va metodlari boʻyicha maxsus oʻquv mashgʻulotlaridan oʻtgandan, texnik vositalarni ekspluatatsiya qilish qoidalari boʻyicha imtihonlarni topshirgandan keyin texnik nazorat vositalari bilan ishlashga qoʻyiladi.

12. Masʼul xodim ish joylarida texnik xarakteristikalar, ushbu asbobni ekspluatatsiya qilish boʻyicha koʻrsatmalar va uni qoʻllashda xavfsizlik choralarini hisobga olgan holda texnik nazorat vositalarini joylashtirishi va ulardan foydalanishi kerak. Texnik nazorat vositalari taʼminlangan tartibda saqlanadi, ularni saqlash shartlari tayyorlovchi zavodning normativ-texnik hujjatlarida belgilangan talablarga muvofiq boʻlishi kerak.

13. Pochta aloqasi operatori, provayderining masʼul xodimlari pochta, kuryerlik joʻnatmalari nazoratini texnik nazorat vositalari yordamida ekspluatatsiya qilish boʻyicha qoʻllanma (yoʻriqnoma)ga muvofiq hamda tayyorlovchi zavod tomonidan va ushbu Yoʻriqnomada oʻrnatilgan xavfsizlik choralariga rioya qilgan holda amalga oshiradilar.

14. Pochta, kuryerlik joʻnatmalari nazorati pochtani belgilangan joyga joʻnatish muddatlariga rioya qilingan holda amalga oshiriladi.

15. Rentgen texnikasi pochta, kuryerlik joʻnatmalarini rentgen nurlanishi yordamida tekshirish uchun moʻljallangan boʻlib, tekshiriladigan pochta, kuryerlik joʻnatmalarining tarkibini koʻz bilan kuzatish va joylanmaning ayrim predmetlarini identifikatsiyalash imkonini beradi.

16. Rentgen uskunasi oʻrnatilgan joy xavfli pochta, kuryerlik joʻnatmalarining namunali rasmlari va rentgenogrammalari bilan jihozlanadi.

17. Dozimetrlar pochta, kuryerlik joʻnatmalarida ionlanuvchi nurlanish manbalarini, shu jumladan radioaktiv moddalarni aniqlash uchun qoʻllaniladi.

18. Radioaktiv moddalar pochta, kuryerlik joʻnatmalarida kukunsimon massa yoki radioaktiv nurlanish manbalari boʻlib hisoblangan predmetlar koʻrinishida joʻnatilishi mumkin.

19. Pochta, kuryerlik joʻnatmalarni tekshirib koʻrishda dozimetrning raqamli tablosidagi koʻrsatkichlarni hisoblash oʻlchashning belgilangan kichik diapazon birliklarida amalga oshiriladi.

20. Tabiiy radiatsion fonning yoʻl qoʻyiladigan darajasi sifatida Qoraqalpogʻiston Respublikasi, viloyatlar va Toshkent shahar sanitariya-epidemiologik osoyishtalik va jamoat salomatligi boshqarmalari tomonidan belgilangan radiatsion xavfsizlik normalari qoʻllaniladi.

21. Portlovchi moddalarning gaz analizatori pochta, kuryerlik joʻnatmalarida portlovchi, yengil alangalanadigan moddalarning mavjudligini aniqlash uchun qoʻllaniladi. Aniqlash tekshirilayotgan pochta, kuryerlik joʻnatmalarining ust qismidan yoki ichki hajmidan havoning namunasini tanlab olish va portlovchi, tez alanga oluvchi moddalar bugʻlariga xos boʻlgan komponentlarning mavjudligi yuzasidan namunalarni tahlil qilish yoʻli bilan amalga oshiriladi. Ushbu maqsadlar uchun portativ dreyfspektrometrik gaz analizatorlari qoʻllaniladi.

Pochta, kuryerlik joʻnatmalarida narkotik, yengil alangalanadigan moddalar, toksik sanoat moddalari mavjudligini aniqlashda shu maqsadlar uchun moʻljallangan ekspress-analizatorlar qoʻllanilishi kerak.

22. Namunalarni tanlab olish zonasida jadal havo oqimlari (shamol, yelvizak va hokazolar) mavjud boʻlganda tekshirish joyini ulardan muhofaza qilish zarur.

23. Yozma xat-xabarlarda metall predmetlarni aniqlash uchun metallodetektorlardan foydalaniladi.

24. Metallodetektorning talab etiladigan sezgirligini oʻrnatish uchun, unga ilova qilinadigan, tayyorlovchi zavodning normativ-texnik hujjatlarida belgilangan talablarga muvofiq kalibrlash zarur.

25. Nazorat tugagandan keyin pochta aloqasi operatori, provayderi kelib tushgan pochtaga ilova qilingan hujjatlarga nazorat oʻtkazilganligi toʻgʻrisida belgi qoʻyadi va unda nazorat oʻtkazilgan joy, nazorat oʻtkazilgan sana va vaqt koʻrsatiladi. Belgi ushbu nazoratni oʻtkazgan shaxsning imzosi bilan tasdiqlanadi.

Ushbu Yoʻriqnomaning V bobiga muvofiq ajratilgan pochta, kuryerlik joʻnatmalari pochta aloqasi operatori, provayderi tomonidan xabardor qilish sxemasiga muvofiq vakolatli organlarga topshirish uchun olib qoʻyiladi. Ilova qilingan hujjatlarda sana va vaqti koʻrsatilgan holda “Olib qoʻyildi” deb belgi qoʻyiladi va uni qoʻygan shaxs tomonidan imzo bilan tasdiqlanadi.

26. Vakolatli organlardan, avval olib qoʻyilgan va tekshirish uchun topshirilgan roʻyxatga olinadigan pochta, kuryerlik joʻnatmalari qaytarilgan holatda pochta aloqasi operatori, provayderi tomonidan alohida yukxat tuziladi, bu yukxat boʻyicha pochta, kuryerlik joʻnatmalarini belgilangan joyga keyinchalik joʻnatish uchun topshirish amalga oshiriladi. Nazorat oʻtkazilganligi toʻgʻrisidagi yozuv yozilgan yukxat ikki nusxada tuziladi, yukxatning birinchi nusxasi pochta, kuryerlik joʻnatmalari bilan birga topshiriladi, yukxatning ikkinchi nusxasi pochta aloqasi operatori, provayderida qoladi. Oddiy pochta joʻnatmalari pochta aloqasi operatori, provayderi tomonidan avval tuzilgan ushbu pochta, kuryerlik joʻnatmalarini ajratish toʻgʻrisidagi dalolatnomaning birinchi nusxasiga imzo qoʻyilib belgilangan joyga joʻnatish uchun topshiriladi.

27. Umumiy yukxatlarda nazorat oʻtkazilganligi toʻgʻrisidagi yozuvlar mavjud boʻlmagan holatda butun pochta odatdagi tartibda qabul qilinadi, bunda pochtani joʻnatgan pochta aloqasi operatori, provayderining rahbari nomiga xabarnoma yuboriladi.

28. Xabarnomada quyidagi maʼlumotlar koʻrsatiladi: pochta, kuryerlik joʻnatmalarini qabul qilish raqami, joyi va sanasi, hujjat tuzilgan joyi va sanasi, qayerdan va qanday hujjatlar bilan kelib tushganligi koʻrsatiladi, keyin tekshiruv vaqtida aniqlangan barcha kamchiliklar sanab oʻtiladi. Belgilar tekshiruvchi xodimning imzosi bilan tasdiqlanadi.

29. Xavfli pochta, kuryerlik joʻnatmalari pochta aloqasi operatori, provayderi tomonidan boshqa pochta, kuryerlik joʻnatmalaridan maxsus ajratilgan joyga alohida olib qoʻyilishi kerak, bu yerda ular vakolatli organlarning vakillari kelgunga qadar va ular xavf tugʻdirmasligi tasdiqlanmaguncha saqlanadi. Ushbu joyga bino ichidagi turli joylaridan qulay kelish yoʻli belgilanishi lozim va ushbu yoʻl oʻtish uchun toʻsiqlarsiz boʻsh holatda taʼminlab turilishi kerak.

30. Xavfli pochta, kuryerlik joʻnatmalarini ajratish vositalari sifatida maxsus konteynerlar, seyflar, temir javonlar, qutichalar, zich berkitiladigan sigʻimlar va boshqa shu kabilar boʻlishi mumkin.

31. Tarkibida portlovchi moddalar yoki portlovchi qurilmalarning mavjudligi belgilariga ega pochta, kuryerlik joʻnatmalari ajratilmaydi. Vakolatli organlarning vakillari kelgunga qadar bunday shubhali pochta, kuryerlik joʻnatmasi bilan har qanday harakatlarni amalga oshirishga yoʻl qoʻyilmaydi.

32. Xavfli pochta, kuryerlik joʻnatmalari aniqlanganda pochta aloqa operatori, provayderi zudlik bilan xabardor qilish sxemasiga muvofiq faktlar va koʻrilgan choralar toʻgʻrisida vakolatli organlarga axborot beradi.

33. Axborot oʻz ichiga quyidagilarni olishi kerak:

xavfli pochta, kuryerlik joʻnatmalari aniqlangan pochta aloqasi operatori, provayderi boʻlinmasining nomi va uning pochta manzili;

boʻlinma boshligʻining familiyasi, ismi va otasining ismi;

xavfli pochta, kuryerlik joʻnatmalarini aniqlagan xodim familiyasi, ismi va otasining ismi, aniqlangan sana va vaqti, shubha tugʻdirgan sabablar;

xavfli pochta, kuryerlik joʻnatmasining toʻliq maʼlumotlari: pochta, kuryerlik joʻnatmasining turi, qabul qilingan joyi, raqami, sanasi, eʼlon qilingan qiymat summasi, joʻnatuvchi va oluvchining manzili, oʻrov, sugʻurta muhrlarining turi va holati, sugʻurta qopining raqami va holati;

koʻrilgan choralar.

34. Xavfli pochta, kuryerlik joʻnatmalari aniqlangan holatda, ushbu joʻnatmalarni vakolatli organlarga topshirish ushbu organlar tomonidan tuziladigan olib qoʻyish toʻgʻrisidagi dalolatnoma asosida pochta aloqasi operatorlari, provayderlari tomonidan amalga oshiriladi. Xavfli pochta, kuryerlik joʻnatmasini olib qoʻyish toʻgʻrisidagi dalolatnomaning birinchi nusxasi pochta aloqasi operatori, provayderining hujjatlariga qoʻshib qoʻyiladi.

35. Xavfli pochta, kuryerlik joʻnatmasini vakolatli organlarga yakuniy xulosa olingunga qadar tekshirishga topshirish boʻyicha nazorat pochta aloqasi operatori, provayderi tomonidan amalga oshiriladi.

36. Pochta, kuryerlik joʻnatmalarini nazorat qiluvchi pochta aloqasi operatori, provayderi xodimlari xavfli pochta, kuryerlik joʻnatmasini aniqlaganda umumiy xavfsizlik choralariga rioya etishga va:

foydalanishda eʼtiborsizlik va manmanlikka yoʻl qoʻymaslik;

tarkibini hidi boʻyicha aniqlashga urinmaslik;

ochmaslik va ichidagi tarkibini olmaslik (toʻkmaslik);

boshqalarga uni tekshirib koʻrishiga yoʻl qoʻymaslik;

shubhali predmetni begona shaxslarning foydalana olmasligi uchun ajratib qoʻyishga majburdir, tarkibida portlovchi moddalar yoki portlovchi qurilmalarning mavjudligi belgilariga ega pochta, kuryerlik joʻnatmalari bundan mustasno.

37. Tarkibida portlovchi moddalar yoki portlovchi qurilmalar mavjudligi belgilariga ega pochta, kuryerlik joʻnatmalari aniqlanganda xavfsizlik choralari quyidagilardan iborat:

pochta, kuryerlik joʻnatmalarini ochmaslik, bukmaslik, tashlamaslik;

unga mexanik, tovush, yorugʻlik taʼsirini oʻtkazmaslik va isitish asboblari yonida saqlamaslik;

cheklangan va zax joyda saqlamaslik;

predmetni suvga tushirmaslik va ustini biror narsa bilan yopmaslik;

uni boshqa pochta, kuryerlik joʻnatmalari yonida saqlamaslik.

38. Pochta aloqasi operatorlari, provayderlari vakolatli organlar bilan birgalikda xavfli pochta, kuryerlik joʻnatmalari aniqlanganda harakatlanish rejasini ishlab chiqishlari kerak.

39. Tarkibida radiatsion, infeksion yoki kimyoviy moddalarning mavjudligi belgilariga ega pochta, kuryerlik joʻnatmalari aniqlanganda xavfsizlik choralari quyidagilardan iborat:

ularni ochmaslik, silkitmaslik va paypaslamaslik;

ularni hid orqali aniqlashga urinmaslik;

shubhali va yonida yotgan pochta, kuryerlik joʻnatmalarini (ularga aniqlangan modda tushgan boʻlsa) germetik plastik paketga, keyin ikkinchi tara (idish) (qopqoqli chelak, seyf, maxsus konteyner va sh.k.)ga joylashtirish;

ushbu joʻnatmaga tegilgan qoʻlqoplar va predmetlarga 3 foizli monoxloramin eritmasida shimdirilgan tampon bilan puxta ishlov berish;

eng sodda yakka tartibda himoyalanish vositalari (respirator, paxta-doka bogʻich, koʻzoynaklar, rezina qoʻlqoplar, maxsus kiyim)dan foydalanish;

ventilyatsiyani oʻchirish, deraza va eshiklarni yopish, begona shaxslar kirishining oldini olish;

keyingi koʻrsatmalar olingunga qadar joyida qolish.

40. Pochta, kuryerlik joʻnatmalarini qabul qilish, saralash va ularga ishlov berishni amalga oshiradigan pochta aloqasi operatorlari, provayderlarining xodimlari xavfli pochta, kuryerlik joʻnatmalari aniqlangan holatda oʻz uchastkalarida qanday choralar koʻrishlari kerakligi toʻgʻrisida yoʻl-yoʻriq olishlari kerak.

41. Pochta aloqasi operatori, provayderining har bir boʻlinmasida favqulodda holatlarda qoʻngʻiroq qilish zarur boʻlgan pochta aloqasi operatorlari, provayderlarining xavfsizligi uchun masʼul boʻlgan shaxslar, vakolatli organlarning (shu jumladan portlovchi moddalar va portlovchi qurilmalarni aniqlash, zararsizlantirish va yoʻq qilish boʻyicha hududiy ichki ishlar organlarining maxsus otryadi, yongʻin boʻlinmalari va boshqa vakolatli organlarning) roʻyxati va telefon raqamlari boʻlishi kerak.

42. Pochta aloqasi operatorlari, provayderlari tomonidan ushbu Yoʻriqnoma talablariga rioya qilishlari ustidan nazorat qonun hujjatlariga muvofiq amalga oshiriladi.

43. Ushbu Yoʻriqnoma Oʻzbekiston Respublikasi Favqulodda vaziyatlar vazirligi, Ichki ishlar vazirligi, Milliy xavfsizlik xizmati, Sogʻliqni saqlash vazirligi, Tashqi ishlar vazirligi va “Oʻzbekiston pochtasi” OAJ bilan kelishilgan.