Yangi tashkil etilayotgan xoʻjalik yurituvchi subyektlar faoliyatini avj oldirish, ishlab chiqarish va xoʻjalik faoliyati uchun real shart-sharoitlarga ega boʻlgan yangi tadbirkorlik tuzilmalari shakllantirilishini, shuningdek belgilangan hisob-kitob tartibiga rioya etilishini taʼminlash maqsadida:

1. Belgilab qoʻyilsinki, 1999-yilning 1-aprelidan boshlab yuridik shaxs huquqlariga ega yangi tashkil etilayotgan savdo va savdo-vositachilik korxonalarini Oʻzbekiston Respublikasi Adliya vazirligida, Qoraqalpogʻiston Respublikasi Vazirlar Kengashida, viloyatlar, shaharlar, tumanlarning hokimliklarida roʻyxatdan oʻtkazish va soliq organlarida hisobga qoʻyish ularda oʻzlarining ustav faoliyatiga mos keladigan savdo maydonlari, omborxonalari hamda asbob-uskunalari, shu jumladan, chakana savdo korxonalari uchun — nazorat-kassa apparatlari yoki ularni xarid qilishga yoxud ijaraga olishga mablagʻlari mavjud boʻlgan taqdirdagina amalga oshiriladi.

Mazkur tartibga rioya qilinishi uchun shaxsiy javobgarlik Qoraqalpogʻiston Respublikasi Vazirlar Kengashining Raisi, viloyatlar va Toshkent shahar hokimlari, shuningdek Davlat soliq qoʻmitasining Raisi va hududiy soliq organlarining rahbarlari zimmasiga yuklansin.

2. Agarda savdo va savdo-vositachilik korxonalari uch oy mobaynida moliya-xoʻjalik faoliyatiga bogʻliq pul operatsiyalarini bank hisobvaraqlari orqali amalga oshirmagan hollarda tijorat banklari:

ularning bank hisobvaraqlari boʻyicha keyingi operatsiyalari oʻtkazishni toʻxtatib qoʻysin (budjetga va budjetdan tashqari jamgʻarmalarga soliqlarni hamda boshqa majburiy toʻlovlarni oʻtkazish bundan mustasno);

xoʻjalik yurituvchi subyektning hisobvaraqlari boʻyicha operatsiyalar toʻxtatilgan sanadan boshlab uch kun muddatda yuridik shaxs faoliyatini bundan buyon davom ettirish maqsadga muvofiq yoki muvofiq emasligi toʻgʻrisida xulosa tayyorlash uchun u hisobga qoʻyilgan joydagi soliq xizmati organiga axborot bersin.

3. Oʻzbekiston Respublikasi Adliya vazirligi va mahalliy hokimiyat organlari davlat soliq xizmati organlarining taqdimnomasiga binoan, moliya-xoʻjalik faoliyatiga bogʻliq pul operatsiyalarini bank hisobvaraqlari orqali amalga oshirmayotgan yuridik shaxslarni belgilangan tartibda xoʻjalik yurituvchi subyektlar reyestridan chiqarsinlar.

4. Xoʻjalik yurituvchi subyekt oʻzining yuridik manzilgohi oʻzgargani haqida roʻyxatga oluvchi organga va soliq xizmati organiga oʻn kun muddat ichida maʼlum qilmagan taqdirda xoʻjalik yurituvchi subyektning mansabdor shaxslariga soliq organlari tomonidan eng oz ish haqi miqdorining 10 baravaridan 15 baravarigacha maʼmuriy jarima solinishi belgilab qoʻyilsin.

5. “Budjet bilan hisob-kitoblar uchun xoʻjalik yurituvchi subyektlarning masʼuliyatini oshirish chora-tadbirlari toʻgʻrisida” Oʻzbekiston Respublikasi Prezidentining 1996-yil 9-avgustdagi PF-1504-son Farmonining 8-bandi savdo va savdo vositachilik korxonalari uchun oʻz kuchini yoʻqotgan deb hisoblansin.

Oʻzbekiston Respublikasi Adliya vazirligi manfaatdor vazirliklar va idoralar bilan birgalikda ikki hafta muddatda qonunchilikka ushbu Farmondan kelib chiqadigan oʻzgartish va qoʻshimchalar toʻgʻrisida takliflar kiritsin.

6. Vazirlar Mahkamasi bir hafta muddatda mazkur Farmonni bajarish yuzasidan qaror qabul qilsin.