Oʻzbekiston Respublikasi Hukumati bilan Rossiya Federatsiyasi Hukumati, bundan keyin “Tomonlar” deb ataluvchilar,

1992-yil 30-maydagi Oʻzbekiston Respublikasi bilan Rossiya Federatsiyasi oʻrtasida davlatlararo munosabatlarning asoslari, doʻstlik va hamkorlik toʻgʻrisida Shartnomaga, 1998-yil 12-oktabrdagi Oʻzbekiston Respublikasi bilan Rossiya Federatsiyasi oʻrtasida 1998—2007-yillarga moʻljallangan iqtisodiy hamkorlikni chuqurlashtirish toʻgʻrisida Shartnomaga, shuningdek boshqa ikki tomonlama shartnomalarga amal qilib,

xalqaro huquq, tenglik, yaxshi qoʻshnichilik va oʻzaro foyda tamoyillari asosida har tomonlama hamkorlikni yanada rivojlantirish va mustahkamlash maqsadida,

iqtisodiy, ilmiy-texnikaviy, insonparvarlik va boshqa sohalarda Oʻzbekiston—Rossiya hamkorligining samaradorligini oshirish zaruratini hisobga olib,

quyidagilar toʻgʻrisida ahdlashib oldilar:

Tomonlar Oʻzbekiston Respublikasi va Rossiya Federatsiyasi oʻrtasida iqtisodiy hamkorlik boʻyicha hukumatlararo komissiya tuzadilar (bundan keyin Komissiya).

Quyidagilar Komissiyaning asosiy vazifalari boʻlib hisoblanadi:

Oʻzbekiston Respublikasi bilan Rossiya Federatsiyasi oʻrtasidagi savdo-iqtisodiy, ilmiy-texnikaviy va insonparvarlik hamkorligini rivojlanishiga koʻmaklashish;

Oʻzbekiston—Rossiya hamkorligining ahvolini tahlil qilish, uning ustuvor yoʻnalishlarini va oʻzaro harakat shakllarini mukammallashtirish yoʻllarini aniqlash;

Oʻzbekiston Respublikasi bilan Rossiya Federatsiyasi oʻrtasida tuzilgan xalqaro shartnoma va boshqa ikki tomonlama kelishuvlarning, jumladan Komissiya yigʻilishlarida qabul qilingan qarorlarning bajarilishini nazorat qilish;

ikki tomonlama davlatlararo, hukumatlararo va muassasalararo loyihalarni tayyorlash boʻyicha Tomonlar davlatlarining vazirlik, muassasa va tashkilotlari faoliyatini muvofiqlashtirish;

Oʻzbekiston Respublikasi bilan Rossiya Federatsiyasi oʻrtasidagi savdo-iqtisodiy, ilmiy-texnikaviy va insonparvarlik hamkorligining dasturlarini tayyorlash va muvofiqlashtirish, shuningdek ularni amalga oshirish boʻyicha kelishilgan choralarni ishlab chiqish;

Komissiya yigʻilishlarini tayyorlash va oʻtkazish.

Komissiya, zarurat boʻlgan holda, ikki tomonlama hamkorlikning alohida yoʻnalishlari boʻyicha uning rahbarligida oʻz faoliyatini amalga oshiradigan kichik komissiyalar va ishchi guruhlarini tashkil qilishi mumkin.

Muntazam yigʻilishlar, shuningdek kichik komissiyalar va ishchi guruhlarining oʻzaro maslahatlashishlari Komissiya ishining asosiy shakli boʻlib hisoblanadi.

Komissiya faoliyatining ishchi tili boʻlib rus tili hisoblanadi.

Komissiya ishining tartibi Komissiya yigʻilishlarida belgilanadi.

Komissiya qarorlari konsensus asosida qabul qilinadi va Komissiya yigʻilishining bayonnomasi imzolangan sanadan boshlab kuchga kiradi. Tomonlar davlatlarini vakolatli organlarining maʼqullashi talab qilinadigan qarorlar Tomonlar ularning maʼqullashlari toʻgʻrisida yozma ravishdagi xabarnomani olgan sanadan boshlab kuchga kiradi.

Komissiya ikkita milliy qismdan — Oʻzbekiston qismidan va Rossiya qismidan iborat boʻladi.

Komissiyaga Oʻzbekiston va Rossiya qismlarining raislari boshchilik qiladilar. Komissiya milliy qismlarining raislari va tarkibini Tomonlar oʻz davlatlarining qonunlariga muvofiq tasdiqlaydilar.

Komissiya yigʻilishlari odatda bir yilda kamida ikki marta navbatma-navbat Oʻzbekiston Respublikasida va Rossiya Federatsiyasida oʻtkaziladi. Komissiya navbatdagi yigʻilishining kun tartibi uning avvalgi yigʻilishida oldindan muvofiqlashtiriladi hamda Tomonlar tarafidan Komissiyaning navbatdagi yigʻilishidan kamida bir oy ilgari batamom aniqlashtiriladi.

Zarurat boʻlgan holda, oʻzaro kelishuvga koʻra, Komissiya milliy qismlarining raislari Komissiyaning navbatdan tashqari yigʻilishlarini chaqirishlari, Komissiya milliy qismlari raislarining ishchi uchrashuvlarini oʻtkazishlari mumkin.

Komissiya va uning organlarining yigʻilishlarini tayyorlash hamda ularda ishtirok etish uchun har bir Tomon oʻz davlatining ekspert va maslahatchilarini, shuningdek tadbirkor doiralarining vakillarini jalb etishi mumkin.

Kichik komissiyalar va ishchi guruhlarining yigʻilishlari zarurat boʻlgan holda oʻzaro kelishuv asosida chaqiriladi.

Yigʻilishlarning axborot taʼminoti, Komissiya materiallari va hujjatlarini tayyorlash hamda tarqatish, shuningdek qabul qilingan qarorlar bajarilishi ustidan keyinchalik nazorat qilish Komissiya milliy qismlarining masʼul kotiblariga yuklanadi.

Shu maqsadda masʼul kotiblar bir-birlari bilan doimiy ish aloqasida boʻladilar va, zarurat boʻlgan holda, Komissiya yigʻilishlari orasidagi davrda uchrashadilar.

Komissiya yigʻilishlarida, Komissiya milliy qismlari raislarining uchrashuvlarida, kichik komissiyalar va ishchi guruhlarining yigʻilishlarida ishtirok etish uchun delegatsiyalarni yuborish bilan bogʻliq xarajatlar yuboruvchi Tomon hisobidan moliyaviy taʼminlanadi.

Komissiya yigʻilishlari, Komissiya milliy qismlari raislarining uchrashuvlari, kichik komissiyalar va ishchi guruhlarining yigʻilishlarini oʻtkazish bilan bogʻliq xarajatlar davlati hududida yigʻilish oʻtkazilayotgan Tomon mablagʻlari hisobidan moliyaviy taʼminlanadi.

Komissiya yigʻilishini va Komissiya milliy qismlari raislarining uchrashuvini oʻtkazish toʻgʻrisidagi qarorni Tomonlar har bir alohida holda qabul qiladilar.

Hamrohlik qiluvchilarni kiritgan holda delegatsiyalar aʼzolarining umumiy soni Komissiya milliy qismlari raislari tomonidan belgilanadi hamda, odatda, har bir tomondan Komissiya yigʻilishida ishtirok etish uchun 20 kishidan va Komissiya milliy qismlari raislarining uchrashuvida ishtirok etish uchun 10 kishidan oshmasligi kerak.

Ushbu Bitimga Tomonlarning oʻzaro roziligi boʻyicha oʻzgartish va qoʻshimchalar kiritilishi mumkin. Ular ushbu Bitimning ajralmas qismi boʻlib hisoblanadigan bayonnoma bilan rasmiylashtiriladi.

Ushbu Bitimni talqin yoki tatbiq qilishda yuzaga keladigan bahsli masalalar muzokaralar yoʻli bilan hal etiladi.

Ushbu Bitim imzolangan sanadan boshlab kuchga kiradi va besh yil davomida amal qiladi. Agar Tomonlardan hech biri Bitim amal qilishining tutashidan kamida olti oy ilgari uning amal qilishini toʻxtatish niyati toʻgʻrisida boshqa Tomonga yozma ravishda xabarnoma yubormasa, ushbu Bitimning amal qilishi keyingi besh yillik davrlarga oʻz-oʻzidan uzaytiriladi.

Moskva shahrida 2001-yil 4-mayda ikki nusxada, har biri oʻzbek va rus tillarida tuzildi, ikkala matn bir xil kuchga ega.