Oʻzbekiston Respublikasi Hukumati bilan Hindiston Respublikasi Hukumati, bundan keyin “Tomonlar” deb ataluvchilar,

axborot va ommaviy axborot vositalari sohasida har tomonlama hamkorlikni rivojlantirishga koʻmaklashish niyatida,

Oʻzbekiston Respublikasi bilan Hindiston Respublikasi oʻrtasida davlatlararo munosabatlar va hamkorlik toʻgʻrisida 1993-yil 24-maydagi Shartnoma, Oʻzbekiston Respublikasi Hukumati bilan Hindiston Respublikasi Hukumati oʻrtasida madaniy hamkorlik toʻgʻrisida 1994-yil 5-yanvardagi Bitim, shuningdek boshqa ahdnomalarga asoslanib,

quyidagilar toʻgʻrisida ahdlashib oldilar:

Tomonlar turmush va madaniyatning turli jihatlarini aks ettiruvchi radio va televideniye dasturlarini ayirboshlash sohasida hamkorlikni ragʻbatlantirishga kelishib oldilar.

Tomonlar biri hukumat axborot xizmati hamda ikkinchisi jurnalistlar tashkilotidan boʻlgan ikkitadan jurnalistni har yili uzogʻi ikki haftalik muddatga almashish imkoniyatini koʻrib chiqadilar.

Tomonlar bir-birlarini oʻz xalqaro kinofestivallarida ishtirok etish uchun delegatsiya almashuvi orqali chaqiradilar.

Tomonlar badiiy va hujjatli filmlar ijodkorlari orasidagi hamkorlikka koʻmaklashadilar.

Tomonlar radio va televideniye translyatsiyasi uchun bir-birlarining hududida turgan radio va televideniye xodimlariga yordam beradilar.

Xodimlarning soni/shtati hamda ularning qabul qiluvchi mamlakatda qancha muddat turishlarini Tomonlar oʻzaro kelishib hal etadilar. Joʻnatuvchi Tomon xalqaro transport xarajatlarini, qabul qiluvchi Tomon esa yashab turish, ovqatlanish va mahalliy transportdan foydalanish xarajatlarini toʻlaydi.

Tomonlar orasida dasturlar/materiallar almashish takliflar va Tomonlardan birining soʻroviga koʻra oldindan shartlashuv asosida bepul amalga oshiriladi.

Yuboriladigan materiallar kelishilgan andozalarga muvofiq yozilgan boʻlib, uning mazmuni ingliz tilidagi matnda qayd qilingan boʻladi. Yuboruvchi Tomon uni oʻrab- joylash va joʻnatish xarajatlarini, qabul qiluvchi Tomon esa bojxona bojlarini toʻlaydi.

Ushbu Bayonnomaga muvofiq almashish uchun berilayotgan materiallardan qabul qiluvchi Tomon oʻz raʼyiga koʻra foydalanadi, biroq ularni uchinchi tomonga berib yuborish yoki sotishga haqli boʻlmaydi.

Materiallarning oʻzgartirilishi yoki qisqartirilishi ularning mazmun-mohiyatini buzib yubormasligi kerak.

Tomonlar ushbu Bayonnoma qoidalarini amalga oshirishda eng yaxshi natijalarga erishish maqsadida Qoʻshma Qoʻmita tuzadilar va u ushbu Bayonnomada eslatib oʻtilgan hamkorlikning turli sohalarida hamkorlikni tashkil qilish uchun har yil maslahatlashuvlar oʻtkazib turadi.

Tomonlarning oʻzaro roziligiga koʻra ushbu Bayonnomaga uning tarkibiy qismi deb hisoblanadigan oʻzgartish va qoʻshimchalar kiritilishi mumkin.

Ushbu Bayonnoma imzolangan kundan boshlab kuchga kiradi va uch yil davomida amal qiladi. Shundan soʻng, Tomonlardan birontasi tegishli muddat tutashidan kamida uch oy ilgari uning faoliyatini toʻxtatish toʻgʻrisida oʻz niyatidan boshqa Tomonni yozma ravishda xabardor qilmasa, uning faoliyati oʻz-oʻzidan keyingi bir yillik muddatlarga uzayadi.

Dehli shahrida, 2000-yil 2-mayda ikki nusxada, oʻzbek, hind va ingliz tillarida tuzildi, bunda barcha matnlar bir xil kuchga ega. Talqin qilishda har xilliklar kelib chiqsa, ingliz tilidagi matn ustuvor hisoblanadi.