Oʻzbekiston Respublikasi Hukumati va Qatar Davlati Hukumati, bundan keyin “Tomonlar” deb ataluvchilar,

atrof-muhit muhofazasi, barqaror taraqqiyot maqsadida tabiiy resurslarni tiklash va muhofaza qilish sohalarida hamkorlik qilishni hamda xalqaro va mintaqaviy tashkilotlarda barqaror taraqqiyot gʻoyasini mustahkamlashni istab,

atrof-muhit muhofazasi sohasidagi hamkorlikni rivojlantirish maqsadida atrof-muhit boʻyicha konferensiyalar hamda xalqaro va mintaqaviy uchrashuvlarda oʻzaro ekologik masalalarni muvofiqlashtirish zarurligini tan olgan holda,

quyidagilar toʻgʻrisida kelishdilar:

Tomonlar atrof-muhitni muhofaza qilish va barqaror taraqqiyot maqsadida tabiiy resurslardan oqilona foydalanish sohalarida tenglik, hamjihatlik va oʻzaro manfaatdorlik prinsiplari asosida ikki tomonlama hamkorlikni mustahkamlash va rivojlantirishga intiladilar.

Tomonlar oʻrtasidagi hamkorlik yoʻnalishlari quyidagilardan iborat:

1) atrof-muhit ifloslanishining oldini olish va bartaraf qilish hamda chiqindilarni tartibga solish;

2) rivojlanish loyihalari boʻyicha atrof-muhitga taʼsirni baholash;

3) atrof-muhit sohasidagi bilimlarni oshirish hamda maʼlumot va tajriba almashish;

4) qoʻriqlanadigan tabiat hududlarini boshqarish;

5) ekologik indikatorlar va barqaror taraqqiyot indikatorlari;

6) urbanizatsiyalashgan (shahar va aholi yashaydigan) hududlardagi atrof-muhitni yaxshilash, sahrolashish va yerlar degradatsiyasi;

7) ekologik turizm;

8) suv resurslari holatini muhofaza qilish va yaxshilash;

9) atrof-muhit muhofazasi va tabiiy resurslardan oqilona foydalanish boʻyicha sanoat va texnologiyalarni rivojlantirish;

10) yoʻqolib ketayotgan biologik turlarni qoʻriqlash va tiklash, xususan lochinlarni koʻpaytirish.

11) atrof-muhit boʻyicha hamkorlikning Tomonlar oʻrtasida oʻzaro kelishilgan boshqa yoʻnalishlari.

Tomonlar quyidagi masalalar boʻyicha kelishuvga erishdilar:

1) atrof-muhit muhofazasi va tabiiy resurslardan oqilona foydalanish sohasidagi maxfiylik xususiyatiga ega boʻlmagan maʼlumotlar, hujjatlar va matbuotdagi chiqishlar bilan muntazam almashib turish.

2) mazkur Memorandumda koʻrsatilgan hamkorlik yoʻnalishlari boʻyicha, har bir holatda tuziladigan alohida bitimlar asosida aniq qoʻshma dasturlar va/yoki loyihalarni amalga oshirish.

3) ekspertlar, tadqiqotchilar va mutaxassislarning oʻzaro tashriflarini amalga oshirish.

Mazkur Memorandumni talqin qilish yoki qoʻllash munosabati bilan yuzaga kelishi mumkin boʻlgan nizolar oʻzaro maslahatlashuvlar va muzokaralar yoʻli bilan hal etiladi.

Quyidagilar Tomonlarning mazkur Memorandum doirasidagi hamkorlik yoʻnalishlarini amalga oshirish uchun masʼul boʻlgan vakolatli organlar hisoblanadi:

Oʻzbekiston Respublikasidan — Oʻzbekiston Respublikasi Davlat tabiatni muhofaza qilish qoʻmitasi;

Qatar Davlatidan — Atrof-muhit vazirligi.

Tomonlar mazkur Memorandumda nazarda tutilgan yoʻnalishlar boʻyicha qoʻshma komissiyalarni, ishchi guruhlarini tuzishlari yoki muvofiqlashtiruvchilarni tayinlashlari mumkin.

Tomonlarning oʻzaro kelishuvi boʻyicha mazkur Memorandumga uning ajralmas qismi boʻlgan alohida protokollar bilan rasmiylashtiriladigan oʻzgartish va qoʻshimchalar kiritilishi mumkin.

Mazkur Memorandum Tomonlar uning kuchga kirishi uchun zarur boʻlgan davlat ichki tartibotlarini bajargani toʻgʻrisida soʻnggi yozma bildirishnomani diplomatik kanallar orqali olingan sanadan kuchga kiradi va besh yil davomida oʻz kuchida qoladi hamda, agar Tomonlardan hech biri tegishli davr tugashidan olti oy oldin oʻzining Memorandum amal qilishini toʻxtatish maqsadi toʻgʻrisida boshqa Tomonni diplomatik kanallar orqali yozma ravishda xabardor qilmasa, har safar kelgusi besh yillik davrlarga oʻz-oʻzidan uzaytirilaveradi.

Mazkur Memorandum amal qilishining toʻxtatilishi uning amal qilishi davrida boshlangan va uning amal qilishini toʻxtatish paytida tugallanmagan loyiha va dasturlarning Tomonlar tarafidan roʻyobga chiqarilishiga taʼsir etmaydi.

Barchasini tasdiqlash maqsadida oʻz hukumatlari tomonidan tegishli ravishda vakil qilingan quyida qoʻl qoʻyuvchilar mazkur Memorandumni imzoladilar.

2010-yil 24-noyabrda Doxa shahrida har biri oʻzbek, arab va ingliz tillarida ikki asl nusxada tuzildi, bunda barcha matnlar bir xil kuchga ega. Mazkur Memorandum qoidalarini talqin qilishda ixtiloflar kelib chiqsa, Tomonlar ingliz tilidagi matnga murojaat qiladilar.