Oʻzbekiston Respublikasi Prezidentining “Davlat xaridlari tizimini maqbullashtirish va ularga kichik biznes subyektlarini jalb etishni kengaytirish toʻgʻrisida” 2011-yil 7-fevraldagi PQ–1475-son qaroriga muvofiq Vazirlar Mahkamasi qaror qiladi:

1. Yangi tahrirdagi Oʻzbekiston respublika tovar-xom ashyo birjasida boshlangʻich narxni pasaytirish yuzasidan elektron auksion savdolarni tashkil etish va oʻtkazish tartibi toʻgʻrisidagi Nizom 1-ilovaga muvofiq tasdiqlansin.

2. Vazirlar Mahkamasining “Tovar-xom ashyo birjalari faoliyatini takomillashtirishga doir qoʻshimcha chora-tadbirlar toʻgʻrisida” 2004-yil 31-maydagi 251-son qaroriga (Oʻzbekiston Respublikasi QT, 2004-y., 5-son, 50-modda) 2-ilovaga muvofiq oʻzgartirishlar kiritilsin.

3. Vazirlar Mahkamasining “Davlat xaridlarini tashkil etishga doir normativ-huquqiy bazani takomillashtirish chora-tadbirlari toʻgʻrisida” 2011-yil 1-apreldagi 100-son qarori (Oʻzbekiston Respublikasi QT, 2011-y., 4-son, 24-modda) 1-bandining uchinchi xatboshi va qarorga 2-ilova oʻz kuchini yoʻqotgan deb hisoblansin.

4. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S.Azimov zimmasiga yuklansin.

1. Ushbu Nizom Oʻzbekiston respublika tovar-xom ashyo birjasida (keyingi oʻrinlarda birja deb ataladi) boshlangʻich narxni pasaytirish yuzasidan elektron auksion savdolarni auksion shaklida tashkil etish va oʻtkazish tartibini belgilaydi.

2. Ushbu Nizomning amal qilishi jalb qilingan xorijiy kreditlar va grantlar hisobiga amalga oshiriladigan tovarlar (ishlar, xizmatlar)ni xarid qilishga tatbiq etilmaydi, agar ularni berish shartlarida xaridlarni amalga oshirishning oʻzgacha tartibi belgilangan boʻlsa.

3. Ushbu Nizom maqsadlari uchun quyidagi atamalar va taʼriflardan foydalaniladi:

agent — birjada akkreditatsiya tartib-qoidasidan oʻtgan hamda buyurtmachilar va yetkazib beruvchilarga topshiriq shartnomasi asosida ularning elektron auksion savdolarda qatnashishini taʼminlashga doir professional xizmatlar koʻrsatadigan yuridik shaxs;

buyurtmachi — elektron auksion savdolarda tovar (ishlar, xizmatlar)ni xarid qiluvchi yuridik yoki jismoniy shaxs;

yetkazib beruvchi — taklif etilgan shartlarda oʻzining elektron auksion savdolarda qatnashish va savdolarda gʻolib chiqqan taqdirda tovar (ishlar, xizmatlar)ni yetkazib berish niyatini bildirgan xoʻjalik yurituvchi subyekt (shu jumladan yuridik shaxs tashkil etmagan yakka tartibdagi tadbirkor);

foydalanuvchining yakka tartibdagi raqami — birjaning hisob-kitob-kliring palatasi tomonidan buyurtmachilar va yetkazib beruvchilarga ularning belgilangan tartibda birjaning hisob-kitob-kliring palatasining talab qilib olingungacha ikkilamchi depozit hisob raqamiga oʻtkaziladigan avans toʻlovlarini hisobga olish uchun beriladigan yakka tartibdagi raqam;

hisob-kitob-kliring palatasi — birjaning buyurtmachilar va yetkazib beruvchilarning avans toʻlovlarini deponentga qoʻyish va hisobga olish yoʻli bilan kontraktlar boʻyicha majburiyatlarni bajarishga qodir boʻlgan buyurtmachilar va yetkazib beruvchilarni elektron auksion savdolarga qoʻyishni taʼminlaydigan tarkibiy boʻlinma;

elektron auksion savdolar predmeti (keyingi oʻrinlarda savdolar predmeti deb ataladi) — tovarlar, ishlar va xizmatlar;

Hukumat komissiyasi — davlat xaridlari boʻyicha Hukumat komissiyasi;

Hukumat komissiyasining ishchi organi — Oʻzbekiston Respublikasi Moliya vazirligi Gʻaznachiligi;

maxsus axborot portali — birjaning buyurtmachilarning elektron auksion savdolar oʻtkazish toʻgʻrisidagi eʼlonlari va xarid jarayoni qatnashchilari uchun zarur boʻlgan boshqa axborot joylashtirilishi va koʻzdan kechirilishini taʼminlaydigan maxsus sayti;

elektron auksion savdolar (keyingi oʻrinlarda savdolar deb ataladi) — ushbu Nizomga muvofiq boshlangʻich narxni pasaytirish yuzasidan ochiq auksion shaklida oʻtkaziladigan, buyurtmachilar tomonidan belgilangan mezonlar va shartlardan kelib chiqib tovar (ishlar, xizmatlar) maqbul yetkazib beruvchisini tanlash usulini oʻzida ifodalaydigan elektron savdolar;

elektron tizim — barcha manfaatdor shaxslar qatnashishi mumkin boʻlgan savdolar oʻtkazilishini taʼminlaydigan dasturiy-texnik kompleksdan foydalanish vositasida yetkazib beruvchilar oʻrtasida tovarlar (ishlar, xizmatlar)ni xarid qilishga buyurtmalarni joylashtirish tizimi.

avans toʻlovi — birja tomonidan har qaysi tomon uchun 0,05 foizdan koʻp boʻlmagan miqdorda belgilanadigan birjaning vositachilik yigʻimini, shuningdek birja tomonidan belgilanadigan savdolar predmeti boshlangʻich narxining uch foizidan oshmaydigan miqdorda yetkazib beruvchining moliyaviy zakalatlarini oʻz ichiga oladigan, buyurtmachilar va yetkazib beruvchilar tomonidan kiritiladigan moliyaviy mablagʻlar summasi;

kontraktni roʻyxatdan oʻtkazish — tomonlar imzolagan kontraktni tuzilgan kontraktlar reyestriga birja tomonidan kiritish;

birjaning mintaqaviy boʻlinmasi — birjaning mintaqaviy filiali yoki savdo maydonchasi;

tuzilgan kontraktlar reyestri — tomonlar imzolagan va birja shtampi bilan tasdiqlangan kontraktlar roʻyxati;

boʻlib oʻtmagan bitimlar reyestri — lotlar roʻyxati, ular boʻyicha ushbu Nizomga muvofiq boʻlib oʻtmagan deb eʼtirof etilgan savdolar natijalari;

kontrakt — savdolar natijalari toʻgʻrisida elektron tizim tomonidan shakllantirilgan, shartnoma kuchiga ega boʻlgan protokol;

eʼlon — savdolar muddatlari va talablari toʻgʻrisida buyurtmachi tomonidan maxsus axborot portalida joylashtirilgan maʼlumotlar xabari;

personal kabinet — maxsus axborot portalidagi individual sahifa, uning vositasida savdolarda qatnashish uchun zarur axborotdan foydalanish taʼminlanadi. Personal kabinet buyurtmachi yoki yetkazib beruvchi (ularning agentlari) uchun tegishli individual loginlar va parollarni qoʻllab foydalanishadi;

buyurtmachining buyurtmanomasi — buyurtmachining elektron tizimda joylashtiriladigan ochiq ofertasi;

yetkazib beruvchining buyurtmanomasi — aksept, elektron tizimda joylashtiriladigan ofertaning yetkazib beruvchi tomonidan toʻliq va soʻzsiz qabul qilinishi;

Davlat xaridlari masalalari boʻyicha bahslar va kelishmovchiliklarni koʻrib chiqish boʻyicha maxsus komissiya — savdolarni oʻtkazish va ularning natijalarini rasmiylashtirish bilan bogʻliq masalalarni sudgacha koʻrib chiqish uchun birja tomonidan tuzilgan organ.

4. Hukumat komissiyasi tomonidan belgilanadigan roʻyxat boʻyicha bitta kontrakt boʻyicha 300 AQSH dollaridan 100 ming AQSH dollarigacha teng boʻlgan summada tovarlar (ishlar, xizmatlar)ning davlat xaridlari (keyingi oʻrinlarda tovarlar davlat xaridi deb ataladi) faqat ushbu Nizomga muvofiq tashkil etiladigan va oʻtkaziladigan savdolar orqali amalga oshiriladi, qonun hujjatlarida nazarda tutilgan hollar bundan mustasno.

5. Bitta kontrakt boʻyicha 300 AQSH dollarigacha teng boʻlgan summadagi davlat xaridlari ham buyurtmachining tashabbusi bilan ushbu Nizomga muvofiq amalga oshirilishi mumkin.

6. Savdolarni oʻtkazishga tayyorgarlik koʻrish quyidagilarni oʻz ichiga oladi:

buyurtmachilar va yetkazib beruvchilarni savdolarning qatnashchilari sifatida akkreditatsiyadan oʻtkazish;

maxsus axborot portalida savdolarni oʻtkazish toʻgʻrisidagi eʼlonni joylashtirish;

buyurtmachilar va yetkazib beruvchilar tomonidan, ularning savdolarda qatnashishini taʼminlab beradigan avans toʻlovlarining toʻlanishi;

buyurtmachilarning buyurtmanomalari (lotlari)ni shakllantirish.

7. Budjet mablagʻlari oluvchilar boʻlgan buyurtmachilarni akkreditatsiya qilish birja tomonidan Oʻzbekiston Respublikasi Moliya vazirligining Gʻaznachiligi va birja maʼlumotlar bazalarining oʻzaro elektron aloqasi yoʻli bilan avtomatik rejimda markazlashtirilgan tartibda amalga oshiriladi.

Budjetdan mablagʻ oluvchi hisoblangan akkreditatsiya qilingan buyurtmachilar savdolarda birinchi marta qatnashayotganda (mustaqil yoki agentlar orqali) birjaga (keyinchalik birjaga berish uchun buyurtmachi roʻyxatdan oʻtkazilgan joy boʻyicha birjaning mintaqaviy boʻlinmalariga) buyurtmachining rahbari va bosh buxgalterining notarial yoki yuqori tashkilot tomonidan tasdiqlangan imzolari namunalari qoʻyilgan kartochkalarni taqdim etadilar.

8. Budjetdan mablagʻ olmaydigan buyurtmachilarni akkreditatsiyadan oʻtkazish uchun ariza beruvchilar birjaga (keyinchalik birjaga berish uchun buyurtmachi roʻyxatdan oʻtkazilgan joy boʻyicha birjaning mintaqaviy boʻlinmalariga) quyidagilarni taqdim etadilar:

belgilangan shakldagi ariza;

davlat roʻyxatidan oʻtkazilganlik toʻgʻrisidagi guvohnomaning kseronusxasi (jismoniy shaxslar uchun — pasportlarining kseronusxalari);

buyurtmachi rahbari va bosh buxgalterining notarial tasdiqlangan imzolari namunalari (yuridik shaxslar uchun), shaxsiy imzolarining notarial tasdiqlangan namunasi (jismoniy shaxslar uchun) qoʻyilgan kartochka.

9. Yetkazib beruvchi sifatida akkreditatsiyadan oʻtkazish uchun ariza beruvchi birjaga (keyinchalik birjaga berish uchun yetkazib beruvchi roʻyxatdan oʻtkazilgan joy boʻyicha birjaning mintaqaviy boʻlinmalariga) quyidagilarni taqdim etadi:

belgilangan shakldagi ariza;

davlat roʻyxatidan oʻtkazilganlik toʻgʻrisidagi guvohnomaning kseronusxasi;

yetkazib beruvchining rahbari va bosh buxgalterining notarial tasdiqlangan imzolari namunalari (yuridik shaxslar—budjet tashkilotlari uchun tasdiqlash yuqori tashkilot tomonidan ham amalga oshirilishi mumkin), shaxsiy imzoning notarial tasdiqlangan namunasi (jismoniy shaxslar uchun) qoʻyilgan kartochka;

davlat soliq xizmati organlari tomonidan (kichik biznes subyektlari uchun) berilgan xodimlar soni va kichik biznes subyektlariga tegishliligi toʻgʻrisidagi maʼlumotnoma (Oʻzbekiston Respublikasi Moliya vazirligi Gʻaznachiligi, Davlat soliq qoʻmitasi va birjaning maʼlumotlar bazalarining oʻzaro aloqasi taʼminlangungacha);

belgilangan tartibda berilgan tegishli litsenziya yoki ruxsatnomaning kseronusxasi (agar savdo predmeti hisoblangan tovarlarni yetkazish, ishlarni bajarish va xizmatlar koʻrsatish bilan bogʻliq faoliyat qonun hujjatlariga muvofiq litsenziyalashni yoki ruxsat beruvchi hujjat olishni talab qilsa).

Taqdim etilgan maʼlumotlarning haqqoniyligi uchun yetkazib beruvchilar javobgardirlar.

Yetkazib beruvchilarni akkreditatsiyadan oʻtkazish natijalari boʻyicha birja akkreditatsiyadan oʻtkazilgan yetkazib beruvchilar reyestrini shakllantiradi, u maxsus axborot portaliga joylashtiriladi va barcha foydalanuvchilar uchun ochiq boʻladi.

10. Buyurtmachilar va yetkazib beruvchilarni akkreditatsiyadan oʻtkazish bepul amalga oshiriladi va muddatsiz xususiyatga ega. Tashkiliy-huquqiy shakli, nomi, manzili, bank rekvizitlari oʻzgarganda yoxud akkreditatsiyaning holatiga yoki amal qilishining davom etishiga taʼsir koʻrsatadigan boshqa oʻzgarishlar boʻlgan hollarda buyurtmachilar va yetkazib beruvchilar besh kun muddatda birjaga (keyinchalik birjaga berish uchun buyurtmachining roʻyxatdan oʻtkazilgan joyi boʻyicha birjaning mintaqaviy boʻlinmasiga) tegishli hujjatlarni ilova qilgan holda ushbu oʻzgarishlar toʻgʻrisida yozma axborot taqdim etishlari shart.

11. Akkreditatsiya natijalari boʻyicha birja:

buyurtmachiga va yetkazib beruvchiga berilgan foydalanuvchining yakka tartibdagi raqamiga muvofiq alohida shaxsiy hisob raqamlari ochadi. Buyurtmachilar va yetkazib beruvchilarning avans toʻlovlari hisob-kitob-kliring palatasining talab qilib olingungacha ikkilamchi depozit hisob raqami doirasida ushbu shaxsiy hisob raqamlarida hisobga olinadi;

buyurtmachilar va yetkazib beruvchilarga personal kabinet tashkil etadi, unga oʻtkaziladigan savdolar toʻgʻrisidagi maʼlumotlarni va boshqa zarur maʼlumotlarni yuboradi.

12. Buyurtmachi savdolarda qatnashish uchun mustaqil ravishda yoki agent orqali maxsus axborot portaliga eʼlon joylashtiradi.

Zarurat boʻlganda, buyurtmachi yoki uning agenti eʼlonni (ishlarni bajarish, xizmatlar koʻrsatish uchun savdolar oʻtkazilishida) savdolar predmeti boʻyicha loyiha-smeta hujjatlari va boshqa hujjatlar bilan toʻldirishi ham mumkin.

Maxsus axborot portalida joylashtirilgan eʼlon, hisob-kitob kliring palatasining ikkilamchi depozit hisob raqami doirasida buyurtmachining hisob raqamida uning avans toʻlovi mavjud boʻlgan taqdirda avtomatik tarzda buyurtmachining buyurtmanomasiga aylanadi.

13. Savdolar buyurtmachining buyurtmanomasida bayon qilingan talablarni hisobga olgan holda oʻtkaziladi.

Agar buyurtmachining buyurtmanomasida alohida boshqacha talab koʻrsatilmagan boʻlsa, yetkazib beruvchi yangi tovar yetkazib berishi shart.

Bunda buyurtmachining eʼloni va buyurtmanomasi matniga savdolar predmetiga taalluqli boʻlmagan va yetkazib beruvchilar oʻrtasida raqobatni cheklovchi talablarni kiritish taqiqlanadi.

Imkoniyati yuqori yetkazib beruvchilarga nisbatan cheklashlar belgilash zarur boʻlganda buyurtmachi eʼlonga tegishli talablarni faqat Hukumat komissiyasining ruxsati bilan kiritishi mumkin.

14. Buyurtmachilar va yetkazib beruvchilarning oʻz agentlari bilan oʻzaro munosabatlari, shu jumladan agentni taqdirlash summasi ular oʻrtasida tuzilgan topshiriq shartnomasi asosida belgilanadi. Bunda tovarlarning davlat xaridlari boʻyicha agentni taqdirlash summasi Oʻzbekiston Respublikasi Moliya vazirligi va Iqtisodiyot vazirligi bilan kelishgan holda birja tomonidan belgilanadigan cheklangan miqdordan ortiq boʻlishi mumkin emas.

15. Savdolarda qatnashish uchun akkreditatsiyadan oʻtgan buyurtmachilar eʼlon joylashtirgunga qadar hisob-kitob-kliring palatasining ikkilamchi depozit hisob raqami doirasida oʻz shaxsiy hisob raqamlariga oldindan avans toʻlovlarini oʻtkazishlari shart. Avans toʻlovlarisiz buyurtmachilarning buyurtmanomalari joylashtirilmagan hisoblanadi va aktivlashtirilmaydi.

Buyurtmachi tomonidan toʻlangan avans toʻlovlari elektron tizim tomonidan savdolar gʻolibi aniqlangunga qadar blokirovka qilinadi.

16. Akkreditatsiyadan oʻtgan yetkazib beruvchilar savdolarda qatnashish uchun hisob-kitob-kliring palatasining ikkilamchi depozit hisob raqami doirasida oʻz shaxsiy hisob raqamlariga avans toʻlovlarini oʻtkazishlari shart.

Yetkazib beruvchi tomonidan kiritilgan avans toʻlovi boshqa yetkazib beruvchi tomonidan kam narx koʻrsatilgan taklif berilgunga qadar blokirovka qilinadi.

Savdolar gʻolibining moliyaviy zakalati u kontraktni imzolagunga qadar blokirovka qilinadi.

17. Savdolarni oʻtkazish toʻgʻrisidagi eʼlon savdolarning gʻolibini — yetkazib beruvchini aniqlash sanasidan kamida 30 kun oldin joylashtirilishi shart.

Roʻyxati Hukumat komissiyasi tomonidan aniqlanadigan tovarlar (ishlar, xizmatlar)ning davlat xaridi boʻyicha savdolar oʻtkazish toʻgʻrisida ilgari joylashtirilgan eʼlonlar boʻyicha avtomatik shakllantirilgan buyurtmanomalarda buyurtmachi tomonidan zarurat boʻlganda, savdolar tugashi sanasidan kamida 10 kun oldin savdolar predmetining boshlangʻich narxi, bozor konyunkturasidan kelib chiqqan holda aniqlashtirilishi mumkin.

18. Agent tomonidan maxsus axborot portalida savdolarni oʻtkazish toʻgʻrisidagi eʼlon joylashtirilganligi uchun Oʻzbekiston Respublikasi Moliya vazirligi va Iqtisodiyot vazirligi bilan kelishgan holda birja tomonidan aniqlanadigan, cheklangan miqdordan ortiq boʻlmagan miqdorda toʻlov undiriladi.

19. Savdolar oʻtkazish toʻgʻrisidagi eʼlonda quyidagi maʼlumotlar boʻlishi lozim:

buyurtmachining nomi va manzili;

savdolar predmetini moliyalashtirish manbalari;

savdolarning birinchi va oxirgi kuni (savdolar muddati);

savdolar predmetining boshlangʻich narxi;

savdolar predmetining tavsifi (savdolar predmetining spetsifikatsiyasi);

savdolar predmetini lotlar boʻyicha boʻlish va har bir lotning miqdori;

tovarlarni yetkazib berish, ishlarni bajarish, xizmatlar koʻrsatish muddatlari va shartlari;

tovarlarni yetkazib berish, ishlarni bajarish, xizmatlar koʻrsatish joyi (manzili).

20. Agar qonun hujjatlariga muvofiq tovarlar (ishlar, xizmatlar)ning ayrim turlarining davlat xaridlari faqat yoki ustun darajada kichik biznes subyektlaridan amalga oshirilishi kerak boʻlsa, savdolar oʻtkazish toʻgʻrisidagi eʼlonda ushbu shart majburiy tartibda koʻrsatiladi.

21. Savdolar elektron tizimida, boshlangʻich narx bosqichma-bosqich pasaytirilgan holda oʻtkaziladi. Bosqichning oʻlchami birja tomonidan belgilanadi.

22. Savdolarni oʻtkazish, toʻlangan avans toʻlovi summasiga muvofiq har bir lot boʻyicha savdolarga qoʻyish, savdolar gʻoliblarini aniqlash, bitimlarni roʻyxatga olish va kontraktni shakllantirish elektron tizim orqali amalga oshiriladi.

23. Birja elektron tizimning operatori sifatida:

elektron tizimning uzluksiz ishlashini;

savdolarning ushbu Nizomga va qonun hujjatlari talablariga muvofiq oʻtkazilishini;

ushbu lot boʻyicha savdolarga qoʻyilgan barcha yetkazib beruvchilarning joylashish joyidan qatʼi nazar, barchasiga savdolarda bir vaqtning oʻzida qatnashish imkoniyati berilishini;

savdolarni oʻtkazishda va ularning natijalarini chiqarishda oshkoralik va aniq-ravshanlikni;

akkreditatsiyadan oʻtgan barcha savdolar qatnashchilarining huquqlari tengligini;

narxi boʻyicha eng yaxshi buyurtmanomalarni aniqlash jarayonini avtomatlashtirish yoʻli bilan savdolar gʻoliblarini aniqlashning xolisonaligini;

yetkazib beruvchilarni ular tomonidan belgilangan miqdorda avans toʻlovini toʻlaganlaridan keyin savdolarga qoʻyish yoʻli bilan ularning buyurtmanomalarini taʼminlashi shart.

24. Yetkazib beruvchilarning javob tariqasidagi buyurtmanomalarini qabul qilish buyurtmachining eʼloni elektron tizim orqali avtomatik tarzda buyurtmanomaga aylantirilgan vaqtdan boshlanadi.

25. Savdolarda qatnashayotgan akkreditatsiyadan oʻtkazilgan yetkazib beruvchilarning nomi va ularning Oʻzbekiston aloqa va axborotlashtirish agentligi maʼlumotlari elektron tizimda aks ettirilmaydi, ushbu Nizomning 29-bandida nazarda tutilgan hollar bundan mustasno.

26. Savdolar davomida elektron tizim yetkazib beruvchilarning berilgan buyurtmanomalaridan eng kam narxli buyurtmanomani avtomatik tarzda tanlaydi, u elektron tizimda aks ettiriladi hamda savdolarning barcha qatnashchilariga — ushbu paytdagi buyurtmachilar va yetkazib beruvchilarga maʼlum boʻladi.

27. Savdolarda kamida ikki nafar yetkazib beruvchi qatnashsa savdolar boʻlib oʻtgan deb hisoblanadi.

Agar savdolarda ikki nafardan kam yetkazib beruvchi qatnashsa, savdolar boʻlib oʻtmagan deb hisoblanadi, savdolar gʻolibi aniqlanmaydi va savdolar 10 kunga uzaytiriladi.

Savdolarni uzaytirish, buyurtmachi tomonidan yangi buyurtmanoma berish yoʻli bilan, zarurat boʻlganda, boshlangʻich bahoni aniqlashtirgan holda amalga oshiriladi.

Aynan bir turdagi tovarlar (ishlar, xizmatlar) boʻyicha uzaytirilgan savdolar boʻlib oʻtmagan deb eʼlon qilingan hollarda budjetdan mablagʻ oluvchilar tovar (ish, xizmat)larni qonun hujjatlarida belgilangan tartibda eng yaxshi takliflarni tanlash asosida, oxirgi buyurtmanomada eʼlon qilingan tovarlar (ishlar, xizmatlar)ni sotib olish shartlarini oʻzgartirmasdan kamida uchta xoʻjalik yurituvchi subyektga tovarlar (ishlar, xizmatlar)ni sotib olish uchun takliflar yuborish yoʻli bilan xarid qilishlari mumkin.

Eng yaxshi takliflar tanloviga nohalol yetkazib beruvchilar reyestridagi mavjud xoʻjalik yurituvchi subyektlar qoʻyilmaydi

Bunda buyurtmachilar eng yaxshi takliflar tanlovi gʻolibini aniqlash vaqtida tovarlar (ishlar, xizmatlar)ni sotib olish yuzasidan taklif yuborilgan xoʻjalik yurituvchi subyektning maxsus axborot portalida joylashtirilgan nohalol yetkazib beruvchilar reyestrida yoʻqligini tekshirishi va unga ishonch hosil qilishi shart.

Buyurtmachining rahbarlari yetkazib beruvchini tanlashni oʻtkazish tartibiga rioya qilinishi yuzasidan shaxsan javobgardirlar.

28. Yetkazib beruvchilardan takliflar boʻlmasligi (yoki savdolarda faqat bir nafar yetkazib beruvchi qatnashishi) sababli, shuningdek yetkazib beruvchilar tomonidan boshlangʻich narxdan ortiq boʻlgan narxlar taklif qilinganda, budjetdan mablagʻ oluvchi hisoblangan buyurtmachi uchun oziq-ovqat mahsulotlarining davlat xaridi boʻyicha savdolar boʻlib oʻtmagan deb eʼtirof etilgan taqdirda Oʻzbekiston Respublikasi Moliya vazirligi Gʻaznachiligi yoki uning hududiy boʻlinmalari (keyingi oʻrinlarda gʻaznachilik organlari deb ataladi) bilan kelishilgan holda savdolarni uzaytirmasdan buyurtmani joylashtirishga yoʻl qoʻyiladi.

Budjetdan mablagʻ oluvchi hisoblangan buyurtmachi oziq-ovqat mahsulotlarining davlat xaridini savdoni uzaytirmasdan buyurtmani joylashtirish toʻgʻrisidagi qarorni kelishish uchun tegishli gʻaznachilik organiga lot raqamini koʻrsatgan holda yozma murojaat qiladi. Bunda gʻaznachilik organlari uch ish kuni mobaynida birja tomonidan maʼlumotlar bazasining elektron aloqasi vositasida Moliya vazirligi Gʻaznachiligiga taqdim qilingan boʻlib oʻtmagan bitimlar reyestrida lot tartib raqamining mavjudligini tekshiradilar.

Savdolarni uzaytirmasdan buyurtmani joylashtirish toʻgʻrisidagi qarorni kelishish muddati gʻaznachilik organlariga kelishish toʻgʻrisidagi murojaat tushgan kundan boshlab uch ish kunidan ortiq boʻlmasligi kerak.

Savdolarni uzaytirmasdan yetkazib beruvchi bilan kontrakt faqat ilgari maxsus elektron portalda joylashtirilgan ushbu buyurtma boʻyicha eʼlonda nazarda tutilgan shartlarda tuzilishi mumkin. Bunda tuzilgan kontraktning narxi:

savdolarda boshlangʻich narxdan past narxni taklif qilgan faqat bitta yetkazib beruvchi qatnashgan hollarda — yagona yetkazib beruvchi boʻlgan savdolar qatnashchisi narxidan;

oʻtkazilgan savdolarda yetkazib beruvchilardan takliflar boʻlmagan yoki yetkazib beruvchilar tomonidan taklif etilgan narxlar boshlangʻich narxdan yuqori boʻlgan hollarda — eʼlon qilingan boshlangʻich narxning 10 foizidan ortiq boʻlmasligi kerak.

29. Savdolarning tugash vaqti kelganida tizim savdolar oʻtkazilishining butun vaqti mobaynida berilgan eng past narxli buyurtmanomani avtomatik tarzda aniqlaydi. Eng past narxli buyurtmanomani bergan yetkazib beruvchi elektron tizim orqali savdolarning gʻolibi sifatida tanlab olinadi. Yetkazib beruvchining nomi elektron tizimda aks ettiriladi va bunda buyurtmachining buyurtmanomasida keltirilgan shartlarga muvofiq avtomatik tarzda amalga oshirilgan bitimni qayd etadi va kontraktni shakllantiradi hamda buyurtmachi va yetkazib beruvchining personal kabinetiga vositachilik toʻlovini toʻlash uchun schyot-fakturaning elektron shakli yuboriladi.

30. Elektron tizimda amalga oshirilgan bitimlar natijalari boʻyicha yozma shaklda kontrakt rasmiylashtiriladi.

Kontrakt shakli Oʻzbekiston Respublikasi Moliya vazirligi Gʻaznachiligi bilan kelishgan holda birja tomonidan tasdiqlanadi.

31. Birja (birjaning mintaqaviy boʻlinmasi) va savdolarda gʻolib chiqqan yetkazib beruvchi yoki uning agenti savdolar gʻolibi aniqlangan vaqtdan boshlab besh ish kuni mobaynida kontraktni imzolashi, ayni bir vaqtda uni birja (birjaning mintaqaviy boʻlinmasi) tomonidan roʻyxatdan oʻtkazishi shart.

Buyurtmachi va yetkazib beruvchining kontrakt boʻyicha huquq va majburiyatlari birja (birjaning mintaqaviy boʻlinmasi) va yetkazib beruvchi yoki uning agenti tomonidan imzolangan vaqtdan boshlab yuzaga keladi.

Yuridik shaxs hisoblanadigan budjetdan mablagʻ oluvchilar-buyurtmachilar oʻzlari personal kabinetlar orqali elektron tarzda birja tomonidan yuborilgan kontraktlar nusxalarini mustaqil ravishda koʻchirib oladilar, ularni tashkilotning rahbari imzosi va muhri bilan tasdiqlaydilar va oʻzlariga xizmat koʻrsatadigan gʻaznachilik organlariga roʻyxatdan oʻtkazish uchun taqdim etadilar.

Budjetdan mablagʻ oluvchi hisoblanmaydigan buyurtmachilar oʻzlariga personal kabinet orqali elektron tarzda birja tomonidan yuborilgan kontraktlar nusxalarini mustaqil ravishda koʻchirib oladilar va zarurat boʻlganda, oʻzi joylashgan hududdagi birjada (birjaning mintaqaviy boʻlinmasida) tasdiqlaydilar.

32. Buyurtmachi kontrakt tuzishni rad etgan yoki boshqacha tarzda bosh tortgan taqdirda yetkazib beruvchi kontrakt tuzishdan bosh tortish tufayli yetkazilgan zararlarni qoplash talabi bilan sudga murojaat qilishga haqlidir.

33. Tovarlarning davlat xaridlari boʻyicha kontrakt tuzishni buyurtmachining rad etishi yoki boshqacha tarzda bosh tortishi toʻgʻrisidagi axborot davlat xaridlari toʻgʻrisidagi qonun hujjatlarini buzuvchi buyurtmachining mansabdor shaxslariga nisbatan chora koʻrish uchun Hukumat komissiyasiga yuboriladi.

34. Savdolarda gʻolib chiqqan yetkazib beruvchi kontrakt tuzishni rad etganda yoki uni tuzishdan boshqacha tarzda bosh tortganda uning moliyaviy zakalati, birjaning vositachilik yigʻimlaridan tashqari gʻolib aniqlangan sanadan boshlab bir hafta muddatda yetkazilgan zarar uchun kompensatsiya sifatida buyurtmachining tegishli hisob raqamiga (agar buyurtmachi gʻaznachilik ijrosi bilan qamrab olingan boʻlsa — budjet mablagʻlari yoki budjetdan tashqari mablagʻlar boʻyicha tegishli shaxsiy gʻazna hisobvaragʻini koʻrsatgan holda yagona gʻazna hisobvaragʻiga, agar buyurtmachi gʻaznachilik ijrosi bilan qamrab olinmagan boʻlsa — uning bankdagi talab qilib olingungacha depozit hisob raqamiga) oʻtkaziladi.

35. Yetkazib beruvchi kontrakt tuzishni rad etgan yoki boshqacha tarzda bosh tortgan taqdirda buyurtmachi kontrakt tuzishdan bosh tortish tufayli yetkazilgan zararlarni qoplash talabi bilan sudga murojaat qilishga haqlidir. Savdolarda gʻolib chiqqan, biroq kontrakt tuzishni rad etgan yoki boshqacha tarzda bosh tortgan yetkazib beruvchi birja tomonidan nohalol yetkazib beruvchilar reyestriga kiritiladi, yengib boʻlmas kuchlar yuzaga kelganligi munosabati bilan rad etish holatlari bundan mustasno.

36. Nohalol yetkazib beruvchilar reyestriga kiritilgan yetkazib beruvchilar olti oy mobaynida savdolarda qatnashishga qoʻyilmaydilar. Yetkazib beruvchini nohalol yetkazib beruvchilar reyestriga kiritish toʻgʻrisidagi axborot maxsus axborot portaliga joylashtiriladi.

37. Savdolarda gʻolib chiqqan yetkazib beruvchi kontrakt tuzishni rad etgan yoki boshqacha tarzda bosh tortgan taqdirda buyurtmachi uchun navbatdagi eng yaxshi narxni taklif etgan yetkazib beruvchi, ushbu yetkazib beruvchi uni savdolar gʻolibi deb eʼtirof etishga va kontrakt tuzishga rozi boʻlgan taqdirda, savdolar gʻolibi deb eʼtirof etiladi. Savdolarning ikkinchi gʻolibi bilan kontrakt Davlat xaridlari masalalari boʻyicha bahslar va kelishmovchiliklarni koʻrib chiqish boʻyicha maxsus komissiya protokoli asosida tuziladi, u savdolar gʻolibi aniqlangan vaqtdan boshlab oʻn ish kunidan kechikmay buyurtmachiga va yetkazib beruvchiga yuboriladi. Ikkinchi yetkazib beruvchi bilan namunaviy kontrakt savdolarda ikkinchi yetkazib beruvchi taklif qilgan narxni hisobga olgan holda birja tomonidan shakllantiriladi hamda birja (buyurtmachi roʻyxatdan oʻtkazilgan joydagi birjaning mintaqaviy boʻlinmasi) va buyurtmachi uchun navbatdagi eng yaxshi narxni taklif qilgan yetkazib beruvchi yoki uning agenti tomonidan imzolanadi, buyurtmachi uchun navbatdagi eng yaxshi narxni taklif qilgan yetkazib beruvchini savdolar gʻolibi deb eʼtirof etish toʻgʻrisida Davlat xaridlari masalalari boʻyicha bahslar va kelishmovchiliklarni koʻrib chiqish boʻyicha maxsus komissiya qarori qabul qilingan vaqtdan boshlab besh ish kunidan kechikmay imzolanadi.

38. Bitim holati boʻyicha hisob-kitob-kliring palatasi buyurtmachilar va yetkazib beruvchilarning avans toʻlovlari summasidan har qaysi tomondan bitimning amaldagi summasidan birjaning vositachilik yigʻimini undiradi.

39. Kontraktni roʻyxatga olish uni tuzilgan kontraktlar reyestriga kiritish yoʻli bilan amalga oshiriladi.

Tuzilgan kontraktlar reyestri Oʻzbekiston Respublikasi Moliya vazirligining Gʻaznachiligi va birja maʼlumotlar bazasining elektron aloqasi yoʻli bilan Oʻzbekiston Respublikasi Moliya vazirligi Gʻaznachiligiga yuboriladi.

40. Hisob-kitob-kliring palatasi buyurtmachi va savdolarda gʻolib chiqqan yetkazib beruvchining avans toʻlovining blokirovkadan chiqarilgan qoldiqlarini bir ish kuni mobaynida ularning talab qilib olingungacha depozit hisob raqamlariga (shaxsiy gʻazna hisob varagʻiga) oʻtkazadi yoki ularning yozma bildirishnomasiga koʻra boshqa savdolarda qatnashish uchun avans toʻlovlari hisobiga qabul qiladi.

41. Savdolarning gʻolibi deb eʼtirof etilmagan yetkazib beruvchining avans toʻlovini qaytarish u blokirovkadan chiqarilgan kundan boshlab keyingi bir ish kuni mobaynida amalga oshiriladi.

42. Buyurtmachi:

savdolarni oʻtkazish uchun taqdim etilgan hujjatlarning ishonchliligi va qonun hujjatlariga muvofiqligi;

savdolar gʻolibi boʻlgan yetkazib beruvchi bilan kontrakt tuzish yoki savdolar gʻolibi boʻlgan yetkazib beruvchi bilan kontrakt tuzishni rad etish muddatiga rioya etilishi (ajratilgan budjet mablagʻlari kamayishi holatlari bundan mustasno);

buyurtmachi tomonidan tovarlarning davlat xaridlarini amalga oshirishda — Hukumat komissiyasining ishchi organiga ushbu Nizomning bajarilishi monitoringi olib borilishi uchun ishonchli axborot taqdim etilishi;

tomonlar oʻrtasidagi kontrakt majburiyatlarini bajarish tugallangandan keyin besh yil mobaynida savdolar predmeti boʻyicha eʼlonlar va texnik hujjatlarning asl nusxalari saqlanishi uchun javob beradi.

43. Yetkazib beruvchi:

savdolarda qatnashish uchun taqdim etilgan hujjatlarning ishonchliligi;

miqdor, sifat, texnik parametrlar, shuningdek taklif etilayotgan tovarlar (ishlar, xizmatlar)ni yetkazib berish muddatlari va joyi boʻyicha yetkazib beruvchi buyurtmanomalari shartlarining buyurtmachi buyurtmanomalarida nazarda tutilgan shartlarga muvofiqligi;

savdolar shartlarining boshqa buzilishlari;

tuzilgan kontrakt shartlarining bajarilmaganligi uchun javob beradi.

44. Birja:

savdolar oʻtkazish toʻgʻrisidagi eʼlonning maxsus axborot portalida oʻz vaqtida chop etilishi;

buyurtmachilar, yetkazib beruvchilar va ularning agentlarini akkreditatsiyadan oʻtkazish yoki ularni savdolarga qoʻyish asossiz rad etilganligi yoxud savdolarga qoʻyish cheklanganligi;

savdolarni tashkil etish va oʻtkazish hamda savdolar gʻolibini aniqlash tartib-qoidasiga rioya etilishi;

savdolar bayonnomasini imzolash muddatlarining buzilishi yoki imzolashning rad etilishi;

elektron tizim va maxsus axborot portalining uzluksiz ishlashi;

savdolar natijalari boʻyicha tomonlar tuzishgan kontraktning roʻyxatdan oʻtkazilishi uchun javob beradi.

45. Elektron auksion savdolarni oʻtkazish va uning natijalarini rasmiylashtirish bilan bogʻliq masalalarni sudgacha koʻrib chiqish uchun birja tomonidan Davlat xaridlari masalalari boʻyicha bahslar va kelishmovchiliklarni koʻrib chiqish boʻyicha maxsus komissiya tashkil etiladi.

Davlat xaridlari masalalari boʻyicha bahslar va kelishmovchiliklarni koʻrib chiqish boʻyicha maxsus komissiya vakolatiga quyidagilar kiradi:

yetkazib beruvchilarning kontraktlarni imzolashni rad etganligi yoki undan bosh tortganligi uchun ushbu Nizomga muvofiq javobgarligini belgilash;

yetkazib beruvchilarni nohalol yetkazib beruvchilar reyestriga kiritish;

ushbu Nizom bilan Davlat xaridlari masalalari boʻyicha bahslar va kelishmovchiliklarni koʻrib chiqish boʻyicha maxsus komissiya vakolatiga kiritilgan boshqa masalalarni hal etish.

1. 1-band quyidagi tahrirda bayon qilinsin:

“1. Belgilab qoʻyilsinki, tovar-xom ashyo birjalarida tovarlarni (ishlarni, xizmatlarni) sotish:

muayyan turdagi va sifatdagi tovarlar, shu jumladan belgilangan tartibda birja savdolariga qoʻyilgan standart tovarlar elektron birja savdolari natijalari boʻyicha birja bitimlari;

tovarlar (ishlar, xizmatlar), shu jumladan oʻziga xos xususiyatlarga ega boʻlgan tovarlar auksion savdolari (shu jumladan davlat xaridlarini tashkil etish boʻyicha elektron savdolar) natijalari boʻyicha auksion savdolari;

xaridorlarga tovarlar (ishlar, xizmatlar)ning namunalari va modellarini koʻzdan kechirish imkoniyatini bergan, elektron kataloglarni, prospektlarni, reklama byulletenlarini yoki tovarlarni (ishlarni, xizmatlarni) tavsiflovchi boshqa hujjatlarni taqdim etgan holda ularning elektron koʻrgazma-yarmarka savdosi natijalari boʻyicha koʻrgazma-yarmarka bitimlari tuzish vositasida tashkil etilishi mumkin”.

2. 5-bandning toʻrtinchi xatboshi chiqarib tashlansin.

3. 9-band va qarorga 1-ilova chiqarib tashlansin.