Oʻzbekiston Respublikasi Prezidentining “Oʻzbekiston Respublikasi Vazirlar Mahkamasining ijro etuvchi tuzilmasini qisman oʻzgartirish toʻgʻrisida” 2012-yil 7-avgustdagi PQ-1799-son qaroriga muvofiq Vazirlar Mahkamasi qaror qiladi:

1. Madaniyat, taʼlim, sogʻliqni saqlash va ijtimoiy muhofaza masalalari axborot-tahlil departamenti toʻgʻrisidagi nizom ilovaga muvofiq tasdiqlansin.

2. Oʻzbekiston Respublikasi Vazirlar Mahkamasining “Oʻzbekiston Respublikasi Vazirlar Mahkamasining axborot-tahlil departamentlari hamda Huquqiy ekspertiza va xalqaro shartnomalar boshqarmasi toʻgʻrisidagi nizomlarni tasdiqlash haqida” 2009-yil 26-noyabrdagi 302-son qarori (Oʻzbekiston Respublikasi QT, 2009-y., 11-son, 73-modda) 1-bandining toʻrtinchi xatboshi va qarorga 3-ilova oʻz kuchini yoʻqotgan deb hisoblansin.

3. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari A.I. Ikramov hamda Oʻzbekiston Respublikasi Vazirlar Mahkamasi Ijro etuvchi apparatining boshqaruvchisi S.X. Bekenov zimmasiga yuklansin.

1. Madaniyat, taʼlim, sogʻliqni saqlash va ijtimoiy muhofaza masalalari axborot-tahlil departamenti (keyingi oʻrinlarda Departament deb ataladi) Oʻzbekiston Respublikasi Hukumati Ijro etuvchi apparatining tarkibiy boʻlinmasi hisoblanadi.

2. Departamentning faoliyati Vazirlar Mahkamasini, uning Prezidiumini, shuningdek Vazirlar Mahkamasining Ijro etuvchi apparatini madaniyat va sanʼat, uzluksiz taʼlim va kadrlar tayyorlash, fan va innovatsiyalar, maʼnaviy boy va jismoniy sogʻlom avlodni tarbiyalash, yoshlar siyosati, sport, sogʻliqni saqlash tizimini isloh qilishni yanada chuqurlashtirish va dorivor vositalar bilan taʼminlashni yaxshilash, aholini ijtimoiy muhofaza qilish sohasida davlat siyosatini amalga oshirish masalalari boʻyicha axborot-tahliliy materiallar bilan taʼminlashga yoʻnaltirilgan.

3. Departament oʻz faoliyatida Oʻzbekiston Respublikasi Konstitutsiyasi va qonunlariga, Oʻzbekiston Respublikasi Oliy Majlisi palatalarining qarorlari va boshqa hujjatlariga, Oʻzbekiston Respublikasi Prezidentining farmonlari, qarorlari va farmoyishlariga, Vazirlar Mahkamasining qarorlari va farmoyishlariga, shuningdek mazkur Nizomga amal qiladi.

4. Departament oʻz faoliyatini Oʻzbekiston Respublikasi Bosh vaziri rahbarligida amalga oshiradi.

Departament oʻz vakolatiga kiruvchi masalalar boʻyicha Oʻzbekiston Respublikasi Bosh vazirining tegishli oʻrinbosariga boʻysunadi, ayni vaqtda uning faoliyati Vazirlar Mahkamasining Ijro etuvchi apparati boshqaruvchisi tomonidan muvofiqlashtirib boriladi.

5. Departament oʻz faoliyatini Vazirlar Mahkamasi Ijro etuvchi apparatining boshqa tarkibiy boʻlinmalari, davlat va xoʻjalik boshqaruvi organlari, mahalliy davlat hokimiyati organlari, boshqa organlar va tashkilotlar bilan oʻzaro hamkorlikda amalga oshiradi.

6. Quyidagilar Departamentning asosiy vazifalari hisoblanadi:

a) uzluksiz taʼlim va kadrlar tayyorlash sohasida:

uzluksiz taʼlim va kadrlar tayyorlash tizimini isloh qilish, ilgʻor pedagogik va axborot-kommunikatsiya texnologiyalarini, xalqaro normalar va talablarga javob beradigan taʼlim standartlarini taʼlim jarayoniga joriy etish, taʼlim muassasalarining moddiy-texnika bazasini yanada rivojlantirish va mustahkamlash, ularni zamonaviy oʻquv va laboratoriya anjomlari bilan jihozlash hamda shu asosda taʼlim tizimini isloh qilish jarayonlarini yanada chuqurlashtirish boʻyicha takliflar ishlab chiqish, uning faoliyat koʻrsatishi samaradorligini oshirish boʻyicha qabul qilingan chora-tadbirlarning amalga oshirilishini tizimli oʻrganishni tashkil etish;

umumtaʼlim maktablari bitiruvchilarini kasbga yoʻnaltirish hamda ularni kasb-hunar kollejlari va akademik litseylarda oʻqitish bilan toʻliq qamrab olish, iqtisodiyot tarmoqlari va sektorlarida talab qilinadigan, chuqur kasbiy bilimlarga ega boʻlgan, xorijiy tillarni biladigan hamda zamonaviy axborot va kommunikatsiya texnologiyalari koʻnikmalarini egallagan mutaxassisliklar boʻyicha oʻrta va yuqori boʻgʻin malakali mutaxassislari darajasi va sifatini oshirish borasida tizimli ishlarni amalga oshirish, kasb-hunar kollejlari va oliy taʼlim muassasalari bitiruvchilarini ishga joylashtirish monitoringini olib borish;

uzluksiz taʼlim va kadrlar tayyorlash, taʼlim tizimini isloh qilish jarayonlarini yanada chuqurlashtirish, uning faoliyati samaradorligini oshirish masalalari boʻyicha Oʻzbekiston Respublikasi qonunlari, Oʻzbekiston Respublikasi Prezidentining farmonlari, qarorlari va farmoyishlari, Vazirlar Mahkamasining qarorlari bajarilishini taʼminlash;

davlat va xoʻjalik boshqaruvi organlarining, mahalliy davlat hokimiyati organlarining uzluksiz taʼlim va kadrlar tayyorlash, boshlangʻich musiqa taʼlimi tizimini takomillashtirish, bolalar musiqa va sanʼat maktablarining zamonaviy moddiy-texnika bazasini rivojlantirish va shakllantirish, ularni yuqori professional pedagoglar va mutaxassislar bilan taʼminlash masalalari boʻyicha faoliyatini muvofiqlashtirish;

taʼlim va kadrlar tayyorlash sohasida boshqaruv tuzilmasini takomillashtirish, xorijiy taʼlim tuzilmalari bilan koʻp tomonlama va samarali xalqaro hamkorlik qilish uchun shart-sharoitlar yaratish boʻyicha takliflar ishlab chiqish;

b) yoshlar siyosati sohasida:

maʼnaviy boy va har tomonlama kamol topgan, yuqori bilimli va jismoniy sogʻlom, mustaqil fikrlovchi va oʻz hayotiy pozitsiyasiga, keng dunyoqarashga, mustahkam bilimlarga, qatʼiy eʼtiqodga ega boʻlgan hamda milliy madaniyat va maʼnaviy qadriyatlarga, yoshlarda bizning mentalityetimizga yot boʻlgan ommaviy madaniyat elementlariga, diniy aqidaparastlikka va mafkuraviy ekstremizmning boshqa koʻrinishlariga qarshi turishga qodir boʻlgan ichki immunitetni shakllantiruvchi jahon sivilizatsiyasi boyliklariga asoslangan yuksak maʼnaviy va axloqiy prinsiplarni egallagan yosh avlodni shakllantirishga yoʻnaltirilgan yoshlar siyosatini ishlab chiqish va amalga oshirishda qatnashish;

davlat hokimiyati va boshqaruvi organlarining, “Kamolot” yoshlar ijtimoiy harakatining, taʼlim, madaniy-maʼrifiy muassasalarning va boshqa tashkilotlarning davlat yoshlar siyosatini amalga oshirish hamda barkamol avlodni shakllantirish uchun zarur shart-sharoitlarni taʼminlashdagi faoliyatini muvofiqlashtirish;

yoshlarning huquqiy savodxonligini, huquqiy madaniyatini va huquqiy ongini oshirishga yoʻnaltirilgan chora-tadbirlarni ishlab chiqish va amalga oshirish ishlarini tashkil etish;

respublikada amalga oshirilayotgan ijtimoiy-iqtisodiy, ijtimoiy-siyosiy islohotlarning mohiyati va ahamiyatini yosh avlod ongiga chuqur singdirish, yoshlarning mamlakatni isloh qilish va demokratik yangilash jarayonlaridagi ijtimoiy faolligini kuchaytirish chora-tadbirlari kompleksini amalga oshirish;

yosh oilalarni qoʻllab-quvvatlashga, ular uchun munosib uy-joy va ijtimoiy-maishiy sharoitlar yaratishga, uy-joylarini qulaylashtirish uchun imtiyozlar va preferensiyalar berishga, ularning maʼnaviy boy va jismonan sogʻlom farzandlarni tarbiyalashiga yoʻnaltirilgan takliflar ishlab chiqish ishlarini tashkil etish;

v) fan va innovatsiyalar sohasida:

ilm-fanni rivojlantirishni hamda iqtisodiyot tarmoqlari va sohalarida fan-texnika taraqqiyotining zamonaviy yutuqlarini va innovatsiya texnologiyalarini izchil joriy etishni taʼminlash, yoshlarning ijodiy va intellektual salohiyatini roʻyobga chiqarish uchun shart-sharoitlar yaratish, iqtisodiy rivojlangan demokratik mamlakatlarda qabul qilingan talablar va standartlarga muvofiq yuqori malakali ilmiy va ilmiy-pedagogik kadrlar tayyorlash tizimini takomillashtirish boʻyicha chora-tadbirlar kompleksini amalga oshirish;

Oʻzbekiston Respublikasining ilmiy va texnologiya salohiyatini yanada rivojlantirish, iqtisodiyotda va ijtimoiy sohada isloh qilishning strategik vazifalari va ustuvor yoʻnalishlariga muvofiq mamlakatni ilmiy-texnik rivojlantirish uchun qulay shart-sharoitlar yaratish, amalga oshiriladigan ilmiy tadqiqotlar va texnologik ishlanmalarning saviyasi, sifati va samaradorligini oshirish boʻyicha takliflar ishlab chiqish, ularning natijalaridan amaliyotda keng foydalanish;

Fanlar akademiyasi, davlat va xoʻjalik boshqaruvi organlari, mahalliy davlat hokimiyati organlarining fan va innovatsiyalar masalalari boʻyicha Oʻzbekiston Respublikasi qonunlarini, Oʻzbekiston Respublikasi Prezidentining farmonlari, qarorlari va farmoyishlarini, Vazirlar Mahkamasining qarorlarini bajarish boʻyicha faoliyatini muvofiqlashtirish;

fan sohasini boshqarish va moliyalashtirish prinsiplarini takomillashtirish, bozor mexanizmlarini ilmiy va innovatsion faoliyatdagi boshqaruv va xoʻjalik munosabatlari tizimiga keng joriy qilish boʻyicha takliflar ishlab chiqish;

vazirliklar, idoralar, ilmiy tashkilotlar va muassasalarning yuqori malakali ilmiy va ilmiy-pedagog kadrlarni tayyorlash va attestatsiyadan oʻtkazish boʻyicha davlat siyosatini amalga oshirish sohasidagi faoliyati muvofiqlashtirilishini taʼminlash;

davlat ilmiy-texnika va innovatsiya dasturlarining amalga oshirilishi monitoringi va tahlilini taʼminlash;

g) madaniyat va sport sohasida:

madaniyat va sanʼatni rivojlantirish, Oʻzbekiston xalqining milliy madaniyati va maʼnaviy merosini ehtiyotlab saqlash va koʻpaytirish, aholining madaniy saviyasini oshirish hamda uning doimiy ravishda ortib borayotgan intellektual, estetik va madaniy ehtiyojlarini taʼminlash, yoshlarning ijodiy salohiyatini roʻyobga chiqarish, shuningdek madaniyat muassasalarining, bolalar musiqa va sanʼat maktablarining moddiy-texnika bazasini mustahkamlash, ularning faoliyati samaradorligini oshirish boʻyicha takliflarni muvofiqlashtirish va ishlab chiqish;

madaniyat va sport, maʼnaviyat hamda milliy gʻoyani targʻib qilish masalalari boʻyicha Oʻzbekiston Respublikasi qonunlari, Oʻzbekiston Respublikasi Prezidentining farmonlari, qarorlari va farmoyishlari, Vazirlar Mahkamasining qarorlari bajarilishini nazorat qilish va tashkil etish;

madaniyat va sport sohasidagi ishlarning ahvolini tizimli va kompleks oʻrganishni, tahlil qilishni tashkil etish;

mahalliy davlat hokimiyati organlariga fuqarolarni muddatli harbiy xizmatga yigʻish va joʻnatishni, ularning harbiy qismlarda qabul qilinishini, shuningdek rezervga boʻshatilgan harbiy xizmatchilarning yashash joylariga qaytib kelishini tashkil etish tizimini takomillashtirish chora-tadbirlarini ishlab chiqish va amalga oshirish masalalarida tashkiliy jihatdan koʻmaklashish;

bolalar va yoshlarni sport bilan muntazam shugʻullanishga keng jalb etish, jismonan sogʻlom yosh avlodni shakllantirish, sport inshootlarining moddiy-texnika bazasini yanada rivojlantirish va mustahkamlash hamda ulardan samarali foydalanish, ularni jahon standartlariga javob beradigan sport anjomlari va uskunalari bilan jihozlash uchun shart-sharoitlarni yaratish va amalga oshirish;

sportda yuksak yutuqlarni rivojlantirish hamda Olimpiya oʻyinlarida, jahon chempionatlarida, boshqa xalqaro musobaqalarda Oʻzbekiston nomidan munosib qatnashishga qodir boʻlgan yuqori klassli sportchilarni tayyorlash uchun zarur shart-sharoitlar yaratish chora-tadbirlarining ishlab chiqilishi va amalga oshirilishini taʼminlash;

mamlakatda roʻy berayotgan keng koʻlamli oʻzgarishlar va yangilanishlarning mohiyatini ochib berish boʻyicha aholi oʻrtasida maʼnaviy-maʼrifiy ishlarni amalga oshirishda jamoat tashkilotlari va harakatlariga, fuqarolarning oʻzini oʻzi boshqarish organlariga koʻmaklashish chora-tadbirlarini taʼminlash;

mahalliy davlat hokimiyati organlari bilan birgalikda vijdon erkinligi va diniy tashkilotlar toʻgʻrisidagi qonun hujjatlariga muvofiq diniy masalalarni hal etishda yagona siyosat amalga oshirilishini taʼminlash;

“Davlat tili haqida”gi Oʻzbekiston Respublikasi Qonuni bajarilishini tashkil etish va nazorat qilish;

d) sogʻliqni saqlash va dori-darmonlar bilan taʼminlash sohasida:

sogʻliqni saqlash tizimini yanada isloh qilish, tibbiy xizmat koʻrsatishning, eng avvalo, onalar va bolalar salomatligini muhofaza qilishni taʼminlash boʻyicha darajasini oshirish, qishloq vrachlik punktlarining, tashxis, perinatal va skrining markazlarining moddiy-texnika bazasini rivojlantirish va mustahkamlash, respublika ixtisoslashtirilgan ilmiy-amaliy tibbiyot markazlarining aholiga yuqori texnologiyali tibbiy yordam koʻrsatish borasidagi faoliyati samaradorligini oshirish boʻyicha monitoring olib borish va chora-tadbirlar koʻrish;

davlat va xoʻjalik boshqaruvi organlari, mahalliy davlat hokimiyati organlarining sogʻliqni saqlash sohasining faoliyat koʻrsatishi va dori-darmonlar bilan taʼminlash, aholiga sifatli bepul tibbiy yordam koʻrsatish va ularni dori-darmonlar bilan taʼminlash masalalari boʻyicha Oʻzbekiston Respublikasi qonunlari, Oʻzbekiston Respublikasi Prezidentining farmonlari, qarorlari va farmoyishlari, Vazirlar Mahkamasining qarorlari bajarilishini tashkil etishdagi faoliyatini muvofiqlashtirish;

sogʻliqni saqlash sohasida islohotlarning amalga oshirilishini tizimli va kompleks oʻrganishni tashkil etish, ushbu sohada boshqaruv shakllari, usullari va tuzilmasini takomillashtirish boʻyicha takliflar ishlab chiqish;

aholi salomatligi saqlanishi va yaxshilanishini maqbullashtirish, samaradorligini oshirish va taʼminlash, profilaktik sogʻliqni saqlashni rivojlantirish, sogʻlom turmush tarzini keng ommalashtirish, ushbu sohada aniq yoʻnaltirilganlikni va aholini qamrab olishni kuchaytirish boʻyicha vazifalarning kompleks hal etilishini tashkil qilish;

tugʻma va nasliy kasalliklar paydo boʻlishi sabablarini oʻrganish, ularning oldini olish, mintaqamiz uchun xarakterli boʻlgan kasalliklarni oʻrganish va ularning oldini olish boʻyicha taʼsirchan chora-tadbirlarni joriy etish masalalarida mamlakatimizning tibbiyot fanini rivojlantirish chora-tadbirlarini ishlab chiqish va amalga oshirish;

aholini virusli va yuqumli kasalliklardan himoya qilishning profilaktik chora-tadbirlarini kuchaytirish hamda ulardan muhofaza qilishning ishonchliligini oshirish, ijtimoiy ahamiyatli kasalliklarning oldini olish, ularni barvaqt aniqlash va davolashning samarali tizimini shakllantirish boʻyicha tadbirlarni amalga oshirish;

farmatsevtika mahsulotlari ishlab chiqarishni koʻpaytirishning yuqori va barqaror surʼatlarini taʼminlash, farmatsevtika tarmogʻini modernizatsiya qilish, texnik va texnologik jihatdan qayta jihozlash, faol investitsiya siyosatini amalga oshirish, dori-darmonlar ishlab chiqarishda mahalliy xomashyodan foydalanish hisobiga mahalliylashtirish darajasini oshirish, farmatsevtika sanoatining raqobatbardoshliligini oʻstirish boʻyicha tashkiliy chora-tadbirlarni amalga oshirish;

yuqumli kasalliklarning oldini olish, hududlarni oʻta xavfli kasalliklarning olib kirilishi va tarqalishidan sanitariya jihatidan muhofaza qilish, atrof muhit gigiyenasi va sogʻlom turmush tarzini shakllantirish boʻyicha sanitariya-epidemiologiya xizmati faoliyati bilan bogʻliq masalalarni muvofiqlashtirish;

e) ijtimoiy muhofaza sohasida:

aholining nochor qatlamlarini ijtimoiy muhofaza qilish sohasida davlat siyosati amalga oshirilishini takomillashtirish, fuqarolarning oʻzini oʻzi boshqarish organlarining kam taʼminlangan va yosh oilalarni manzilli ijtimoiy yordam bilan taʼminlashdagi rolini oshirish boʻyicha tizimli va kompleks monitoring olib borish va chora-tadbirlar koʻrish;

demokratik qadriyatlarni, odamlarning huquqlari, erkinliklari va qonuniy manfaatlarini himoya qilish, fuqarolar tomonidan oʻz salohiyatini roʻyobga chiqarish uchun shart-sharoitlar yaratish, ularning ijtimoiy, ijtimoiy-iqtisodiy faolligini va huquqiy madaniyatini oshirish boʻyicha fuqarolik jamiyati institutlarining ijtimoiy sheriklik va jamoat nazoratining taʼsirchan mexanizmini shakllantirish, shuningdek ijtimoiy hayotning turli sohalaridagi hamda katta ijtimoiy ahamiyatga ega boʻlgan boshqa muammolarning eng muhim davlat dasturlarida fuqarolik jamiyati institutlari ishtirokining huquqiy asoslarini takomillashtirish boʻyicha takliflar ishlab chiqish;

aholini ijtimoiy muhofaza qilishga, jamoat tashkilotlari, jamgʻarmalar, boshqa nodavlat notijorat tashkilotlari salohiyatini joylardagi ijtimoiy ahamiyatli muammolarni hal qilishga jalb etish mexanizmlarini ishlab chiqishga yoʻnaltirilgan chora-tadbirlarni amalga oshirish;

davlat tuzilmalari va ijtimoiy tuzilmalarning respublikaga chet eldan tushayotgan muruvvat yordamini manzilli va maqsadli taqsimlashdagi va keyinchalik undan foydalanishning samaradorligi monitoringini olib borishdagi faoliyatini muvofiqlashtirish.

7. Departament oʻziga yuklangan vazifalarni bajarish uchun quyidagi funksiyalarni amalga oshiradi:

oʻz vakolatiga kiradigan masalalar boʻyicha axborotlarni toʻplaydi va umumlashtiradi;

iqtisodiyotning oʻzi mutasaddi boʻlgan tarmoqlarida va hududlarda ishlarning ahvolini oʻrganadi hamda Oʻzbekiston Respublikasi Prezidenti, Oʻzbekiston Respublikasining Bosh vaziri, Oʻzbekiston Respublikasi Bosh vazirining oʻrinbosari uchun tegishli materiallarni tayyorlaydi;

oʻzi mutasaddi boʻlgan tarmoqlarni rivojlantirish, tegishli tarmoqlarda islohotlarni chuqurlashtirish dasturlarini shakllantirish va amalga oshirish monitoringini olib boradi;

Oʻzbekiston Respublikasi qonunlari, Oʻzbekiston Respublikasi Prezidentining farmonlari, qarorlari va farmoyishlari, Vazirlar Mahkamasining qarorlari, Oʻzbekiston Respublikasi Prezidenti, Oʻzbekiston Respublikasining Bosh vaziri va uning oʻrinbosarlari, Vazirlar Mahkamasi Ijro etuvchi apparati boshqaruvchisining topshiriqlari ijrosini nazorat qiladi;

tegishli tarmoqlar boʻyicha tizimlashtirilgan maʼlumotlar bazalari yaratilishi va yuritilishini, ularning muntazam ravishda toʻldirib va yangilab borilishini taʼminlaydi;

Vazirlar Mahkamasining koʻrib chiqishi uchun tahliliy, maʼlumotnoma materiallar va boshqa materiallarni, Oʻzbekiston Respublikasining Bosh vaziri va uning oʻrinbosarlari topshiriqlari loyihalarini tayyorlaydi;

Vazirlar Mahkamasiga kiritilgan Oʻzbekiston Respublikasi qonunlari, Oʻzbekiston Respublikasi Prezidentining farmonlari, qarorlari va farmoyishlari, Vazirlar Mahkamasining qarorlari va farmoyishlari hamda boshqa hujjatlar loyihalari ekspertizasini amalga oshiradi va ularni ishlab chiqadi, ular yuzasidan zarur tahliliy va maʼlumotnoma materiallar tayyorlaydi;

Oʻzbekiston Respublikasi Prezidenti, Oʻzbekiston Respublikasining Bosh vaziri va uning oʻrinbosarlari tomonidan oʻtkaziladigan yigʻilishlarga materiallar tayyorlashda va ularda qabul qilinadigan qarorlarni rasmiylashtirishda qatnashadi;

materiallarning kompleksliligi hamda ularni ishlab chiqish va tayyorlashning sifati, Oʻzbekiston Respublikasi qonunlari, Oʻzbekiston Respublikasi Prezidentining farmonlari, qarorlari va farmoyishlari, Vazirlar Mahkamasining qarorlari, Oʻzbekiston Respublikasi Prezidenti, Oʻzbekiston Respublikasining Bosh vaziri va uning oʻrinbosarlari topshiriqlari loyihalarining davlat va xoʻjalik boshqaruvi manfaatdor organlari, Vazirlar Mahkamasi Ijro etuvchi apparatining boshqa tarkibiy boʻlinmalari bilan kelishilishi uchun javob beradi;

Departament vakolatiga kiruvchi masalalar boʻyicha qonun loyihalari ishlab chiqilishini va belgilangan tartibda Oʻzbekiston Respublikasi Oliy Majlisiga taqdim etilishini tashkil qiladi;

oʻziga yuklangan vazifalarga muvofiq davlat va xoʻjalik boshqaruvining mutasaddilik qilinadigan organlari faoliyatini muvofiqlashtiradi;

oʻz vakolatiga kiruvchi masalalar boʻyicha Hukumatlararo bitimlar loyihalarini tayyorlashda qatnashadi;

Oʻzbekiston Respublikasining Bosh vaziri va uning oʻrinbosarlari boshchilik qiladigan tegishli Hukumat komissiyalari va idoralararo komissiyalar, kengashlar va tashkiliy qoʻmitalar ishlari samaradorligini taʼminlaydi, ular tomonidan qabul qilingan qarorlarning bajarilishini muvofiqlashtiradi va nazorat qiladi;

jismoniy va yuridik shaxslarning murojaatlarini koʻrib chiqadi va ularda qoʻyilgan masalalarni hal etish boʻyicha takliflar tayyorlaydi, ushbu murojaatlarni koʻrib chiqish va chora-tadbirlar koʻrish uchun tegishli davlat va xoʻjalik boshqaruvi organlariga, mahalliy davlat hokimiyati organlariga yuboradi, ularning oʻz vaqtida koʻrib chiqilishini nazorat qiladi, jismoniy shaxslarni va yuridik shaxslarning vakillarini shaxsan qabul qilishni amalga oshiradi;

Departamentga yuklangan boshqa funksiyalarni belgilangan tartibda amalga oshiradi.

8. Departament oʻziga yuklangan vazifalar va funksiyalarni bajarish uchun quyidagi huquqlarga ega:

Vazirlar Mahkamasida koʻrib chiqiladigan masalalarni tahlil qilish va tayyorlash uchun zarur boʻlgan materiallar va maʼlumotlarni Vazirlar Mahkamasi Ijro etuvchi apparatining boshqa tarkibiy boʻlinmalaridan, davlat va xoʻjalik boshqaruvi organlaridan, mahalliy davlat hokimiyati organlaridan, boshqa organlar va tashkilotlardan belgilangan tartibda olish va soʻrash;

davlat va xoʻjalik boshqaruvi organlari, mahalliy davlat hokimiyati organlari, boshqa organlar va tashkilotlar rahbarlari hamda vakillari ishtirokida yigʻilishlar oʻtkazish;

mutasaddilik qilinadigan vazirliklar, davlat qoʻmitalari va idoralar, xoʻjalik boshqaruvi organlarining kollegial organlari majlislarida, Oʻzbekiston Respublikasi Bosh vazirining, Bosh vazir oʻrinbosarining topshirigʻiga binoan esa — davlat boshqa organlarining, nodavlat notijorat va boshqa tashkilotlarning Departament yuritadigan sohaga kiruvchi masalalar boʻyicha oʻtkaziladigan majlislarida va yigʻilishlarida qatnashish;

zarurat boʻlganda, Vazirlar Mahkamasida koʻrib chiqiladigan masalalarni ishlab chiqish uchun davlat va xoʻjalik boshqaruvi organlarining, ilmiy muassasalar va boshqa tashkilotlarning rahbarlari va vakillarini belgilangan tartibda jalb etish, tegishli masalalar boʻyicha vaqtinchalik ishchi guruhlar tashkil etish;

zarurat boʻlganda, “Oʻzbekiston Respublikasi Vazirlar Mahkamasi toʻgʻrisida”gi Oʻzbekiston Respublikasi Qonuni va Vazirlar Mahkamasining Reglamenti talablari buzilgan holda tushayotgan hujjatlarni qaytarib yuborish.

Departamentning zarur materiallarni, maʼlumotlarni taqdim etish, shuningdek Oʻzbekiston Respublikasi qonunlari, Oʻzbekiston Respublikasi Prezidentining farmonlari, qarorlari va farmoyishlari, Vazirlar Mahkamasining qarorlari va boshqa hujjatlar loyihalarini puxta ishlab chiqish boʻyicha talablari, agar Oʻzbekiston Respublikasi Prezidentining, Oʻzbekiston Respublikasi Bosh vazirining, uning oʻrinbosarlarining va Vazirlar Mahkamasi Ijro etuvchi apparati boshqaruvchisining topshiriqlarida bajarishning boshqa muddatlari belgilanmagan boʻlsa, Departament tomonidan belgilangan muddatlarda bajarilishi kerak.

9. Departament:

oʻziga yuklangan vazifalarning zarur darajada va samarali bajarilishi uchun;

Vazirlar Mahkamasiga kiritilgan takliflar va masalalarni ekspert jihatidan sifatli ishlab chiqishning tashkil etilishi uchun;

Oʻzbekiston Respublikasi qonunlarining, Oʻzbekiston Respublikasi Oliy Majlisi qarorlari va boshqa hujjatlarining, Oʻzbekiston Respublikasi Prezidenti farmonlari, qarorlari va farmoyishlarining, Hukumat qarorlari, farmoyishlarining, Vazirlar Mahkamasi rahbariyati topshiriqlarining mutasaddilik qilinadigan idoralar tomonidan oʻz vaqtida va sifatli bajarishning taʼminlanishi uchun;

Vazirlar Mahkamasining “Ijro intizomini mustahkamlash chora-tadbirlari toʻgʻrisida” 1999-yil 12-yanvardagi 12-son qaroriga muvofiq ijro intizomi mustahkamlanishi uchun javob beradi.

10. Departamentning tuzilmasiga quyidagilar kiradi:

ilm-fanni rivojlantirish, taʼlim va yoshlar siyosati shuʼbasi;

sogʻliqni saqlashni rivojlantirish va ijtimoiy muhofaza shuʼbasi;

madaniyat va sportni rivojlantirish shuʼbasi.

Har bir shuʼba tarkibiga shuʼba mudiri, bosh va yetakchi mutaxassislar kiradi.

Departament tuzilmasi Oʻzbekiston Respublikasi Prezidenti tomonidan yoki u bilan kelishgan holda Oʻzbekiston Respublikasi Vazirlar Mahkamasi tomonidan tasdiqlanadi.

11. Departament ishlariga Departament mudiri rahbarlik qiladi.

12. Departament mudiri, shuʼba mudirlari va mutaxassislar belgilangan tartibda lavozimga tayinlanadi va lavozimdan ozod qilinadi.

13. Departament ishlari “Oʻzbekiston Respublikasi Vazirlar Mahkamasi toʻgʻrisida”gi Oʻzbekiston Respublikasi Qonuniga, Vazirlar Mahkamasining Reglamentiga, ushbu Nizomga, Vazirlar Mahkamasi Ijro etuvchi apparatida ish yuritish boʻyicha Yoʻriqnomaga, Oʻzbekiston Respublikasi Prezidentining, Oʻzbekiston Respublikasi Bosh vazirining, uning oʻrinbosarlarining topshiriqlariga, Vazirlar Mahkamasi Ijro etuvchi apparati boshqaruvchisining buyruqlari va topshiriqlariga muvofiq, shuningdek Vazirlar Mahkamasining ish rejalari, Departamentning ish rejalari, mudir va mutaxassislarning shaxsiy ish rejalari asosida tashkil etiladi.

Departamentning ish rejasi Kompleksning Oʻzbekiston Respublikasi Vazirlar Mahkamasi Prezidiumi tomonidan tasdiqlangan ish rejasi asosida shakllantiriladi.

Departamentning ish rejasi va Departament mudirining shaxsiy ish rejasi Vazirlar Mahkamasi Ijro etuvchi apparati boshqaruvchisi bilan kelishiladi va Oʻzbekiston Respublikasi Bosh vazirining oʻrinbosari tomonidan tasdiqlanadi.

Shuʼbalar mudirlari va mutaxassislarning shaxsiy ish rejalari Oʻzbekiston Respublikasi Bosh vazirining tegishli oʻrinbosari bilan kelishiladi va Departament mudiri tomonidan tasdiqlanadi.

Departamentning Oʻzbekiston Respublikasi qonunlari, Oʻzbekiston Respublikasi Prezidentining farmonlari, qarorlari va farmoyishlari, Hukumat qarorlari amalga oshirilishi tizimli monitoringini taʼminlash boʻyicha faoliyati mutasaddilik qilinadigan davlat va xoʻjalik boshqaruvi organlarida, mahalliy davlat hokimiyati organlarida Vazirlar Mahkamasining ish rejasiga muvofiq kompleks oʻrganishlarni oʻtkazish yoʻli bilan, shuningdek Oʻzbekiston Respublikasi Bosh vazirining, Oʻzbekiston Respublikasi Bosh vaziri oʻrinbosarining topshiriqlariga muvofiq, Vazirlar Mahkamasi, Vazirlar Mahkamasi Prezidiumi, Kompleks majlislarida hisobotlarni eshitish orqali tashkil etiladi.

14. Departament mudiri:

Departamentga bevosita rahbarlikni amalga oshiradi, shuʼba mudirlari va mutaxassislar ishlarini tashkil qiladi hamda Departamentga yuklangan vazifalar va funksiyalarning bajarilishi uchun shaxsan javob beradi;

Oʻzbekiston Respublikasi Vazirlar Mahkamasiga kiritilgan Departament mutasaddilik qiladigan sohaga kiruvchi masalalar boʻyicha takliflarni va hujjatlar loyihalarini koʻrib chiqishda davlat manfaatlariga qatʼiy rioya qilinishini taʼminlaydi, ularning ekspert jihatdan puxta ishlab chiqilishini tashkil qiladi va tayyorlangan hujjatlar loyihalariga viza qoʻyadi. Tegishli hujjatlar qabul qilingandan keyin ularning bajarilishi yuzasidan tizimli nazoratni taʼminlaydi;

respublikaning tegishli tarmoqlari, sohalari va hududlarida iqtisodiy islohotlarning ahvoli va natijadorligi toʻgʻrisida tizimli monitoring tashkil etilishini hamda maʼlumotlar banki shakllantirilishini, shuningdek muammoli masalalarni hal etish, respublika tarmoqlari va hududlarini rivojlantirishning istiqbolli vazifalarini amalga oshirish boʻyicha amaliy chora-tadbirlar ishlab chiqilishi va bajarilishini taʼminlaydi;

Departamentning tasdiqlangan tuzilmasi va shtatlar jadvaliga muvofiq lavozimga tavsiya etilayotgan nomzodlarning kasbiy darajasi va ish malakasini oshirish, ularni ragʻbatlantirish va jazolash choralari boʻyicha takliflarni puxta ishlab chiqadi hamda Ijro etuvchi apparat boshqaruvchisi bilan kelishgan holda Kompleks rahbariga koʻrib chiqish uchun kiritadi;

mutaxassislar oʻrtasida vazifalarning taqsimlanishini, shuningdek Kompleksning yarim yillik uchun ish rejasi loyihasini ishlab chiqadi va Kompleks rahbariga tasdiqlash uchun kiritadi, Departament shuʼba mudirlari va mutaxassislarining ish rejalarini tasdiqlaydi;

Oʻzbekiston Respublikasi Vazirlar Mahkamasiga tushgan respublika Hukumati qarorini talab qilmaydigan hujjatlarni tegishli davlat va xoʻjalik boshqaruvi organlari, mahalliy ijro etuvchi hokimiyat organlariga koʻrib chiqish uchun yuboradi;

Oʻzbekiston Respublikasi Vazirlar Mahkamasining va uning Prezidiumi majlislarida, Oʻzbekiston Respublikasining Bosh vaziri, uning oʻrinbosarlari oʻtkazadigan yigʻilishlarda, Hukumat komissiyalari va idoralararo komissiyalar, kengashlar va tashkiliy qoʻmitalar majlislarida, Vazirlar Mahkamasining Ijro etuvchi apparati boshqaruvchisi tomonidan Departament yuritadigan sohaga kiruvchi masalalar boʻyicha oʻtkaziladigan yigʻilishlarda qatnashadi;

Ijro etuvchi apparatda amalda boʻlgan Yoʻriqnomaga muvofiq ish yuritishni taʼminlaydi;

chiquvchi xat-xabarlarni imzolaydi.

15. Departament mudiri vaqtinchalik boʻlmaganda uning vazifasini Oʻzbekiston Respublikasi Bosh vazirining tegishli oʻrinbosari tomonidan belgilanadigan Departamentning shuʼba mudirlaridan biri bajaradi.

16. Shuʼba mudiri:

shuʼba mutaxassislari ishlarini muvofiqlashtiradi va shuʼbaga yuklangan vazifalar va funksiyalarning bajarilishi uchun shaxsan javob beradi;

shuʼbaga birkitilgan masalalar boʻyicha maʼlumotnoma, tahliliy, statistik va boshqa materiallar, shuningdek qonun hujjatlari va boshqa normativ-huquqiy hujjatlar loyihalarining mutaxassislar tomonidan sifatli va oʻz vaqtida tayyorlanishini tashkil etadi;

qabul qilingan qonunlar, Oʻzbekiston Respublikasi Prezidentining farmonlari, qarorlari va farmoyishlarini, Hukumat qarorlarini amalga oshirish boʻyicha mutaxassislar tomonidan tashkiliy chora-tadbirlar yoki nazorat rejalari tayyorlanishini, ularning Oʻzbekiston Respublikasi Bosh vaziri yoki uning oʻrinbosari tomonidan tasdiqlanishini muvofiqlashtiradi, erishilgan natijalarning monitoringini doimiy ravishda taʼminlaydi;

masalalarni oʻrganib chiqishni muvofiqlashtirishni va tegishli davr uchun mutaxassislar, Departament va Vazirlar Mahkamasining tasdiqlangan ish rejalaridagi chora-tadbirlarning amalga oshirilishini taʼminlaydi, tanqidiy tahlil asosida tegishli takliflarni koʻrib chiqish uchun Departament mudiriga va Oʻzbekiston Respublikasi Bosh vazirining oʻrinbosariga kiritadi;

iqtisodiyotning tegishli tarmoqlari, sohalari va sektorlari boʻyicha turkumlangan maʼlumotlar bazasining mutaxassislar tomonidan yaratilishi va yuritilishi yuzasidan nazoratni amalga oshiradi;

maʼlumotnoma materiallar va hujjatlar loyihalari toʻgʻrisida Departament mudiriga, shuningdek belgilangan tartibda Oʻzbekiston Respublikasi Bosh vaziriga, Bosh vazirning oʻrinbosariga, Ijro etuvchi apparat boshqaruvchisiga axborot beradi;

islohotlarni chuqurlashtirish, shuningdek Departament vakolatiga kiruvchi masalalar boʻyicha mavjud kamchiliklarni bartaraf etish yuzasidan takliflar ishlab chiqilishini tashkil qiladi va ularni Departament mudiriga taqdim etadi;

Oʻzbekiston Respublikasi Vazirlar Mahkamasi va uning Prezidiumi majlislarida, Oʻzbekiston Respublikasining Bosh vaziri, uning oʻrinbosarlari oʻtkazadigan yigʻilishlarda, Hukumat komissiyalari hamda idoralararo komissiyalar, kengashlar va tashkiliy qoʻmitalar majlislarida, shuʼba yuritadigan sohaga kiradigan masalalar boʻyicha Ijro etuvchi apparat boshqaruvchisi oʻtkazadigan yigʻilishlarda qatnashadi;

Departament mudiri topshirigʻiga binoan chiquvchi xat-xabarlarni imzolaydi;

davlat va xoʻjalik boshqaruvi organlari, boshqa organlar va tashkilotlar rahbarlari va vakillari, olimlar va mutaxassislar bilan Vazirlar Mahkamasi va uning Prezidiumi majlislarida, Oʻzbekiston Respublikasi Prezidenti, Oʻzbekiston Respublikasining Bosh vaziri va uning oʻrinbosarlari oʻtkazadigan yigʻilishlarda koʻrib chiqishga materiallar tayyorlash uchun oʻziga birkitilgan masalalar boʻyicha yigʻilishlar oʻtkazadi, shuningdek ijrodagi Oʻzbekiston Respublikasi qonunlari, Oʻzbekiston Respublikasi Prezidenti farmonlari, qarorlari va farmoyishlari, Hukumat qarorlari loyihalarini ularni tayyorlash maqsadida muhokama qiladi;

vazifalar taqsimotiga muvofiq boshqa funksiyalarni amalga oshiradi.

17. Departamentning bosh mutaxassisi:

oʻz funksional vazifalariga muvofiq takliflarning va hujjatlar loyihalarining sifati, ishonchliligi va oʻz vaqtida tayyorlanishi, topshiriqlar va qabul qilingan hujjatlarning bajarilishi yuzasidan nazoratning taʼminlanishi uchun shaxsan javob beradi;

davlat va xoʻjalik boshqaruvining, mahalliy ijro etuvchi hokimiyatning tegishli organlari, korxonalar, muassasalar va tashkilotlar tomonidan taqdim etilgan takliflarni va hujjatlar loyihalarini har tomonlama tahlil qiladi, ular yuzasidan zarur tahliliy materiallarni va ekspert takliflarni tayyorlaydi, shuningdek ularning Oʻzbekiston Respublikasi Vazirlar Mahkamasi Reglamentiga muvofiq zarur kelishuvlarini taʼminlaydi;

materiallar va hujjatlarning loyihalari toʻgʻrisida shuʼba mudiriga, Departament mudiriga, shuningdek belgilangan tartibda Oʻzbekiston Respublikasi Bosh vazirining oʻrinbosariga va Ijro etuvchi apparat boshqaruvchisiga axborot beradi;

qabul qilingan hujjatlar boʻyicha nazorat rejasini yoki tashkiliy chora-tadbirlarni ishlab chiqadi va belgilangan tartibda tasdiqlash uchun kiritadi, Oʻzbekiston Respublikasi qonunlarining, Oʻzbekiston Respublikasi Prezidenti farmonlari, qarorlari va farmoyishlarining, Vazirlar Mahkamasi qarorlarining, Oʻzbekiston Respublikasi Prezidenti, Oʻzbekiston Respublikasining Bosh vaziri hamda uning oʻrinbosarlarining iqtisodiyotning tegishli tarmoqlari va sohalari yoki respublika hududlari boʻyicha topshiriqlarining davlat va xoʻjalik boshqaruvi organlari, mahalliy ijro etuvchi hokimiyat organlari tomonidan bajarilishi yuzasidan tizimli nazoratni amalga oshiradi;

tegishli funksional masalalar va hujjatlar boʻyicha maʼlumotlarning turkumlangan bazasini shakllantirishni va yuritishni, uning muntazam ravishda toʻldirib va yangilab borilishini tashkil qiladi;

tegishli davlat va xoʻjalik boshqaruvi organlari, mahalliy ijro etuvchi hokimiyat organlari markaziy apparatlari (iqtisodiy, moliyaviy va huquqiy xizmatlari)ning tarkibiy boʻlinmalari ishlarining ahvoli va natijadorligini doimiy ravishda oʻrganib boradi, ularning kollegial organlari majlislarida qatnashadi, ularning faoliyati samaradorligini oshirish boʻyicha takliflar kiritadi;

oʻziga birkitilgan masalalar boʻyicha oʻtkaziladigan Oʻzbekiston Respublikasi Vazirlar Mahkamasi va uning Prezidiumi majlislarida, Oʻzbekiston Respublikasining Bosh vaziri va uning oʻrinbosarlari oʻtkazadigan yigʻilishlarda, Hukumat komissiyalari va idoralararo komissiyalar hamda kengashlar majlislarida, Ijro etuvchi apparat boshqaruvchisi oʻtkazadigan yigʻilishlarda belgilangan tartibda qatnashadi;

Vazirlar Mahkamasi va uning Prezidiumi majlislarida, Oʻzbekiston Respublikasi Prezidenti, Oʻzbekiston Respublikasining Bosh vaziri va uning oʻrinbosarlari oʻtkazadigan yigʻilishlarda koʻrib chiqishga materiallar tayyorlash uchun, shuningdek ijrodagi Oʻzbekiston Respublikasi qonunlari, Oʻzbekiston Respublikasi Prezidentining farmonlari, qarorlari va farmoyishlari, Hukumat qarorlari loyihalarini ularni tayyorlash maqsadida muhokama qilish uchun oʻziga birkitilgan masalalar boʻyicha davlat va xoʻjalik boshqaruvi organlari, boshqa organlar va tashkilotlar vakillari, olimlar va mutaxassislar bilan yigʻilishlar oʻtkazadi;

tegishli masalalar boʻyicha yetakchi mutaxassisning faoliyatini nazorat qiladi;

vazifalar taqsimotiga muvofiq boshqa funksiyalarni amalga oshiradi.

18. Departamentning yetakchi mutaxassisi:

oʻz funksional vazifalariga muvofiq takliflarning va hujjatlar loyihalarining sifati, ishonchliligi va oʻz vaqtida tayyorlanishi, topshiriqlar va qabul qilingan hujjatlarning bajarilishi yuzasidan nazoratning taʼminlanishi uchun shaxsan javob beradi;

tegishli davlat va xoʻjalik boshqaruvi organlari, mahalliy ijro etuvchi hokimiyat organlari, korxonalar, muassasalar va tashkilotlar tomonidan taqdim etilgan takliflarni va hujjatlar loyihalarini har tomonlama tahlil qiladi, ular yuzasidan zarur tahliliy materiallarni va ekspert takliflarni tayyorlaydi, shuningdek ularning Oʻzbekiston Respublikasi Vazirlar Mahkamasi Reglamentiga muvofiq zarur kelishuvlarini taʼminlaydi;

materiallar va hujjatlarning loyihalari toʻgʻrisida Departament mudiriga, shuningdek belgilangan tartibda — Oʻzbekiston Respublikasi Bosh vazirining oʻrinbosariga, Ijro etuvchi apparat boshqaruvchisiga axborot beradi;

qabul qilingan hujjatlar boʻyicha nazorat rejasini yoki tashkiliy chora-tadbirlarni ishlab chiqadi va belgilangan tartibda tasdiqlash uchun kiritadi, Oʻzbekiston Respublikasi qonunlarining, Oʻzbekiston Respublikasi Prezidenti farmonlari, qarorlari va farmoyishlarining, Vazirlar Mahkamasi qarorlarining, Oʻzbekiston Respublikasi Prezidenti, Oʻzbekiston Respublikasining Bosh vaziri hamda uning oʻrinbosarlarining iqtisodiyotning tegishli tarmoqlari va sohalari yoki respublika hududlari boʻyicha topshiriqlarining davlat va xoʻjalik boshqaruvi organlari, mahalliy ijro etuvchi hokimiyat organlari tomonidan bajarilishi yuzasidan tizimli nazoratni amalga oshiradi;

tegishli funksional masalalar va hujjatlar boʻyicha maʼlumotlarning turkumlangan bazasini shakllantirishni va yuritishni, uning muntazam ravishda yangilab borilishini tashkil qiladi;

tegishli davlat va xoʻjalik boshqaruvi organlari, mahalliy ijro etuvchi hokimiyat organlari markaziy apparatlari (iqtisodiy, moliyaviy va huquqiy xizmatlari)ning tarkibiy boʻlinmalari ishlarining ahvoli va natijadorligini doimiy ravishda oʻrganib boradi, ular faoliyatining samaradorligini oshirish boʻyicha takliflar kiritadi.

oʻziga birkitilgan masalalar boʻyicha oʻtkaziladigan Oʻzbekiston Respublikasi Vazirlar Mahkamasi va uning Prezidiumi majlislarida, Oʻzbekiston Respublikasining Bosh vaziri va uning oʻrinbosarlari oʻtkazadigan yigʻilishlarda, Hukumat komissiyalari va idoralararo komissiyalar hamda kengashlar majlislarida, Ijro etuvchi apparat boshqaruvchisi oʻtkazadigan yigʻilishlarda belgilangan tartibda qatnashadi;

bosh mutaxassis bilan kelishgan holda davlat va xoʻjalik boshqaruvi organlari, boshqa organlar va tashkilotlar vakillari, olimlar va mutaxassislar bilan ijrodagi Oʻzbekiston Respublikasi qonunlari, Oʻzbekiston Respublikasi Prezidentining farmonlari, qarorlari va farmoyishlari, Hukumat qarorlarining loyihalarini ularni tayyorlash maqsadida muhokama qiladi;

vazifalar taqsimotiga muvofiq boshqa funksiyalarni amalga oshiradi.

19. Inspektor Departamentda ish yuritishni amalga oshiradi, hujjatlarning oʻtishini nazorat qiladi, hujjatlar yigʻmajildlarining tayyorlanishini va arxivda saqlashga oʻz vaqtida berilishini taʼminlaydi, oʻziga yuklangan boshqa funksiyalarni bajaradi.